Odingel lokiu a Sakrament Miting

A sakrament miting a meskid a techall loldak er kid e oldingel er a rebebil.

A sakrament miting a taem er a omelisiich er a chedaol tekoi e melbedebek el kirel a Osobel me a Tngakireng er Ngii. Sel dolai er a sakrament er a bek el sandei, e ngoldak er kid el rokui (mesa Doctrine and Covenants 84:110). E ng di a rebebil er a rechedal a ward me a branch er kid a chellungel a berraod malechub eng kuk kmal diak el teloi er kid.

Aikakid a bebil er a teletael el sebeched lousbech er a temel a sakrament loldingel er a rebebil e sobechakl a klengar tir.

Molngeseu el rulii a Sakrament Miting el mo Ungil el mo er Tirkel Moldingel er Tir

A kot el dauch er a omesubel odingel a mo medengelterir a dersta el chad me a telungalek me a ikel ngelsengesir. Ng locha sebechem el ngosuterir el rulii tial teletael er a omeliul a sakrament el mo ungil kirir sel msal mo ungil medengelterir.

A Mindy, el ngeasek el chedil loungalek er a rekebtot, e a beot lomerellel a odos loldingel er ngii a kmal mle klou a lengesuir ngii er sel temel a sakrament e ra bek el sandei.

“Ng mekngit el temel a bechik er a urerel a uchul, e a kubeteterir tirkal kebtot el redil ngelekam el mo er a ikelesia er a bek el sandei,” ng melekoi a Mindy. “Ng kmal meringel a dolasm el kiei el rokir a sakrament lobeteterir a reteru el mekekerei el ngalek, eng di a odos loldingel er ngak a mla nguu me ngerchelel lolngeseu er ngak.

“Ng dengchokl lobengkemam e olngeseu er ngak lomes er tirkal ngelekek er a bek el sandei. Sel ledengchokl er bita er ngak eng klou a renguk e diak el ko er a mesbesebek a renguk sel loumekngit e loutekangel tirkal ngelekek. A kumdasu e ngii a diak lodengei el kmo a omerellel a kmal klou a relii er ngak er chelechal taem. Ng milsekak el ngeasek, e mesbesebek a renguk el chedil, e ngii a ngosukemam el mo kellechakl e ungil a rengmam el ngara ikelesia.”

Uldasu el mo Olngeseu er Tirkel Ngarngii a Chelitecheterir

Mouchais el mo er a roungerachel er a chelechad er a elders me a Relief Society el kirel aikel ngelsengesir me a lousbech a rechedal a ikelesia.
A roungerachel a tuib aikel dai er a cheldecheduch el ngii a mo ngosuterir a rechedal a ikelesia. A lsekum a dersta el klumech a mo klungiolir tirkel moldingel er tir, e mouchais el mo er a roungerachel er a ikelesia.
A lsekum e kemedengelii a chad el ngarngii a chelitechetul malechub eng atar er a kmo ngera el kall el uchul eng diak el sebechir el ngmai a klengeltengat er a sakrament, e moker tir me bo mui el medengei aikel ngesou el sebechel modars el mo ngosuterir. Mouchais aika el tekoi el mo er a roungerachel er a ikelesia.
A lsekum a chad el moldingel er ngii malechub e kemedengelii a chad el sechudel diak lorael meng di ngara blai, a di lemereko el uaisei malechub eng kuk di kedeb el taem, e molengit er a bisop me a sakrament bol sebechel mengai el mo er a blirir. Ng dirrek el sebechem el lemuches a klumech el medung er a sakrament miting e ouchais el mo er tir lokiu a dengua, email, a lechub e kemong.
A lsekum a chad el moldingel er ngii a oungalek er a remekekerei el ngalek, eng sebechem el ngosuterir er sel temel a sakrament miting.
A lsekum e tirkel moldingel er tir a blechoel diak lemei er a sakrament miting, e molasm losiik a teletael el mo ngosuterir. A lousbech olidiuul, eng sebechem lotekterir. A lsekum a rechad er a blirir a kuk diak el ko er a olngeseu er tir, eng sebechem el siotai er tir el mo dengchokl lobengkem. Ng sebechem lodersii a tokubets longit el mo ngosuterir el mo semeriar e sorir el ngara sakrament miting.

