“Kev Txhawb Pab Dhau Los ntawm txoj Kev Sib Ntsib Txais lub Cim Nco Txog,” Liahona, June 2020

Daim Duab

txhawb pab

Tus uas kos duab yog Edward McGowan

Tej Ntsiab Cai txog Kev Txhawb Pab, Rau Hli Ntuj 2020

Kev Txhawb Pab Dhau Los ntawm Kev Sib Ntsib Txais lub Cim Nco Txog

Txoj kev sib ntsib txais lub cim nco txog muab cib fim rau peb sawv daws txhawb pab lwm tus thiab nrog lawv sib tham.

Txoj kev sib ntsib txais lub cim nco txog yog ib lub sij hawm ntxiv dag zog rau peb sab ntsuj plig thiab ua tib zoo xav mus xav los hais txog tus Cawm Seej thiab Nws txoj Kev Theej Txhoj. Thaum peb noj lub cim nco txog txhua lub lis piam, peb sawv daws puav leej tau kev txhawb nqa (saib Doctrine and Covenants 84:110). Tab sis mas ib txhia neeg hauv peb tej pawg ntseeg thiab tej ceg ntseeg nqa nra hnyav los yog tsis tuaj koom peb hlo li.

Nram qab no yog ob peb lub tswv yim qhia saib peb yuav ua li cas siv teev sij hawm dawb ceev ntawd kom txhawb nqa lwm tus neeg thiab pab kom lawv lub neej nyob zoo dua.

Pab Ua Kom txoj Kev Sib Ntsib Noj lub Cim Nco Txog Yog Ib Yam Zoo rau Lawv cov uas Koj Txhawb Pab

Qhov thib ib yuav tsum kawm kom paub txhawb pab yog ua tib zoo kawm paub txog cov neeg los yog tsev neeg thiab lawv tej kev xav tau. Tej zaum koj yuav pab tau lawv muaj ib txoj kev sib ntsib noj lub cim nco txog zoo dua thaum koj kawm ntxiv txog lawv.

Rau Mindy, ib tug niam tsev uas muaj me nyuam me uas yog ntxaib, tus viv ncaus uas txhawb pab nws tau pab ua kom txoj kev sib ntsib noj lub cim nco txog mus zoo dua rau nws txhua lub lis piam.

“Vim yog kuv tus txiv lub sij hawm ua hauj lwm, kuv coj kuv ob tug ntxhais ntxaib nrog kuv tuaj tshawj kuv ib leeg xwb txhua lub lis piam,” piav Mindy. “Yeej yog ib yam nyuaj heev uas sim koom tag nrho txoj kev sib ntsib noj lub cim nco txog thaum muaj ob tug me nyuam ntxhais me, tiam sis tus viv ncaum uas txhawb pab kuv tau txiav txim siab pab kuv.

“Nws nrog peb zaum ua ke thiab pab kuv saib xyuas kuv ob tug me nyuam ntxhais txhua lub lis piam. Qhov uas nws zaum ntawm kuv ib sab pab kuv ntau heev thiab pab kom kuv tsis txhawj xeeb thaum kuv ob tug me nyuam txhoj puab thiab kus kes. Kuv xav hais tias tus viv ncaus ntawd yeej yuav tsis paub hais tias qhov uas nws ua ntawd tau pab kuv ntau npaum li cas. Nws pom tias kuv yog ib tug niam tsev hluas uas nyuaj siab heev, thiab nws pab ua kom lub tshawj yog ib qho chaw muaj kev thaj yeeb nyab xeeb rau peb txhua tus.”

