Parau tumu nō te aupurura’a, Tēnuare 2020

Ha’aputuputura’a ia ’Īserā’ela nā roto i te aupurura’a

Te tāvinira’a, ’o te hō’ē ïa rāve’a nō te pe’e atu nā muri i te a’ora’a a te peropheta ’ia ha’aputuputuhia ’Īserā’ela.

’Ua ani manihini mai te peresideni Russell M. Nelson ia tātou ’ia tauturu i te ha’aputuputura’a mai ia ’Īserā’ela—« te ’ohipa faufa’a roa a’e ’o te tupu nei i ni’a i te fenua i teie nei mahana ».¹

Nō ’outou ’o tē hina’aro nei ’ia tai’ohia ’outou i roto i teie ’ohipa nō te ha’aputuputura’a ia ’Īserā’ela, e taime fa’ahiahia mau teie nō te rave i te reira nā roto i te aupurura’a. ’O te hō’ē ’ia rāve’a tei fa’auruhia mai nō te tauira’a i te orara’a o te mau ta’ata. Nā roto ānei i te aupurura’a i te mau melo paruparu ’e ’aore rā, te anira’a ānei ia rātou ’ia tauturu ia tātou, ’a tāvini ai tātou i te feiā i rāpae mai i tā tātou fa’aro’o, e hōro’a mai te aupurura’a i te mau rāve’a fa’ahiahia nō te ha’aputuputu ia ’Īserā’ela.

Fa’aorara’a i te mau melo ’o tei ho’i mai

« Ma te tūra’ihia ’e te here, e tupu te mau temeio, ’e e ’itehia ia tātou te mau rāve’a nō te fa’aho’i mai i tō tātou mau tuahine ’e mau taea’e « māuiui » i roto i te tauahira’a mau o te ’evanelia a Iesu Mesia ». —Jean B. Bingham²

« ’Ua vai au ’ei melo paruparu nō te roara’a ’e ono matahiti, i tō māua tō’u hoa fa’aipoipo fa’anu’ura’a i roto i te hō’ē ’oire ’āpī. ’Ua haere mai tō’u peresideni ’āpī nō te Sōtaiete Tauturu e fārerei iā’u, ma te ani ē, e nehenehe ānei tāna e tono mai i te hō’ē tuahine nō te hahaere iā’u. Noa atu te ri’ari’a ri’i, ’ua fāri’i au. Nā teie tuahine i hahaere iā’u i te mau ’āva’e ato’a, noa atu tōna tōmea i te mau ’ūri—’e ’ūri iti here ’ōhie noa ho’i tā’u ! E piti matahiti te maoro tōna aupuru-noa-ra’a iā’u, ’e ua fa’atupu te reira i te hō’ē maita’i rahi mau i ni’a iā’u.

« Noa atu ē, e fārereira’a autaea’era’a noa teie mau hahaerera’a, i te tahi ra taime, ’ua ui mai ’oia iā’u i te mau uira’a tei arata’i ia māua i te tahi ’āparaura’a pae vārua. ’Ua fa’atupu te reira i te tahi huru ’ē ri’i i ni’a iā’u, terā rā, ’ua fa’aitoito te reira iā’u ’ia mā’iti, ’ia haere i mua i roto i te ’evanelia ’e ’aore rā, ’ia vai tūtau noa i reira. ’Ua riro teie fa’aotira’a ’ei ’arora’a nā’u, terā rā, ’ua mā’iti au ’ia fārerei i te mau misiōnare tuahine.

« I te mahana vau i haere ai i te purera’a ’ōro’a nō te taime mātāmua i roto i nā matahiti e ono, ’ua ri’ari’a vau i te tomo atu i roto. I tō’u haerera’a atu i te purera’a, te tīa’i-noa-hia ra vau, e tō’u tuahine aupuru, ’e ua ’āpe’e mai iā’u ē tae roa atu i roto i te fare pure. I muri iho, ’ua ’āpe’e mai ’oia iā’u i tō’u pere’o’o, ma te ani mai iā’u ē, e aha te tauturu tāna e rave ’ia maita’i a’e au, i roto i tā’u tauto’ora’a ’ia vai fātata noa i te Fa’aora.

« Nā te taime ’e te here o tō’u tuahine aupuru tei tauturu i te fa’aho’i-fa’ahou-ra’a mai iā’u i te purera’a, ’e tē fa’ariro nei au i tāna mau tauto’ora’a mai te hō’ē tao’a hōro’a rahi roa a’e tei hōro’ahia mai iā’u. ’Ua māuruuru roa vau i tōna vaira’a i pīha’i iho iā’u i tō’u ho’ira’a mai i roto i te ’Ēkālesia a te Fa’aora ra ».

I’oa hunahia, British Columbia, Canada

Mau parau tumu e tāpe’a mai

« Hahaere iā’u i te mau ’āva’e ato’a »

Nāhea ’outou i te fa’a’ite ē, ’ua hau atu tō ’outou ha’apa’o i te feiā tā ’outou e aupuru nei i te tahi atu mau mea ? (’a hi’o Te Parau Ha’api’ira’a ’e te mau Parau Fafau 121: 44).

