Nongonongen Iamwir, October 2019
Mi Tufich Ka Misini Ei Kinikinin Iamwir mi Auchea?
Wewen ach sipwe iamwir ngeni aramas pwe sipwe “fiti ekkewe mi pwapwa non ar pwapwa” nenne chok ren wewen pwe sipwe “fiti ekkewe mi kechiw non ar kechiw” (Rome 12:15).
Sasing seni Augusto Zambonato
Nupwen sia ekkieki usun wisach iamwir, mi mecheres pwe sipwe ekkieki usun ach sipwe anisi ekkewe mi osupwang. Sia kapas usun foneni atake fan itan ewe fefin mi mano punuwan, amongoni ekkewe mi samau, are niffang ngeni ekkewe mi weires. Sia chechemeni kapasen Paul pwe sipwe “fiti ekkewe mi kechiw non ar kechiw,” nge sise pwan chechemeni sipwe nennengeni ewe aewin kinikinin ena wokisin—pwe sipwe “fiti ekkewe mi pwapwa non ar pwapwa”? (Rome 12:15). Fiti ekkewe sia iamwir ngeni non ar pwapwa—ikamwo wewen ena pwe sipwe pwapwa non ar kuna are anisi ir ne kuna pwapwa non fansoun weires—mi ew kinikinin iamwir non napanapan ewe Chon Angasano mi auchea.
Ikkei mei wor unungat mettoch mi tongeni anikich (pwan ew kesapw fori) ren ach sia nennengeni sipwe tumunuochu met mi murinno minne Kot mi awora non manauach.
1. Apareni
Bonnie H. Cordon, Ewe Presitenin Ekkewe Fopun Unusan, a anisikich ne weweiti pwe mi auchea sipwe kuna ekkewe sia iamwir ngeni—esap chok ar weires me osukosuk nge kuna ar pechekun, nipwakoch, me kuna pwan. I a apasa pwe mi auchea sipwe “nour ketiweno, emon chon peni, me emon chon eteneki nonomur me tumunur non ar anean me ar mochen.”1
Non ewe tuttunnapen ekkewe siip me sike, ewe Chon Amanau a apasa pwe ekkewe minne repwe uta peniemwanin repwe eis: “Samol, inet am aua kunok pwe ka echik nge am oua amongonuk, are ka kaka nge am oua aunuk?
“Pwan inet am oua kunok pwe en emon wasona nge am oua etiwok?” (Matthew 25:37–38).
“Mwongei me pwi kana, ewe ouwonamen fos ina kuna,” Sister Cordon a apasa. “Ekkewe aramas mi pung ra kuna ekkewe ir mi osupwang pun ra mamasa me kuna. Kich sia tongeni anenenoi mesach ach sipwe aninis me ekinamwei, ach sipwe fori apwapwan me pwan onotan.”2
2. Kuta Kofichin Apwapwa
Sipwe apwapwa ren ar kuna feioch watte pwan kukkun. Ese nifinifin ika pwe emon a pworacho ngeni kanser are a pworacho ngeni ew mufesen, kuna ew angang minafo are kuna efoch suus mi poutuno, manau ew maram mwirin emon mi achengicheng a ma seni are emon a manau ew wiik ese ani suke.
Kokori ren apwapwa, tinano echo taropwe, are panieno ngeni mongon neanowas. Ren ach sia pwapwa fengen ren ach kewe feioch, manau non tipekinsiou, me apwapwa ren ekkewe feiochun me kunan aramas, “epwe wor [ach] apwapwa non pwapwan pwich kewe” (Alma 30:34).
3. Kuna Poun ewe Samon
Fan ekkoch ach sia pwapwa ren aramas a wewen pwe sipwe anisi ir pwe repwe kuna ar pwisin tufichin repwe pwapwa—ikamwo met sokkun weires are apwapwa mi tonong manauach. Ewe ennet mi mecheres ina pwe Samach won Nang mi apareni kich me a monata an epwe ekiekicheta mi tongeni esinepato pwapwa mi murinno.
En mi tongeni anisi aramas pwe repwe kuna poun ewe Samon non manauer seni om ka apworausa ifa usun ka kuna non manauom. Kopwe tipetekison pwe kopwe tufichin apworausa ifa usun Samach won Nang a anisuk non om osukosuk. Ei kapasen pwarata mi tongeni anisi aramas ne esinna me afanni ifa usun I a pwan anisi ir (nengeni Mosaia 24:14).
4. Kosap Omochu om Tufichin Apwapwa
Osupwangan, fan ekkoch sia omochu ach pwisin tufichin apwapwa ren aramas, naman nupwen sia mefi tipefesin usun met sia tongeni ani nifang are nonnomun manauach. Amwo sipwe kuna pwapwa non pwapwan pwan emon, nge sia fen tupeno ren osukosukan mochenia. Me usun chok met Elter Quentin L. Cook seni ewe Mwichen Engon me Ruemon Aposel a aitikich: “Ach mocheniaiti feiochun emon epwe chok osuno pwapwa. Sise tongeni kinisou me mwara non fan ew chok.”3
“Ifa usun sia tongeni pworacho ngeni ei osukosuk mi chok fifis non napangeni manauan meinisin?“ Elter Jeffrey R. Holland seni ewe Mwichen Engon me Ruemon Aposel a eis. “… Sia tongeni anneani ach kewe feioch meinisin me sia tongeni pwapwa ren kunan ekkoch. Amwararan, sia tongeni anisi aramas, ewe taison netipach mi napanap.”4 Amwo sise mochenia, sipwe fen ingeiti ekkewe sia iamwir ngeni. Kopwe fangoch ne apworausa met ka kinisou ngeni ir pwan ar famini ren.
Usun met Paul a achema ngeni kich, meinisin kich kinikinin ewe inisin Kraist, me nupwen “och kinikin epwe ningeno, iwe ekkewe ekkoch kinikin repwe fiti non an pwapwa” (1 Corinth 12:26). Ren an Samach won Nang aninnis ngeni kich, sia tongeni apareni mokutukutun ekkoch, apwapwa ren kunan watte pwan kukkun, anisir ne esinna netipan ewe Samon, me pworacho ngeni mefian mochenia pwe sipwe tongeni wesewesen apwapwa fengen non ekkewe feiochun, nipwakochun, me pwapwan ekkoch.
© 2019 seni Intellectual Reserve, Inc. All rights reserved. A för non Amerika. Kapungunon non fosun Merika: 6/18. Kapungunon chiakun: 6/18. Chiakun Ministering Principles, October 2019. Chuukese. 15771 901