“Ndinwam otode ke mme Edinam Ufok Abasi,” Liahona, Ofiong July ke isua 2020

Bud Cordin owut ndise nte mkparawa irenowo ebopde ataya; Sherie Price McFarland owut ndise nte nkaiferi enimde okpokoro; background otode Getty Images

Ukpebnkpo Unwam, Ofiong July ke isua 2020

Ndinwam otode ke mme Edinam Ufok Abasi

Ntot Andiwet: Ema enanam etop emi mbemiso idiok-udongo COVID-19 editibe. Ubak mme ekikere eke editienede ididukke utom kini editie nsan-nsan edi eyeda itie kini mme esop ye edinam Ufok Abasi otongode. Edieke ofonde, mbok enam mme ekikere emi ke usung nte ekemde ye item Ufok Abasi ye eke ukara etemede.

Usung kiet ke ndisin unwam nno mbon ward, mbohoidung, ye mme ufan nnyin edi-to ke mme edinam Ufok Abasi. Mme ke mbufo emeduak edinam emi ebehede unana mme inemesit eke owo emi mbufo enwamde mme ke mbufo eyekot mmo ete edibuana ke edinam mme ndinam utom nno mbon efen, edinamke ward, stake, mme ke multistake level ekeme ndino ufon ye inem usung man esin edidiana-kiet onyung ono mbon Ufok Abasi nsongo-nda.

Edinam Ufok Abasi nko ekeme ndiberede usung ono ediwak ufang ke ndisin unwam. Nte uwutnkpo, edinam Ufok Abasi ekeme ndino ufang ndibuana ke utom unwam emi odiongde mbon efen onyung osongo nti ebuana ke obio. Edinam Ufok Abasi nko ekeme ndidi ifet ke ndikpere mbon mfiak-edem ke Ufok Abasi ye mme ufan eke edu-ukpono efen ye mme ufan eke minyeneke edu-ukpono.

Ke esit edide ediwak owo ke Ufok Abasi enyene ufang eno Abasi man odiong onyung osongo mme ward ye branch, mbohoidung, ye mme obio nnyin.

Ndibop Nti Ebuana

Ini etuep ke edi, ndien David Dickson ikenyeneke ifiok ndomokiet nte edinamde ufokemana esie eboho etuep.

David, nnwan esie, ye ndito iban iba ekeworo edidung esit-idung obio Fredonia, Arizona, USA, akwa ana-inwang obio emi oyohode ye ikpo nda-ndat ebedeng, awawa-mkpri eto, emi mfang misibeheke.

Ufok emi mme Dicksons ekedungde ekenyene stove-ifia nte nkokure nkpo emi edinode mmo ufiop. David ama ososop odiongo ete ke nditang ifia nim ekedi akpan ifiok kiet koro ini etuep ke Fredonia esiyoho ye snow ye ice.

“Ami nkenyeneke ifia mme nkpo-usiak-eto ndomokiet mme ifiok nte mkpedade kiet nam utom!” David odoho. “Ami nkefiokke se ami mkpenamde”

Usuk mbon ward ema ebup David ete mme ufokemana esie enyene ifia ekem ndida nkure ofure ini etuep. David ete, “Ikedaha mmo anyan ini ndifiok ke imo inyeneke ifia.” “Elders quorum ema esosop enyime ndinwam mi ntang ifia nim. Ye oyoho esit-ekom, ami mma nnyime eno mmo.”

David osop edikut ete ke utom utang-ifia emi ekebiet ediwak edinam ward emi ema ekenehede enam-uduak, enehede-ediomo, enyung enehede-edinam. Usenubok Saturday kiet, David, elders quorum, ye mbon ward eken eworo eka ikpo-obot ke ukpat-nkpo-isang eke trucks ye trailers.

David ete “Ke uwemeyo kiet, eno ekom ke nkpo-utom ye mbufiok, mbon ward ema eno ufokemana mi ediwak-ifia emi ekebighede ono nnyin ke ufang ini etuep iba” “Ata akpan nkpo efen, ema ekpep mi ofuri se akanade ami ndiongo kabnaga nditang-ifia nim ke idem mi. Ke ini eke ami mkpongde Fredonia, ami mma ndiongo nte ndade nkpo-usiak-eto nam utom, ndien ami nnyung nsinwam ke utom utang-ifia mbok eke ami nkemede ndibat.”

