Machib u dakean e General Conference

Gubin e thin ni mornga’agen e athamgil, yilen ko tabinaew, nge pin’en nike fil e pi tapigpig rok Somoel, ma general conference e bo’or e kanawo’ nima pi’ ngodaed ni ngan pigpig—um’on, nge napan, nge tomuren e general conference!

Susie nge Tom Mullen, ni yow e sensey ko class ni fan e pi’in ni be fal’eg rogon ni nge yaen ko mission, e gubin ngiyal’ ma yow ma pi’ e athamgil ngak e class rorow ni ngan pining bee’ ni nge guy e general conference.

“Bea’ ni yibe pining ni nge rrin’ ban’en e bang ko murwel ko tamachib, ma kubay u tanggin e machib,” e ke yoeg. “Pi’in ni ba’ u lane class romaed e yaed ma sul ngar yoeged e n’en nike buch roraed nge cha’an ni kar piningeg nge un.”

Ba’aray boech rogon nike weliy e class rok:

“Ku noned ngak e fagar niba’ boech e n’en nibe magawon riy. Ku pininged nge yib nge motoyil ko general conference. Napan ni gamaed ra yan gu guyed, me yoeg ngomaed ni bo’or boech e kanawo’ ni rayog ni nge ayuweg.”
“Gu ted ba abich ni fan e general conference me yib e gidii’ nike feek nochi ban’en ni ngan kay u ta’abang. Rib falel’ ma ku laem niged ni ka gamaed ra tay biyay.”
“Ku pining e fagar rog ni nge un ngog nggu guyew e general conference. Napan ni gomow be weliy mornga’agen, ma gomow leam nag ni nggu warow nga galasia ko rayog ni ngguyew u rom fa dabiyog. Ke yag romow, ma bangiyal’ ni rib falel’ ni gomow bay u rom!”

Mullens nge class rorow e kar filed ban’en, ni bo’or e kanawo’ ni ngan machib u dakean e general conference. Ba kanawo’ nib falel’ ni ngan weliy mornga’agen e thin nima pi’ e athamgil, yilen ko tabinaew, nge sabathin nib mangil, nge machib rok e tapigpig rok Somoel!

Pining e Gidii’ nga Tabinaew Rom

“Ke yoeg fare Tathapeg ngak e pi’in nibe laek ni ngan ‘ Nge bigimed me t’uf bigimed rok; rogon ni um pired ni gimed ba t’uf rog’ (John 13:34). Ere ngad sap gaed ko rogon nibe tu’ufeg daed. … Fa’anra gadaed ra tay ni Cha’an ni gadaed be sap ngak, ma gubin ngiyal’ ma thingardi ayuwegned gubin e gidii’.” —President Dallin H. Oaks¹

Ke bukun e duw ni Mike nib home teacher romaed e guy dalip e bitir romow nge gag e kemus niba’ e laptop romad nib achig ni gamed ma guy e general conference riy. Me pining mad nga tabinaew rok ni ngug uned ngak nge ppin rok, i Jackie, i yaliy e general conference. Ke falfalen’ fakag ni ngar guyed e conference ko TV; ma gub falfalen’ ko ayuw; ma gamaed falfalen’ ko roffen nem.

Tomuren e roffen nem, ma gamaed paer ni gamaed ma guy e general conference u ta’abang. Mus ni napan ni gu feked e biromaed e TV, ma ka gamaed ma yaen nga tafen Mike nge Jackie ni ku feked e giyul, babyor, nge nochi ban’en ni ngan kay napan e general conference.. HThin ko pi profet ni yibe motoyil ngay u ta’abang e rib mangil. Ku boeded e tabinaew. Mike nge Jackie e kar mangew e tafagar rog nge titaw nge tutuw ko pifaakag. Rorow tu’ufeg nge gol e ke mang e tawa’ath ko tabinaew rog. Rigub falfalen’ ni kar bingew e maab ko tabinaew nge gumircha’en row ngomaed.

Suzanne Erd, California, USA

Boech e n’en ni ngan Leam nag

“Guy”

Fare Tathapeg e dani gurgur ni nge guy e tin nib tu’uf ko boech e gidii’ me pi’ e ayuw ngoraed (muguy ko Matthew 9:35–36; John 6:5; 19:26–27). Rayog ni ngad rin’ed nib ta’abrogon.

