Na iVakavuvuli ni Veiqaravi, Tiseba 2019

Na Cava e Vakavulica vei Keda na iTalanoa ni Siganisucu me baleta na Veiqaravi

“Na gauna talei ni yabaki. Lagasere mai; Gauna ni siganisucu sa voleka. Talanoa ni sucu vou nei Jisu, nona tadu mai ki vuravura” (“Na Gauna Talei,” iVolanisere ni Gonelalai, 32).

E sa dua na gauna totoka na gauna ni Siganisucu ni ra taura vakasauri e dua na ibalebale vou na sipi, ivakatawa ni sipi, vale ni manumanu, kei na kalokalo. Era sa yaco me tiki bibi ni kena tukuni tale e dua na ka e yaco bibi duadua ena itukutuku makawa ni kawatamata: na sucu i Jisu Karisito. E vuqa na matavuvale era vakaraitaka na irairai ni siganisucu ena nodra dui veivale. Eso tale era nakita me ra wilika na italanoa ni Nona sucu se vakaitavi ena dua na vakatasuasua. Me vaka ga na italanoa kece i Karisito, na italanoa ni Nona sucu e sinai ena lesoni eso eda rawa ni vulica me baleta na veiqaravi, me baleta na kena wasei na Nona rarama me vakararamataki vuravura. A kaya o Peresitedi Henry B. Eyring na iKarua ni Daunivakasala ena Mataveiliutaki Taumada,“Na italanoa ni Siganisucu e sa dua na italanoa ni loloma.”

“… Mai na italanoa ni sucu i Karisito, eda rawa ni raica ka vakilai Koya ka kilai Koya. Oqori e vakamamadataka na noda icolacola ena ilakolako. Ka na muataki keda meda guilecavi keda ka vakamamadataka na icolacola vei ira na tani.”¹

“Sa sega na tiki ni bure me nodratou” (Luke 2:7)

A sega ni vakarautaka na itaukei ni bure na tiki ni bure me baleta na iVakabula, ia e sega ni dodonu me da na cakava na cala o ya! Eda rawa ni vakarautaka na tiki ni bure me baleta na iVakabula ena yaloda ena noda vakarautaka na tikina me baleti ira na tacida kei na ganeda ena noda teveli, ena noda itikotiko, kei na noda itovo tudei ni bula. E vuqa na itovo tudei vakamatavuvale e rawa ni vakamikamicataki cake ka guiguilecavi dredre vakalevu sara ni ra okati kina eso tale na tamata. Sa dua tu na itovo tudei nei Daiana kei na nona matavuvale me dau sureta e dua me Siganisucu vata kei iratou. Ena Tiseba yadua, eratou dau veivosakitaka ka vakatulewataka o cei me ratou sureta.² Ena rairai rawa ni tekivuna nomu matavuvale e dua na itovo tudei e tautauvata. E dua beka o dau veiqaravi vua ena taleitaka me duavata kei na nomu matavuvale ena laga sere taleitaki ni Siganisucu. O na rawa talega ni vakarautaka e dua na tikina ena nomudou vakayakavi ni Siganisucu vua e dua e sega ni tiko vakavoleka nona matavuvale.

Na sala vinaka cake cava me da marautaka kina na iVakabula mai na noda muria na Nona ivakaraitaki ni veiciqomi? Nanuma tiko ni oKoya sa sureti “ira kecega me ra lako mai vua ka vakaivotavota ena nona vinaka; ka sa sega ni bureitaka vua e dua sa lako mai vua, na tamata loaloa kei na tamata vulavula, na bobula kei na galala, na tagane kei na yalewa; ka sa nanumi ira na tawa lotu; ka ra sa tautauvata na tamata kecega vua na Kalou, ko ira na Jiu kei ira na kai Matanitu Tani” (2 Nifai 26:33). Veivagalalataki ka veiokati.

