Dagiti Pagbatayan iti Ministering, Marso 2020

Ministering babaen ti Serbisio iti Templo

No tulongantayo dagiti dadduma nga agragsak kadagiti bendision ti templo, agminministeringtayo.

Background manipud iti Getty Images; ladawan ti Tegucigalpa Honduras Temple

Ti idadar-ay iti templo ket napateg a panagkagumaan. Insuro ni Presidente Russell M. Nelson a “napateg ti templo iti pannakaisalakan ken pannakaitan-oktayo ken dagiti pamiliatayo . …

“… Kasapulan ti tunggal maysa kadatayo ti agtultuloy a naespirituan a panangpapigsa ken panangisuro a posible laeng iti balay ti Apo.”¹

Ti idadar-ay iti templo agkasapulan iti panangtarawidwid iti oras, pagrebbengan, ken resources, kasta met ti panagbalin a naespirituan a nakasagana. Agminministertayo no mailasintayo dagiti tubeng a mangyadayo kadagiti kakabsattayo manipud iti templo ken mangtulong kadakuada a mangsapul kadagiti pangrisut.

Ti Templo ket Parabur a Mabalin a Pagragsakan ti Asino Man

Magmagna ti maysa a kasubsubli a missionary, ni Meg, nga agturong kadagiti ridaw ti Kona Hawaii Temple idi madlawna a nakatugaw nga agmaymaysa ti maysa a balasitang iti bangko iti ruar. Narikna ni Meg a nasken a kasaritana ti balasitang, ngem saan a sigurado no ania ti isaona. Isu a dinamagna maipapan iti kayat a sawen ti tato iti mukod ti balasitang. Dayta ti nangrugian ti saritaan a nangpalugod iti balasitang, ni Lani, a mangisalaysay iti estoriana.

Imbaga ni Lani ken ni Meg maipapan iti panangikarigatanna nga agsubli iti naan-anay a pannakiraman iti Simbaan, dagiti nasayaat a miembro a tumultulong kenkuana, ken ti namnamana a mailantip iti maladaga nga anakna a babai.

Inawis ni Meg ni Lani nga umay agtugaw iti pagur-urayan a siled iti templo a kaduana. Saanda a mabalin ti agpauneg nga ad-adda pay iti templo, ngem makastrekda iti pagserkan a ridaw. Immanamong ni Lani, ket naggidanda a napan kadagiti kangrunaan a ridaw ti templo. Maysa a temple worker ti nangipakita kadakuada ti bangko iti baba ti naipinta a ladawan ti Mangisalakan.

Bayat ti panangtugawda, inyarasaas ni Lani, “Talaga a kayatko ti umay iti templo ita nga aldaw, ngem nagnerbiosak.” Gapu ta sinurot ni Meg ti Espiritu, tinulonganna a sungbatan ti naulimek a kararag ni Lani.

Dagiti Kapanunotan a Mangtulong kadagiti awanan iti Recommend

Mabalin a paraburan ti templo uray dagiti awanan pay iti temple recommend.

Iburaymo dagiti riknam maipapan no kasano a pinaraburannak ti Apo babaen ti aramid iti templo.
Awisem ti maysa a tao a dumar-ay iti open house iti templo wenno iti visitor’s center. Mangsapul kadagiti open house iti temples.ChurchofJesusChrist.org.
Mangbuya kadagiti ladawan ken agsursuro iti ad-adu pay maipapan iti templo iti temples.ChurchofJesusChrist.org.

Aramiden a Nalaklaka ti Idadar-ay ti Templo para iti Dadduma

Uray kadagiti miembro nga addaan temple recommend, mabalin a karit ti idadar-ay iti templo. Mabalin nga agbiahe iti adayo a distansia dagiti dadduma. Mabalin nga addaan babassit nga annak dagiti dadduma wenno addaan baket ken lakayen a miembro ti pamilia nga agkasapulan iti pannakaaywan. Makapagtitinnulongtayo a mangaramid a posible ti serbisio iti templo para iti tunggal maysa.

Napalaus ti rikna ni Leola Chandler iti panangaywanna iti masakit nga asawana ken dagiti uppat nga annakda. Isu nga inkeddengna a mangilatang iti oras iti tunggal Martes tapno dumar-ay iti templo iti asideg. Nagbalin daytoy a pagtaudan ti kappia ken bileg iti biagna.

Maysa nga aldaw nangngeganna ti sumagmamano a babbaket a kakabsat iti wardna a tarigagayanda unay ti dumar-ay iti templo, ngem awan ti wagas tapno makapanda idiay. Indiaya ni Leola ti mangilugan kadakuada. Kadagiti sumaruno a 40 a tawen, manmano a napan iti templo nga is-isu.²

Naparaburan ni Leola, ken naparaburanna dagiti dadduma nga indiayaanna a mangitulod kadakuada iti templo.

