ຫລັກທຳຂອງການປະຕິບັດສາດສະໜາກິດ, ເດືອນກຸມພາ 2020

ການປະຕິບັດສາດສະໜາກິດຜ່ານທາງປະຫວັດຄອບຄົວ

ຮູບພາບປະກອບ ໂດຍ ໂຈຊົວ ເດັນນິສ; ພາບຂ້າງຫລັງ ແລະ ຮູບຖ່າຍຈາກ Getty Images

ການຊ່ວຍເຫລືອບາງຄົນກັບປະຫວັດຄອບຄົວຂອງເຂົາເຈົ້າ ເປັນວິທີໜຶ່ງທີ່ມີພະລັງ ໃນການປະຕິບັດສາດສະໜາກິດ. ເມື່ອທ່ານເຊື່ອມໂຍງຄົນອື່ນເຂົ້າກັບບັນພະບຸລຸດຂອງເຂົາເຈົ້າ ຜ່ານທາງເລື່ອງລາວ ແລະ ລາຍລະອຽດກ່ຽວກັບຄອບຄົວ, ແລ້ວທ່ານຈະກາຍເປັນຄົນຕື່ມເຕັມຊ່ອງວ່າງຢູ່ໃນໃຈຂອງເຂົາເຈົ້າ ຊຶ່ງບາງເທື່ອເຂົາເຈົ້າບໍ່ຮູ້ຊ້ຳວ່າຕົວເອງມີ (ເບິ່ງ ມາລາກີ 4:5–6).

ບໍ່ວ່າຈະເປັນສະມາຊິກຕະຫລອດຊີວິດ ຫລື ເປັນບາງຄົນທີ່ບໍ່ເຄີຍໄດ້ຍິນເລື່ອງພຣະກິດຕິຄຸນທີ່ຟື້ນຟູຂອງພຣະເຢຊູຄຣິດ, ລູກໆທຸກຄົນຂອງພຣະເຈົ້າກໍມີຄວາມໃຝ່ຝັນຢາກຮູ້ຈັກວ່າ ເຂົາເຈົ້າມາຈາກໃສ.

ສ່ວນຫລາຍຈະບໍ່ໃຊ້ເວລາດົນ ທີ່ຈະປະຄວາມປະທັບໃຈທີ່ເລິກຊຶ້ງ ແລະ ຍືນຍົງ, ດັ່ງທີ່ສາທິດຢູ່ໃນເລື່ອງລາວດັ່ງຕໍ່ໄປນີ້.

ການຊອກຫາຄອບຄົວຢູ່ 30,000 ຟີດ

ເມື່ອບໍ່ດົນມານີ້ ຂະນະທີ່ເດີນທາງກັບບ້ານ, ຂ້າພະເຈົ້າເຫັນຕົວເອງຢູ່ທາງຂ້າງຂອງສະຕີບ, ຜູ້ຊຶ່ງໄດ້ເລົ່າພາກສ່ວນໜຶ່ງຂອງເລື່ອງສ່ວນຕົວໃຫ້ຂ້າພະເຈົ້າຟັງ. ລາວໄດ້ຮຽນຈົບມັດທະຍົມປາຍ, ໄດ້ເຂົ້າຮ່ວມກອງທັບສະຫະລັດ ຖານະຜູ້ຊ່ຽວຊານດ້ານການສື່ສານ ຕອນມີອາຍຸ 18 ປີ, ແລະ ບໍ່ດົນໄດ້ເລີ່ມຕົ້ນທຳງານຢູ່ທີ່ທຳນຽບຂາວ, ໃຫ້ຄວາມຊ່ວຍເຫລືອດ້ານການສື່ສານແກ່ປະທານາທິບໍດີຂອງສະຫະລັດອາເມຣິກາ. ຈາກອາຍຸ 18 ປີ ເຖິງ 26 ປີ, ລາວໄດ້ຮັບໃຊ້ປະທານາທິບໍດີຂອງສະຫະລັດອາເມຣິກາສອງຄົນ. ເລື່ອງລາວຂອງລາວແມ່ນໜ້າສົນໃຈຂະໜາດ!

“ສະຕີບ,” ຂ້າພະເຈົ້າເວົ້າ, “ເຈົ້າຕ້ອງຂຽນເລື່ອງເຫລົ່ານີ້ລົງໄວ້ເພື່ອລູກຫລານຂອງເຈົ້າ! ເຂົາເຈົ້າຕ້ອງການເລື່ອງເຫລົ່ານີ້ຈາກມຸມມອງຂອງເຈົ້າເອງ.” ລາວກໍເຫັນດ້ວຍ.

