Kenginn e Pigpig, December 2019

Yaat ko Krismas nibe Fil Ngodaed Mornga’agen e Machib

”Iraray e ngiyal’ ni ri yi ba a’dag ko duuw. Yon’ e Tang; ko Krismas e bay taw. Weliy mornga’agen i Yesus nikan gargeleg, napan, niba bitir, nike yib nga fayleng” (“The Nativity Song,” Children’s Songbook, 52).

Krismas e ngiyal’ napan ni pi saaf, nge pi’in nima matangiy e saaf, tafen e gaan ko gamanman nge tu’uf e ran sap ngay nib thil rogon. Ra ga’fan u lane tin nike buch ni tha’abi ga’fan ni kakrom, Yesus Kristus nikan gargeleg. Oren e tabinaew e ra tata’ ya’an u lane tabinaew roraed. Boech e ma be’eg morna’agen fa un ko skit ni yibe yan u ya’an. Boed oren e yaat mornga’agen Kristus, mornga’agen nikan gargeleg e ba sug ko pin’en ni rayog ni ngad filed ni mornga’agen e machib, mornga’agen nibe dag e tamilang Rok ninge tamilang nag e fayleng. ”Yaat ko Krismas e mornga’agen e tu’ufeg,” ke yoeg President Henry B. Eyring, Bin L’agruw e Counselor u lane Bin Somm’on e Presidency.

”… Lane yaat ni mornga’agen Kristus nikan gargeleg, ma rayog ni ngad guyed ma gadaed thamiy ko Ir mini’. Binem e ma ba’ud nag e tomal rodaed. Ma ra gagyeg nag daed ni ngad pagtilined gadaed ma gadaed ba’ud nag e tomal rok boech e gidii’.”¹

”Ya dariy e gin ni yad ra par riy u tafen e milekag” (Luke 2:7)

Cha’an ni nu’un rok e dani yag ni nge fal’eg tigil’ fare Tathapeg, ma rayog ni dabin rrin’ed ta’ab oloboch! Rayog ni ngad ted tigil’ fare Tathapeg u lan gumircha’en daed ni gadaed be fal’eg tigil’ e pi walagen daed ko tebel, lane tabinaew rodaed, nge yilen rodaed. Oren e tabinaew e rayog ni ngan fal’eg nge ri gel boech e yalen me ri paer ni ban’en ni dabin pagtilin ni yibe uneg boech e gidii’ ngay. Daiana nge tabinaew rok e ba’ e yalen roraed ni yaed ma pining bee’ nge un ngoraed ko Krismas. Gubin e December, ma yaed ma weliy ko mini’ e ngar pininged nge un.² Sana tabinaew rom e ku rayog ni nge rrin’ e binem. Sana bee’ ni gama guy ni gaba a’dag ni nge un ko tabinaew rom ngan noen’ e tang ko Krismas ni yiba a’dag u ta’abang. Ku rayog ni ngam fal’eg tigil’ bee’ ko Krismas ni dariy e tabinaew rok ko gin ni ba’ riy.

Mange e re kanawo’ nib falel’ rogon i leam nag fare Tathapeg ni yibe fol ko wo’ Rok? Tafneyem ni be pining ”gubin ni ngar baed ngakʼ ngar feked boech e murnguy rokʼ; ma dar fek yathin e piʼin nibe yib ngakʼ, ni talimor nge wechwech, ni kalbus nge de kalbus, ni pumoʼon nge ppin; ma kubay u waenʼ fa piʼin dariy loren Got u wunʼraed; ma gubin ma taʼareb rogon rokʼ Got, ni Jew nge Gentile” (2 Nephi 26:33). Fal’eg tigil’iy maga fal’eg ban’en ni ngan rrin’.

