ຫລັກທຳຂອງການປະຕິບັດສາດສະໜາກິດ, ເດືອນມັງກອນ 2020

ການເຕົ້າໂຮມອິດສະຣາເອນຜ່ານທາງການປະຕິບັດສາດສະໜາກິດ

ການປະຕິບັດສາດສະໜາກິດເປັນໂອກາດທີ່ຈະຕິດຕາມຄຳແນະນຳຂອງສາດສະດາ ທີ່ຈະເຕົ້າໂຮມອິດສະຣາເອນ.

ປະທານຣະໂຊ ເອັມ ແນວສັນ ໄດ້ເຊື້ອເຊີນເຮົາໃຫ້ເຕົ້າໂຮມອິດສະຣາເອນ ຊຶ່ງເປັນ—“ສິ່ງສຳຄັນທີ່ສຸດ ທີ່ກຳລັງເກີດຂຶ້ນຢູ່ໃນໂລກ ໃນທຸກວັນນີ້.”¹

ຕໍ່ຜູ້ທີ່ຢາກເປັນພາກສ່ວນຂອງວຽກງານຂອງການເຕົ້າໂຮມອິດສະຣາເອນ, ການປະຕິບັດສາດສະໜາກິດສາມາດເປັນໂອກາດທີ່ດີເລີດ. ມັນເປັນວິທີທີ່ດົນໃຈ ທີ່ຈະປ່ຽນແປງຊີວິດຂອງຜູ້ຄົນ. ບໍ່ວ່າເຮົາຈະປະຕິບັດສາດສະໜາກິດຕໍ່ສະມາຊິກທີ່ບໍ່ເຂັ້ມແຂງ ຫລື ເຊື້ອເຊີນເຂົາເຈົ້າໃຫ້ຊ່ວຍເຫລືອເຮົາ ຂະນະທີ່ເຮົາຮັບໃຊ້ຄົນທີ່ນັບຖືສາດສະໜາອື່ນກໍຕາມ, ການປະຕິບັດສາດສະໜາກິດຈະໃຫ້ໂອກາດເພື່ອເຕົ້າໂຮມອິດສະຣາເອນ.

ການຊ່ວຍໃຫ້ສະມາຊິກເກົ່າກັບຄືນມາ

“ດ້ວຍຄວາມຮັກເປັນປັດໃຈທີ່ຊຸກຍູ້, ສິ່ງມະຫັດສະຈັນຈະເກີດຂຶ້ນ, ແລະ ເຮົາຈະພົບເຫັນເສັ້ນທາງທີ່ຈະນຳເອື້ອຍອ້າຍນ້ອງທີ່ ‘ເສຍໄປ’ ຂອງເຮົາເຂົ້າມາສູ່ອ້ອມກອດທີ່ລວມໝົດທຸກຢ່າງຂອງພຣະກິດຕິຄຸນຂອງພຣະເຢຊູຄຣິດ.” —ຈີນ ບີ ບິງກຳ²

“ຂ້າພະເຈົ້າບໍ່ເຂັ້ມແຂງເປັນເວລາເກືອບເຖິງຫົກປີ ຕອນສາມີກັບຂ້າພະເຈົ້າໄດ້ຍ້າຍໄປຢູ່ເມືອງໃໝ່. ປະທານສະມາຄົມສະຕີສົງເຄາະໃໝ່ຂອງຂ້າພະເຈົ້າໄດ້ມາຢ້ຽມຢາມ, ໄດ້ຖາມຖ້າຫາກວ່າ ເພິ່ນຊິໃຫ້ເອື້ອຍນ້ອງຄົນໜຶ່ງມາຢ້ຽມຢາມຂ້າພະເຈົ້າຊິໄດ້ບໍ. ດ້ວຍຄວາມກັງວົນເລັກນ້ອຍ, ຂ້າພະເຈົ້າໄດ້ຕົກລົງ. ເອື້ອຍນ້ອງຄົນນີ້ ໄດ້ມາຢ້ຽມຢາມຂ້າພະເຈົ້າທຸກເດືອນ, ເຖິງແມ່ນວ່າລາວແພ້ຂົນໝາກໍຕາມ—ແລະ ຂ້າພະເຈົ້າກໍມີໝາທີ່ມັກຝັ້ນມັກເ ຝືອຜູ້ຄົນຢູ່ແລ້ວ! ການປະຕິບັດສາດສະໜາກິດຂອງນາງໄດ້ສືບຕໍ່ຈົນເຖິງສອງປີ, ແລະ ກໍມີຜົນກະທົບຢ່າງໃຫຍ່ຫລວງຕໍ່ຊີວິດຂອງຂ້າພະເຈົ້າ.

