ການປະຕິບັດສາດສະໜາກິດຜ່ານທາງ ກອງປະຊຸມໃຫຍ່ສາມັນ

ພ້ອມດ້ວຍຂໍ້ອ້າງອີງທີ່ເຊີດຊູໃຈ, ປະເພນີຂອງຄອບຄົວ, ແລະ ການສິດສອນຈາກຜູ້ຮັບໃຊ້ຂອງພຣະຜູ້ເປັນເຈົ້າ, ກອງປະຊຸມໃຫຍ່ສາມັນໄດ້ມອບວິທີປະຕິບັດສາດສະໜາກິດຫລາຍວິທີໃຫ້ແກ່ເຮົາ—ກ່ອນ, ລະຫວ່າງ, ແລະ ຫລັງຈາກກອງປະຊຸມໃຫຍ່ສາມັນ!

ໃນຖານະຄູສອນຫ້ອງຮຽນກະກຽມສຳລັບການເຜີຍແຜ່, ຊູສີ ແລະ ທອມ ມູເລັນ ໄດ້ຊຸກຍູ້ສະມາຊິກໃນຫ້ອງຮຽນຂອງເຂົາເຈົ້າເປັນປະຈຳ ໃຫ້ເຊື້ອເຊີນບາງຄົນໃຫ້ເບິ່ງກອງປະຊຸມໃຫຍ່ສາມັນ.

“ການເຊື້ອເຊີນບາງຄົນໃຫ້ເຮັດບາງສິ່ງ ເປັນພາກສ່ວນສຳຄັນຂອງວຽກງານເຜີຍແຜ່, ແລະ ມັນກ່ຽວຂ້ອງກັບການປະຕິບັດສາດສະໜາກິດຄືກັນ,” ນາງເວົ້າ. “ນັກຮຽນຂອງພວກເຮົາໄດ້ລາຍງານເປັນປະຈຳກ່ຽວກັບຜົນອອກມາດີຫລາຍຂະໜາດໃດສຳລັບເຂົາເຈົ້າ ແລະ ສຳລັບຜູ້ທີ່ເຂົາເຈົ້າໄດ້ເຊື້ອເຊີນ.”

ຕໍ່ໄປນີ້ແມ່ນສອງສາມວິທີທີ່ນັກຮຽນຂອງເຂົາເຈົ້າໄດ້ລາຍງານເລື່ອງການເອື້ອມອອກໄປຫາຄົນອື່ນ:

“ພວກເຮົາປະຕິບັດສາດສະໜາກິດຕໍ່ໝູ່ຄົນໜຶ່ງຜູ້ທີ່ກຳລັງປະເຊີນກັບບັນຫາບາງຢ່າງຢູ່. ພວກເຮົາໄດ້ເຊື້ອເຊີນລາວໃຫ້ເບິ່ງກອງປະຊຸມໃຫຍ່ສາມັນສຳລັບຄຳຕອບ. ຕອນພວກເຮົາໄດ້ໄປຢ້ຽມຢາມລາວຫລັງຈາກກອງປະຊຸມໃຫຍ່, ລາວໄດ້ບອກພວກເຮົາວ່າ ລາວໄດ້ຍິນຫລາຍແນວ ທີ່ເປັນປະໂຫຍດ.”
“ພວກເຮົາໄດ້ຈັດງານລ້ຽງກອງປະຊຸມໃຫຍ່ສາມັນ ແລະ ທຸກຄົນກໍໄດ້ເອົາອາຫານການກິນມາສົມທົບ. ໃຜໆກໍມັກ ພວກເຮົາກໍເລີຍຕັດສິນໃຈຈັດງານລ້ຽງອີກ.”
“ຂ້ອຍໄດ້ເຊື້ອເຊີນໝູ່ຄົນໜຶ່ງໃຫ້ມາເບິ່ງກອງປະຊຸມໃຫຍ່ສາມັນກັບຂ້ອຍ. ເມື່ອພວກເຮົາເວົ້າລົມກັນກ່ຽວກັບກອງປະຊຸມ, ພວກເຮົາໄດ້ຕັດສິນໃຈຂັບລົດໄປຕຶກໂບດ ເພື່ອເບິ່ງວ່າພວກເຮົາຊິເບິ່ງກອງປະຊຸມຢູ່ຫັ້ນໄດ້ຫລືບໍ່. ພວກເຮົາໄດ້ເບິ່ງຢູ່ທີ່ໂບດ, ແລະ ມັນກໍໄດ້ເປັນປະສົບການທີ່ດີທີ່ສຸດ ທີ່ໄດ້ຢູ່ຫັ້ນ!”

