Dumngegka Kenkuana

Ni Presidente Russell M. Nelson

Presidente ti Simbaan ni Jesucristo dagiti Santo iti Ud-udina nga Aldaw

Ammo ti Amatayo a no napalawlawantayo iti panagduadua ken panagbuteng, ti naan-anay a a makatulong kadatayo ket dumngeg iti Anakna.

Patpatgek a kakabsatko, agyamanak unay kadakayo gapu iti tulong ti teknolohia nakapagtitipontayo a sangkamaysa ket agdaydayaw iti daytoy a bigat ti Domingo. Nagasattayo a mangammo a naisublin ti ebanghelio ni Jesucristo iti rabaw ti daga!

Iti naglabas nga adu a lawas, nakapadas ti kaaduan kadatayo iti pannakasinga iti bukodtayo a biag. Dagiti ginggined, apuy, layos, sarot, ken dagiti bunga dagitoy ti nangsinga kadagiti agtultuloy nga aramid ken nakaigapuan dagiti panagkurang ti taraon, kangrunaan a kasapulan, ken naurnong a kuarta.

Iti baet amin dagitoy, dayawendakayo ken agyamankami kadakayo ti panangpiliyo a dumngeg iti balikas ti Apo bayat daytoy a panawen ti pannakaburibor babaen ti pannakikaduayo kadakami iti daytoy a sapasap a komperensia. Ti kumarkaro a kasipngetan a danggayan ti panagsagaba ket ad-adda pay a mangparaniag iti silaw ni Jesucristo. Panunotenyo laeng ti kinasayaat a maaramid ti tunggal maysa kadatayo iti daytoy a panawen ti pannakaburibor ti intero a lubong. Ti ayatyo ken pammatiyo iti Mangisalakan ket mabalin a nasayaat unay a mangiturong iti maysa a tao a mangtakuat iti Pannakaisubli ti pakabuklan ti ebanghelio ni Jesucristo.

Iti naglabas a dua a tawen, naam-ammomi ken ni Sister Nelson dagiti rinibribu kadakayo iti intero a lubong. Nakitaripnongkami kadakayo kadagiti istadium ken bulwagan ti hotel. Iti tunggal lokasion, nariknak a kadennak dagiti pinili ti Dios ket makitkitak ti panaguummong ti Israel a mapaspasamak iti imatangko.

Agbibiagtayo iti aldaw a “tinagtagiuray dagiti nagkauna nga ammatayo a sigagagar.”¹ Addatayo kadagiti tugaw iti sango tapno saksiantayo nga aktual ti pasamak a nakita ni propeta Nephi iti parmata laeng, a bumabanto “ti bileg ti Kordero ti Dios” “kadagiti natulagan a tao ti Apo, a naiwaraswaras iti amin a rabaw ti daga; ket igamda ti kinalinteg ken addaanda iti nadayag a bileg ti Dios.”²

Dakayo, kakabsatko ti mabilang kadagiti lallaki, babbai, ken ubbing a nakita ni Nephi. Panunoten dayta!

Sadinokayo man wenno ania man ti kasasaadyo, ni Apo Jesucristo isu ti Mangisalakanyo, ken ti propeta ti Dios a ni propeta Joseph Smith isu ti propetayo. Isu ti naordenan idin sakbay ti pannakabukel ti lubong nga agbalin a propeta iti daytoy maudi a dispensasion, no kaano nga “awan ti makatubeng”³ manipud kadagiti Santo. Agtultultuloynga agayus ti paltiing manipud iti Apo iti daytoy agtultuloy a proseso iti pannakaisubli.

Ania ti kaipapananna kadakayo a naisublin ti ebanghelio ni Jesucristo iti rabaw iti daga?

Kayatna a sawen a mailantipkayo ken ti pamiliayo a sangkamaysa iti agnanayon! Kayatna a sawen a gapu ta binuniagannakayo ti maysa nga addaan iti turay manipud ken ni Jesucristo ken nakumpirmaan a miembro ti Simbaanna, makadkaduayo a kanayon ti Espiritu Santo. Iwanwan ken saluadannakayonto. Kayatna a sawen a dinakayto panawan nga agmaymaysa wenno awanan iti kabaelan a makaawat iti bileg ti Dios a mangtulong kadakayo. Kayatna a sawen a mabendisionannakayo iti bileg ti priesthood no awatenyo dagiti napateg nga ordinansa ken agaramid kadagiti katulagan iti Dios ket agtungpal kadagitoy. Maysa nga angkora iti kararuatayo dagitoy a kinapudno, nangnangruna kadagitoy a panawen ti narungsot a bagyo.