“ເຖິງແມ່ນວ່າການຢ້ຽມຢາມຂອງນາງ ສ່ວນຫລາຍມີແຕ່ເວົ້າລົມກັນແບບທຳມະດາ, ແຕ່ບາງເທື່ອນາງກໍໄດ້ຖາມ ຄຳຖາມ ທີ່ນຳໄປສູ່ການສົນທະນາເລື່ອງຝ່າຍວິນຍານ. ສິ່ງເຫລົ່ານີ້ໄດ້ເຮັດໃຫ້ຂ້າພະເຈົ້າຮູ້ສຶກບໍ່ສະບາຍໃຈເລັກນ້ອຍ, ແຕ່ມັນໄດ້ກະຕຸ້ນຂ້າພະເຈົ້າໃຫ້ຕັດສິນໃຈວ່າ ຂ້າພະເຈົ້າຄວນດຳເນີນໄປຕໍ່ໃນພຣະກິດຕິຄຸນ ຫລື ຢູ່ໃນທີ່ເດີມ. ຂ້າພະເຈົ້າບໍ່ຮູ້ວ່າຊິຕັດສິນໃຈແນວໃດ, ແຕ່ໄດ້ເລືອກໃຫ້ເອື້ອຍນ້ອງຜູ້ສອນສາດສະໜາມາຢ້ຽມຢາມ.

“ໃນມື້ທີ່ຂ້າພະເຈົ້າກັບໄປຮ່ວມກອງປະຊຸມສິນລະລຶກເປັນເທື່ອທຳອິດ ໃນຫົກປີ, ຂ້າພະເຈົ້າຮູ້ສຶກຢ້ານກົວ ທີ່ຈະເຂົ້າໄປຂ້າງໃນ. ເມື່ອຂ້າພະເຈົ້າຍ່າງເຂົ້າໄປໃນໂບດ, ເອື້ອຍນ້ອງຜູ້ປະຕິບັດສາດສະໜາກິດຂອງຂ້າພະເຈົ້າ ໄດ້ຖ້າຂ້າພະເຈົ້າຢູ່, ແລະ ນາງກໍໄດ້ຍ່າງເຂົ້າໄປໃນຫ້ອງນະມັດສະການພ້ອມກັບຂ້າພະເຈົ້າ. ຫລັງຈາກໂບດ, ນາງກໍໄດ້ຍ່າງໄປສົ່ງຂ້າພະເຈົ້າຢູ່ລົດ, ໄດ້ຖາມຂ້າພະເຈົ້າວ່າ ມີສິ່ງໃດບໍທີ່ນາງພໍຊ່ວຍໄດ້ ເພື່ອໃຫ້ຂ້າພະເຈົ້າເຂົ້າໃກ້ພຣະຜູ້ຊ່ວຍໃຫ້ລອດຫລາຍກວ່າເກົ່າ.

“ເວລາ ແລະ ຄວາມຮັກຂອງເອື້ອຍນ້ອງຜູ້ປະຕິບັດສາດສະໜາກິດຂອງຂ້າພະເຈົ້າ ໄດ້ນຳພາຂ້າພະເຈົ້າກັບຄືນໄປເຂັ້ມແຂງ, ແລະ ຂ້າພະເຈົ້າໄດ້ຖືວ່າ ຄວາມພະຍາຍາມຂອງນາງ ເປັນຂອງປະທານທີ່ຍິ່ງໃຫຍ່ທີ່ສຸດຢ່າງໜຶ່ງ ທີ່ໄດ້ມອບໃຫ້ຂ້າພະເຈົ້າ. ຂ້າພະເຈົ້າມີຄວາມກະຕັນຍູຫລາຍ ທີ່ນາງ ໄດ້ຢູ່ຄຽງຂ້າງຂ້າພະເຈົ້າ ໃນການເດີນທາງກັບຄືນ ຫາສາດສະໜາຈັກຂອງພຣະຜູ້ຊ່ວຍໃຫ້ລອດ.”

