Tej Ntsiab Cai txog Kev Txhawb Pab, Cuaj Hlis Ntuj 2019

Tus Ntsuj Plig Yeej (Yuav) Pab Koj Txhawb Pab Lwm Tus

Lub pov thawj hwj txoj kev txib mus txhawb pab, uas muab rau cov txiv neej thiab cov poj niam huv tib si, los ua rau lawv muaj cai txais kev tshwm sim.

ministering

Tej duab los ntawm Getty Images

Txoj kev hu mus txhawb pab thiab hlub ib yam li tus Cawm Seej hlub los tej lub sij hawm yog ib qho nyuaj heev—qhov tseem ceeb yog thaum peb yuav tsum sib raug zoo nrog cov uas peb tsis tshua paub zoo. Vim muaj ntau txoj kev mus txhawb pab, peb xav paub txog tej yam zoo tshaj plaws kom sib raug zoo nrog cov uas peb txais kev txib mus pab.

Peb tsis tas xav ntev mus ntxiv vim tus Vaj Ntsuj Plig Dawb Huv coj tau peb kev thaum peb rau siab ua tiag tiag.

Muam Bonnie H. Cordon, Koom Haum Ntxhais Hluas tus Tuam Thawj Tswj Hwm hais tias, “Nej txoj hauj lwm ua neeg txhawb pab yog los saum ntuj ceeb tsheej los. Rau siab thov kom thiaj yuav paub tias yuav tsum pab lawv li cas.”¹

Thaum peb nrhiav kev pab ib yam li tus Cawm Seej ua, tus Ntsuj Plig uas coj Nws kev yeej yuav coj peb kev zoo ib yam li ntawd. Qhov no yeej muaj tseeb thaum peb ua raws li kev txib ua hauj lwm, xws li kev txhawb pab, vim tus npisov cov yawm sij pov thawj hwj muaj txoj cai txib. Nov yog rau lub tswv yim rau kev mus txhawb pab nrog tus Ntsuj Plig.

Kuv Yuav Ua Li Cas Kom Muaj tus Ntsuj Plig Thaum Txhawb Pab Lwm Tus?

• Thov Vajtswv Coj Leej Txiv Saum Ntuj Ceeb Tsheej xav kom peb sib txuas lus nrog Nws thaum peb thov Vajtswv. Kev thov Vajtswv tsis ua rau peb txav los nyob ze Nws xwb, tiam sis kev thov Vajtswv kuj ua rau peb “txais tau cov koob hmoov uas Vajtswv kam pub rau peb tiam sis nyob ntawm seb peb puas thov kom tau.”² Muam Cordon hais tias, “Yam li thaum peb thov Vajtswv kom peb to taub lawv lub siab zoo me ntsis, kuv hais lus tim khawv tias Leej Txiv Saum Ntuj Ceeb Tsheej yuav coj peb kev thiab Nws tus Ntsuj Plig yuav nrog nraim peb mus.”³

• Tsis Txhob Tos Kom Txais Kev Tshoov Siab. Cia li ua xwb. Cia li “mob siab ua tej yam zoo” (Lus Qhuab Qhia thiab Kev Khi Lus 58:27) thiab koj yuav kawm tias tus Ntsuj Plig yuav coj koj kev thiab pab koj. Thawj Tswj Hwm Dallin H. Oaks, tus Pab Cuam thib Ib hauv Thawj Pawg Thawj Tswj Hwm hais tias “Qhov uas peb cia li mus tom ntej pab lwm tus thiab ua hauj lwm yeej yog ib txoj kev rau peb ua neeg tsim nyog txais kev tshwm sim. Thaum kuv kawm vaj lug kub kuv pom tias kev tshwm sim feem ntau yog hais rau Vajtswv cov me nyuam thaum lawv tab tom ua tej yam, tsis yog thaum lawv nyob twj ywm hauv lawv lub tsev tos tus Tswv qhia lawv txog yam thib ib uas lawv yuav tsum ua.”⁴

Kuv Yuav Ua Li Cas Ho Paub Kuv Txais Kev Tshoov Siab Mus Txhawb Pab?

• Ua Li Maumoos Qhia. Peb tsis tas nyob twj ywm xwb thiab xav mus xav los txog qhov uas peb txoj kev xav puas yog kev tshoov siab. Peb tsis tas ua li ntawd vim peb muaj Maumoos txoj kev yooj yim paub: Yog koj muaj ib txoj kev xav uas tshoov koj lub siab kom ua zoo thiab kom ntseeg los sis pab lwm tus ntseeg Khetos, ces koj yuav paub tias yog los ntawm Vajtswv (saib Maulaunais 7:16).

• Tsis Txhob Txhawj. Txwj Laug Jeffrey R. Holland ntawm Pawg Kaum Ob tug Thwj Tim hais tias, “Cia li dhia hauv lub pas dej thiab ua luam dej xwb. Cia li mus rau cov uas xav tau kev pab. Tsis txhob tos vim nej xav seb nej yuav tsum ua luam dej ntxeev tiaj los sis ua luam dej li ib tug dev. Yog peb ua raws li cov ntsiab cai uas nws qhia rau peb, coj raws nraim li cov yawm sij pov thawj hwj, thiab ua kom tus Vaj Ntsuj Plig Dawb Huv coj peb txoj hau kev, peb yeej ua tau.”⁵

Txoj Kev Zoo Tshaj Ua Raws Li Kev Tshoov Siab Yog Dab Tsi?

