Osisechakl er a Odingel, Ongeteruich el Buil 2019

Kau ke olngesonges a Ikal Meklou a Ultutlel Telengtengil a Odingel?

A oldingel a “oldeu el obengterir a re dmeu a rengrir” el kmal di uaisei el “delangel lobengterir a re lmangel” (Romans 12:15).

Sel domdasu el kirel a oldingel, eng beot el bo domdasu er tirke el tir a ousbech a ngesou. Ke de mesaod el kirel a olngeseu er a sersel a melakl dil, olab a belsilel a smecher el morng, malechub e kede merous el mora metacherbeserir. Kede dobedebekii a osisecheklel a Paulus el mo “lmangel lobengterir a re lmangel,” engdi kid kede ungil mesa selkotel techetechel tial bades—el mo “oldeu el obengterir a re dmeu a rengrir”? (Romans 12:15). Oldeu lobengterir a doldingel er tir—a locha belkul a mo outkeu el kirel a klungiaol mlo er tir malechub e kede olngeseu er tir el metik a deureng er a chelesel aikel chetituokel el klebesei er tir—a klou a ultutelel el telengtengil a oldingel el diua Osobel.

Aikakid aikel kldei el uldasu el sebechel lolengeseu (ma imong el dolechib er kid ngii) sel bo dungil lomtab aikel ulngil tekoi el Dios a melechang er a chelsel a klengar er kid.

1. Bom Kerekikl

A Bonnie H. Cordon, el Young Women General President, a ngosukid el mo ungil medengei el kmo ngkired el kmal mesterir tirkel doldingel er tir—el mes a diak el dil chelngelir ma ringel ng dirrek el klisichir, duch, me a klungiaol lolab. Ng dilu el kmo ng kirred el mo “mesisiich e ungil lorrenges—el chad el ungil medengei a teletelir e olengeseu er tir er a urungulir ma lomdasu el momerul.”¹

Sel cheldechedechal a sib ma kaming, ea Osobel a melekoi el kmo tirkel mora kadikmel a mo oker: “Rubak, oingerang ea kimilsekau el songerenger, e mekelau? malechub e ke meched a rengum, e meskau a imelem?

“Se er a ki mesekau el ngodel el chad, e a ki ngilikau?” (Mateus 25:37–38).

“Rodam me a rodos, a tekoi el domes er ngii a ulemes,” a Sister Cordon a millekoi. “A remelemalt a milsterir tirkel lousbech a ngesou e le tir el omes e omtab. Kid a dirrek el sebeched el mo ungil lomes e mo olngeseu e menglaod, mo outkeu e dirrek el oureng a klungiaol.”²

2. Mosiik a Uchul e ke mo Outkeu

Moutkeu el kirel a klungiaol molab meklou me a mekekerei. Aika sebechel el reua outekangel lomekungil er kau ra kasinoma malechub e koutekangel leng mildort a deleuill, metik er a beches el ureor malechub e ke metik er a ririid el oacher, rokir a tal buil ruruil er a le bol secher a betik ra rengum malechub e ke rokir a ta el sandei el diak mousbech a sukal.

Momekedong el chemat er tir, besterir a card, malechub e bo momengur lobengterir ra kmong ker. Sel dedak el kaudars a klengeltengat, e kiei loba omereng el saul, e outkeu a klengeltengat me a klungiaol el mora rebebil, e kid a “oldeu er a deureng er a rodam er kid” (Alma 30:34).

Mesa Chimal a Rubak

A le bebil ra taem ea oldeu lobengterir a rebebil a belkul a ngosuterir el mes aikel mo uchul e te oldeu el kirel—ngii mesel ngarngii a chetituokel malechub eng ungil tekoi er a klengar er kid. Sel beot el klemerang el Chedam er a Babeluades a kerekikl er kid e kldmokl el mo melikeu er kid a sebechel kot el ungil luchul a deureng.

Ng sebechem el ngosuterir a rebebil el mesa chimal a Rubak er a klengar er tir sel mouchais aikel kau a mla mes er a klengar er kau. Bol medemedemek a rengum e mouchais aikel Demad er a Babeluades a mla ngosukau er ngii er a chelsel a ringel. Tial omouchais el kirel a mo ngosuterir a rebebil el mes e mtab aikel Ngii a mla ngosuterir er ngii (mesa Mosiah 24:14).

Lak Mngesengesii er a Kau a mo Oldeu

Ng mekngit, le sel bebil e kede ngosengesid er a mo oldeu lobengterir a rebebil, tokuni sel domelchesiu el diak de ansing er a ikel sebeched lodars malechub a dauch er a klengar er kid. Meng bai mo diak debetik er a deureng er sel deureng er a tang, e soiseb er a bediklel omengaisisiu. El uaikel lulsisechakl a Elder Quentin L. Cook er a Chelechad er a Teruich me a Terung el Apostol: “Omengaisisiu a klengeltengat a kmal sebechel oridii a deureng. Ng diak el sebeched el ngara omereng el saul e mechechei er a osisiu el taem.”³

“Meng mekera bo lak er kid tial omeruul el ngarngii er a rebetok el chad?” nguleker a Elder Jeffrey R. Holland er a Chelechad er a Teruich me a terung el Apostol. “… Ng sebeched lomechur a betok el klengeltengat el dolab e sebeched el outkeu a tekoi el blal kedmokl e rebebil. Sel kot el kiungiolel, a sebeched el mesiou er a rebebil, tia sel kot lungil bedengel a louedikel a chaidireng el mla mekedmokl.”⁴ Ng bai diak dongaisisiu, e bai melekoi a ungil tekoi el kirir tirka el doldingel er tir. Bo mimokl louchais a soam el kirir me tirkel ngara telungalek er tir.

El uaikel lomeklatk er kid a Paulus, kid a klekedekellel a bedengel a Kristo, me sel “modanges a tang, e a ikel bebil a ngara deureng lobengkel” (1 Korinth 12:26). Obengkel a ngsou er a Chedam er a Babeluades, eng sebeched el kerekikl er a teletael el ngarngii a rebebil, e outkeu a klungiaol el meklou me a mekekerei, ngosuterir el metebengii a chimal a Rubak, e mo diak de mechechei mel meral sebeched el dmak el ngara deureng er a klengeltengak, duch, me a deureng er a rebebil.