Mga Prinsipyo sa Ministering, Disyembre 2019

Ano ang Ginatudlo sa Aton sang Istorya sang Paskwa parte sa Ministering

“Ini ang tiyempo nga pinalangga. Magkanta; ang Paskwa malapit na. I-istorya ang kamatuoran, sang si Jesus natawo sa duta” (“The Nativity Song,” Children’s Songbook, 52).

Litrato

ministering

Detalye gikan sa Behold the Lamb of God, ni Walter Rane

Ang Paskwa isa ka matahum nga tion sang ang mga carnero, mga manugbantay, mga pasungan, kag mga bituon gulpi lang nakaangkon sang bag-o nga kahulugan. Nangin importante ini nga mga karakter sa pagsugid liwat sang isa sa pinakaimportante nga mga hitabo sa kasaysayan sang tawo: ang pagkatawo ni Jesucristo. Madamo sang mga pamilya ang nagabutang sang belen sa ila mga balay. Ang iban nagasiguro nga basahon ang istorya sang Iya pagkabun-ag ukon nagaentra sa isa ka drama-drama. Pareho sang tanan nga mga istorya ni Cristo, ang istorya sang Iya pagkabun-ag napuno sang mga leksyon nga matun-an naton parte sa ministering, parte sa pagpaambit sang Iya kasanag para pasanagon ang kalibutan. “Ang istorya sang Paskwa isa ka istorya sang gugma,” siling ni Pangulong Henry B. Eyring, Ika-duhang Manuglaygay sa Unang Panguluhan.

“… Sa mga istorya sang pagkabun-ag ni Cristo, makita naton kag mabatyagan kon sin-o Sia sadto kag kon sin-o Sia karon. Ginapamag-an sina ang aton mga palas-anon samtang nagapanglakaton. Kag tuytuyan kita sini nga kalimtan ang aton mga kaugalingon kag pamag-anon ang palas-anon sang iban.”¹

“Walay hulot sa ila sa balay nga dalayunan” (Lucas 2:7)

Ang manugbantay sang kwarto napaslawan nga maghatag sang lugar para sa Manluluwas, pero indi naton kinahanglan nga himuon ang ina nga sayop! Pwede naton hatagan sang lugar ang Manluluwas sa aton mga tagipusuon paagi sa paghatag sang lugar para sa aton mga kauturan sa aton mga lamisa, sa aton mga balay, kag sa aton mga tradisyon. Madamo sa mga tradisyon sang pamilya ang pwede himuon nga mas matam-is kag mas halandumon paagi sa paglakip sang iban nga tawo. Si Daiana kag ang iya pamilya may tradisyon nga mag-imbitar sang isa ka tawo nga maghiwat sang Paskwa upod sa ila. Kada Disyembre, ginahambalan nila kag ginadesisyunan kon sin-o ang ila gusto imbitaron.² Basi ang inyo pamilya gusto nga sugdan ang pareho sina nga tradisyon. Ayhan may ginaministeran kamo nga gusto mag-upod sa inyo pamilya sa pagkanta sang mga kalantahon sa Paskwa. Mahimo man kamo maghatag sang lugar sa inyo panyapon sa Paskwa para sa tawo nga wala sang pamilya sa inyo lugar.

Indi bala mas manami nga saulugon ang Manluluwas paagi sa pagsunod sang Iya ehemplo nga paglakip sang iban? Tandai nga ginaagda Niya ang “tanan sa pagkari sa iya kag mag-ambit sang iya kaayo; kag wala sia sing ginadumilian nga bisan sin-o nga nagakari sa iya, itom kag puti, ulipon kag hilway, lalaki kag babayi; kag ginadumdom niya ang mga pagano; kag ang tanan palareho sa Dios, alangay nga Judio kag Gentil” (2 Nefi 26:33). Maghatag sang lugar kag ilakip ang iban.

