Kenginn ko Pigpig, January 2020

Kunuy Pi u Isreal u Fithik e Machib

Machib e rogon wo’en ni ngan laek wo’en e mulwol rok’ e profet ni ngan kunuy pi u Isreal.

President Russell M. Nelson e ke piningdaed ni ngad ayuwegned ngan kunuy pi u Isreal—“bin th’abi ga’fan e n’en nibe buch u fayleng e dabay.”¹

Ngak’ e gidii’ ni ba’adag ni nge pi’ e ayuw ni ngan kunuy pi u Isreal, machib e reb i kanawo’en nrayag ni ngan rrin’ e biney. Ba wo’en nib thogthog nrayag ni nge thilyeg e yafos ko gidii’. Demuturug ko gadaed be machib ngak’ e gidii’ nike mo’owar fan piningraed ni ngar ayuwegned gadaed ngaed ayuwegned boech e gidii’ nib thil e mich roraed ngodaed, machib e reb i kanawo’en ni ngan kunuy pi u Isreal.

Ayuweg Gathon e Galasia nike Sul

“Ko fare t’ufeg nibe pi’ gelngin, ma’ang’ang era buch, ma gadaed ra peri’eg rogon wo’en nrayag ni gadaed ra fulwegned fapi walagendaed nib bpin nge mo’on ko fare gospel rok Yesus Kristus.” —Jean B. Bingham²

“Ke gaman nel’ e duw nap’an ni kug mo’owar ko galasia ni gu chuw gow figirngig ngu parew ngalan reb e binaew. Fare Relief Society president rog nib be’ech e yib i nangfan salpeg, me fith ko rayag ni nge pi’ be’ ni ngabi nangfan salpeg. Woed ni gube rus buch’uw, machane magaran’ug ngay. Biney e ppin yibi nangfan salpeg ni gubin e pul, dariy fan nib m’ar ko kus—ma bay e kus rog ni rib ba’dag e gidii’! Machib rok’ e ul’ul’ nge gaman l’agruw e duw, ni ri ayuwegneg ni rib gel.

“Oran e milekag rok’ e baga’ ni sabathib, ma boch e ngiyal’ ma fith ngog boch e duwer nima fek mow ngu weliyew mornga’agen e tin nib thothup. Tiney e baga’ ni guma tuntun riy, machane ke thogthog nag ngog ni ngu dugliy ko ngu ul’ul’ nga mm’on ko fare gospel fa ngu par ko gin ni gubay riy. Biney e laem e rib momaw’ ngog, machane kug dugliy ni nguy fagli missionaries ni l’agruw i ppin.

“Boran riy kug dugliy ni ngu un ko fare mu’ulung ko sacrament nike gaman nel’ e duw ma irraray e somm’on rog, yib e murus ngog ni nguwan ngalan. Nap’an ni gu wan ngalan fare galasia, ma fare ppin nima machib ngog e be son nigeg, me un ngog ngalan fare chapel. Tomren, me un ngog nge teg ko karo rog, nibe fith ngog ko uw rogon nrayag ni nge ayuwegneg ni ngu chugur ngak’ fare Tathapeg rog.

“Machib nge fare tu’ufeg rok’ fare ppin ngog e ayuwegneg ngu sul biyay, ma guma tay ni fare murwel rok’ e reb e tawa’ath nikan pi’ ngog ni th’abi fel’. Gube og nag e magar ni’i moy rog nibay u chireg nap’an ko biney e ngiyal’ ni gube sul ko fare Galasia rok’ fare Tathapeg.”

Ndan nog fithngan, British Columbia, Canada

Pi yalen ni ngan tay u Wun’uy

“Yibi nangfan salpeg ni gubin e pul”

Uw rogon nrayag ni ngam dag nib tu’uf fapi gidii’ rom ni gama machib ngoraed ko boech ban’en? (mu guy ko Doctrine nge Covenants 121:44).

“Pi Duwer”

Fith e duwer nib mat’aw e rayag ni nge ayuweg be’ nge fith ir. Tay u wun’un ni fapi machib rodaed e bay fan nib ga’ ko bin ba’aray ni ngan sabathin.³

“Be son nigeg”

Gol ngak’ gubin e gidii’ nike yib (mu guy ko 3 Nephi 18:32).

“Nibay u chireg nap’an ko biney e ngiyal’ ni gube sul”

Ayuw rodaed e rayag ni nge ayuweg e pi gidii’ ni kar dol’gaed ma yaed be gay rogon ni ngar suled ngak fare Tathapeg ni ngan fosag raed (mu guy ko Hebrews 12:12–13).

Machib nge Kunuy

“Demuturug rogon nib mom ngom, mu weliy fan ngak’ e gidii ni Yesus nge fare Galasia Rok’ e bagga’fan ngom. …

“… Muruwel rom e ngam weliy e tin nibay ulan gum’ircha’em mag ul’ul ngam par ko tin nib mich u wun’um ngay.” —Elder Dieter F. Uchtdorf⁴

Machib min wereg fare thin ko fare gospel e ta’ab ban’en. Ba’aray boech kanawo’en nrayag ni ngad kunuyed fapi tafagar rodaed nge gubuliyiror rodaed nap’an ni gadaed be machib—fan machib ma yibe kunuy fapi tafagar rodaed nge fapi gubuliyoror ridaed:

Pigpig u ta’abang. Sapnag rogon nrayag ni ngam pining e tafagar fa gubuliyoror rom ni nge ayuwegnem ngam ayuweg be’ nike tu’uf e ayuw rok’. Fithraed ngar ayuwegned gur ngam fal’ag e ggan ni fan ngak’ reb e mitin ni fan gi fakay e bitir, nangfan salpen e gidii’ nike plubthir, fan ayuweg be’ nike m’ar.
Fanow u ta’abang. Tafney nag reb fapi tafagar fa gubuliyoror ni nge pi’ e tabinaew rok’ ni ngan machib nag fare machib ko fapi missionary riy ngak’ be’ nibe guy e missionaries. Fa reb e tafagar ni nge ayuwegnem ngan tay fare mu’ulung ko missionary u tabinaew rom fa un ngom ko fare machib nga tofen be’.
Ayuweg e gidii’ nap’an ni kam guy nib tu’uf e ayuw. Og nag nrayag ni ngam fekrad ko misa. Pining e bitir nge un ko fafal ko Primary fa fel’yangren. Mang boch kanawo’en nrayag ni ngam machib mag kunuy?
Fanay fapi ayuw nike pi’ e Galasia. Bo’or mit e ayuw nibe pi’ e Galasia ngak’ e gidii’ ni nge ayuwegraed ngar wereged fare thin ko fare gospel. Rayag ni ngam sapnag ko internet “Missionary” guruy nbay ulan fare Gospel Library app mag guy ko ComeUntoChrist.org ko rogon nrayag ni ngan kunuy pi u Isreal ulan e binaew rodaed.

© 2020 by Intellectual Reserve, Inc. All rights reserved. Kan yoloey u Meriken. Kan micheg nag ko thin nu Ngalis: 6/19. Micheg i pilyeg: 6/19. Pilyeg e thin ko Ministering Principles, January 2020. Yapese. 16984 905