Insalaysay ti Libro ni Mormon ti klasiko a panagdur-as ken pannakatnag iti dua a kangrunaan a sibilisasion. Ipakita ti pakasaritaanda no kasano ti kinalaka para iti kaaduan a tattao ti manglipat iti Dios, mangsupring kadagiti pammallaag dagiti propeta ti Dios, ken agkalikagum iti bileg, kinalatak ken tarigagay ti lasag.⁴ Inulit-ulit nga impakdaar dagiti immuna a propeta “dagiti naindaklan ken nakaskasdaaw a banag kadagiti tao, a dida pinati.”⁵

Awan ti nagdumaanna iti panawentayo. Iti panaglabas dagiti tawen, adu a naindaklan ken nakaskasdaaw a banag ti nangngegan manipud kadagiti naidaton a pulpito iti Simbaan iti nadumaduma a suli ti lubong. Ngem kaaduan a tao ti saan nga umawat kadagitoy a kinapudno— nalabit a gapu ta dida ammo ti pangsapulan kadakuada⁶ wenno gapu ta dumdumngegda kadagiti tao a di makaammo iti naan-anay a kinapudno wenno gapu ta saanda nga inawat ti kinapudno a kasukat dagiti nailubongan a tarigagay.

Tuso ti kabusor. Iti rinibu a tawen ar-aramidenna nga aglanga a nasayaat ti dakes ken aglanga a dakes ti nasayaat.⁷ Gagangay a napigsa, natured, ken napannakkel dagiti mensahena.

Nupay kasta, maiduma unay dagiti mensahe ti Nailangitan nga Ama. Makisarita iti nanumo, naulimek, ken nakaskasdaaw ti kinalawagna tapno sigurado a maawatantayo Isuna.⁸

Kas pagarigan, no yam-ammona ti Bugbugtong nga Anakna kadagiti tao iti rabaw ti daga, agus-usar kadagiti nakaskasdaaw a sumagmamano a balikas. Iti Bantay ti Panagbalbaliw-langa, kinuna ti Dios kada Pedro, Santiago ken Juan, “Daytoy ti Anakko a dungdunguek, dumngegkayo Kenkuana.”⁹ Dagiti balikasna kadagiti Nephite iti nagkauna a Bountiful “Adtoy ti Ay-ayatek nga Anak, isu a makaay-ayo kaniak isu a nangigloriaak ti naganko—isu ti denggenyo.”¹⁰ Ken ni Joseph Smith, iti dayta a naindaklan a pakdaar a nanglukat iti daytoy a dispensasion, kinuna laeng ti Dios kenkuana, “Daytoy ti Ay-ayatek nga Anakko. Dumngegka Kenkuana!”¹¹

Ita, patpatgek a kakabsatko, panunotenyo ti kinapudno nga iti daytoy tallo a gundaway a kadakdakamat laeng, sakbay nga inyam-ammo ti Ama ti Anak, nakarikna iti buteng dagiti tao nga adda idiay ken, dumani napukawan iti namnama dagiti dadduma pay.

Nagbuteng dagiti Apostol idi nakitada ni Jesucristo a napalawlawan iti ulep iti Bantay ti Panagbalbaliw-langa.

Nagbuteng dagiti Nephite gapu ta nakapadasdan iti pannakadadael ken kasipngetan iti sumagmamano nga aldaw.

Ni Joseph Smith ket naan-anay a pinengdan ti puersa ti kasipngetan sakbay ti panaglukat ti langit.

Ammo ti Amatayo a no napalawlawantayo iti panagduadua ken panagbuteng, ti naan-anay a a makatulong kadatayo ket dumngeg iti Anakna.

Gapu ta no agkalikagumtayo a dumngeg—sipupudno a dumngeg—iti Anakna, maiwanwantayo a mangammo no ania ti aramidentayo iti ania man a kasasaad.

Ti kaunaan a balikas iti Doktrina ken Katulagan ket dumngeg.¹² kayatna a sawen “dumngeg nga addaan iti panggep nga agtungpal.”¹³ Kayatna a sawen ti dumngeg ket “dumngeg Kenkuana”—tapno denggen no ania ti kayat nga ibaga ti Mangisalakan ken imdengan ti balakadna. Iti daytoy a dua a balikas—“Dumngegka Kenkuana”—Ited ti Dios kadatayo ti pagtuladan iti balligi, ragsak ken rag-o iti daytoy a biag. Nasken a denggen[tayo] dagiti balikas ti Apo, dumngeg kadakuada, ken imdengan no ania ti imbagana kadatayo!

Iti panagkalikagumtayo nga agbalin a kas disipulo ni Jesucristo, dagiti panagkagumaantayo a dumngeg Kenkuana masapul a kanayon nga addaan iti panggep. Agkasapulan iti panangammo ken agtultuloy a panangipakat iti pigsa tapno mapunno iti inaldaw-aldaw a biagtayo kadagiti balikasna, pannursurona, ken kinapudnona.

Saantayo a mabalin nga agpannuray lattan iti impormasion a masagangtayo iti social media. Iti binilbilion a balikas iti internet ken kadagiti patalastas a maisaksaknapen iti lubong nga agtultuloy a serreken ti naringgor, dakes nga aramid ti kabusor, sadino ti mabalin a papanantayo tapno dumngeg Kenkuana?