Molatk el kmo, a Beot el Teletael a Klou a Relii

A Sister Jean B. Bingham, el Merredel er a Cherrengelel a Relief Society a millekoi el kirel odingel, el kmo: “A lebebil er a taem e kede omdasu el kmo ng kmal kired el rulii a klou el kmo ngerang el mo sebechel ‘mucherangel’ el odingel el mo er a rebebil. E ng di a beot lolchotel omesiou a sebechel klou a relii er a rebebil—me a dirrek el kid.”¹

Chelsel a kekerei el ward el ngara Belgium, e a Evita a blechoel loleiuid a tekoi er a Sebangiol el mo er a rechad el me oldingel me a rechedal a Ikelesia. A tara taem, e a Evita a mlo kaodengei ngii me a tal chad er a Dominican Republic el ngii a milsuub el kirel a Ikelesia. Ng mle telkib el medengei a tekoi er a Merikel, eng di a tekoi er a Sebangiol a kmal techel a tekingel. A Evita uleliuid a tekoi el mo er ngii er a taem er a sakrament miting meng mlo kellechakl a rengul.

“A oidel a tekoi a lebebil er a taem eng rulii Chedaol sils er ngak el ksal ko er a meriked,” ng melekoi Evita. “Eng di sel kutireklii Chedaol Reng e kuker er a rechad el kmo te ousbech er a chad loleiuid a tekoi eng kmal meskak a deureng sel kudengei el kmo ng sebechek el ngosuterir el melchesuar Chedaol Reng e mo ungil a rengrir.”

Uldasu el mo Olngeseu lokiu a Beot el Teletael

Bo mongedecheduch er a roungerachel el kirel a kmo ngtechang lousbech a ngesou er sel temel a sakrament miting. A lechub a lsekum e kemedengelii a chad lousbech a ngesou, e mouchais er a roungerachel me bo lodengelterir.
Bom chelellakl el dengchokl sel mongiil er a miting lomuchel. Tia mo ngosuterir tirkel kmal “chellungel a berraod me a klengitelreng el meliuekl er kid”² e lousbech er a budech el mei lokiu a kellechakl e chedaol basio.
Sel Sandei el temel a sengerenger, e molatk odersii a sils er kau er a sengerenger me a nglunguchem el mo er a chad el kau oldingel er ngii el kmal lousbech ongelim.
Moluluuch el mo medengei el kmo ngarngii a chad locha soal a mdengchokl er bita er ngii malechub e ke dengchokl el kmeed er ngii er sel temel a sakrament a lechub e ngarngii a kuk tara rolel a ke mo olngeseu.

A Sakrament Miting a Sebechel mo Ungil Basio el mo er a Rokui el Chad

A President Joseph Fielding Smith (1876–1972) a ulisechakl el kmo, “A Sakrament miting a kot el chedaol, kot el tokubets, er a rokui el miting er a chelsel a Ikelesia.”³ Ngii di el teletael, eng klou a ultutelel el tirkel rokui el chad el ngara sakrament miting a ungil a rengrir e mosisechakl er a chedaol tekoi—oumesingd tirkel beches el chedal a ikelesia a lechub e tirkel meketeketa el diak bel dum el chedal a ikelesia.

A Merania er a beluu er a New South Wales, er a Australia, a mlo sechelil a tal redil el milsuub el kirel a Ikelesia er tial ward er ngii. “Ng kmal mla mo ta er a ungil sechelik er chelechang,” ng melekoi a Merania. “Ng kmal soak el dengchokl lobengkel er a sakrament miting er a bek el sandei, e ak blechoel loker ngii el kmo nguangerang e ngera sebechek rulii el mo ngoseuir.” Telkib el taem ruriul, e a sechelil a Merania a miltecholb. A blak el reng er a rechedal a ward, me a ungil teletael er a sakrament miting, a kmal mle klou a relii er a uldesuel.

Uldasu el kirel Odingel el mo er Tirkel Lueta el mei malechub a Rebeches el Chedal a Ikelesia

A lsekum ke mo mengedecheduch er a sakrament miting, eng sebechem el siotai er a resechelim, telungalek, me a rebebil er a rechad el mo orrenges er a klemechem.
Ng sebechem lomes e mengemedaol er tirkel ko er a di tir el tang a lechub e te ko er a ousbech a ngesou. Moker el kmo ng sebechem el dengchokl lobengterir a lechub e bol dengchokl er bita er kau.
Sel bol merek a sakrament, eng sebechem el siotai er tirkal moldingel er tir me a rebebil er a rechad el mei er a ikel omilil er a Ikelesia, mo er a templo, malechub eng kuk di kmo ngera lomilil morngii.
A lsekum a chad el moldingel er ngii a meketeketa el diak el mei er a sakrament miting, e sola ketengel meremang e moker tir el kmo ngarngii a ko er a ker er a uldesuir el kirel a mlosisechakl el suobel. Msbedeterir el kmo ng sebechir loker kau a lsekum eng mlarngii a tekoi, cheldecheduch, malechub eng telkib er a osisechakl el mlo diak lodengelii. Ng dirrek el sebechiu el dmak e smiik a nger.

© 2020 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Osisechakl er a Odingel, Ongelolem el Buil 2020.Palauan.16988 881