“A sa so na ivakatawa ni sipi ena vanua ko ya era sa tiko mai na vanua veico, a ra veivuke me vakatawa na sipi ena bogi” (Luke 2:8)

E kena irairai ni ganita vinaka na ivakatawa ni sipi me dua vei ira na imatai me kidavaka na iVakabula gone dramidrami. O ira na parofita ena gauna e liu a vakatokai Jisu Karisito me “Nodra iVakatawa na Isireli” (Same 80:1) ka “iVakatawa ni vuravura taucoko” (1 Nifai 13:41). Ka a tukuna Vakaikoya na Karisito, “Oi au na ivakatawa vinaka, ia kau sa kilai ira sa noqu” (Joni 10:14). Na kilai ni noda sipi kei na nodra yadravi e tiki bibi ni nodra vakatawani kei na veiqaravi me vaka e vakayacora na iVakabula.

Ena vei cina kataremoremo kei na iukuuku mareqeti eso, e sa levu sara na ka me saravi ena gauna ni Siganisucu. Ia na totoka cecere ga ni gauna oqori ena rawa ni kunei ni da nanuma meda vagolea na noda rai vakatabakidua vei ira eda veiqaravi kina ka yadrava matua na noda qele ni sipi. Na yadravi matua e rawa ni kena laurai na nona ivakalomavinaka taleitaki e dua se tarogi me baleta na nona ituvatuva ni lako vakagade e dua. Eda yadrava matua ni da raica ka sotava na nodra gagadre na tani—na veika e matata kei na kena e sega so ni matata.

Ni a mai yali vakasauri o Mick, na wati Cheryl, e a kavoro vakaca sara okoya. Ni roro voleka mai na nona imatai ni Siganisucu ni yali o Mick, sa tubu na galili. Ena vakavinavinaka, a tu e yasana o Shauna na nona marama dauveiqaravi. O Shauna kei na watina, o Jim, a sureti Cheryl ena vuqa na gade ni vakacagicagi. Erau a raica sara na kote makawa nei Cheryl ka navuca me rau cakava kina e dua na ka. Ena vica na siga ni bera na Siganisucu, a kauta mai o Shauna kei Jim vei Cheryl e dua na iloloma ni Siganisucu: e dua na kote vou totoka. Erau a kila na gagadre vakayago nei Cheryl me baleta e dua na kote katakata ia vaka talega kina na nona gagadre vakayalo ni veivakacegui kei na vakaitokani. Erau a toroya cake me vakayacora na vei gagadre oqori, ena kena vinaka duadua erau rawata ka vakarautaka e dua na ivakaraitaki totoka ena ivakarau eda rawa talega ni da yadravi ira kina na noda qele ni sipi.³

“Era sa kaya vakai ira na ivakatawa ni sipi, Me datou mai lako ki Peceliema” (Luke 2:15)

“Me datou mai lako” e sa dua na veisureti bulabula! Era a sega ni nanuma na ivakatawa ni sipi ni ra na rui oca na nodra itokani ena ilakolako. Era a sega ni gole galugalu ga yani ki Peceliema vakai ira. Era a vuki yani ka veiraici ena mamarau ka kaya, “Me datou mai lako!”

Eda na sega beka ni rawa ni sureti ira na noda itokani me ra mai raica na iVakabula gone dramidrami, ia eda rawa ni sureti ira me ra vakila na Yalo ni Siganisucu (se na Yalo i Karisito) ni ra veiqaravi vata kei keda. A kaya o Bonnie L. Oscarson, na Peresitedi Raraba e liu ni Goneyalewa “Na sala me vakalevutaki kina na yalo ni Siganisucu sai koya meda dodoliga yani ena lomasoli vei ira era tiko voliti keda ka soli keda yani.”⁴ Raitayaloyalotaka ni o taura tiko e dua na kadrala. Era na rawa ni raica dina ka vakayagataka na tani na rarama mai na nomu kadrala, ia raitayaloyalotaka na katakata era na rawa ni vakila kevaka o vakayagataka nomu kadrala mo waqaca na nodra kadrala me rawa kina ni ra taura ga vakai ira na rarama.