ດັ່ງທີ່ຄອບຄົວມູເລັນ ແລະ ນັກຮຽນຂອງເຂົາເຈົ້າໄດ້ຮຽນຮູ້, ມັນມີຫລາຍວິທີທາງທີ່ຈະປະຕິບັດສາດສະໜາກິດຜ່ານທາງກອງປະຊຸມໃຫຍ່ສາມັນ. ມັນເປັນວິທີທີ່ດີຫລາຍ ທີ່ຈະແບ່ງປັນຂໍ້ອ້າງອີງທີ່ເຊີດຊູໃຈ, ປະເພນີຂອງຄອບຄົວ, ການສົນທະນາທີ່ມີຄວາມໝາຍ, ແລະ ການສິດສອນຂອງຜູ້ຮັບໃຊ້ຂອງພຣະຜູ້ເປັນເຈົ້າ!

ເຊື້ອເຊີນຄົນອື່ນໃຫ້ມາທີ່ບ້ານຂອງທ່ານ

“ພຣະຜູ້ຊ່ວຍໃຫ້ລອດໄດ້ບັນຊາຜູ້ຕິດຕາມຂອງພຣະອົງໃຫ້ ‘ເຮົາຮັກພວກເຈົ້າຢ່າງໃດ ພວກເຈົ້າກໍຈົ່ງຮັກຊຶ່ງກັນແລະກັນຢ່າງນັ້ນ’ (ໂຢຮັນ 13:34). ສະນັ້ນພວກເຮົາຈຶ່ງເບິ່ງຕາມທີ່ພຣະອົງຮັກເຮົາ. … ຖ້າຫາກເຮົາໃຫ້ພຣະອົງເປັນຕົວຢ່າງຂອງເຮົາ, ແລ້ວເຮົາຄວນພະຍາຍາມສະເໝີ ທີ່ຈະເອື້ອມອອກໄປເພື່ອລວມຄົນອື່ນເຂົ້າກັບເຮົາ.” —ປະທານ ດາລິນ ເອັຈ ໂອກສ໌¹

ເມື່ອຫລາຍປີກ່ອນ ໄມ ຄູສອນປະຈຳບ້ານທີ່ດີຂອງພວກເຮົາ ໄດ້ສັງເກດເຫັນ ວ່າລູກສາມຄົນຂອງຂ້າພະເຈົ້າ ແລະ ຂ້າພະເຈົ້າ ມີແລັບທັອບນ້ອຍໜ່ວຍໜຶ່ງ ເພື່ອເບິ່ງກອງປະຊຸມໃຫຍ່ສາມັນ. ທັນໃດນັ້ນ ລາວກໍໄດ້ເຊື້ອເຊີນ ພວກເຮົາໃຫ້ໄປເຮືອນລາວ ເພື່ອເບິ່ງກອງປະຊຸມໃຫຍ່ກັບລາວ ແລະ ແຈ໊ກກີ້ ພັນລະຍາຂອງລາວ, ໄດ້ເນັ້ນວ່າ ເຂົາເຈົ້າຢາກມີເພື່ອນເບິ່ງກອງປະຊຸມນຳ. ລູກໆຂອງຂ້າພະເຈົ້າກໍຕື່ນເຕັ້ນຫລາຍ ທີ່ຈະໄດ້ເບິ່ງກອງປະຊຸມໃຫຍ່ຢູ່ໃນໂທລະທັດ; ຂ້າພະເຈົ້າກໍຊາບຊຶ້ງຫລາຍທີ່ໄດ້ຮັບການສະໜັບສະໜູນ; ແລະ ພວກເຮົາກໍມັກໃຊ້ເວລານຳກັນ.