“Kag may mga manugpahalab sang carnero sa among duta nga nagapakagab-i sa mga latagon, kag nagapulaw sa kagab-ihon sa ila panong” (Lucas 2:8)

Daw nagakabagay lang nga ang mga manugpahalab malakip sa una nga nagtamyaw sang lapsag nga Manluluwas. Ang mga propeta sang una nagtumod kay Jesucristo bilang ang “Manugpahalab sang Israel” (Salmo 80:1) kag ang “Manugpahalab sa bug-os nga kalibutan” (1 Nefi 13:41). Kag si Cristo Mismo nagsiling, “Ako ang maayong manugpahalab, kilala ko ang akon [carnero]” (Juan 10:14). Ang pagkilala sang aton carnero kag pagpadayon sa pagbantay isa ka importante nga bahin sang pagka-manugpahalab kag pagminister pareho sang Manluluwas.

Upod sa nagainigpat-igpat nga mga suga kag mauti nga mga dekorasyon, kadamo sang pwede tulukon sa tion sang Paskwa. Pero ayhan ang pinakadako nga katahum sang selebrasyon makita kon kita nagadumdom nga isaylo ang aton panulok sa ila nga aton ginaministeran kag bantayan ang aton mismo mga panong. Ang pagbantay mahimo nga ang pagtalupangod sang paborito nga kalan-unon ukon pagpamangkot sang plano sang isa ka tawo sa pagsaulog. Nagabantay kita kon makita naton kag ginasabat ang panginahanglan sang iban—pareho inang hilmunon kag indi gawa hilmunon.

Sang gulpi nga napatay ang bana ni Cheryl nga si Mick, naglalain gid sia. Sang nagahilapit ang iya una nga Paskwa nga wala sia, nagdugang na gid ang iya kasubo. Maayo lang, ara ang iya ministering sister nga si Shauna. Ginaimbitar si Cheryl ni Shauna kag sang iya bana, nga si Jim, sa madamo nga lakat sa pagliwa-liwa. Natalupangdan nila nga daan na ang kunop ni Cheryl kag nagdesisyon nga aksyunan ini. Pila ka adlaw antes mag-Paskwa, gindalhan ni Shauna kag Jim si Cheryl sang pamaskwa: isa ka matahum nga bag-o nga kunop. Nahibal-an nila ang pisikal nga pagpanginahanglan ni Cheryl sang mainit nga kunop pati na ang iya emosyunal nga panginahanglan sang kaumpawan kag kaupod. Naggiho sila para masabat ang ina nga mga panginahanglan sa pinakamaayo nga nahibal-an nila kag nagpahamtang sang matahum nga ehemplo kon paano kita man sarang magbantay sa aton mga panong.³

“Ang mga manugpahalab sang carnero nagsinilingay, Makadto kita karon sa Betlehem” (Lucas 2:15)

Ang “Makadto kita karon” isa ka masinadyahon nga imbitasyon! Wala ang mga manugpahalab nagpanumdom nga ang ila mga abyan ginakapoy para magpanglakaton. Wala sila nagpadulong sa Betlehem nga mahipos nga silahanon lamang. Masinadyahon sila nga nagtulukay kag nagsiling, “Makadto kita karon!”

Bisan indi naton maagda ang aton mga abyan nga maglakat para makita ang lapsag nga Manluluwas, pwede naton sila agdahon para mabatyagan ang espiritu sang Paskwa (ukon ang espiritu ni Cristo) paagi sa pag-alagad upod sa aton. “Ang paagi para magtubo ang espiritu sang Paskwa amo ang paglab-ot sa mga yara sa aton palibot kag maghatag sang aton kaugalingon,” siling ni Bonnie L. Oscarson, anay Pangkabilugan nga Pangulo sang Young Women.⁴ Pamensara nga kuno abi nagauyat kamo sang kandila. Sigurado gid nga makita kag makabenepisyo ang iban sa kasanag halin sa inyo kandila pero hunahunaa ang kainit nga ila mabatyagan kon gamiton ninyo ang inyo kandila para pasigahon ang ila kandila kag tugutan sila nga sila mismo ang magkapyot sang ila kasanag.

