“Erudua Sacrament Nhyiamu mu do dze Rosom,” Liahona, Obiradzi 2020
Edward McGowan yɛɛ nsaano mfonyin no
Erosom ho Fapem, Obiradzi 2020
Erudua Sacrament Nhyiamu mu do dze Rosom
Sacrament nhyiamu ma hɛn akwan horow ma yɛnye binom hyia na yɛsom hɔn.
Sacrament nhyiamu no yɛ mber a yɛmee wɔ sunsum mu na dɛ yɛyɛ ankorankor no, yɛdwendwen Agyenkwa no na No Werdambɔ no ho. Ber a yedzi sacrament no dapɛn biara no, yɛbɔmu nya ntowdo (hwɛ Nkyerɛkyerɛ na Ahyɛmudzi 84:110). Naaso binom wɔ hɛn ward na nkorbata horow mu a wɔdze adzesoadze dudur ba anaa wɔmmba koraa.
Akwan horow a bia yebesi botum dze dɛm dɔnhwer krɔnkrɔn no dze asom binom na yɛdze nsesã aba hɔn abrabɔ mu no nye iyinom.
Boa Ma Sacrament Nhyiamu no Nkɔ Do Yie Ma Hɔn a Esom Hɔn no.
Anamɔn a odzi kan a edze bosũa mbrɛ ibesi bɔsom nye ibohu ankorankor anaa ebusua ebusua na hɔn ehiadze no yie. Iruhu hɔn yie ara no bɛma enya akwan horow a ibotum aboa ma hɔn sacrament som ber no akɔdo yie.
Mindy, mbɔdomaba ntafo hɔn nã akataasiaba no, mbɔdzembɔ kakra ara a n’akyerɛbaa ɔsomfo yɛe maa no no nyaa nsonsonee kɛse noara wɔ ne sacrament nhyiamu ber no dapɛn biara.
Mindy kyerɛkyerɛ mu dɛ, “Osian mo kun n’edwuma nhyehyɛɛ ntsi, mara na menye hɛn ntafo mbasiamba no kɔ asɔr dapɛn biara.” “Ɔyɛ a ɔyɛ dzen bor do dɛ menye mbɔdomaba beenu no a wɔnntsena fakor no botwa sacrament nhyiamu no, naaso m’akyerɛbaa ɔsomfo no afa asodzi no ato no do dɛ ɔbɔboa me.
“Ɔnye hɛn tsena na ɔboa me ma mohwɛ me mbasiamba no dapɛn biara. Ɔtsena me nkyɛn no ara yɛ adze kɛse ma me dodow na ɔdwedwe me haw ber a wɔrehaw adwen anaa hɔnho reyɛ ahomtsew no. Menngye nndzi dɛ obohu dabiarada dɛ ne ndzeyɛɛ no enya nhyɛdo mapã wɔ m’abrabɔ mu dɛm ber yi. Ohun m’ehiadze dɛ enã akatasiaaba a, ɔrehaw, na ɔboa ma asɔr yɛ asomdwee na enyigye bea ma hɛn nyina.”
Adwenkyerɛ a Ɔbɔboa Hɔn a wɔwɔ Ehiadze Pɔkyee Binom
-
Kɔbɔ elderfo quorum na Relief Society banodzifo amandzɛɛ wɔ asɔrmba hɔn ehiadze ho.
-
Baanodzifo yɛ sacrament nhyiamu kasa a wɔma no ho nhyehyɛɛ ama woeehyia asɔrmba hɔn ehiadze horow no. Sɛ hɔn a esom hɔn no benya mfaso wɔ asɛm bi ho a, enye wo baanodzifo nkyɛ dɛm adwenkyerɛ no.
-
Sɛ inyim dɛ obi wɔ dzɛmdzi bi anaa edziban bi a ɔnngye hɔn a osiw hɔn kwan ma wonntum nnya sacrament mu nhyira a, bisa hɔn ma wɔnkyerɛkyerɛmu yie na dza wobotum ayɛ ma woetu hɔn som ber no mpon. Enye wo baanodzifo nkyɛ asɛm yi.