ແລ້ວພຣະວິນຍານໄດ້ກະຕຸ້ນຂ້າພະເຈົ້າໃຫ້ຖາມລາວ ຖ້າຫາກວ່າລາວຮູ້ກ່ຽວກັບບັນພະບຸລຸດຂອງລາວຫລືບໍ່. ສະຕີບຮູ້ຫລາຍກ່ຽວກັບຍາດທາງແມ່ຂອງລາວ, ລວມທັງເລື່ອງໜຶ່ງກ່ຽວກັບຄອບຄົວຂອງລາວ ໄດ້ຮັບປະທານອາຫານກັບ ອັບຣາຮາມ ລິງກັນ ຂະນະທີ່ເພິ່ນອອກຫາຫາງສຽງ ຢູ່ໃນເຂດຊົນນະບົດ ກ່ອນການເລືອກຕັ້ງປະທານາທິບໍດີຂອງສະຫະລັດ ປີ 1860.

ແຕ່ລາວບໍ່ຮູ້ຫລາຍກ່ຽວກັບຍາດທາງພໍ່ຂອງລາວ. ລາວກໍຢາກຮູ້ຕື່ມອີກຫລາຍແທ້ໆ. ຂ້າພະເຈົ້າໄດ້ດຶງເອົາມືຖືອອກມາ ແລະ ເປີດແອພ FamilySearch. “ສະຕີບ, ພວກເຮົາສາມາດຊອກຫາຄອບຄົວຂອງເຈົ້າດຽວນີ້ເລີຍ!”

ຂ້າພະເຈົ້າໄດ້ຕໍ່ມືຖືໃສ່ ວາຍຟາຍ ຢູ່ໃນຍົນ. ຂ້າພະເຈົ້າໄດ້ວາງມືຖືໄວ້ເທິງຖາດຢູ່ຕໍ່ໜ້າຂ້າພະເຈົ້າ ເພື່ອວ່າພວກເຮົາທັງສອງຈະສາມາດຫລຽວເຫັນ. ພວກເຮົາໄດ້ຊອກຫາຢູ່ໃນແຜນລຳດັບຄອບຄົວ. ພາຍໃນສອງສາມນາທີ ພວກເຮົາທັງສອງກໍໄດ້ເຫັນໃບແຕ່ງງານຂອງພໍ່ຕູ້ທວດຂອງລາວ ກັບແມ່ຕູ້ທວດຂອງລາວ.

“ແມ່ນເຂົາເຈົ້າອີ່ຫລີ!” ລາວເວົ້າ. “ຂ້ອຍຈື່ນາມສະກຸນຂອງແມ່ຕູ້ທວດໄດ້ແລ້ວຕອນນີ້!”

ພວກເຮົາທັງສອງເຕັມໄປດ້ວຍຄວາມຮູ້ສຶກຕື່ນເຕັ້ນ. ພວກເຮົາໄດ້ເລີ່ມຕົ້ນສ້າງບັນທຶກສຳລັບບັນພະບຸລຸດທີ່ລາວບໍ່ຮູ້ຈັກຫລາຍ ລະຫວ່າງ 45 ນາທີນັ້ນ. ລາວໄດ້ຂໍໃຫ້ຂ້າພະເຈົ້າສັນຍາກັບລາວວ່າ ພວກເຮົາຈະສືບຕໍ່ຄົ້ນຄວ້ານຳກັນຢູ່ລັດໂຄໂລຣາໂດ. ພວກເຮົາກໍໄດ້ແລກປ່ຽນຂໍ້ມູນຕິດຕໍ່ຫາກັນ ຂະນະທີ່ຍົນລົງເດີ່ນ.

ເບິ່ງແມ, ແມ່ນແຕ່ຕອນບິນສູງ 30,000 ຟີດ (9,145 ແມັດ) ຢູ່ໃນອາກາດ, ດ້ວຍເຄື່ອງມືຖືອັນເລັກນ້ອຍເທົ່າກັບຝາມື, ກໍຍັງສາມາດຊອກຫາຊາຍ ແລະ ຍິງ ທີ່ແຕ່ງງານກັນໄດ້ 100 ປີມາແລ້ວ ຜູ້ທີ່ລາວ ແລະ ຄອບຄົວຂອງລາວບໍ່ຮູ້ຈັກ. ບໍ່ໜ້າເຊື່ອ! ແຕ່ພວກເຮົາກໍໄດ້ພົບເຫັນເຂົາເຈົ້າ. ຄອບຄົວໄດ້ເຊື່ອມຕໍ່ເຂົ້າກັນ. ເລື່ອງລາວໄດ້ຖືກຈື່ຈຳ. ຄວາມຮູ້ສຶກ ແລະ ຄວາມຮູ້ບຸນຄຸນໄດ້ມີຕໍ່ເທັກໂນໂລຈີ ແລະ ເຄື່ອງມື. ມັນເກືອບເປັນສິ່ງມະຫັດສະຈັນ.