« Mau uira’a »

Nā roto i te anira’a i te mau uira’a tano, e tauturu ’e e fa’atupu te reira i te hi’opo’ara’a ’e te ha’amaita’ira’a ia tātou iho. ’A ha’amana’o ē, tā tātou aupurura’a tei ’ō atu tōna fā i te ’ōti’a noa nō te autaea’era’a.³

« Tīa’i-noa-hia ra vau »

’Ia ’ite te ta’ata tāta’itahi e mea fāri’i-ma’ita’i-hia ’oia (’a hi’o 3 Nephi 18:32).

« Vaira’a i pīha’i iho iā’u i tō’u ho’ira’a mai »

Nā tō tātou pāturu e fa’atupu i te hō’ē tauira’a faufa’a mau i ni’a i te feiā tei hi’a a’e nei, ’a ho’i mai ai rātou i te Fa’aora ra, ’ia fa’aorahia ho’i (’a hi’o Hebera 12:12 – 13).

Aupurura’a ’e ha’aputuputura’a

« Nā roto i te rāve’a ’ōhie ’e te au maita’i ia ’outou, ’a fa’a’ite i te ta’ata nō te aha Iesu Mesia ’e tāna ’Ēkālesia i riro ai ’ei mea faufa’a nō ’outou.

« … Tā ’outou, ’o te fa’a’itera’a ïa i te mea nō roto mai i tō ’outou ’ā’au ’e ’ia ora mai te au i tō ’outou mau ti’aturira’a ». —Elder Dieter F. Uchtdorf⁴

Aupurura’a ’e fa’a’itera’a i te ’evanelia e tū’ati rāua. Teie te tahi mau rāve’a nō te ha’aputuputu mai i tō tātou mau hoa ’e tō tātou mau ta’ata tupu ’a aupuru ai tātou—’e ’aore rā, ’a aupuru atu nō te ha’aputuputu mai i tō tātou mau hoa ’e tō tātou mau ta’ata tupu.

’A tāvini-’amui. ’A imi i te mau rāve’a nō te tītau manihini i te mau hoa ’e ’aore rā i te mau ta’ata tupu nō te ’amui mai ia ’oe i roto i te aupurura’a ma te pahono atu i te mau anira’a a te hō’ē ta’ata tei roto i te hepohepo. ’A ani atu ia rātou i te tauturu nō te tunu i te mā’a nā te hō’ē metua vahine ’āpī, ’ia haere e fārerei i te hō’ē ta’ata ruhiruhia tē fa’aea nei i pīha’i iho mai, ’e ’aore rā, ’ia tāmā i te fare nō te hō’ē ta’ata ’o tei vai nei i roto i te ma’i.
’A ha’api’i-’amui. ’A ani manihini atu i te hō’ē hoa, ’e ’aore rā, i te hō’ē ta’ata ’aita e haere pinepine nei i te purera’a, ’ia fa’aterehia te hō’ē ha’api’ira’a misiōnare i tō rātou fare nō te hō’ē ta’ata ’o tē fārerei nei i te mau misiōnare. ’E ’aore rā, ’ia pāturu mai tō ’oe hoa nō te fa’anahora’a i te hō’ē ha’api’ira’a i roto i tō ’oe ’utuāfare ’e ’aore rā, ’ia ’āpe’e mai ia ’oe i te hō’ē ha’api’ira’a i roto i te ’utuāfare o te tahi ta’ata ’ē atu.
’A toro te rima ia vetahi ’ē ’ia ’ite atu ’oe ē, tē hina’arohia ra te tauturu. ’A pūpū atu i te fa’anahora’a nō te utara’a ta’ata i te purera’a. ’A ani manihini atu i te mau tamari’i ’ia haere i te mau fa’a’oa’oara’a a te mau feiā ’āpī ’e ’aore rā, a te mau tamari’i nō te Paraimere. E aha te tahi atu mau rāve’a e nehenehe ai ’oe e aupuru ’e e ha’aputuputu mai ?
’A fa’a’ohipa atu i te mau rāve’a tā te ’Ēkālesia i hōro’a mai. Tē hōro’a nei te ’Ēkālesia i te mau rāve’a e rave rahi i te mau melo nō te tauturu ia rātou ’ia fa’a’ite i te ’evanelia. ’A hi’o-haere atu nā roto i te tuha’a « Misiōnare » i roto i te fa’anahora’a Vaira’a buka ’Evanelia, ’e ’a haere i ni’a ia ComeUntoChrist.org ’ia ’ite ’oe i te mau mana’o nāhea i te ha’aputuputu mai ia ’Īserā’ela i roto i tō tātou mau vahi nohora’a.

© 2020 by Intellectual Reserve, Inc. All rights reserved. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Ministering Principles, January 2020. Tahitian. 16984 895