ຫລັງຈາກນັ້ນ, ການເບິ່ງກອງປະຊຸມໃຫຍ່ສາມັນກໍໄດ້ກາຍເປັນປະເພນີ. ແມ່ນແຕ່ຕອນທີ່ພວກເຮົາມີໂທລະທັດຂອງຕົວເອງ, ພວກເຮົາກໍຍັງພາກັນໄປບ້ານຂອງ ໄມ ແລະ ແຈ໊ກກີ້ ພ້ອມກັບໝອນຂອງພວກເຮົາ, ປຶ້ມບັນທຶກ, ແລະ ເຂົ້າຕົ້ມເຂົ້າໜົມສຳລັບກອງປະຊຸມໃຫຍ່ສາມັນຢູ່ຄືເກົ່າ. ການໄດ້ຍິນຖ້ອຍຄຳຂອງສາດສະດາ ນຳກັນເປັນສິ່ງທີ່ພິເສດຫລາຍ. ພວກເຮົາໄດ້ກາຍເປັນຄອບຄົວດຽວ. ໄມ ແລະ ແຈ໊ກກີ້ ໄດ້ກາຍເປັນໝູ່ເພື່ອນທີ່ດີທີ່ສຸດ ແລະ ເປັນພໍ່ຕູ້ແມ່ຕູ້ຄົນທີສອງ ຕໍ່ລູກໆຂອງຂ້າພະເຈົ້າ. ຄວາມຮັກ ແລະ ມິດຕະພາບ ຂອງເຂົາເຈົ້າ ໄດ້ເປັນພອນທີ່ເຫລືອເຊື່ອຕໍ່ຄອບຄົວຂອງຂ້າພະເຈົ້າ. ຂ້າພະເຈົ້າມີຄວາມກະຕັນຍູສຳລັບຄວາມເຕັມໃຈຂອງເຂົາເຈົ້າ ທີ່ຈະເປີດບ້ານ ແລະ ຫົວໃຈຂອງເຂົາເຈົ້າຕໍ່ພວກເຮົາ.

ຊູແຊນ ເອີດ, ແຄລີໂຟເນຍ, ສະຫະລັດ

ຫລັກທຳທີ່ໃຫ້ພິຈາລະນາ

“ໄດ້ສັງເກດເຫັນ”

ພຣະຜູ້ຊ່ວຍໃຫ້ລອດໄດ້ໃຊ້ເວລາດ້ວຍຄວາມຮັກເພື່ອ ເບິ່ງ ຄວາມຕ້ອງການຂອງຄົນອື່ນ ແລະ ແລ້ວໄດ້ກະທຳເພື່ອສະໜອງຄວາມຕ້ອງການເຫລົ່ານັ້ນ (ເບິ່ງ ມັດທາຍ 9:35–36; ໂຢຮັນ 6:5; 19:26–27). ເຮົາກໍສາມາດເຮັດຄືກັນ.

“ທັນໃດນັ້ນ ລາວກໍໄດ້ເຊື້ອເຊີນ”

ຫລັງຈາກເຮົາສັງເກດເຫັນຄວາມຕ້ອງການຂອງຜູ້ທີ່ເຮົາປະຕິບັດສາດສະໜາກິດຕໍ່, ຂັ້ນຕອນຕໍ່ໄປແມ່ນປະຕິບັດ.

“ການໄດ້ຍິນຖ້ອຍຄຳຂອງສາດສະດາ”

ເຮົາຄວນ “ຊຸມນຸມກັນຢູ່ເລື້ອຍໆ” (ໂມໂຣໄນ 6:5) ເພື່ອຮຽນຮູ້ນຳກັນ, ເຕີບໂຕນຳກັນ, ແລະ ເວົ້າລົມນຳກັນກ່ຽວກັບສິ່ງທີ່ເປັນທາງວິນຍານ ທີ່ສຳຄັນຫລາຍທີ່ສຸດຕໍ່ຈິດວິນຍານຂອງເຮົາ.