Tej Tswv Yim Kom Pab Tau Tib Neeg uas Muaj tej Kev Xav Tau Tshwj Xeeb

Qhia cov thawj coj ntawm pawg txwj laug thiab lub Koom Haum Niam Tsev hais txog tej yam uas cov mej zeej xav tau.
Cov thawj coj hais kom cov neeg uas hais lus hauv txoj kev sib ntsib noj lub cim nco txog hais txog tej yam uas yuav pab cov mej zeej raws li lawv xav tau kev pab. Yog tias cov uas koj txhawb pab yuav tau kev txhawb nqa los ntawm ib zaj lus twg, qhia lub tswv yim ntawd rau koj cov thawj coj.
Yog tias koj paub leej twg uas xiam hoob qhab los yog noj dab tsi phiv uas ua kom lawv txais tsis tau txoj koob hmoov ntawm lub cim nco txog, cia li noog lawv saib yog phiv dab tsi thiab saib yuav li cas kom lawv txoj kev teev tiam Vajtswv mus zoo dua. Qhia tej yam no rau koj cov thawj coj.
Yog tias ib tug neeg uas koj txhawb pab los yog paub txog yuav tsum nyob tsev xwb, txawm yog txhua lub sij hawm los yog ib ntus xwb, cia li nug koj tus npisov saib lawv txais puas tau lub cim nco txog ntawm lawv lub tsev. Koj kuj sau tau ntawv tseg hais txog tej yam uas cov hais lus hais thaum txoj kev sib ntsib txais lub cim nco txog thiab faib tej lus cim ntawd hauv xov tooj, los yog email, los yog tim ntsej tim muag.
Yog tias ib tug neeg uas koj txhawb pab muaj me nyuam me, koj pab tau lawv saib xyuas cov me nyuam thaum koom txoj kev sib ntsib noj lub cim nco txog.
Yog tias cov uas koj txhawb pab tsis tshua tuaj koom txoj kev sib ntsib txais lub cim nco txog, sim to taub thiab xav txog tej yam koj ua tau kom thiaj pab. Yog tias lawv yuav tsum mus qhov twg, ces koj thauj lawv mus qhov chaw ntawd los tau. Yog tias lawv tsev neeg tsis txhawb nqa lawv, koj caw tau lawv nrog koj zaum hauv txoj kev sib ntsib noj lub cim nco txog. Koj caw tau lawv yam tshwj xeeb li kom pab lawv paub hais tias sawv daws zoo siab tos txais lawv rau ntawm txoj kev sib ntsib txais lub cim nco txog.

Nco Qab Ntsoov, tej Yam Me Me Yeej Kav Ntev Heev

Hais txog kev txhawb pab, tus Muam Jean B. Bingham, lub Koom Haum Niam Tsev tus Tuam Thawj Tswj Hwm, tau qhia hais tias: “Qee zaum peb xav hais tias peb yuav tsum ua ib yam loj heev kom thiaj ‘suav’ tau tias peb ua hauj lwm pab peb cov neeg zej zog. Tiam sis tej yam me me uas peb ua kom pab lwm tus yeej muaj hwj huam heev rau lwm tus—tsis hais peb tus kheej los yog.”¹

Hauv ib pawg ntseeg me me hauv Belgium, feem ntau Evita yuav txhais lus rau cov neeg qhua thiab cov mej zeej uas tuaj xyuas uas hais lus Mev. Muaj ib zaug, Evita ntsib ib tug neeg uas tuaj Dominican Republic tuaj uas tab tom kawm txog lub Koom Txoos. Tus txiv neej ntawd paub lus Askiv me me, tiam sis lus Mev yog nws yam lus uas xub hais. Ces Evita cia li pab txhais lus rau nws yam yau yau li hauv txoj kev sib ntsib txais lub cim nco txog kom nws thiaj nyob tus me ntsis.

“Qee zaum kev txhais lus ua rau kuv Hnub Caiv ib nyuag ntxhov me ntsis,” Evita hais. “Tiam sis thaum kuv ua raws li tej kev tshoov siab thiab nug lwm tus neeg saib lawv puas xav tau ib tug neeg txhais lus rau lawv, kuv lub siab sov thiab kuv zoo siab heev paub hais tias kuv pab tau lawv hnov tus Ntsuj Plig thiab koom tau lawv tej kev sib ntsib.”

