Yalen e Pigpig, March 2020

PIGPIG NGE MACHIB U LAN E TEMPLE

Napan ni gadaed ra ayuweg e gidii’ ni ngar falfalen’ gaed ko pi tawa’ath ko temple, ma gadaed be pigpig.

Sasing nike yib rok Getta; sasing ni ya’an e Tegucigalpa Honduras Temple

Temple ni yibe un ngay e ba gamíngmíng ni rib mangil. President Russell M. Nelson e fil ni “fare temple e rib ga’fan ko thap rodaed nge falflaen’ rodaed nge tabinaew rodaed . …

“… Ra bagdaed ma ba tu’uf ni nge paer ma be gel lanyan’ nge tin ni nge fil ban’en ni rogon e ya’el ni kemus ni rayog u lane na’un rok Somoel.”¹

Temple ni yibe yan ngay e ba tu’uf rogon ni gadaed be yal’owiyed e rran rodaed, murwel, nge tin inb ga’fan, ni kab mu’un e tafney rodaed ngay. Gadaed be pigpig napan ni gadaed be poey e re n’en nibe taleg e pi walagdaed ko yaen nga temple man ayuweg raed ngar pir’eged e ayuw.

Temple e Ba Tawa’ath ni Demtrug Bee’ ni Rayog Ninge Falfalen’ Riy

Meg, ni kaffini sul ko maruwel ko glasia rok’, e be yaen ko maab ko fare Kona Hawaii’ Temple me guy ba ppin nibe paer rok ni go’ir u dakean e benchi u waen. Me thamiy Meg ni nge non ko fare ppin, machane dani nang ko mange nge yoeg. Ere me fith ko mang e be yup fan e tatu ni ba’ u ay fare ppin. Me tabab fare ppin, i Lani, i weliy mornga’agen.

Yoeg Lani ngak Meg mornga’agen ni daryag ni ngari un nga Galasia, pi gidii’ ni ku ur ayuwegned, nge athap rok ni ngan chiliy ngak e ppin ni fak.

Meg e pining Lani nge un ngak nga lane temple ko gin ni yima soen riy. Dawori yag ni ngar ranow boech nga lane temple, machane rayog ni ngar ranow ko yuyang riy. Ba adag Lani, mar ranow nga langan fare maab. Cha’an nima murwel u lane temple e dag ngorow ba benchi ni bay u tanggin ba sasing ni ya’an fare Tathapeg.

Napan ni ri pirew nga but u ta’abang, me kathkath Lani, “Ri gu ba adag ni nggub nga lane temple e daba’, machane gube rus.“ Bachan nike motoyil Meg ko fare Kan Nthothup, ma ke fulweg taban e meybil rok Lani.

Gonop ningan Ayuweg e Pi’in ni Dariy e Recommend Rok

Pi’in ni dawori yag e temple recommend ngak e kurayog ni nge fal’eg e temple wa’athan.

Weliy mornga’agen e thamtham rom ko rogon nike fal’eg Somoel wa’atham u dakean e murwel ko temple.
Pining bee’ ni nge un ngom ko bang u lane temple. Gay e ngiyal’ ni kan bing e termple ko gidii’ ko temples.ChurchofJesusChrist.org.
Yaliy e pi sasing nge mornga’agen e temple ko temples.ChurchofJesusChrist.org.

N’anggin nge Moem Rogon Ngak Boech e Gidii’ i Guy e Temple

Mus ko pi’in ba’ e temple roraed, ma yaed be yog nib gel e tomael nge moma’ w ko yaen nga temple. Ba’ boech e gidii’ nima chuur nib n’uw yang. Boech e ba’ e bitir fa tabinaew nike labthir nib tu’uf e ayuw roraed. Rayog ni ngad murwel gaed u ta’abang ngan moem nag rogon e pigpig ko temple ngak gubin e gidii’.

Leola Chandler e ke magawon nibe ayuweg e pumo’on rok nika ubchiya’ nge aningeg e bitir rorow. Ere dugliy e ngiyal’ ko Tuesday ni nge yan ko temple nib chugur ngak. Ke mang bang ko yafas rok nib gapas niba’ gelngin riy.

Reb e rran me rung’ag e ppin nib pil’al u lane ward rok ni ri yaed ba adag ni ngar uned nga temple, machane dariy e ma’af roraed. Me yoeg Leola ni rayog ni nge ayuweg raed. Aningeg nge ragag e duw nga m’on, ma dakir yag rok ni nge yan nga temple ni go’ir.²

Kari tawa’ath Leola, ma ke fal’eg wa’athan boech e gidii’ napan ni feek raed nga temple.