-
Sɛ obi a esom no anaa inyim no noho akã mpa, koraa anaa mber kumabaa a, bisa wo bishop sɛ wobotum dze sacrament no akɛma no wɔ fie a. Sacrament nhyiamu mu ber no, ibotum mpo akyerɛw nsɛnsin na akyɛ no wɔ foon do, email do, anaa akã no enyim na enyim.
-
Sɛ obi a esom no no wɔ mbofra nkakraba a, ibotum ama hɔn mboa wɔ sacrament nhyiamu ber mu.
-
Sɛ hɔn a esom hɔn no nntaa mmba sacrament nhyiamu a, bɔ mbɔdzen dɛ ibɛtse hɔn ase na susu akwan horow a ibotum dze aboa. Sɛ wohia hɛntsĩadze a, ibotum ama wɔatsena wo kaar mu. Sɛ wonya atsenkã dɛ hɔn ebusua mma hɔn abamba a, ibotum ato nsa afrɛ hɔn ma wɔnye wo atsena. Ibotum ama nsato soronko a ɔbɛma woenya atsenkã wɔ sacrament nhyiamu ase dɛ wɔkã hɔn fua na hɔnho wɔ hia.
Kaa, Ndzeyɛɛ a Ɔnnyɛ Kyinkyinnɛn no Nya Nhyɛdo Mapã
Ɔrekasa fa erosom ho no, Akyerɛbaa Jean B. Bingham, Wiadze Mfɛndzanan Relief Society President, kyerɛkyerɛɛ dɛ: “Ɔtɔfabi a yɛdwen dɛ ɔwɔ dɛ yɛyɛ biribi kokoroko a ɔyɛ atsenkã ana ‘ɔakyerɛ’ dɛ yɛrosom hɛn anyɛnkofo. Naaso ɔsom ndzeyɛɛ a ɔnnyɛ kyinkyinɛnn botum enya nhyɛdo kɛse noara wɔ binom do—na hɛnankasa so hɛn do dɛmara.”1
Ward kakraba bi a ɔwɔ Belgium mu no, Evita tɔ dɛ ɔkyerɛase ma ahɔho na asɔrmba a wɔkã Spanish-kasa ber a Asɔr nhyiamu rokɔ do no. Ber bi, wɔnye obi a ofi Dominican Republic a, orusũa Asɔr no ho asɛm kyiaa no. Nna ɔtse Ngyiresi Borɔfo kasa kakra, naaso ne kasaa ankasa nye Spanish kasa. Ntsi Evita kãa dɛ ɔbɛkyerɛ ase kommyɛ mu wɔ sacrament nhyiamu ber mu no ama no, ntsi ɔmaa onyaa ahomkã yie.
Evita se dɛ, “Ɔtɔfabi a merekyerɛase no ma m’Ahomgyeda no yɛ ahokyer kakra.” “Naaso miridzi nkenyan do dze bisa binom dɛ sɛ wohia obi a ɔkyerɛ kasa ase no, ɔma me enyigye atsenkã na ɔdɔ ampaara dɛ minyim dɛ mutum boa hɔn ma wɔtse Sunsum ne nkã na hɔn enyi gye hɔn nhyiamu horow no ho.”
Adwenkyerɛ a yebodua Ndzeyɛɛ a Ɔnnyɛ Kyinkyinɛnn do dze Aboa
-
Enye wo baanodzifo nkasa mfa nhwɛ onyia a obehia mboa som kakra wɔ sacrament nhyiamu ber mu no. Anaa sɛ inyim obi a ohia a, si nkitse dɛ ebɛma wo baanodzifo enyi aba hɔn do.
