Karihngihn ke Toeni Luhlahp

Ahkkweye mwe sramsram nuhkwewa, facsin luhn sucu, ac luti ke mwet kuhlwacnsap luhn Leum, toeni luhlahp uh use nuh sesr in karihngihn ke inkacnek na pucspucs—met, ke pacl sac, ac tok liki wik luhn toeni luhlahp!

Ke misin-ahkolah luhn mwet luti ke kuhlahs, Susie ac Tom Mullen pacl nuhkwewa elos ahkkeye mempucr ke kuhlahs lalos in suli in liye toeni luhlahp.

“Suli mwet sahyac in oruh ma se pa in ahksahfyelah orekma lal ke misin, ac el kuhpahsryang oacpacna nuh ke karihngihn,” el fahk. “Tuhlihk lutlut lasr uh ripohrt fohlohk nuh sesr pacl nuh kwewa lah fuhkah woiyac ke eklac la ac oacyacpac nuh sin mwet se elos suli ah.”

Pa inge kuhtuh inkwacnek ma tuhlihk lutlut lalos ripohrti ke elos suk sahyac:

“Kuht karihngihn kawuck se suc oasr kuhtuh ma upac nuh sel. Kuht Solwacl in lohng ke toeni luhlahp nuh ke top lal. Ke kuht muhtwacta yohrohl tukun toeni sac, el fahk nuh sesr lah el lohng mwe nuhnak na pucspucs ma kuh in kahsrwel.”
“Kuht oruh party se ke toeni luhlahp se ac mwet nuhkwewa us tuhkuh mwe kahsruh in ahkacsruhi kac. Arulwacna pwacr lah kuht sulwaclah in sifil pac oruh.”
“Nga suli kawuck se in liye toeni luhlahp ah wiyuc. Ke kuht sramsram kihn, kuht sulwaclah in drive nuh ke lohm in miting uh fin kuht kuh in sifil liye we. Kuht oraclah, ac ohiyac na wowo se pa kuht som nuh kac ah!”

Sucu Mullens ac tuhlihk lutlut lalos ah lotwelah, arulwacna pohs inkwacnek in karihngihn ke toeni luhlahp. Ohiyac na wolwacna se pa in fahkwelihk ke ahkkweyeacn sramsram, facsin luhn sucu, sramsram yohk srihpac, ac lutlut ke mwet kuhlwansap luhn Leum!

Suli Mwet Sahyac nuh Lun Lohm Sum

“Mwet Lahngo el sapkihn nuh sin Mwet suc Fahsr Tohkohl in ‘luhngse sie sin sie; oacna ke nga luhngse kom’ (Jon 13:34). Oruh kuht liye lah fuhkah luhngse Lal nuh sesr. … Fin kuht orwaclah muh El pa kuht e etahi pactuhn la, kuht enenuh in pacl nuhkwewa srihke in suk sahyac in sang mwet nuhkwewa nuh kac.” —President Dallin H. Oaks¹

Mike mwet luti na wowo se lasr ke yac somlah ah etwacack oasr laptop na srihsrihk se fanna nahtuhsr kuht in liye toeni luhlahp ma orek uh. El silahklahk na suli kuht in tuhkuh nuh ke lohm sel in liye weluhl ac muhtwacn kiacl, Jackie, fahk lah elos luhngse mwet kawuck in weluhlos. Tuhlihk nuhtihk ah arulwacna engan in liye kanfuhracns ah ke TV na pwacye ah; nga kuloh kihn ac ahkkweye; ac kuht nuhkwewa luhngse pacl lasr kwewa.

Tok liki, tuhkweni liye jacnuhruhl kanfuhracns oruh oacna in facsin se. Finne ke kuht eis TV nahtuhsr sifacna, kuht srack pacna som nuh yohrohl Mike ac Jackie wi ilul lasr ah, puk in sihm, ac snack nuh ke toeni luhlahp uh. Lohng ke kahs luhn mwet pahluh tuhkweni oruh arulwacna special. Kuht sucu se lac. Mike ac Jackie kawuck lac luhk ac ninac pahpah mahtuh ahkluo luhn tuhlihk nuhtihk inge. Luhngse ac kuhlwacnsuhpuh lalos oruh mwe insewowo na kuht tiac pahn wo se nuh sin sucu luhk uh. Nga arulwacna kuloh kihn kahsruh na wowo lalos ma elos ikucslah lohm selos ac insiaclos nuh sesr.