Gonop ni ngan Ayuweg Boech e Gidii’ Ngar Uned nga Temple

Urogon ni rayog ni ngam ayuweg boech e gidii’ ngar uned boech nga temple? Rayog ni ngam pir’eg ni ta’ab gonop e kiki ayuwegnem boech.

Mared u ta’abang. Mog ni rayog ni ngam pi’ e ma’af. Rayog ni nge pi’ e athamgil ngak bee’ ni nge un boech nga temple.
Mfith e tabinaew rom fa ward rom ni nge ayuwegnem ngam rrin’ e pi gam’ing ni pa’ e tabinaew rom ni kakrom, baga’ ni napan ni ba’ bukun fithngan e tabinaew rom ni kakrom rayog ni nge thapeg e gam’ing.
Mog ni rayog ni ngam paer ko bitir ngeyag ni nge un e galabthir ko temple. Fa mu ayuwegmew ni ra biyay ma gimew be paer ko bitir romew.

Napan nib Palog e Temple

Chandradas “Roshan” nge Sheron Antony u Colombo, Sri Lanka, e ri dugliyew ni ngan chiyliy row u lane temple. Tafagar rorow ni Ann nge Anton Kumarasamy e kari falfalen’ gow ngorow. Machane yow manang ni yan ko fare Manila Philippines Temple e dani moem ma ku dani sobut pulwon.

Roshan nge Sheron e kar ayuwegnew e salpiy rorow mar chuw’iyew pulwon e chuur rorow ni kab palog ngeyag ni ngar fekew e bin nib sobut pulwon. Arame, me taw fare rran. Machane, napan ni ri taw gow nga Malaysia, mar nangew ni ra ngar ranow nga Malile’, ma ba tu’uf e visa ngorow fa ngar fekew reb e sukuki nib thil. Dabyog ni ngar fekew e visa, ma dabkiyog ni ngar chuw’iyew e tiket ni fan reb e sukuki. Machane dabun row ningar sulow nga tabinaew ni daworun chiyliy row.

Dakir nangew ko mange ngar rirn’ew, me kol Roshan nag Anton. Anton nge Anne e ri yow ba adag ni ngar ayuwegnew row. Yow u fithik in e mabgol u Sri Lanka nikan chiyliy row u lane temple, ma yow manang ko mang tawa’ath riy. Machane kaffin ri mu’ gow i pi’ew e salpiy rorow ni ngar ayuwegnew e tabinaew rorow, ma dakriy e salpiy ni ngar ayuwegnew Roshan nge Sheron ni ngan chuw’iy e tiket rorow.

U Sri Lanka e ba yilen ni nge chuw’iy fare mo’on e churwa’ nib gold ni fan ko ppin rok ni nge ayuweg fa’anra ke yim’ e pumo’on rok. Ann e pi’ e churwa’ rok ni chuway’ ni nge ayuw nge chuw’iy fare gal tiket. Tawa’ath rok e ke yag nag ngak Roshan nge Sheron ni ngar thap gow ko temple u Manila.

“Gu manang gelngin nib ga’fan e chiyliy u alne temple,“ e yoeg Ann. “Gu manang ni Sheron nge Roshan e yow ra mang gelgnin e branch. Dabug ni dabi buch e biney rorow.”³

Gonop ningan Ayuweg e Pi’in ni Dabiyog ni nge Un nga Temple

Rayog kan pinngem ni ngam pigpig ngak e pi’in ni dabyog ni nge thap ko temple ni bukun yay fa bachane palfangen fa pulwon. Machane ku rayog ni ngam pir’eg e kanawo’ ningam ayuweg raed ngar falfalen’ gaed ko tawa’ath ko temple.

Fil ma mu mared u ta’abang u lane class ni fan ko temple fa class ko cheppin e tabinaew.
Mpi’ e sasing ni ya’an e temple ni ngar ted u lane tabinaew roraed.
Fa’anra kam un nga lane temple, mag weliy mornga’agen e n’en nike buch rom nge mich rom ni mornga’agen e pi gam’ing ko temple.
Ayuweg raed ngar filed boech mornga’agen fapi m’ag ni kar ngongliyed nge rogon ni ngan fol riy. Murwel ko “Understanding Our Covenants with God: An Overview of Our Most Important Promises,”u lane July 2012 Liahona.

© 2020 ko Intellectual Reserve, Inc. All rights reserved. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Pilyeg ko Ministering Principles, March 2020. Yapese. 16985 905