ສະຫງວນນາມ, ແຂວງບຣິດິດ ໂຄລຳເບຍ, ປະເທດການາດາ

ຫລັກທຳທີ່ໃຫ້ພິຈາລະນາ

“ໄດ້ມາຢ້ຽມຢາມຂ້າພະເຈົ້າທຸກເດືອນ”

ທ່ານຈະສະແດງອອກວ່າ ທ່ານຫ່ວງໃຍຕໍ່ຄົນທີ່ທ່ານປະຕິບັດສາດສະໜາກິດ ຫລາຍກວ່າສິ່ງອື່ນໆແນວໃດ? (ເບິ່ງ ຄຳສອນ ແລະ ພັນທະສັນຍາ 121:44).

“ຄຳຖາມ”

ການຖາມຄຳຖາມທີ່ຖືກຕ້ອງ ສາມາດຊ່ວຍກະຕຸ້ນໃຫ້ຄິດສຳຫລວດຕົວເອງໄດ້. ໃຫ້ຈື່ຈຳວ່າ ການປະຕິບັດສາດສະໜາກິດຂອງເຮົາ ມີຈຸດປະສົງທີ່ເກີນກວ່າການພຽງແຕ່ເປັນການພົບປະສັງສັນເທົ່ານັ້ນ.³

“ໄດ້ຖ້າຂ້າພະເຈົ້າຢູ່”

ທຸກຄົນຄວນຮູ້ສຶກໄດ້ຮັບການຕ້ອນຮັບ (ເບິ່ງ 3 ນີໄຟ 18:32).

“ໄດ້ຢູ່ຄຽງຂ້າງຂ້າພະເຈົ້າ ໃນການເດີນທາງກັບຄືນ”

ກຳລັງໃຈຂອງເຮົາສາມາດສ້າງຄວາມແຕກຕ່າງອັນໃຫຍ່ຫລວງໄດ້ ຕໍ່ຜູ້ທີ່ພະຍາຍາມກັບຄືນມາຫາພຣະຜູ້ຊ່ວຍໃຫ້ລອດ ແລະ ຮັບການປິ່ນປົວ (ເບິ່ງ ເຮັບເຣີ 12:12–13).

ການປະຕິບັດສາດສະໜາກິດ ແລະ ການເຕົ້າໂຮມ

“ໃນວິທີທາງໃດກໍຕາມທີ່ເບິ່ງວ່າ ເປັນແບບທຳມະຊາດ ແລະ ປົກກະຕິຕໍ່ທ່ານ, ໃຫ້ບອກຜູ້ຄົນວ່າ ເປັນຫຍັງພຣະເຢຊູຄຣິດ ແລະ ສາດສະໜາຈັກຂອງພຣະອົງ ຈຶ່ງມີຄວາມສຳຄັນຕໍ່ທ່ານ. …

“… ບົດບາດຂອງທ່ານແມ່ນ ທີ່ຈະແບ່ງປັນສິ່ງທີ່ທ່ານມີຢູ່ໃນໃຈ ແລະ ດຳລົງຊີວິດ ໃຫ້ກົງກັບຄວາມເຊື່ອຂອງທ່ານ.” —ແອວເດີ ດີເດີ ແອັຟ ອຸກດອບ⁴