ຈອນນາຕັນ ເປຕີ, ໂຄໂລຣາໂດ, ສະຫະລັດ

ຖືກຫຸ້ມລ້ອມໂດຍຄອບຄົວໃໝ່

ນາງມາເຣຍບໍ່ໄດ້ໄປໂບດເປັນເວລາ 20 ປີແລ້ວ. ສອງສາມເດືອນຜ່ານມານີ້, ພວກເຮົາໄດ້ໃຊ້ສອງສາມຊົ່ວໂມງກັບນາງ ຢູ່ບ້ານຂອງພວກເຮົາ, ຄົ້ນຫາຄອບຄົວຂອງນາງ ຜ່ານທາງສຳມະໂນຄົວ ແລະ ບັນທຶກອື່ນໆ. ໃນຈຸດໜຶ່ງນາງໄດ້ເວົ້າອອກມາຢ່າງຕື່ນເຕັ້ນພ້ອມທັງນ້ຳຕາວ່າ, “ຂ້ອຍໄດ້ຮຽນຮູ້ກ່ຽວກັບຄອບຄົວຂອງຂ້ອຍໃນສອງຊົ່ວໂມງ ຫລາຍກວ່າທີ່ຂ້ອຍເຄີຍຮູ້ມາຕະຫລອດຊີວິດຂອງຂ້ອຍ!”

ໃນທ້າຍການຢ້ຽມຢາມຂອງພວກເຮົາ, ພວກເຮົາໄດ້ແນະນຳນາງໃຫ້ຮູ້ຈັກຍາດພີ່ນ້ອງທີ່ຢູ່ອ້ອມຂ້າງຂ້າພະເຈົ້າ ຢູ່ໃນແອພ FamilyTree. ມັນກັບເປັນວ່າ ສາມີຂອງຂ້າພະເຈົ້າ ແລະ ຂ້າພະເຈົ້າ ພວກເຮົາທັງສອງ ເປັນຍາດຫ່າງໆຂອງນາງມາເຣຍ. ນາງໄດ້ຮ້ອງໄຫ້ຕື່ມອີກ, ເວົ້າວ່າ ນາງເຄີຍຄິດວ່ານາງມີແຕ່ໂຕຄົນດຽວ. ນາງບໍ່ເຄີຍຮູ້ວ່າ ນາງມີຄອບຄົວຢູ່ໃນເຂດນັ້ນ. ສອງສາມອາທິດຈາກນັ້ນ ນາງມາເຣຍໄດ້ພົບກັບອະທິການຂອງພວກເຮົາ. ເວລານີ້ ນາງກຳລັງເອົາໃຈໃສ່ກັບການກະກຽມທີ່ຈະໄປພຣະວິຫານ, ແລະ ນາງກໍໄດ້ພົບກັບລູກອ້າຍລູກນ້ອງ “ຄົນໃໝ່” ຢູ່ໃນຫວອດຂອງພວກເຮົາ!

ແຄໂຣ ຣີເນີ ເອເວີເຣັດ, ນອດ ຄາໂຣລາຍນາ, ສະຫະລັດ

ສູດສຳລັບການປະຕິບັດສາດສະໜາກິດ

ນາງອັດສະລີ, ເອື້ອຍນ້ອງທີ່ຂ້າພະເຈົ້າປະຕິບັດສາດສະໜາກິດຕໍ່, ແລະ ຂ້າພະເຈົ້າ ພວກເຮົາທັງສອງ ມີປຶ້ມສູດເຮັດອາຫານຈາກແມ່ຕູ້ຂອງພວກເຮົາ. ຂອງນາງແມ່ນຈາກແມ່ຕູ້ທວດຂອງນາງ, ແລະ ຂອງຂ້າພະເຈົ້າແມ່ນປຶ້ມທີ່ຂ້າພະເຈົ້າໄດ້ຮວບຮວມສູດເຂົ້າກັນ ຕອນທີ່ຂ້າພະເຈົ້າໄດ້ຮັບມໍລະດົກ ເປັນກ່ອງສູດອາຫານຂອງແມ່ຕູ້ ກຣີນວູດ ຫລັງຈາກທີ່ເພິ່ນເສຍຊີວິດ.