“ມາຟັງຄຳຂອງສາດສະດາ, ແລະ ຟັງພຣະຄຳຂອງພຣະເຈົ້າ”² ອາດເປັນຄຳເຊື້ອເຊີນທີ່ສຳຄັນທີ່ສຸດ ທີ່ເຮົາສາມາດກ່າວກັບຜູ້ທີ່ເຮົາປະຕິບັດສາດສະໜາກິດຕໍ່.

“ຄວາມຮັກ ແລະ ມິດຕະພາບ”

ເພື່ອຊ່ວຍ ແລະ ເປັນອິດທິພົນໃຫ້ແກ່ຄົນອື່ນແທ້ໆ, ເຮົາຕ້ອງສ້າງຄວາມສຳພັນດ້ວຍຄວາມເຫັນອົກເຫັນໃຈ ແລະ ດ້ວຍ “ຄວາມຮັກອັນບໍ່ແກ້ງເຮັດ” (ເບິ່ງ ຄຳສອນ ແລະ ພັນທະສັນຍາ 121:41).

ການແບ່ງປັນທາງອິນເຕີເນັດ

“ຊ້ອງສື່ສານມວນຊົນເປັນເຄື່ອງມືທົ່ວໂລກ ທີ່ສາມາດສົ່ງຜົນກະທົບຕໍ່ບຸກຄົນ ແລະ ຄອບຄົວຢ່າງຫລວງຫລາຍ. ແລະ ຂ້າພະເຈົ້າເຊື່ອວ່າ ມັນເຖິງເວລາແລ້ວສຳລັບພວກເຮົາ ໃນຖານະສານຸສິດຂອງພຣະຄຣິດ ທີ່ຈະໃຊ້ເຄື່ອງມືທີ່ດົນໃຈເຫລົ່ານີ້ຢ່າງເໝາະສົມ ແລະ ຢ່າງມີປະສິດທິພາບຫລາຍກວ່າເກົ່າ ທີ່ຈະເປັນພະຍານເຖິງພຣະເຈົ້າ ພຣະບິດາຜູ້ສະຖິດນິລັນດອນ, ແລະ ເຖິງແຜນແຫ່ງຄວາມສຸກສຳລັບລູກໆຂອງພຣະອົງ, ແລະ ເຖິງພຣະບຸດຂອງພຣະອົງ, ພຣະເຢຊູຄຣິດ, ໃນຖານະພຣະຜູ້ຊ່ວຍໃຫ້ລອດຂອງໂລກ.” —ແອວເດີ ເດວິດ ເອ ແບ໊ດນາ³

ອິນເຕີເນັດຊ່ວຍເຮົາໃຫ້ ແບ່ງປັນພຣະກິດຕິຄຸນ ກັບຊາວໂລກທັງປວງ. ຂ້າພະເຈົ້າມັກຫລາຍ! ຂ້າພະເຈົ້າແບ່ງປັນກິດຈະກຳສອງສາມຢ່າງສຳລັບກອງປະຊຸມໃຫຍ່ສາມັນ, ແຕ່ສ່ວນຫລາຍຂ້າພະເຈົ້າພະຍາຍາມຊ່ວຍເຫລືອຄົນອື່ນ ສ້າງການສົນທະນາ ຈາກຄຳປາໄສຂອງກອງປະຊຸມໃຫຍ່ສາມັນ. ການເຫັນຄຳຖາມຈາກຄົນອື່ນສ່ວນຫລາຍຈະຊ່ວຍເຮົາໃຫ້ເຫັນສິ່ງຕ່າງໆໃນຮູບແບບໃໝ່ ແລະ ສາມາດເປັນສິ່ງພາໄປສູ່ຄຳຖາມສຳລັບການສົນທະນາທີ່ດີເລີດຂອງເຮົາໄດ້.

