Mga Prinsipyo sa Ministering, Pebrero 2020

Ministering paagi sa Family History

Drowing ni Joshua Dennis; background nga imahe kag litrato iya sang Getty Images

Ang pagbulig sa isa ka tawo paagi sa ila family history isa ka epektibo nga paagi sa pag-minister. Kon inyo ginaangot ang iban sa ila mga kaliwat paagi sa mga istorya kag detalye sang pamilya, ginapun-an ninyo ang mga kakulangan nga ila nabatyagan nga kon kaisa wala nila mahibal-an (tan-awa sa Malaquias 4:5–6).

Bisan sa dugay na nga miyembro sang Simbahan ukon sa tawo nga wala pa gid nakabati parte sa ginpanumbalik nga ebanghelyo ni Jesucristo, ang tanan nga anak sang Dios gusto gid makahibalo kon diin sila naghalin.

Sa masami indi madugay ang magbilin sang mabaskog kag nagalawig nga impresyon, pareho sa ginapakita sa masunod nga mga istorya.

Pagpangita sang Pamilya sa 30,000 Katapak nga Kataason

Samtang nagasakay sa eroplano papuli, natupad ko si Steve, nga nagsugid sa akon sang pila ka bahin sang iya personal nga kabuhi. Naggradweyt sia sa hayskul, nagsulod sa U.S. Army bilang espesyalista sa komunikasyon sa edad nga 18 anyos, kag wala madugayi nakasulod sa White House, nga nagasuporta sang mga komunikasyon sa Pangulo sang Estados Unidos. Sugod sa edad 18 tubtob 26, nag-alagad sia sa duha ka mga Pangulo sang Estados Unidos. Kanami sang iya mga inagihan!

“Steve,” siling ko, “kinahanglan mo isulat ang imo mga istorya para sa imo mga kabataan sa ulihi! Kinahanglan nila mabatian ining mga istorya halin mismo sa imo.” Nagsugot sia.

Dayon gintulod ako sang Espiritu nga pamangkuton sia kon ano ang iya nahibal-an parte sa iya mga katigulangan. Madamo si Steve sang nahibal-an sa parte sang iya iloy, lakip na ang istorya nga nakaupod sang iya pamilya sadto si Abraham Lincoln sa pagpanyapon samtang nagapangampanya sia sa mga probinsya sang 1860 nga pang-panguluhan nga eleksyon sang U.S.

Ugaling, diutay lang kaayo ang iya nahibal-an sa bahin sang iya amay. Gusto gid niya kuntani nga mas makahibalo pa. Ginpaandar ko ang akon telepono kag ginbuksan ang FamilySearch nga app. “Steve, pwede naton pangitaon ang imo pamilya subong!”

Nagkonek ako sa Wi-Fi sang eroplano. Gintungtong ko ang akon telepono sa lululamesa sa akon atubang para makita namon nga duha. Gin-search namon ang FamilyTree. Pila lang ka minutos pareho kami nga nagatulok sa rehistro sa kasal sang iya lolo-sa-tuhod sa iya lola-sa-tuhod.

“Sila ina!” siling niya. “Nadumduman ko na ang iya apelyido!”

Pareho kami nga napuno sang balatyagon sang kalipay. Ginsugdan namon sa pagsulat sang mga impormasyon parte sa iya indi-kaayo-kilala nga mga paryente sa nagdason nga 45 minutos. Ginpapromisa niya ako nga padayunon namon ang pag-search nga magkaupod sa Colorado. Nagbayluhanay kami sang numero sang telepono samtang manughugpa na ang eroplano.

Ari kami, nagabiyahe sang 30,000 katapak (9,145 m) sa kahanginan, gamit ang isa ka instrumento nga daw palad ko lang kadako, nga nagapangita sang lalaki kag babayi nga ginkasal 100 katuig na ang nagligad nga nalimtan na niya kag sang iya pamilya. Indi mapatihan! Pero nakita namon sila. Naangot na ang mga pamilya. Nadumduman ang mga istorya. Nakabatyag ako sang dako nga kapasalamatan sa teknolohiya kag sa mga instrumento. Isa matuod ato ka milagro.