Mabalintayo ti agbasa kadagiti nasantuan a kasuratan. Dagitoy ti mangisuro kadatayo maipapan ken ni Jescucristo ken ti ebangheliona, ti kinasakup ti Pannubbotna, ken ti naindaklan a plano ti Ama ti kinaragsak ken pannakasubbot Napateg ti inaldaw a napasnek a panagbasa iti balikas ti Dios para iti naespirtuan a pannakaispal nangnangruna kadagitoy nga aldaw a kumarkaro ti pannakaburibor. No agpennektayo kadagiti balikas ni Cristo iti inaldaw, dagiti balikas ni Cristo ti mangibaganto kadatayo no kasano ti agresponde kadagiti rigat a ditayo kaano man impagarup a a mapadasantayo.

Mabalintayo ti dumngeg Kenkuana iti templo. Ti balay ti Apo ket maysa a balay a pagsursuruan. Idiay a mangisuro ti Apo iti bukodna a wagas. Idiay a mangisuro ti tunggal ordinansa maipanggep iti Mangisalakan. Masursurotayo idiay no kasano ti mangiwaknit iti belo ken makisarita a nalawlawag iti langit. Masursurotayo idiay no kasano ti mangtubngar iti kabusor ken manggun-od iti bileg ti priesthood ti Apo a mangpapigsa kadatayo ken dagiti ipatpategtayo. Nasken nga aggagar ti tunggal maysa kadatayo a a manggun-od iti pagkamangan idiay.

No naikkaten ti saan nga agpaut a panagiget gapu iti COVID-19, mangted koma iti oras nga agdaydayaw ken agserbi iti templo. Tunggal minuto iti dayta nga oras ti mangbendision kadakayo ken ti pamiliayo a saan a maaramid iti sabali pay a wagas. Mangipaay iti oras a mangutob no ania ti mangngegan ken mariknayo no addakayo idiay. Dawatenyo iti Apo nga isuronakayo no kasano a lukatan ti langit tapno mangbendision iti biagyo ken ti biag dagiti ay-ayaten ken pagserbianyo.

Idinto a saan pay a posible ti agdaydayaw iti templo iti agdama, awisenkayo a makiraman nga ad-adda pay iti family history, agraman ti panagsukisok iti family history ken indexing. Ikarik a no nayonanyo ti orasyo iti aramid iti templo ken family history, manayonan ken mapadur-asto ti kabaelanyo a dumngeg Kenkuana.

Nalawlawag pay a maaramidtayo ti dumngeg Kenkuana no pasayaatentayo ti kabaelantayo a mangbigbig kadagiti arasaas ti Espiritu Santo. Napatpateg a maammuanyo ita no kasano a makisarita ti Espiritu kadakayo. Iti Kinadios, mensahero ti Espiritu Santo. Isangbayna iti panunotyo no ania ti tarigagayan ti Ama ken ti Anak a maawatyo. Isu ti Mangliwliwa. Isangbaynanto ti talna iti pusoyo. Paneknekanna ti kinapudno ken patalgedanna no ania ti pudno bayat ti panagdengngeg ken panagbasayo iti balikas ti Apo.

Agpakaasiak manen kadakayo nga aramidenyo ti ania man a nasken nga aramiden tapno manayonan ti kabaelanyo nga umawat iti bukod a paltiing.

Ti panangaramid iti daytoy ti makatulong kadakayo a mangammo no kasano ti agtultuloy iti biagyo, no ania ti aramiden iti panawen iti krisis, ken no kasano ti mangrikna ken mangliklik kadagiti sulisog ken panangallilaw ti kabusor.

Ket, kamaudiananna, dumngegtayo Kenkuana bayat ti panangdengngegtayo iti balikas dagiti propeta, mammadto, ken mammaltiing. Dagiti naordenan nga Apostol ni Jesucristo ti kanayon a agpaneknek maipapan Kenkuana. Itudoda ti dalan bayat ti panangpasartayo iti nasalimuot ken nakalidliday a biagtayo ditoy a lubong.

Anianto ti mapasamak no ad-adda a panggepyo a denggen, dumngeg, ken imdenganyo no ania ti imbaga ti Mangisalakan ken no ania ti ibagbagana ita babaen kadagiti propetana? Ikarik a mabendisionankayonto iti nayon a bileg a mangsango iti sulisog, panagrigat, ken pagkapsutan. Ikarik nga addanto milagro iti panagdennayo kas agassawa, kas pamilia, ken iti aramidyo iti inaldaw. Ken ikarik a manayonanto ti kabaelanyo a mangrikna iti rag-o uray pay no kumarkaro dagiti pannakaburibor iti biagyo.

© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 5/19. Pannakaanamongna a maipatarus: 5/19. Pannakaipatarus ti First Presidency Message, May 2020. Ilokano.16987 864