Dagiti Kapanunotan a Mangtulong kadagiti Dadduma a Dumar-ay iti Templo

Kasano a matulongam dagiti dadduma a mapan iti templo nga ad-adda a masansan? Makitam a makatulong met kenka dagiti isu met laeng a kapanunotan.

Aggiddankayo a mapan. Idiaya a mangted wenno mangurnos para iti transportasion para iti maysa a tao. Mabalin a daytoy ti mangallukoy iti maysa a tao a dumar-ay met iti templo.
Agpatulong kadagiti miembro ti pamiliam wenno ward a mangannong kadagiti ordinansa para kadagiti kapuonanyo, nangruna no aduanka kadagiti nagan ti pamila a nakasaganan para kadagiti ordinansa.
Idiaya a mangaywan iti maladaga tapno makadar-ay dagiti nagannak iti templo. Wenno makipagurnos a makisinnublat iti panangaywan kadagiti annak ti tunggal maysa.

No Adayo ti Templo

Inkeddeng da Chandradas “Roshan” ken Sheron Antony ti Colombo, Sri Lanka, a mailantip iti templo. Naragsakan para kadakuada dagiti gagayyemda a da Ann ken Anton Kumarasamy. Ngem ammoda a narigat ken nangina ti agbiahe a mapan iti Manila Philippines Temple.

Inurnong da Roshan ken Sheron ti kuartada ken nasapa a nag-bookda kadagiti flight kadagiti bulan a nasapsapa tapno makaalada iti flight a kabaelanda a bayadan. Kamaudiananna, dimteng ti aldaw. Nupay kasta, kabayatan ti layover iti Malaysia, natakuatanda a ti panagtultuloyda iti Pilipinas, kasapulanda ti visa wenno kasapulanda ti aglugan iti sabali nga eroplano. Saan a posible ti mangala iti visa, ken saanda a kabaelan ti gumatang iti tiket iti sabali nga eroplano. Ngem saanda a madaeran a panunoten ti panagawid a saanda a mailantip.

Saan a sigurado no ania pay ti aramidenna, tinawagan ni Roshan ni Anton. Tinarigagayan unay da Anton ken Ann ti tumulong. Maysada kadagiti manmano nga agassawa iti Sri Lanka a nailantip iti templo, ket ammoda nga anian a parabur daytoy kadakuada. Ngem itay nabiit inusarda dagiti urnongda a kuarta a pangtulong iti maysa a miembro ti pamilia nga agkasapulan, ken awan ti umdas a kuartada a pangtulong kada Roshan ken Sheron a gumatang iti tiket para iti baro a flight.

Iti Sri Lanka kaugalian ti nobio nga igatanganna ti nobia iti kuentas a balitok tapno addanto kuartana no matay ti asawana. Inkeddeng ni Ann nga ilako ti kuentasna a makatulong a panggatang kadagiti baro a tiket. Ti nawadwad a sagutna ti nangaramid a posible para kada Roshan ken Sheron a makapan iti appointmentda iti templo iti Manila.

“Ammok ti kinapateg ti pannakailantip iti templo,” kinuna ni Ann. “Ammok nga agbalinto da Sheron ken Roshan a dakkel a pigsa iti branch. Diak tinarigagayan a malibtawanda daytoy a gundaway.”

Dagiti Kapanunotan a Mangtulong kadagiti Saan a Makadar-ay iti Templo

Mabalin a maawaganka nga agminister kadagiti saan a makapan a masansan iti templo wenno saan a talaga makapan gapu iti distansia wenno gastos. Ngem mabalinmo latta ti agsapul kadagiti wagas a makatulong kadakuada nga agyaman kadagiti bendision ti templo.

Mangisuro wenno makiraman a sangkamaysa iti panagsagana iti templo wenno klase iti family history.
Ikkam ida iti ladawan ti maysa a templo nga isab-it iti pagtaenganda.
No nakapankan iti templo, iburaymo dagiti riknam maipapan iti padasmo ken pammaneknekmo maipapan kadagiti ordinansa iti templo.
Tulongam ida nga agsursuro iti ad-adu pay maipapan kadagiti katulagan nga inaramidda ken no kasano a tungpalenda dagitoy. Ibilang ti panangusar iti “Understanding Our Covenants with God: An Overview of Our Most Important Promises,” iti Hulio 2012 Liahona.

© 2020 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, March 2020. Ilokano. 16985 864