Jonathan Petty, Colorado, USA

Ginpalibutan sang Bag-o nga Pamilya

Wala na nagasimba si Maria sing masobra 20 katuig. Pila ka bulan ang nagligad, nagtiner kami sing duha ka oras sa iya balay, nga nagapangita sang iya pamilya paagi sa census kag sa iban pa nga mga rekord. Sa isa ka punto naghibi sia nga nagasiling, “Mas madamo pa ako sang nahibal-an parte sa akon pamilya sa sulod sang duha ka oras sangsa nahibal-an ko sa bilog ko nga kabuhi!”

Sang nagahingapos na kami, ginpresenta namon sa iya ang Relatives Around Me [Mga Paryente sa Akon Palibot] nga isa ka feature sa FamilyTree app. Naggwa nga ako kag ang akon bana malayo nga paryente ni Maria. Naghilibion sia liwat, nga nagasiling nga abi niya nagaisahanon na lang sia. Wala sia makahibalo nga may pamilya sia sa amo nga lugar. Pila ka semana ang nagligad nakigkita si Maria sa amon bishop. Ginahikot na niya karon ang paghanda sa pagsulod sa templo, kag nakilala niya ang madamo nga “bag-o” nga mga pakaisa sa amon ward!

Carol Riner Everett, North Carolina, USA

Recipe para sa Ministering

Ako kag si Ashley, ang sister nga akon ginaministeran, pareho nga may cookbook halin sa amon mga lola. Ang iya halin sa iya lola-sa-tuhod, kag ang akon libro ginpahimo ko halin sang ginpanubli ko ang mga recipe nga sinulat sa card ni Lola Greenwood sang sia mapatay.

Nagpili kami ni Ashley sang isa ka recipe sa amon mga cookbook, kag nag-upod kami isa ka gab-i pagkatapos sang trabaho para testingan ang mga ini. Pangyam-is ang iya ginpili nga recipe, gani gin-una namon ini kag ginsulod sa oven. Sawsawan sang chichirya ang akon ginpili—nga kinaandan sa tagsa ka party sang pamilya Greenwood. Ang bata ni Ashley nga si Alice nagbulig sa amon nga tilawan ang pagkaon. Tapos, kay indi gusto ni Ashley nga ubuson sang iya kabataan ang pangyam-is, gindul-ong niya ang iban sa mga sister nga iya ginaministeran.

Ang nanamian namon sa amon pagluto-luto amo nga samtang nagaluto kami, nagaistoryahanay kami parte sa tanan nga regular nga mga topiko sa ministering—ang iya mga kabudlayan kag ang akon man. Pero ginaistoryahan man namon ang amon mga lola kag mga iloy, nga makatalandog para sa amon duha.

Jenifer Greenwood, Utah, USA

Pila ka mga Paagi sa Pagbulig

Ang family history makabukas sang mga pwertahan sang mga oportunidad sa pag-minister kon daw wala na gid sang iban pa. Ari ang pila ka mga ideya nga ayhan gusto ninyo tilawan.

Buligi sila nga magrekord kag mag-upload sang mga audio recording sang mga istorya sa family history, labi na atong may kaupod nga mga litrato.
Maghimo sang fan chart ukon iban pa nga dokumento sa family history nga pwede imprintahon nga pwede mo mapanghatag bilang regalo.
Magtudlo sang pamaagi nga matipigan nila ang ila kaugalingon nga kasaysayan paagi sa paghimo sang journal sa paagi nga nanamian nila. Audio journal? Journal sang mga litrato? Mga video log? Madamo sang pwede pilian sang mga indi gusto sang regular nga paagi sa paghimo sang journal.
Magkadto sa templo nga ululupod para maghikot sang mga ordinansa para sa mga katigulangan. Ukon magtanyag nga maghikot sang mga ordinansa para sa mga pamilya kon may sobra sila sangsa ila masarangan.
Magtipon-tipon sa pagpaambit sang mga tradisyon sang pamilya.
Magtambong nga ululupod sa klase sang family history.

© 2020 Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, February 2020. Hiligaynon. 16995 861