Si Cristo Mismo ang nagtudlo nga ang mga nagasunod sa Iya makaangkon sang kasanag sang kabuhi (tan-awa sa Juan 8:12). Ang pag-alagad pareho sang Iya isa ka paagi nga mahimo naton Sia sundon kag maangkon inang ginpromisa nga kasanag. Gani ipaambit ang kasanag paagi sa pag-agda sang iban nga magserbisyo upod sa inyo! Paano kamo kag ang inyo ginaministeran makaserbisyo sing ululupod? Sing ululupod pwede kamo maghanda sang inyo paborito nga pagkaon ukon sorpresahon ang isa ka tawo sang gamay nga regalo ukon sulat. Sing ululupod pwede ninyo mabatyagan pareho ang kasanag nga nagahalin sa pagsunod sang ehemplo ni Cristo sang pagserbisyo.

“Ginpahibalo nila ang pinamulong sa ila nahanungod sining bata” (Lucas 2:17)

Mahapos hunahunaon ang masadya nga kalangkag sang mga manugpahalab samtang ila ginapaambit ang matahum nga balita sang pagkabun-ag ni Cristo sa madamo nga tawo kutob sa ila masarangan. Ginbalita sang mga anghel, ang ginpropesiya nga Mesias nag-abot na! Ari Sia diri sadto! Sa pagkamatuod, ang pagpaambit sang maayong balita sang Manluluwas isa ka dako nga tema sang istorya sang Pagkabun-ag. Ang mga anghel nagkinanta. Ang bituon nagtudlo sang dalan. Ang mga manugpahalab nagbalita sa mga lugar nga ila malab-utan.

Mahimo naton idugang ang aton mga tingug sa istorya sang Paskwa paagi sa pagpaambit sang maayong balita kag sa pagsaksi sa Manluluwas. “Bangod kay may pribelihiyo kamo nga irepresentar ang Maluluwas sa inyo pagpaninguha sa ministering, pamangkuta ang inyo kaugalingon, ‘Paano ko bala mapaambit ang kasanag sang ebanghelyo sa sining indibidwal ukon pamilya?’” gintudlo ni Sister Jean B. Bingham, Pangkabilugan nga Pangulo sang Relief Society. “Ano ang ginainspirar sang Espiritu nga akon himuon?”⁵

Ari ang pila ka mga panugyan nga pwede ninyo binag-binagon samtang ginatinguhaan ninyo nga hibaluon kon paano ninyo ipaambit ang inyo panaksihon parte sa Manluluwas kag sang Iya ebanghelyo:

Magpangita sang balaan nga kasulatan nga nagalaragway sang inyo balatyagon parte sa Manluluwas ukon nagapahayag kon ngaa nagapasalamat kamo sa Iya. Ipaambit ini sa ila nga inyo ginaministeran.
Magpadala sang text ukon mensahe sa social media nga may video sang Paskwa. May mga matahum kamo nga makita sa ChurchofJesusChrist.org!
Sugiri ang isa ka abyan parte sa isa ka espesyal nga handurawan ukon tradisyon nga nagapadumdom sa inyo kay Cristo.

Mag-angkon sang pagtuo nga ang Balaan nga Espiritu magasaksi sa kamatuoran sang inyo panaksihon, pareho sang Sia nagsaksi kay Simeon kag Ana nga ang lapsag nga si Jesus amo ang Manluluwas (tan-awa sa Lucas 2:26, 38).

“Agud matuod nga mapasidunggan ang pagkari [ni Jesucristo] sa kalibutan, kinahanglan naton himuon ang Iya ginhimo kag lab-uton nga may pag-ulikid kag kaluoy ang aton isigkatawo,” siling ni Elder Dieter F. Uchtdorf sang Korum sang Dose ka mga Apostoles. “Ini pwede naton himuon kada adlaw, sa pulong kag sa buhat. Himuon naton ini nga aton tradisyon sa Paskwa, bisan diin man kita—nga mangin mas maayo, mas mapinatawaron, indi kaayo mahusgaron, mas mapinasalamaton, kag mas maalwan sa pagpaambit sang aton kabuganaan sa mga nagakinahanglan.”⁶

© 2019 by Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, December 2019. Hiligaynon. 15773 861