”Ba kubay e pi’in nima gafaliy e saaf ko ta’ab binaew, ni yaed be yaliy e saaf roraed nib neap” (Luke 2:8)

Rayog ni pi’in nima matan giy e saaf e bay u fithik e pi’in somm’on nike yibi guy fare Tathapeg ni kab modway. Pi profet ni kakrom e ma sap ko Yesus Kristus ni fare ”Chadowliy ko Israel” (Psalm 80:1) nge Chadowliy ko fayleng” (1 Nephi 13:41). Kristus Rok e ga’ar, ”I gag fa’anem ni bfel’ rogon ni gu ma gafaliy e saf, ni gu manang e saf rog” (John 10:14). Saaf rodaed ni gadaed be nang ma gadaed be yaliy e bang ko chadowliy nge machib ni boed rogon fare Tathapeg.

Fithik e magal ko krismas, ma bo’or ban’en ni ngan sap ngay napan e Krismas. Machane n’en ni tha’abi fal’el riy e rayog ni ngan pir’eg napan ni gadaed be tiyan’ daed ko pi’in ni gadaed be machib nag ma gadaed ayuweg e tirodaed e gidii’. Yaliy e rayog ni ngan guy ko okas ni ba a’dag bee’ fa mu fith ko mang e n’en ni nge rrin’ bee’. Gadaed be sap napan ni gadaed be guy ma gadaed be ayuweg e gidii’—pi’in ni yibe gu’ nib fal’ rogon nge pi’in ni dabin nang ko mang e ba tu’uf rok.

Mick ni pumo’on rok Cheryl, e napan ni yim’, ma ri kirban’ nib gel. Napan ni chugur e bin somm’on e krismas rok ni demoy e pumo’on rok, ma kari gel e kirbaen’ rok. Machane, fagar rok ni Shauna e ba’ rok. Shauna nge pumo’on rok, ni Jim, e ri piningew Cheryl ko bukun e holiday. Kar guyew e maad ko garbeb rok nike kireb mar leam nigew ni ngar rrin’ew ban’en ngay. In e rran u m’on ko Krismas, me chuw’iy Shauna nge Jim e tawa’ath rok Cheryl ko Krismas; ba maad ko garbeb nib fal’ ya’an nib be’ech. Kar guyew nib tu’uf e ayuw e binem ngak Cheryl machane kiyow manang e nib tu’uf e gapas ni nge yib ngak. Kar ranow kar rrin’ew gubin e rayog rorow mar dagew ni ku rayog rodaed ni ngad ayuwegned e gidii’.³

”Me yog fa p’in yad ma gafaliy e gamanman u fithik’rad ni lungurad, Ndarod nga Bethlehem” (Luke 2:15)

”Darod e chiney” e ba pong! Fapi cha’ nima gafaliy e gamanman e dar leam niged e fagar roraed ni kar magaf gaed ko yan. Gathi ra bagyaed ma ke yaen rok nga Bethlehem ni go’ ir. Kar chel gaed ngoraed mar ga’ar gaed ngoraed, ”Ndared!”

Gadaed e dabyog ni ngad pininged e tafagar rodaed ni ngan guy fare Tathapeg ni kab modway, rayog ni ngad pininged raed ni ngad thamiyed e kan thothup ko Krismas (fa kan thothup rok Kristus) ni yaed be un ngodaed ko pigpig. ”Rogon ni ngan gel nag fare kan thothup ko Krismas e ngan ayuweg e gidii’ nib liyeg daed,” e be yoeg Bonnie L. Oscarson, kafram nib Young Women General President.⁴ Leam nigem ni gabe koel e candle. Boech e gidii’ e rayog ni guy e candle rom me ayuweg, machane mu tafney nag e gowalngin ni rayog ni ngar thamiyed fa’anra gara feek e candle rom ngam afweg e candle roraed mag pag raed ngar koeled fare nifiy roraed.

