Tej Ntsiab Cai txog Kev Txhawb Pab, Peb Hlis Ntuj 2020

Kev Txhawb Pab Thaum Ua Hauj Lwm hauv lub Tuam Tsev

Thaum peb pab lwm tus txais tau cov koob hmoov ntawm lub tuam tsev, peb yeej txhawb pab lawv.

Daim Duab

ministering

Daim duab los ntawm Getty Images; daim duab txog lub Tuam Tsev Tegucigalpa Honduras

Yeej tsim nyog rau peb siv zog mus rau lub tuam tsev. Thawj Tswj Hwm Russell M. Nelson tau qhia tias “lub tuam tsev yeej tseem ceeb kawg nkaus rau peb txoj kev txhiv dim thiab kev tsa nto thiab yeej tseem ceeb rau peb tsev neeg. …

“… Peb txhua tus xav tau txoj kev ntxiv dag zog rau peb sab ntsuj plig thiab yuav tsum kawm tej yam tshiab uas peb tsuas kawm tau hauv tus Tswv lub tsev.”¹

Yog peb xav mus rau lub tuam tsev peb yuav tsum tswj xyuas peb lub sij hawm, te kev lav ris, tej yam peb muaj, thiab npaj peb sab ntsuj plig thiab. Peb txhawb pab lwm tus thaum peb kawm txog tej yam uas tab kaum peb cov kwv tij thiab cov muam kom lawv mus tsis taus hauv lub tuam tsev thiab pab lawv nrhiav kev kho tej teeb meem ntawd.

Lub Tuam Tsev Yog Ib txoj Koob Hmoov uas Txhua Tus Txais Tau

Ib tug ntxhais txib uas tsis ntev tas los twb rov qab los, tau taug kev mus rau ob lub qhov rooj ntawm lub Tuam Tsev Kona Hawaii thaum nws pom ib tug ntxhais hluas uas zaum nws ib leeg sab nraud. Meg xav tias nws yuav tsum hais lus rau tus ntxhais hluas no, tiam sis nws tsis paub nws yuav tsum hais li cas. Yog li ntawd nws nug seb kev kos duab rau nws pob taws muaj lub ntsiab dab tsi. Nkawd pib sib tham li ntawd ua rau Lani, tus ntxhais hluas ntawd, txaus siab hais nws zaj.

Lani qhia Meg txog nws txoj kev xav rov qab los koom lub Koom Txoos, cov mej zeej uas pab nws, thiab nws txoj kev cia siab tias muaj ib hnub nws yuav ua kev cai khi rau nws tus me nyuam ntxhais.

Meg tau caw Lani tuaj zaum nrog nws hauv lub tuam tsev chav tos. Nkawd tseem mus tsis tau rau lwm qhov chaw hauv lub tuam tsev, tiam sis nkawd yeej nyob tau haud. Lani pom zoo, thiab nkawd nkag los hauv qhov rooj loj ua ke. Ib tug neeg ua hauj lwm hauv lub tuam tsev tau taw tes rau ib lub rooj zaum uas nyob rau ntawm ib daim duab txog tus Cawj Seej.

Thaum nkawd zaum ua ke, Lani ntxhi lus tias, “Kuv twb xav tuaj hauv lub tuam tsev hnub no, tiam sis kuv ntshai.” Vim Meg tau mloog tus Ntsuj Plig lus, nws tau pab teb Lani tej lus thov Vaj tswv.

Tswv Yim Pab cov uas Tsis Muaj Ib daim Ntawv Tso Cai

Cov uas tsis muaj ib daim ntawv tso cai nkag tuam tsev kuj txais tau koob hmoov los ntawm lub tuam tsev.

Cia li qhia tias tus Tswv tau foom koob hmoov rau koj li cas los ntawm kev ua hauj lwm hauv lub tuam tsev.
Caw ib tug neeg los koom lub tuam tsev kev qhib tsev los sis qhov chaw rau cov tuaj xyuas. Nrhiav tej kev qhib tsev uas yuav muaj yav tom ntej nyob ntawm temples.ChurchofJesusChrist.org.
Saib cov duab thiab kawm ntxiv txog lub tuam tsev nyob ntawm temples.ChurchofJesusChrist.org.

Ua Kom Yooj Yim rau Lwm Tus Mus rau lub Tuam Tsev

Txawm cov mej zeej muaj ib daim ntawv tso cai nkag tuam tsev, yeej nyuaj rau lawv mus rau lub tuam tsev thiab. Tej zaum muaj ib txhia uas yuav tsum mus deb heev. Lwm tus muaj cov me nyuam yaus los sis cov laus hauv lawv tsev neeg uas lawv yuav tsum saib xyuas. Peb yeej muaj peev xwm ua hauj lwm ua ke kom txhua tus mus rau lub tuam tsev.

Yeej ua rau Leola Chandler nyuaj siab heev vim nws tu nws tus txiv uas mob heev thiab lawv plaub tug me nyuam. Yog li ntawd nws txiav txim siab nws yuav teem sij hawm mus txhua hnub Tuesday rau ib lub taum tsev nyob ze. Yeej ua rau nws lub neej muaj kev kaj siab lug thiab muaj hwj chim.

