Panangummong iti Israel babaen iti Ministering

Ti ministering ket maysa a gundaway a panangsurot iti balakad ti propeta a mangummong iti Israel.

Inawisnatayo ni Presidente Russell M. Nelson a mangtulong a mangummong iti Israel— “ti kapatgan a banag mapaspasamak ditoy daga iti agdama.”¹

Para kadagiti agtarigagay nga agbalin a paset daytoy nga aramid ti panaguummong iti Israel, ti ministering ket mabalin a maysa a napintas a gundaway. Maysa daytoy a naparegta a gundaway a mangbalbaliw iti biag dagiti tao. Agministertayo man kadagiti saan unay nga aktibo a miembro wenno awisentayo ida a mangtulong kadatayo bayat ti panagserbitayo kadagiti saantayo a kapada iti pammati, ti ministering ti mangipaay kadagiti gundaway tapno maummong iti Israel.

Panangispal kadagtii Agsubli a Miembro

“Addaan iti ayat a kas motibasion, mapasamakto dagiti milagro, ken masarakantayto dagiti wagas a pangpasubliantayo kadagiti ‘napukaw’ a kakabsattayo a babbai ken lallaki iti naan-anay a pannakiraman iti panangawat iti ebanghelio ni Jesucristo.” —Jean B. Bingham²

“Nagbalinak a saan nga aktibo iti uneg ti innem a tawen idi immakarkami iti baro nga ili. Sinarungkarannak ti baro a presidentek ti Relief Society, a nagsaludsod no mabalin a mangibaon iti maysa a kabsat a babai a sumarungkar kaniak. Medio nagnerbiosak, immanamongak. Sinarungkarannak daytoy a kabsat a babai iti tunggal bulan, iti baet ti alerdyina iti aso— adda maysa a makaay-ayo unay nga asok! Nagtultuloy ti ministeringna iti uneg ti dua a tawen, ket napalaus unay ti epektona daytoy kaniak.

“Nupay dagiti isasarungkarna ket gagangay a pannakilangen, sagpaminsan dinamagna kaniak dagiti saludsod a nangiturong kadakami iti naespirituan a pannakisarita. Dagitoy ti medio saan a nagpakomportable kaniak, ngem ginuyugoydak a mangikeddeng no agtultuloyak iti ebanghelio wenno agtalinaedak iti sigud. Narigat para kaniak daytoy a pangngeddeng, ngem pinilik ti sumarungkar a kaduak dagiti sister missionary.

“Iti aldaw a dimmar-ayak iti miting ti sakramento iti umuna a gundaway iti las-ud ti innem a tawen, nagbutengak a sumrek iti uneg. Idi nagnaak a nagturong iti simbaan, ti ministering sisterko ket agur-uray kaniak, ket kinaduanak a simrek iti kapilia. Kalpasanna, kinaduanak a nagsubli iti kotsek, a nagsaludsod kaniak no ania ti mabalin a kasayaatan nga aramidenna a mangtulong kaniak bayat ti panagdur-asko nga umas-asideg iti Mangisalakan.

“Ti oras ken ayat iti ministering sisterko ti nakatulong a nagtarabay kaniak nga agsubli iti panagaktibo, ken imbilangko dagiti panagkagumaanna kas maysa kadagiti kapatgan a sagut a kanayon a naited kaniak. Agyamanak unay nga adda isuna sadiay iti sibayko iti panagdaliasatko nga agsubli iti Simbaan ti Mangisalakan.”

Saan a naipakaammo ti naganna, Langley, British Columbia, Canada

Dagiti Maibilang a Pagbatayan

“Binulan a sinarungkarannak”

Kasano a maipakitam a maseknanka kadagiti pagserbiam nga ad-adda pay ngem iti dadduma a banag? (kitaen iti Doktrina ken Katulagan 121:44).

“Dagiti saludsod”

Ti panagdamag kadagiti umno a saludsod ket makatulong a mangkarit iti panangamiris iti bagi. Laglagipem a ti ministeringtayo ket addaan iti panggep a nalablabes pay ngem iti mainaig iti pannakilangen.³

“Agur-uray kaniak”

Nasken a marikna ti tunggal maysa a naragsak a mapasangbay (kitaen iti 3 Nephi 18:32).

“Adda idiay iti sibayko iti panagsublik nga agdaliasat”

Ti suportatayo ket makaaramid iti napateg a pagdumaan kadagiti naitublak nga agsubli iti Mangisalakan ket maimbagan (kitaen iti Hebreo 12:12–13).

Ministering ken Panangummong

“Iti ania man a wagas a kasla gagangay ken normal kenka, ibinglaymo no apay a napateg kenka ni Jesucristo ken napateg kenka ti Simbaanna. …

“… Ti akemmo ket mangibinglay no ania ti adda iti pusom ken agbiagka a maitunos kadagiti pammatim.” —Elder Dieter F. Uchtdorf⁴

Agkadua ti ministering ken panangibinglay iti ebanghelio. Dagitoy ti sumagmamano a wagas tapno mauummongtayo dagiti gagayyem ken padatayo a tattao kabayatan ti panagministertayo—wenno agministertayo kabayatan ti panangumongtayo kadagiti gagayyem ken padatayo a tattao:

Aggiddankayo nga agserbi. Sapulem dagiti gundaway a pangawisam kadagiti gagayyem wenno pada a tattao a kaduaennaka iti panagministeringmo kadagiti kasapulan ti maysa a tao. Agpatulongka kadakuada a mangisagana iti makan para iti kabarbaro nga ina, sumarungkar iti baket a kaarruba, wenno tulongam a mangdalus iti balay ti maysa a masaksakit.
Aggiddankayo a mangisuro. Ibilang ti panangawis iti maysa a gayyem wenno pada a tao a saan a masansan a makimisa a mangidaulo iti adalen ti misionario iti pagtaenganda para iti maysa a tao a makipagkita kadagiti misionario. Wenno mabalin a suportarannaka ti gayyemmo iti panangidaulo iti maysa nga adalen iti pagtaenganyo wenno kuyogennaka a mangisuro iti adalen iti pagtaengan ti maysa a tao.
Tulongam dagiti dadduma no makitam ti panagkasapulan. Mangidiaya a makipagurnos iti transportasion iti simbaan. Awisen dagiti ubbing kadagiti aktibidad dagiti agtutubo ken Primary. Ania dagiti dadduma pay a wagas a mabalinmo ti agministering ken mangummong?
Usarem dagiti resources nga inted iti Simbaan. Idiaya ti Simbaan ti adu a resources para kadagiti miembro a makatulong kadakuada iti panangibinglay iti ebanghelio. Mabalinmo nga i-browse babaen iti benneg a “Missionary” iti Gospel Library app ken sarungkaran ti ComeUntoChrist.org para kadagiti kapanunotan maipapan iti no kasano a mangummong iti Israel kadagiti komunidadtayo.

© 2020 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, January 2020. Ilokano. 16984 864