Prensip Sèvis Pastoral, Fevriye 2020

Sèvis pastoral atravè Istwa Familyal

Ilistrasyon pa Joshua Dennis; imaj nan fon an ak foto Getty Images

Ede yon moun avèk istwa familyal li se yon mwayen puisan pou rann sèvis pastoral. Lè ou konekte lòt moun avèk zansèt yo atravè istwa yo ak detay sou zansèt yo, ou fini pa ranpli vid nan kè yo ke pafwa yo pa t reyalize yo genyen (gade Malachi 4:5–6).

Kit se yon moun ki manm legliz la tout lavi oswa yon moun ki pa t janm tande pale de levanjil retabli Jezikri a, tout pitit Bondye gen yon gwo dezi pou konnen ki kote yo sòti.

Souvan sa pa pran tan pou kite yon enpresyon pwofon ak dirab, jan sa demontre nan istwa ki pi ba yo.

Retwouve Fanmi a 30,000 Pye

Resaman nan avyon pou tounen lakay mwen, m te chita akote Steve, ki te pataje kèk pati nan istwa pèsonèl li. Li te gradye nan lekòl segondè, antre nan lame amerikèn kòm yon espesyalis kominikasyon nan laj 18 an, epi avan lontan li te kòmanse travay nan Mezon Blanch, nan founi sipò kominikasyon pou Prezidan Ameriken an. Soti laj 18 rive 26 an, li te sèvi de Prezidan Etazini. Istwa l yo te fasinan!

Mwen te di “Steve”, “ou sipoze ekri istwa sa yo pou benefisye posterite ou! Yo sipoze resevwa istwa sa yo dirèkteman apati pwòp pèspektiv pa ou.” Li te dakò.

Apresa Lespri a te pouse m mande li kisa li te konnen konsènan zansèt li yo. Steve te konnen anpil bagay sou bò manman li, enkli yon istwa sou jan fanmi li te al dine yon fwa avèk Abraham Lincoln pandan l t ap mennen kanpay li nan tout kwen peyi a nan eleksyon prezidansyèl 1860 la.

Sepandan, li pa t konnen anpil konsènan bò papa li. Li te vrèman anvi konnen plis. M te rale telefòn mwen epi m te louvri aplikasyon FamilySearch la. “Steve, nou ka jwenn fanmi ou kounye a menm!”

Mwen te konekte sou Wi-Fi avyon an. M te depoze telefòn mwen an sou ti tab la ki te devan m nan pou nou toulède te ka wè. Nou te fouye FamilyTree. Nan espas kèlke minit nou toulède t ap gade sètifika maryaj aryè gran-papa li ak aryè granmè li.

Li te di: “Se yo!” “Mwen raple m siyati li kounye a!”

Yon espri gwo kontantman te anvayi nou tou de. Nou te kontinye kreye pwofil pou lòt zansèt ki pa t twò rekoni l yo pandan 45 minit apre yo. Li te mande m pou m te pwomèt li ke nou t ap kontinye chèche ansanm nan Colorado. Nou youn te bay lòt enfòmasyon pou n te rete an kontak pandan avyan an t ap ateri.

Vwala noumenm, ki nan yon avyon a 30,000 pye (9,145 m) anlè, avèk yon aparèy elektwonik nan men mwen, ap chèche enfòmasyon sou yon mesye ak yon fi ki te marye depi 100 tan men ki te pèdi pou limenm ak fanmi li. Enkwayab! Men nou te jwenn yo. Fanmi te konekte. Li te sonje anpil istwa. Te gen anpil santiman rekonesans pou teknoloji a ak zouti l yo. Sa sete yon mirak tou senpleman.

Jonathan Petty, Kolorado, USA

Antoure ak Nouvo Fanmi

Maria te inaktif pou plis pase 20 ane. Sa gen kèk mwa, nou te pase kèk èdtan avèk li lakay nou, ap eksplore fanmi li atravè dokiman resansman ak lòt rejis. Te gen yon moman kote li te tonbe kriye pandan l t ap di: “Mwen aprann plis sou fanmi m pandan dezètan pase jan m te konnen pandan tout lavi mwen!”

Alafen moman nou te pase ansanm nan, mwen te prezante l fonksyon Fanmi Ki Bò Kote m yo nan aplikasyon FamilyTree a. San nou pa t konnen, mari m avèk mwen te gen koneksyon familyal avèk Maria. Li te tonbe kriye ankò, pandan l t ap di li te panse ke li pa t gen pèsonn. Li pa t janm konnen li te gen fanmi nan zòn nan. Kèk semèn apresa Maria te rankontre avèk nou. Kounye a l ap travay pou prepare l pou l al nan tanp, epi li rankontre anpil “nouvo” kouzen nan pawas nou an!

Carol Riner Everett, Karolin Dinò, USA

Resèt pou Sèvis pastoral

Ashley, yon sè m ap vizite nan sèvis pastoral, avèk mwen gen liv resèt kuizin granmè nou te ba nou. Pa l la soti kote aryè granmè li, epi pa m nan se yon liv ke m te rasanble lè m te eritye bwat resèt granmè Greenwood la lè l te mouri.

Ashley avèk mwen te chwazi yon resèt nan liv kuizin nou yo, epi nou te rankontre apre travay yon jou swa pou nou te eseye yo. Li te chwazi yon resèt pou desè, konsa nou te fè l avan epi nou te mete l nan fou. Mwen te chwazi chip dip—yon espesyalite nan chak fèt nan fanmi Greenwood la. Pitit fi Ashley a, Alice, te ede nou teste manje yo. Apresa, paske Ashley pa t vle timoun li yo manje tout desè a, li te pote kèk pou sè l te responsab nan sèvis pastoral yo.

Sa m te renmen plis nan sware resèt nou an sèke pandan nou t ap fè manje ak patisri a, nou t ap pale sou tout sijè sèvis pastoral regilye yo—difikilte pa l avèk pa mwen. Men nou te pale de granmè nou ak manman nou tou, sa ki te touche nou toulède.

Jenifer Greenwood, Utah, USA

Fason Espesifik pou Ede

Istwa familyal ka louvri pòt pou opòtinite sèvis pastoral lè sanble pa gen okenn lòt fason. Konsidere kèk ide ou ta ka eseye.

Ede yo anrejistre ak telechaje anrejistreman odyo sou istwa istwa familyal yo, espesyalman sa yo ki koresponnn avèk foto yo.
Kreye yon tablo grafik oswa yon lòt dokiman istwa familyal ki ka enprime ke w ka bay kòm yon kado.
Anseye fason pou kaptire pwòp istwa pa yo pa mwayen ekri nan jounal yo nan yon fason yo renmen. Jounal odyo? Jounal foto? Jounal videyo? Gen anpil opsyon pou moun ki pa fin renmen modèl jounal regilye yo.
Ale nan tanp ansanm pou fè òdonans pou zansèt yo. Oubyen ofri pou w fè òdonans pou non fanmi yo si yo gen plis pase sa yo ka jere.
Rankontre ansanm pou nou pataje tradisyon familyal.
Pran yon klas istwa familyal ansanm.

© 2020 Intellectual Reserve, Inc. All rights reserved. Enprime nan Etazini Damerik. Apwobasyon Anglè: 6/19. Apwobasyon pou tradiksyon: 6/19. Tradiksyon pou Ministering Principles, February 2020. Haitian. 16995 036