ນາງອັດສະລີ ແລະ ຂ້າພະເຈົ້າ ພວກເຮົາທັງສອງໄດ້ເລືອກເອົາສູດໜຶ່ງຈາກປຶ້ມສູດອາຫານຂອງຕົນ, ແລະ ພວກເຮົາໄດ້ຢູ່ນຳກັນຫລັງຈາກວຽກ ໃນຄ່ຳຄືນໜຶ່ງເພື່ອເຮັດອາຫານຕາມສູດເຫລົ່ານັ້ນລອງເບິ່ງ. ນາງໄດ້ເລືອກເອົາສູດເຮັດຂອງຫວານ, ແລະ ພວກເຮົາກໍໄດ້ເຮັດມັນກ່ອນ ແລະ ເອົາມັນເຂົ້າເຕົາອົບ. ຂ້າພະເຈົ້າໄດ້ເລືອກເອົາສູດເຮັດແຈ່ວທີ່ກິນກັບຕ່ອນມັນສາລີທອດ—ອາຫານໂປດໃນທຸກງານສັງສັນຂອງຄອບຄົວກຣີນວູດ. ລູກສາວຂອງນາງອັດສະລີໄດ້ຊ່ວຍພວກເຮົາຊີມອາຫານ. ແລ້ວ, ເພາະນາງອັດສະລີບໍ່ຢາກໃຫ້ລູກໆຂອງນາງກິນຂອງຫວານທັງໝົດ, ນາງຈຶ່ງໄດ້ແບ່ງສ່ວນໜຶ່ງໄປໃຫ້ເອື້ອຍນ້ອງຜູ້ທີ່ນາງປະຕິບັດສາດສະໜາກິດ.

ສິ່ງທີ່ຂ້າພະເຈົ້າມັກຫລາຍທີ່ສຸດກ່ຽວກັບສູດຂອງພວກເຮົາແມ່ນ ຂະນະທີ່ພວກເຮົາເຮັດ ແລະ ອົບ, ພວກເຮົາໄດ້ເວົ້າລົມກັນກ່ຽວກັບເລື່ອງການປະຕິບັດສາດສະໜາກິດທັງໝົດຕາມປົກກະຕິ—ກ່ຽວກັບການດີ້ນລົນຂອງນາງ ແລະ ຂອງຂ້າພະເຈົ້າ. ແຕ່ພວກເຮົາກໍຍັງໄດ້ເວົ້າລົມກັນກ່ຽວກັບແມ່ຕູ້ ແລະ ແມ່ຂອງພວກເຮົານຳອີກ, ຊຶ່ງເປັນເລື່ອງລະອຽດອ່ອນສຳລັບພວກເຮົາທັງສອງ.

ເຈນີເຟີ ກຣີນວູດ, ຢູທາ, ສະຫະລັດ

ວິທີຊ່ວຍເຫລືອທີ່ພິເສດ

ປະຫວັດຄອບຄົວສາມາດໃຫ້ໂອກາດສຳລັບການປະຕິບັດສາດສະໜາກິດ ເມື່ອເບິ່ງຄືວ່າ ຢ່າງອື່ນໃຊ້ການບໍ່ໄດ້. ຕໍ່ໄປນີ້ແມ່ນແນວຄິດບາງຢ່າງທີ່ທ່ານສາມາດລອງເຮັດ.

ຊ່ວຍເຂົາເຈົ້າບັນທຶກ ແລະ ອັບໂຫຼດແຟມສຽງບັນທຶກເລື່ອງລາວປະຫວັດຄອບຄົວ, ໂດຍສະເພາະອັນທີ່ເຂົ້າກັບຮູບພາບ.
ຈັດສ້າງໂຄງຮ່າງທີ່ເປັນວີ ຫລື ເອກະສານປະຫວັດຄອບຄົວຢ່າງອື່ນໆທີ່ພິມອອກໄດ້ ທີ່ທ່ານສາມາດມອບໃຫ້ເປັນຂອງຂວັນ.
ສິດສອນວິທີບັນທຶກປະຫວັດຂອງຕົວເອງ ຜ່ານທາງການຮັກສາບັນທຶກສ່ວນຕົວ ໃນວິທີທາງທີ່ເຂົາເຈົ້າມັກເຮັດ. ບັນທຶກສ່ວນຕົວເປັນແຟມສຽງ? ບັນທຶກສ່ວນຕົວເປັນຮູບພາບ? ບັນທຶກເປັນວິດີໂອ ມີທາງເລືອກຫລາຍຢ່າງສຳລັບຜູ້ທີ່ບໍ່ມັກບັນທຶກໃນຮູບແບບການບັນທຶກຕາມມາດຕະຖານ.
ໄປພຣະວິຫານນຳກັນ ເພື່ອເຮັດພິທີການແທນບັນພະບຸລຸດ. ຫລື ສະເໜີເຮັດພິທີການແທນບັນພະບຸລຸດໃນຄອບຄົວຂອງເຂົາເຈົ້າ ຖ້າຫາກເຂົາເຈົ້າມີຫລາຍຈົນເຮັດບໍ່ໄຫວ.
ຫາເວລາຢູ່ນຳກັນເພື່ອແບ່ງປັນປະເພນີຂອງຄອບຄົວ.
ເອົາຫ້ອງຮຽນປະຫວັດຄອບຄົວນຳກັນ.

© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Ministering Principles, February 2020. Laotian. 16995 331