Suzanne Erd, California, USA

Ip yohk in Nuhnkuh

“Etwacack”

Mwet Lahngo el kuhlwacnglacna in eislah pacl in liye enenuh luhn mwet sahyac ac in oruh orekma in kahsruh enenuh luhn el suc enenuh (liye Mattu 9:35–36; Jon 6:5; 19:26–27). Kuht kuh in oruh oacna.

“Suhlahklahklac in suli”

Tukun kuht etuh enenuh luhn mwet suc kuht karihngihn pa, step se tohkoh an pa in orekma.“Lutlut ke kahs luhn mwet pahluh”

Kuht enenuh “tuhkweni pacl pohs” (Moroni 6:5) in tuhkweni lutlut, tuhkweni kapwack, ac sramsram ke ip luhn nguhn ma yohk srihpac ke nguhna lasr uh.

“Tuhkuh, lohng ke puhsrwen mwet pahluh, ac lohng ke kahs luhn God”² sahp pa sie ma yohk srihpac in suli ac kuht kuh in fihliyac nuh tok nuh sin elos suc kuht karihngihn.

“Luhngse ac Kuhlwacnsuhpuh”

Kahsruh na pwacye ac mukwuikwui luhn mwet sahyac, kuht enenuh in muhsaheack kawuck lasr ke pahkomuhta ac “luhngse tiac kikiacp” (liye Doctrine and Covenants 121:41).

Akacsruhi ke Internet

“Petsac ke channel uh pa petsac fin facluh nohfohn ma kuh in ma nuh sin kais sie ac pwacye in oracni pihsen mwet pohs ke kais sie ac sucu uh. Ac nga luhlahlfongi lah pacl uh e tuhkuh nuh sesr mwet tuhma lutlut luhn Kraist in orekmakihn ma inge moklwe in fahlac wo ac yohk liki nuhkwewa in fahkwack ke God Pahpah ma Pahtpaht, Puhlwacn Lal ke engan luhn tuhlihk srihsrihk Nahtuhl, ac Wen Nahtuhl, Jisus Kraist, pa Mwet Lahngo fin facluh.” —Elder David A. Bednar³

Internet ah lelah kuht in fahkwack ke wosasuc nuh fin facluh nohfohn. Nga luhngse ma ingacn! Nga fahkwack ke kuhtuh mukwikwi nuh ke toeni luhlahp uh, tuh yohk srihpac oemeet nga srihke in kahsruh mwet sahyac oraclah sramsram se ke toeni luhlahp ma e fwackyuck lac. Liye kihsensiyuck sin mwet sahyac kuh in pacl nuhkwewa kahsrwe kuht in liye kuhtuh ma ke kahlwem sasuc ac kuh in eklac nuh ke sramsram wolwacna lasr ke kihsensiyuck.

Nga sokwack lah ke kom orekmakihn kihsensiyuck in sramsramkihn sramsram ke toeni luhlahp wi sucu in karihngihn lom an, e kahsrwekom liye fokokoi lalos oacpacna enenuh lalos. Sie kihsensiyuck nga luhngse siyuck pa, Meac kom puhla muh pa sifac se sramsramkihnyuck yohk ke toeni luhlahp?

Top nuh kac an apkuhran nuh ke ma kom liye meac sikyak ke moul lalos ac meac yohk srihpac nuh selos. Eisyuck kom in muh sie tamuhlwel kuh tahmtahel na wowo se in karihngihn mweyen kom eis pacl lom in liyaclos arulwacna kahlwem.

Camille Gillham, Colorado, USA

Ip yohk in Nuhnkuh

“Akacsruhi ke wosasuc”

Kuht wuhlweacng in “tu oacna mwet loh luhn God ke pacl nuhkwewa ac ke ma nuhkwewa, ac ke acn nuhkwewa” (Mosiah 18:9).

“Oraclah mwe sramsram se”

Sramsram ke toeni luhlahp uh kuh in moklwe wolwacna, kahsruh enenuh ke paho, ac nguhn lac na ke sramsram. Ac kain in sramsram se inge kuh in ahkkweye kuhpahsr lom, kahsruh luhlahlfongi lom an in fokokoi, ac usoht engan nuh sum! (liye Doctrine and Covenants 50:22).

“Orekmakihn kihsensiyuck”

“Kihsensiyuck na wowo kuh in kahsrwe kom in kahlwem ke luhngse na pwacye, nuhnkuh, kuh kihsensiyuck ma oasr sin mwet sahyac. Elos kuh in kuhlwack luti lom an, suli Nguhn, ac kahsruh mwet in lotwelah.”⁴

© 2020 ke Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng ke Ministering Principles, April 2020. Kosraean. 16986 868