Kristus Rok e ke fil ni pi’in ni be laek e ra thapeg e tamilang ko yafos (muguy ko John 8:12). Pigpig ni boed Ir e reb e wo’ ni rayog ni ngad laked ma gadaed falfalen’ ko re tamilang nem nikan micheg. Ere mu pi’ e re tamilang nem ni gabe pining bee’ nge un ngom! Urogon ni gimed ra pigpig ngak e gidii’ u ta’bang? Rayog ni ngam fal’eged e gaan ni yiba adag fa mu fal’eged nochi ban’en ni fen bee’. Rayog ni ngam thamiyed e tamilang nima yib ko pigpig rok Kristus ni yib fol riy.

”Kar yoegned mornga’agen e re bitir ney nikan noeg ngoraed” (Luke 2:17)

Ba moem ni ngan leam nag e falfalen’ rok fapi cha’ nima gafgaliy e gamanman napan ni kar weliyed e re thin ney ni mornga’agen Kristus nikan gargaleg ko bukun e gidii’. Fapi angel nikar tang gaed, fare Messiah nikan noeg ni ra yib e ke yib! Imoy u roy! Ere, fare thin nib falel’ ni yibe weliy ni mornga’agen fare Tathapeg e ba thin ko fare yaat ni rib ga’fan. Ke tang fare angel. Fare tu’uf e be gagyeg nag e kanawo’. Ma fapi cha’ nima gafaliy e gamanman e kar weliyed.

Rayog ni ngad uneged e thin rodaed ko fare yaat ko Krismas ni ngad weliyed e thin nib falel’ man micheg nag fare Tathapeg. ”Napan ni ra yib e kanawo’ ngom ni ngam yoen’ loen fare Tathapeg ko machib rom, ma fithem, ’Urogon ni rayog ni nggu dag e tamilag ko fare gospel ko cha’n’ey fa fare tabinaew ney?’” e fil Sister Jean B. Bingham, Relief Society General President. ”Mang e n’en ni ba adag fare Kan Nthothup ni nggu rrin’?”⁵

Ba’aray boech e n’en ni fan ngom ni ngam leam nag napan ni gabe guyrogon ni ngam nang ko rogon ni ngam weliy e mich rom ni mronga’agen fare Tathapeg nge gospel Rok.

Guy e re thin ni be kan ngom ni mornga’agen fare Tathapeg fa be weliy ko mongfan ni gab falfalen’ Ngak. Weliy ngak e cha’an ni gabe machib ngak.
Send nag e text fa mulwol ko social media niba’ ya’an e kachido ko Krismas riy. Ba’ boech nib falel’ ko ChurchofJesusChrist.org!
Moeg ko fagar mornga’agen e n’en ni gama rrin’ nima pogran ngom ni mornga’agen Kristus.

Paer e mich rom ni fare Kan ni Thothup e ra micheg e tin riyul’ ko mich rom, boed nike micheg ngak Simeon nge Anna ni fare modway ni YEsus e ir fare Tathapeg (muguy ko Luke 2:26, 38).

”Ra ngarin tay fan [Yesus Kristus] ninge yib nga fayleng, ma ngarin rrin’e rogon nike rrin’ ma gadaed ayuw u fithik e tu’ufeg nge runguy ngak e gidii’,” e ke yoeg Elder Dieter F. Uchtdorf ko fare Ulung ko fare Ragag nge L’agruwi Apostle. ”Biney e rayog ni ngad rrin’ed ni gubin e rran, ni thin nge mithmith rodaed. Nge paer e biney ni n’en ni ngad rrin’ed ko Krismas, demtrug ko gin ni gadaed bay riy—ni ngad gol gaed, ma gadaed n’ag fan e kireb rok e gidii’, dabin pufthin gaed, gadaed falfalen’, ma gadaed ayuweg e pi’in ni rib tu’uf e ayuw roraed.”⁶

© 2019 by Intellectual Reserve, Inc. All rights reserved. Kan yoloey u Meriken. Kan micheg nag ko thin nu Ngalis: 6/18. Kan micheg nag i pilyeg: 6/18. Pilyeg ko Ministering Principles, December 2019. Yapese. 15773 905