Tej Tswv Yim Pab Dhau ntawm tej Yam Me Me uas Ua Tau

Nrog koj cov thawj coj sib tham saib leej twg xav tau kev pab tshwj xeeb thaum txoj kev sib ntsib txais lub cim nco txog. Los yog tias koj paub leej twg uas xav tau kev pab, ua tib zoo qhia koj cov thawj coj txog lawv thiab.
Zaum twj ywm tos txoj kev sib ntsib pib. Ua li no yuav pab “cov neeg i uas lub siab tu thiab nyuaj siab uas nyob ib ncig ntawm peb”² uas xav tau tej kev nyob kaj siab lug uas los rau ib qho chaw dawb huv uas tswm seeb.
Thaum hnub Sunday uas yoo mov, cia li thov Vajtswv thiab yoo mov pab cov neeg uas koj txhawb pab uas xav tau kev nplij siab tshwj xeeb.
Thov Vajtswv kom paub saib puas muaj leej twg uas yuav tau kev pab los ntawm qhov uas koj mus zaum ntawm lawv ib sab thaum txoj kev sib ntsib txais lub cim nco txog los yog thov saib puas muaj lwm yam ua koj ua tau.

Txoj Kev Sib Ntsib Txais lub Cim Nco Txog Ua Tau Ib qho Chaw uas Tos Txais Txhua tus Neeg

Thawj Tswj Hwm Joseph Fielding Smith (1876–1972) tau qhia hais tias, “Txoj kev sib ntsib txais lub cim nco txog yog txoj kev sib ntsib dawb ceev thiab dawb huv tshaj plaws ntawm tag nrho tej kev sib ntsib hauv lub Koom Txoos.”³ Yog li ntawd, tseem ceeb uas tag nrho cov neeg uas koom txoj kev sib ntsib txais lub cim nco txog hnov tau tus ntsuj plig thiab xav tias sawv daws tos txais lawv—twb yog cov mej zeej tshiab los yog cov mej zeej uas tsis tau tuaj koom ntev.

Merania uas tuaj New South Wales, Australia, tuaj tau ua phooj ywg nrog rau ib tug poj niam uas kawm txog lub Koom Txoos hauv nws pawg ntseeg. “Nim no nws yog kuv ib tug phooj ywg zoo tshaj plaws,” Merania hais. “Kuv nyiam nrog nws zaum hauv txoj kev sib ntsib txais lub cim nco txog txhua lub lis piam, thiab kuv yeej los nug nws saib nws nyob zoo li cas thiab saib puas muaj ib yam dab tsi uas kuv ua tau kom thiaj pab nws.” Tom qab ib ntus, Merania tus phooj ywg tau ua kev cai raus dej. Tej kev pab los ntawm cov neeg ntseeg, thiab qhov uas sawv daws tos txais nws, tau pab ua rau nws xav ua kev cai raus dej.

Tej Tswv Yim rau txoj Kev Txhawb Pab cov Mej Zeej uas Rov Qab Tuaj Koom Los Yog cov Tshiab

Thaum koj yuav hais lus hauv txoj kev sib ntsib txais lub cim nco txog, koj caw tau koj cov phooj ywg, koj cov neeg txheeb ze, thiab lwm tus neeg tuaj hnov koj hais lus.
Koj nrhiav tau thiab tos txais tau lawv cov uas nyob lawv ib leeg los yog cov uas tej zaum xav tau kev pab. Nug saib lawv puas kam koj zaum npuab lawv los yog caw lawv los nrog koj zaum ua ke.
Thaum txoj kev sib ntsib tiav tas, koj caw tau lawv cov uas koj txhawb pab ntawd thiab lwm tus tuaj koom lub Koom Txoos tej kev ua si, mus tom lub tuam tsev, los yog rau lwm yam kev lom zem.
Yog tias ib tug uas koj txhawb pab tuaj koom txoj kev sib ntsib txais lub cim nco txog tiam sis tau ntev ntev lawm uas lawv tuaj, koj nug tau lawv saib lawv puas muaj lus nug dab tsi hais txog tej yam uas tau qhia lawm. Qhia lawv hais tais lawv yeej nug tau koj yog tias muaj ib lo lus, ib zaj dab neeg, los yog ib txoj lus qhuab qhia twg uas lawv tsis to taub. Yog tias tsim nyog neb nrhiav tau cov lus teb ua ke los tau thiab.

© 2020 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, June 2020. Hmong. 16988 295