ຂ້າພະເຈົ້າພົບເຫັນວ່າ ເມື່ອທ່ານ ໃຊ້ຄຳຖາມ ເພື່ອສົນທະນາກ່ຽວກັບກອງປະຊຸມໃຫຍ່ສາມັນກັບຄອບຄົວທີ່ທ່ານປະຕິບັດສາດສະໜາກິດຕໍ່, ມັນຊ່ວຍທ່ານໃຫ້ເຫັນຄວາມເຂັ້ມແຂງ ຕະຫລອດທັງຄວາມຕ້ອງການຂອງເຂົາເຈົ້າ. ໜຶ່ງໃນຄຳຖາມທີ່ຂ້າພະເຈົ້າມັກຖາມແມ່ນ, ເຈົ້າຮູ້ສຶກວ່າ ແມ່ນຫຍັງທີ່ເປັນຫົວຂໍ້ທີ່ສຳຄັນທີ່ສຸດ ຈາກພາກກອງປະຊຸມໃຫຍ່ສາມັນເທື່ອແລ້ວນີ້?

ເກືອບທຸກເທື່ອ ຄຳຕອບຈະເຮັດໃຫ້ທ່ານເຫັນສິ່ງທີ່ກຳລັງເກີດຂຶ້ນຢູ່ໃນຊີວິດຂອງເຂົາເຈົ້າ ແລະ ສິ່ງທີ່ສຳຄັນຕໍ່ເຂົາເຈົ້າ. ມັນຈະຊ່ວຍທ່ານໃຫ້ກາຍເປັນອ້າຍນ້ອງ ຫລື ເອື້ອຍນ້ອງຜູ້ປະຕິບັດສາດສະໜາກິດທີ່ດີກວ່າເກົ່າ ເພາະທ່ານໄດ້ເຫັນເຂົາເຈົ້າຢ່າງແຈ່ມແຈ້ງຫລາຍກວ່າເກົ່າ.

ຄະມຽວ ກຽວແຮມ, ໂຄໂລຣາໂດ, ສະຫະລັດ

ຫລັກທຳທີ່ໃຫ້ພິຈາລະນາ

“ແບ່ງປັນພຣະກິດຕິຄຸນ”

ເຮົາໄດ້ເຮັດພັນທະສັນຍາ ທີ່ຈະ “ຢືນເປັນພະຍານຂອງພຣະເຈົ້າ ໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ” (ໂມໄຊຢາ 18:9).

“ສ້າງການສົນທະນາ”

ຂ່າວສານຂອງກອງປະຊຸມໃຫຍ່ສາມັນສາມາດນຳໄປສູ່ການສົນທະນາທີ່ໜ້າປະຫລາດ, ທີ່ກ່ຽວຂ້ອງ, ແລະ ທາງວິນຍານໄດ້. ແລະ ການສົນທະນາແບບນີ້ສາມາດເພີ່ມຄວາມເຂັ້ມແຂງໃຫ້ແກ່ຄວາມສຳຄັນຂອງທ່ານ, ຊ່ວຍໃຫ້ປະຈັກພະຍານຂອງທ່ານເຂັ້ມແຂງຂຶ້ນ, ແລະ ນຳຄວາມສຸກມາໃຫ້ທ່ານ! (ເບິ່ງ ຄຳສອນ ແລະ ພັນທະສັນຍາ 50:22).

“ໃຊ້ຄຳຖາມ”

“ຄຳຖາມທີ່ດີຈະຊ່ວຍທ່ານໃຫ້ເຂົ້າໃຈຄວາມສົນໃຈ, ຄວາມຫ່ວງໃຍ, ຫລື ຄຳຖາມອື່ນໆທີ່ຜູ້ອື່ນມີ. ມັນຈະເຮັດໃຫ້ການສອນຂອງທ່ານດີຂຶ້ນ, ເຊື້ອເຊີນພຣະວິນຍານ, ແລະ ຊ່ວຍຜູ້ສົນໃຈຂອງທ່ານໃຫ້ຮຽນຮູ້.”⁴

© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Ministering Principles, April 2020. Laotian. 16986 331