Na Karisito Vakaikoya a vakavulica ni o ira era muri Koya ena tu vei ira na rarama ni bula (raica na Joni 8:12). Na veiqaravi me vakataki Koya e sa dua na sala e rawa ni da muri Koya kina ka marautaka na rarama yalataki oya. O koya gona mo wasea na rarama ena nomu sureti ira tale eso me ra veiqaravi vata kei iko! E rawa vakacava mo veiqaravi vata kei ira ko veiqaravi vei ira? E rawa ni drau vakarautaka vata na kemu kakana taleitaki se vakurabuitaka e dua ena dua na iloloma lailai se ivola volai. E rawa ni drau vakila vata ruarua na rarama e lako mai ni muri na ivakaraitaki ni veiqaravi i Karisito.

“Era sa tukuna yani na vosa sa tukuni vei ira e na vuku ni gone oqo” (Luke 2:17)

E rawarawa ni raitayaloyalotaki na nodra nanamaki rekitaki na ivakatawa ni sipi ni ra wasea na itukutuku vakasakiti me baleta na sucu i Karisito vata kei ira na lewevuqa cava ga era sota kaya. Matataki mai vei ira na agilosi, na Mesaia parofisaitaki sa tadu mai! E a tu eke o Koya! Na ka dina, na wasei ni itukutuku vinaka ni iVakabula sai koya e dua na ulutaga levu ni italanoa ni Siga ni sucu. Era a lagasere na agilosi. A dusia na sala na kalokalo. Ka ra a vakatakila yani na ivakatawa ni sipi.

Eda rawa ni vakuria na domoda ki na italanoa ni Siganisucu ena kena wasei na itukutuku vinaka kei na ivakadinadina ni iVakabula. A vakatavulica o Sister Jean B. Bingham, na Peresitedi Raraba ni Soqosoqo ni Veivukei “Ni sa nomu na madigi mo matataka nai Vakabula ena nomu sasaga ni veiqaravi, tarogi iko mada, ‘Ena rawa vakacava niu wasea na rarama ni kosipeli oqo kei ira na tamata yadua se vuvale?’” “Na cava e vakauqeti au tiko kina na Yalotabu me’u cakava?”⁵

Oqo e vica na vakatutu mo vakasamataka ni o vakasaqara mo kila na sala o rawa ni wasea kina na nomu ivakadinadina me baleta na iVakabula kei na Nona kosipeli:

Raica e dua na ivolanikalou e vesuka na veika o vakila me baleta na iVakabula se vakaraitaka na cava na vuna o vakavinavinaka kina Vua. Wasea yani vei ira o veiqaravi kina.
Vakauta e dua na itukutuku vaka‑text se e dua na itukutuku ena tabana ni vakauitukutuku raraba vata kei na dua na vidio ni Siganisucu. Era tiko eso e veivakurabuitaki sara ena ChurchofJesusChrist.org!
Talanoataka vua e dua na itokani me baleta e dua na ivakananumi uasivi se na itovo tudei ka vakananumi iko vei Karisito.

Vakabauta ni na vakadinadinataka na Yalo Tabu na dina ni nomu ivakadinadina, me vaka ga e a ivakadinadinataka oKoya vei Simione kei Ana ni sa iVakabula na gonelailai o Jisu (raica na Luke 2:26, 38).

A kaya o Elder Dieter F. Uchtdorf ena Kuoramu ni iApositolo Le Tinikarua, “Me rawa ni da doka vakaidina na lako mai [i Jisu Karisito] ki vuravura, ia meda cakava me vakataki Koya ka dodoliga yani ena yalololoma kei na loloma veivueti kivei ira na wekada”. “Oqo eda rawa ni cakava e veisiga, ena vosa kei na ivalavala. Meda cakava oqo me noda itovo vaka‑Kirisimasi, ena vanua ga eda tiko kina—me da dauyalovinaka cake, dauveivosoti vakalevu cake, dauvakalelewa vakalailai sobu, dauvakavinavinaka vakalevu cake, ka daulomasoli vakalevu cake ena wasei ni noda sautu vei ira era gadreva.”⁶

© 2019 by Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/18. Vakadonui me vakadewataki: 6/18. iVakadewa ni Ministering Principles, December 2019. Fijian. 15773 858