• Tam Sim Ntawd. Muam Susan Bednar (tus poj niam ntawm Txwj Laug David A. Bednar ntawm Pawg Kaum Ob tug Thwj Tim) yeej coj yam ntxwv zoo txog kev ua raws li kev tshoov siab. Txwj Laug Bednar qhia tias, tom qab nws tus poj niam thov Vajtswv “kom pom tau ntawm sab ntsuj plig pom cov uas xav tau kev pab,” nws saib ncig hauv ib pawg ntseeg thiab feem ntau yuav “txais kev tshoov siab kom mus xyuas los yog hu ib tug neeg. “Thiab thaum Muam Bednar txais kev tshoov siab li no, nws ua raws nraim li qhov uas tshoov nws lub siab qhia tam sim ntawd. Feem ntau thaum twg hais ‘amees’ tom qab thov Vajtswv xaus tag lawm, nws yuav mus hais lus nrog ib tug tub hluas los sis ntxhais hluas los yog mus khawm ib tug poj niam, los sis, thaum nws rov qab mus tsev, mus kiag hu xov tooj.”⁶

• Ua Siab Loj. Qhov uas peb ntshai kev xyeej thiab xav tias peb txaj muag, peb ua tsis taus, los sis peb tab kaum lwm tus yuav ua rau peb tsis ua raws li kev tshoov siab mus txhawb pab lwm tus. Txwj Laug Gerrit W. Gong ntawm Pawg Kaum Ob tug Thwj Tim hais tias, “Peb txhua tus muaj tej lub sij hawm thaum peb xav tias peb tsis zoo, tsis paub zoo, thiab peb tsis tsim nyog. Tiam sis thaum peb rau siab hlub Vajtswv thiab txhawb pab rau peb cov neeg zej zog, peb yuav paub tias Vajtswv hlub peb thiab txais kev tshoov siab tshiab rau peb lub neej kom ua neeg dawb huv ntxiv.”⁷

  Ib tug kwv tij qhia tias nws tsis tshua paub yuav hais li cas rau tus txiv neej uas nws tus poj niam tau sim txo nws tus kheej txoj sia. Tiam sis thaum kawg nws thov tus txiv neej mus noj su. Nws hais tias, “Thaum kuv hais rau nws hais tias, ‘Koj tus poj niam tau sim txo nws txoj sia. Tej zaum koj nyuaj siab heev. Koj puas xav sib tham txog qhov no?’ nws cia li pib quaj. Wb tau sib tham thiab ntaus kev phooj ywg sai sai.”⁸

© 2019 by Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Akiv: 6/18. Pub txhais ua lus Hmoob: 6/18. Kev txhais Ministering Principles, September 2019. Hmong. 15770 295

Lus Cim

1. Bonnie H. Cordon, “Ua ib tug Neeg Yug Yaj,” Liahona, Kaum Ib Hlis Ntuj 2018, 76.

2. Bible Dictionary, “Prayer.”

3. Bonnie H. Cordon, “Ua ib tug Neeg Yug Yaj,” 76.

4. Dallin H. Oaks, “In His Own Time, in His Own Way,” Liahona, Yim Hli Ntuj 2013, 24.

5. Jeffrey R. Holland, “Txhawb Pab Los ntawm Kev Rov Qab Sib Raug Zoo,” Liahona, Kaum Ib Hlis Ntuj 2018, 77.

6. David A. Bednar, “Quick to Observe,” Liahona, Kaum Ob Hlis Ntuj 2006, 17.

7. Gerrit W. Gong, “Peb Hluav Taws ntawm Kev Ntseeg,” Liahona, Kaum Ib Hlis Ntuj 2018, 42.

8. Saib Bonnie H. Cordon, “Ua ib tug Neeg Yug Yaj,” 76.

Tus Cawm Seej tus Yam Ntxwv

Tus Cawm Seej tau npaj txhij ua Nws cov lus qhuab qhia. “Vajtswv twb pub Vaj Ntsuj Plig tus Dawb Huv thiab pub hwj chim rau Yexus tus uas yog neeg Naxales lawm,” ces Khetos twb “mus thoob plaws txhua qhov chaw, nws ua hauj lwm zoo” (Tes Hauj Lwm 10:38). Nws “puv npo [tus] Vaj Ntsuj Plig Dawb Huv” thiab “tus Vaj Ntsuj Plig coj nws mus” ntau zaus (Lukas 4:1). Khetos yeej mus ua zoo ua ntej Vajtswv muab tus Vaj Ntsuj Plig Dawb Huv rau nws, tiam sis qhov uas Nws txais tus Vaj Ntsuj Plig Dawb Huv thiab muaj cai txais kev tshoov siab yeej yog ib feem tseem ceeb ntawm Nws txoj kev mus qhuab qhia—ib yam li yog ib feem tseem ceeb ntawm peb txoj kev mus txhawb pab.

Kev Caw Ua tej Yam

Thaum koj mus txhawb pab lwm tus txhua hnub, cia li thov Vajtswv kom txais tau thiab ua raws li tus Vaj Ntsuj Plig Dawb Huv tej kev tshoov siab. Nco ntsoov tias Leej Txiv Saum Ntuj Ceeb Tsheej yuav foom koob hmoov rau koj thiab cov uas koj txhawb pab thaum koj ua li ntawd!