“Piningey nib Gurgur”

Napan ni gadaed ra guy e tin nib tu’uf ko pi’in ni gadaed be guy, ma gadaed mithmith.“Mu fil fapi thin rok’ e profet nibay e chiney”

Thingardi “gaak gaed nga ta’abang” (Moroni 6:5) ni ngad filed ban’en, man gel u ta’bang, man weliy mornga’agen e pin’en nib ga’fan ko ya’el rodaed.

“Moy, motoyil nga laman e profet, mag rung’ag e thin rok Got”² e reb e pong ni rib ga’fan ni rayog ni ngad yoeged ngak e pi’in ni gadaed be guy.

“Tu’ufeg nge Tapigpig”

Ra ngarin ayuweged boech e gidii, ma thingardi fagar gaed ngoraed u fithik e “tu’ufeg nib mangil” (muguy ko Doctrine and Covenants 121:41).

Mu weliy nga lane internet.

“Social media e ban’en u dakean e fayleng ni rayog ni nge ayuweg bukun e tabinaew nge gidii’. Ma mich u wun’ug nike taw ko ngiyal’ ni gadaed e pi gachalpen Kristus e ngan murwel ko pi n’ey nib fal’ rogon ni ngan micheg nag mornga’agen Got ni fare Chitamangiy nib Machalbog, wo’en e falfalen’ ni fan ko pifaak, nge Faak, ni Yesus Kristus, nib Tathapeg ko fayleng.” —Elder David A. Bednar³

Internet em ma pag daed ngad weliyed fare gospel ko fayleng. Rugu ba adag e binem! Ku weliy in e ban’en ni fan ko general conference, machane ri gu ma gay rogon ni nggu ayuweg e gidii’ ko tabab nag e sabathin nikeb ko genenral conference. Pi duwer rok e gdii’ e baga nima ayuweg daed ningad guyed boech e ban’en nib tamilang rogon ni rayog ni ngad fithed ban’en riy nib mangil.

Ku nang ni napan ni gara murwel ko duwer ningam weliy mornga’agen e pi numon ko general conference ngak e re tabianew ni gama guy, ma ma ayuweg nem ni ngam guy gelngin raed nge tin nib tu’uf roraed. Reb e duwer ni gu ba adag ni guma fith e, Mang e thamiy nikan weliy ko fare general conference ni kaffini m’ay?

Fulweg riy e chugur ni gubin ngiyal’ ma ma pagem ngam guy ko mang e be buch u lane yafas roraed nge n’en nib ga’fan ngoraed. Ma ayuweg nem ni ngam mang bee’ nib gab cheg ko munon ni bachane keyag ni nge guy raed nib fal’ rogon.

Camille Gillham, Colorado, USA

Pi yalen ni ngan tay u Wun’uy

“Weliy fare gospel”

Kad michegned ni ngaed “pired ni gimed e pi mich rok’ Got ni gubin e ngiyal’ ngo fithik’ gubin ban’en, nge gubin yang ni gimed bay riy” (Mosiah 18:9

“Tabab nag e sabathin”

Pi mulwol ko general conference e rayog ni nge tabab nag e sabathin nib falel’,nib mangil, ma ba thothup. Ma mit ney e thin e rayog ni nge gel nag e tha’ rom, me ayuweg e mich rom ni nge gel, me pi’ e falfalen’ ngom! (muguy ko Doctrine and Covenants 50:22).

“Murwel ko duwer”

“Duwer nib mangil e ra ayuweg nem ni ngam nang fan e tin ni yi ba adag, nge magawon, fa duwer ni bay rok boech e gidii’. Rayog ni nge ayuweg e n’en ni gabe fil ko gidii’, me pining fare Kan Thothup, mge ayuweg e gidii’.”⁴

© 2020 ko Intellectual Reserve, Inc. Gubin ma bay mat’won. Kan yoloey u Meriken. Kan micheg nag ko thin nu Ngalis: 6/19. Micheg i pilyeg: 6/19. Pilyeg ko Ministering Principles, April 2020. Yapese. 16986 905