Pagtipon sang Israel Paagi sa Ministering

Ang ministering isa ka oportunidad agud sundon ang laygay sang propeta nga tipunon ang Israel.

Si Pangulong Russell M. Nelson nag-imbitar sa aton sa pagbulig tipon sang Israel—“ang pinakaimportante nga butang nga nagakatabo sa kalibutan karon.”¹

Sa mga gusto makigbahin sa sining buluhaton sang pagtipon sang Israel, ang ministering isa ka manami nga oportunidad. Isa ini ka inspirado nga paagi sa pagbag-o sang mga kabuhi sang tawo. Kon kita naga-minister sa indi-gawa aktibo nga mga miyembro ukon nagaimbitar sa ila sa pagbulig sa aton nga magserbisyo sa mga indi miyembro sang aton simbahan, ang ministering nagahatag sang mga oportunidad sa pagtipon sang Israel.

Pagsalbar sang Nagabalik nga mga Miyembro

“Upod ang pagpalangga bilang rason, ang mga milagro mahanabo, kag makakita kita sang mga paagi nga madala ang aton ‘nadula’ nga mga utod sa para-sa-tanan nga pag-inakop sang ebanghelyo ni Jesucristo.” —Jean B. Bingham²

“Wala na ako nagasimba sa sulod sang anum ka tuig sang nagsaylo kami sang akon bana sa bag-o nga banwa. Ginbisitahan ako sang bag-o ko nga pangulo sa Relief Society, nga nagapamangkot kon pwede sia magpadala sang isa ka sister para magbisita sa akon. Nga may kulba, nagpasugot ako. Ining sister nagabisita sa akon kada bulan, bisan pa nga may allergy sia sa ido—kag may mapinalanggaon ako kaayo nga ido! Nagpadayon ang iya ministering sang duha ka tuig, kag kadako kaayo sang epekto sini sa akon.

“Bisan pa nga ang iya mga pagbisita pagpakig-abyan lamang, kon kaisa may mga pamangkot sia nga nagapadulong sa espirituhanon nga mga paghinambalanay. Medyo indi ako komportable, pero natandog ako sang mga ini para magdesisyon kon magpadayon sa ebanghelyo ukon magpabilin sa kon diin ako. Ginbudlayan ako magdesisyon, pero ginpili ko nga makigkita sa mga sister nga misyonero.

“Sang adlaw nga nagtambong ako sa pangsakramento nga miting sa una nga tion sa sulod sang anum ka tuig, nakulbaan ako magsulod. Pagsulod ko sa simbahan, ang akon ministering sister ara nagahulat sa akon, kag gin-updan niya ako pasulod sa simbahan. Pagkatapos, gindul-ong niya ako sa akon salakyan, nga nagapamangkot kon ano ang pwede niya himuon para makabulig sa akon samtang mas nagapalapit ako sa Manluluwas.

“Ang tiyempo kag pagpalangga sang akon ministering sister ang nagbulig sa akon nga magbalik sa pagkaaktibo, kag ginakabig ko ang iya mga pagpaninguha nga isa sa pinakanami nga regalo nga ginhatag sa akon. Nagapasalamat gid ako nga ara sia sa akon tupad sa akon pagbalik sa Simbahan sang Manluluwas.”

Ngalan ginhinago British Columbia, Canada

Mga Prinsipyo nga Dapat Hunahunaon

“Nagabisita sa akon kada bulan”

Paano mo ipakita nga nagaulikid ka sa imo mga ginaministeran labaw pa sa iban nga mga butang? (tan-awa sa Doktrina kag mga Kasugtanan 121:44).

“Mga pamangkot”

Ang pagpamangkot sang husto nga mga pamangkot makabulig sa pagpanghunahuna. Tandai nga ang aton ministering may katuyuan nga masobra pa sangsa pagpakig-abyan.³

“Nagahulat sa akon”

Ang kada isa dapat makabatyag nga ginaabiabi (tan-awa sa 3 Nefi 18:32).

“Ara sia sa akon tupad sa akon pagbalik”

Ang aton suporta may dako nga kinalain sa ila nga ginabudlayan sa pagbalik sa Manluluwas kag mag-ayo (tan-awa sa Mga Hebreo 12:12–13).

Ministering kag Pagtipon

“Sa mga paagi nga daw natural kag normal sa imo, ipaambit sa mga tawo kon ngaa importante sa imo si Jesucristo kag ang Iya Simbahan. …

“… Ang imo papel amo ang ipaambit ang kon ano nga ara sa imo tagipusuon kag magpangabuhi suno sa imo mga ginapatihan.” —Elder Dieter F. Uchtdorf⁴

Ang ministering kag pagpaambit sang ebanghelyo magkaupod. Ari ang pila sa mga paagi nga matipon naton ang aton mga abyan kag kaingod samtang nagaminister—ukon magminister samtang ginatipon naton ang aton mga abyan kag mga kaingod.

Magserbisyo nga ululupod. Magpangita sang mga oportunidad nga agdahon ang mga abyan kag mga kaingod nga mag-upod sa imo sa pagminister sa mga panginahanglan sang isa ka tawo. Pangabaya sila nga buligan ka sa paghanda sang pagkaon para sa isa ka bag-o nga nanay, pagbisita sang kaingod nga tigulang na, ukon pagtinlo sang balay sang isa nga nagamasakit.
Magtudlo sing ululupod. Pamensara nga imbitaron ang isa ka abyan ukon kaingod nga wala pirme nagasimba sa pag-host sang pang-misyonaryo nga leksyon sa ila balay para sa tawo nga nagapakigkita sa mga misyonero. Ukon pwede ka suportahan sang imo abyan sa pag-host sang leksyon sa imo balay ukon mag-upod sa imo sa pagtudlo sa balay sang iban.
Magtanyag sang bulig kon may nakita ka nga nagakinahanglan. Magtanyag sa pagpatigayon sang masakyan pakadto sa simbahan. Imbitara ang mga kabataan sa mga kahiwatan sang lamharon ukon Primary. Ano pa ang iban nga paagi nga pwede ka mag-minister kag magtipon?
Gamita ang mga materyales nga gintigana sang Simbahan. Ang Simbahan nagatanyag sang madamo nga materyales sa mga miyembro para buligan sila sa pagpaambit sang ebanghelyo. Pwede mo tan-awon sa seksyon sang “Misyonero” sa Gospel Library app kag magkadto sa ComeUntoChrist.org para sa mga ideya kon paano tipunon ang Istael sa aton mga komunidad.

© 2020 by Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, January 2020. Hiligaynon. 16984 861