-
Tsena hɔ dzinn ber a itweɔn ma nhyiamu no ahyɛ ase no. Iyi bɔboa “akoma a abobɔ na esunsum a woridzi awerɛhow a woetwa hɛn ho ehyia”2 a wohia asomdwee no a otum dua obu a yɛkyerɛ wɔ bea krɔnkrɔn ba no.
-
Akɔnkye Kwesida no, susu dɛ edze w’akɔnkye na mpaabɔ no behyira hɔn a wohia awerɛkyekyer kakra akã ho no.
-
Bɔ mpaa fa hu sɛ obi wɔ hɔ a ekɛtsena ne nkyɛn anaa ibɛn no sacrament nhyiamu ber no a ɔbɛyɛ mfaso ama no anaa sɛ kwan biara wɔ hɔ a ibotum aboa a.
Sacrament Nhyiamu Botum ayɛ Bea a Wɔkã Obiara Fua
President Joseph Fielding Smith (1876–1972) kyerɛkyerɛɛ dɛ, “Sacrament nhyiamu no nye Asɔr no ne nhyiamu horow nyina mu dza ɔyɛ krɔnkrɔn abɔso no.3 Dɛm ntsi, ohia tsitsir ara dɛ yɛyɛ ahwɛyie dɛ hɔn a wɔba nhyiamu ase no nya atsenkã dɛ wɔkã hɔn fua na wɔmee hɔn wɔ sunsum mu—nkankara asɔrmba afoforfo anaa asɔrmba a wɔbaa nhyiamu no bi no akyɛr ara yie no.
Merania a ofi New South Wale, Australia, faa ɔbaa bi a orusũa Asɔr no ho nsɛm wɔ no ward no nyɛnko. Merania kã dɛ, “Afei ɔabɛyɛ m’anyɛnkofo adɔfo mu ɔbaako.” “Modɔ dɛ metsena ne nkyɛn wɔ sacrament nhyiamu dapɛn biara, na aber biara mibisa no dɛ noho tse dɛn na sɛ biribi wɔ hɔ a mubotum ayɛ dze aboa no a.” Mber kakra guu mu no, wonumaa Merania ne nyɛnko no. Ward mba hɔn mbɔdzembɔ, na sacrament nhyiamu ase a wɔkã obiara fua no, nyaa nhyɛdo kɛse wɔ n’adwenpɔwbɔ mu.
Adwenkyerɛ horow a Edze Bɔsom Asɔrmba a Wɔresan Aba anaa Asɔrmba Afoforfo
-
Sɛ erekasa wɔ sacrament nhyiamu ase a, ibotum ato nsa afrɛ anyɛnkofo, ebusuafo, na binom ma woebetsie w’asɛm no.
-
Ibotum ahwehwɛ hɔn a wɔayɛ ankonam anaa bia wobehia mboa no na akã hɔn efua. Bisa dɛ ibotum atsena hɔn nkyɛn anaa to nsa frɛ hɔn ma wɔnye wo mbɛtsena.
-
Sɛ wɔpon nhyiamu no a, ibotum ato nsa afrɛ hɔn a isom hɔn na binom ma wɔaba Asɔr agodzi horow, akɔ temple, anaa guado ehyiadzi bi.
-
Sɛ obi a isom no ba sacrament nhyiamu, a ɔbae akyɛr kakra a, ibotum ebisa hɔn sɛ wonyaa nsɛmbisa biara wɔ dza wɔkyerɛkyerɛɛ no ho a. Kã kyerɛ hɔn dɛ kwan da hɔ ma hɔn dɛ sɛ asɛmfua bi, asɛm bi anaa nkyerɛkyerɛ bi a wɔanntse ase no, wɔmbɛn wo. Hom botum abɔmu ahwehwɛ nyiano no sɛ okehia a.
© 2020 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19 Nkyerɛasee ngye ntomu: 6/19. Ministering Principles, June 2020 ne nkyerɛasee. Fante. 16988 502