Muaj ib hnub nws hnov txog ob peb tug viv ncaus laus hauv nws pawg ntseeg uas xav xav mus rau lub tuam tsev, tiam sis lawv tsis muaj tsheb tsav. Leola hais tias nws yuav thauj lawv mus. Tau 40 xyoos tom qab ntawd, feem ntau nws tsis tau mus rau lub tuam tsev nws ib leeg xwb.²

Leola tau koob hmoov, thiab nws pab lwm tus thaum nws hais tias nws yuav thauj lawv mus rau lub tuam tsev.

Tswv Yim Pab Lwm Tus Mus rau lub Tuam Tsev

Koj yuav ua li cas kom pab lwm tus mus rau lub tuam tsev ntxiv? Tej zaum koj yuav kawm tias tej tswv yim uas koj xav tawm yuav pab koj thiab.

Mus ua ke. Cia li thauj lwm tus los sis npaj txoj kev thauj lawv mus. Tej zaum yuav pab lwm tus xav mus rau lub tuam tsev thiab.
Thov cov neeg hauv koj tsev neeg los sis pawg ntseeg pab koj ua kab ke rau koj cov poj koob yawm txwv, qhov tseem ceeb yog thaum koj muaj tej npe ntau uas tau npaj ua kab ke.
Hais tias koj yuav zov me nyuam kom lawv niam lawv txiv thiaj mus tau rau lub tuam tsev. Los sis npaj zov me nyuam ib zaug thiab cia lwm tus zov me nyuam ib zaug.

Thaum lub Tuam Tsev Nyob Deb Heev

Chandradas “Roshan” thiab Sheron Antony los ntawm Colombo, Sri Lanka, txiav txim siab ua kev cai sib khi hauv lub tuam tsev. Nkawd ob tug phooj ywg Ann thiab Anton Kumarasamy yeej pab nkawd zoo siab. Tiam sis nkawd twb paub lawm tis kev mus rau lub Tuam Tsev Manila Philippines tsis yooj yim thiab tsis pheej yig.

Roshan thiab Sheron twb tau ceev nyiaj thiab yuav pib caij nyab hoom ntau lub hlis ua ntej. Ces twb txog hnub nkawd yuav mus. Tiam sis, thaum nkawd nres hauv Malaysia, nkawd kawm tias yog yuav mus rau lub teb chaws Philippines, nkawd yuav tsum muaj ib daim ntawv tso cai nkag teb teb chaws los sis yuav tsum caij lwm lub nyab hoom. Nkawd ua tsis taus ib daim ntawv tso cai nkag lub teb chaws, thiab nkawd tsis muaj nyiaj txaus yuav daim pib caij lwm lub nyab hoom. Tiam sis nkawd yeej tsis xav rov qab mus tsev ua ntej nkawd tau ua kev cai sib khi.

Nkawd tsis paub ua dab tsi, yog li ntawd Roshan hu xov tooj rau Anton. Anton thiab Ann xav pab heev. Nkawd yog ib khub niam txiv tsawg tsawg hauv Sri Lanka uas twb tau ua kev cai sib khi hauv lub tuam tsev thiab nkawd paub tias yog ib txoj koob hmoov tseem ceeb npaum li cas. Tiam sis nkawd twb siv lawv cov nyiaj pab ib tug hauv nkawd tsev neeg, thiab nkawd tsis tau muaj nyiaj txaus pab Roshan thiab Sheron yuav pib caij nyab hoom tshiab.

Nyob hauv Sri Lanka yog kev cai thaum tus vauv yuav ib txoj saw kub rau tus nyab nws thiaj li yuav muaj nyiaj yog tias nws tus txiv tas sim neej. Ann twb txiav txim siab muab nws txoj saw kub muag kom pab yuav ob daim pib tshiab. Nws lub txiaj ntsim no tau pab Roshan thiab Sheron mus rau lub tuam tsev thaum txog sij hawm uas teem tseg nyob hauv Manila.

Ann hais tias, “Kuv paub kev cai sib khi hauv lub tuam tsev muaj nqis npaum li cas. Kuv paub tias Sheron thiab Roshan yuav ntxiv dag zog rau ceg ntseeg no. Kuv tsis tau xav kom xiam lub cib fim no.”³

Tswv Yim Pab cov uas Mus Tsis Taus rau lub Tuam Tsev

Tej zaum yuav hu koj txhawb pab cov uas mus tsis taus rau lub tuam tsev ntau los sis mus tsis taus hlo li vim tias deb heev los sis yuav siv nyiaj ntau. Tiam sis koj kuj nrhiav tau tej kev pab lawv nco txog cov koob hmoov ntawm lub tuam tsev.

Qhia los sis kawm ua ke nyob hauv kev kawm npaj rau lub tuam tsev los sis kawv kawm txog tsev neeg zaj keeb kwm.
Muab ib daim duab txog ib lub tuam tsev rau lawv dai rau hauv lawv lub tsev.
Yog tias koj twb tau mus rau lub tuam tsev, qhia tias koj tau xav li cas thiab ua tim khawv rau lawv txog cov kab ke hauv lub tuam tsev.
Pab lawv kawm ntxiv txog tej kev khi lus uas lawv tau ua thiab yuav ua li cas kom ua raws li tej kev khi lus ntawd. Xav seb koj puas siv “Understanding Our Covenants with God: An Overview of Our Most Important Promises,” nyob hauv phau Liahona thaum Rau Hli Ntuj xyoo 2012.