ການປະຕິບັດສາດສະໜາກິດ ແລະ ການແບ່ງປັນພຣະກິດຕິຄຸນ ຈະຄຽງຄູ່ກັນໄປ. ຕໍ່ໄປນີ້ເປັນບາງວິທີທີ່ເຮົາສາມາດເຕົ້າໂຮມໝູ່ເພື່ອນ ແລະ ເພື່ອນບ້ານຂອງເຮົາ ຂະນະທີ່ເຮົາປະຕິບັດສາດສະໜາກິດ—ຫລື ປະຕິບັດສາດສະໜາກິດ ຂະນະທີ່ເຮົາເຕົ້າໂຮມໝູ່ເພື່ອນ ແລະ ເພື່ອນບ້ານຂອງເຮົາ:

ຮັບໃຊ້ນຳກັນ. ຊອກຫາໂອກາດທີ່ຈະເຊື້ອເຊີນໝູ່ເພື່ອນ ຫລື ເພື່ອນບ້ານໃຫ້ມາຮ່ວມເຮັດການປະຕິບັດສາດສະໜາກິດກັບທ່ານ ເພື່ອຊ່ວຍເຫລືອຜູ້ຄົນທີ່ຂັດສົນ. ຂໍໃຫ້ເຂົາເຈົ້າຊ່ວຍທ່ານເຮັດຂອງກິນໄປໃຫ້ເອື້ອຍນ້ອງທີ່ຫາກໍຄອດລູກ, ໄປຢ້ຽມຢາມເພື່ອນບ້ານຜູ້ອະວຸໂສ, ຫລື ທຳຄວາມສະອາດເຮືອນຊານໃຫ້ຄົນທີ່ເຈັບປ່ວຍ.
ສິດສອນນຳກັນ. ໃຫ້ຄິດທີ່ຈະເຊື້ອເຊີນໝູ່ເພື່ອນ ຫລື ເພື່ອນບ້ານ ຜູ້ທີ່ບໍ່ໄປໂບດເລື້ອຍໆ ໃຫ້ຈັດວັນສອນບົດຮຽນໂດຍຜູ້ສອນສາດສະໜາໃຫ້ບາງຄົນ ຢູ່ເຮືອນຂອງເຂົາເຈົ້າ. ຫລື ໝູ່ເພື່ອນຂອງທ່ານສາມາດສະໜັບສະໜູນທ່ານ ໂດຍການຈັດບົດຮຽນຢູ່ເຮືອນຂອງທ່ານ ຫລື ໄປຟັງບົດຮຽນກັບທ່ານຢູ່ເຮືອນຂອງຄົນອື່ນ.
ເອື້ອມອອກໄປຫາຄົນອື່ນເມື່ອທ່ານເຫັນຄວາມຕ້ອງການ. ສະເໜີການຮັບສົ່ງພາໄປໂບດ. ເຊື້ອເຊີນເດັກນ້ອຍໃຫ້ໄປຮ່ວມກິດຈະກຳຂອງຊາວໜຸ່ມ ຫລື ຊັ້ນປະຖົມໄວ. ມີວິທີອື່ນໃດແດ່ທີ່ທ່ານສາມາດປະຕິບັດສາດສະໜາກິດ ແລະ ເຕົ້າໂຮມ?
ໃຊ້ແຫລ່ງຊ່ວຍເຫລືອຂອງສາດສະໜາຈັກທີ່ອະນຸມັດ. ສາດສະໜາຈັກມີແຫລ່ງຊ່ວຍເຫລືອຫລາຍຢ່າງໃຫ້ສະມາຊິກ ເພື່ອຊ່ວຍເຂົາເຈົ້າໃນການແບ່ງປັນພຣະກິດຕິຄຸນ. ທ່ານສາມາດຊອກຫາພາກ “ຜູ້ສອນສາດສະໜາ” ຢູ່ໃນແອພ ຫ້ອງສະໝຸດພຣະກິດຕິຄຸນ ແລະ ຢູ່ທີ່ ComeUntoChrist.org ສຳລັບແນວຄິດກ່ຽວກັບວິທີເຕົ້າໂຮມອິດສະຣາເອນ ຢູ່ໃນຊຸມຊົນຂອງເຮົາ.

© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Ministering Principles, January 2020. Laotian. 16984 331