Oru edinam Ufok Abasi ntre isibopke nti ebuana kpot ke otu mbon Ufok Abasi edi esibop nti ebuana ye kpukpru owo ke obio nko.

David ete, “Ami nditi nnwan kiet, ikedighe owo Ufok Abasi nnyin, emi ekedide obufa owo ke ebiet oro.” “Enye ekesidi-bara mkpana-eto eke ufok esie man okop ufiop. Inikiet emi nnyin ikofiokde unana esie, nnyin ikut ete ke ana enye enyene ifia ekem man edibara ke ofuri ini etuep oro. Enye ama enehede ono ekom emi akanamde enye ikemeke nditing.”

Utom unwam ke Fredonia ama anam kpukpru owo ebo uboho ye ufiop ke ofuri ini etuep oro.

Ndisin Unwam nno Mbon Efen

Kini ndude ke mission ke Romania, Meg Yost ye nsanga esie esiwak ndikise ufokemana kiet emi mikidighe Ufok Abasi ke anyan ini. “Mme Stanicas ekedu ke otu mme akpa mbon Ufok Abasi ke Romania,” Meg ete, “ndien nnyin imema mmo.”

Ke edisimde ini emi eduakde enyung ediomode ndinam edinam ke branch, mme adausung ebiere ete ke branch eyenyene “Pioneer Night” kiet. Emi edi-di mbubreyo kiet man edara mme nti ebemiso emi eketode United States man edisim Salt Lake Valley. Oro edi-di ufang kiet ke ndikpono mme akpa mbon Ufok Abasi ke Romania.

Meg ete, “Nnyin ikere ke oro edi-di eti usung ono ubak mbon Ufok Abasi nditing iko ntiense ekenkabare-esit mmo ye danga mmo ekutde nte UfokAbasi okoride ke Romania.” “Nnyin isosop ikere ite ke akpana ufokemana Stanica eduk ke edinam oro. Nnyin ikoot mmo ete edibuana, ndien mmo ema ekop inemesit!”

Ke okoneyo usen edinam oro, mme Stanicas ikedisimke ke ini ekperede ini nditongo.

Meg edi-ti ete, “Ama afina nnyin sia ikekere ke mmo ididighe.” Edi ke edikem ini, mmo ebe eduk ke enyin-usung. Mme Stanicas ema eting inem iko ntiense ebanga iko Abasi ye Ufok Abasi. Mmo nko edimehe ye mbon Ufok Abasi emi mmo mikutke ke anyan ini.”

Mbon branch oro etat ubok mmo enyung edara edi-di mme Stanicas. Ke Sunday efen, ama akpa Meg idem ke inemesit ke Sister Stanica ke Ufok Abasi.

“Ini emi ami nkesede enye ke esisit ofiong kiso, enye okosuk edi-di Ufok Abasi!” Meg eketing. “Ami nkere ke ufang ndino iko ntiense esie nnyung mfiok nte ibuanade ye nte enehede eyom imo ke branch ama enehede anwam enye.”

Mme Ekikere Inang ono Ndinwam otode ke mme Edinam Ufok Abasi

Eduak mme edinam emi ekemde ye unana: Mme edinam edi eti usung kiet ke ndiyo mme nsio-nsio unana. Ekeme ndibenge edinam man mmo eyo asanga-asanga unana owo kiet mme eke eboho kiet. Ana nte mme edinam oro anwam mme unana mbon sibuana, mme unana oro ekpedi ndinehede ndiongo owo kiet-kiet, ndikpeb ofon mbanga iko Abasi, mme ndikop odudu eke Spirit.
Ekot kpukpru owo: Nte mbufo eduakde ndinam mme edinam, enam ata utom man ekot mbon emi edikutde ufon ke ndibuana. Enyene ekiekere ebnaga mbufa mbon Ufok Abasi, mbon mfiak-edem, iwaad, mme single adult, mbon nkpo-nam, ye mbon edu-ukpono efen. Eno ikoot ye ata inem ke ekikere, enyung ewut danga mbufo ekpema mmo ndi-di.
Esongo ebuana: Mbon emi mbufo ekotde eyebo ediwak nti nkpo eto ke mme edinam edieke mmo enyenede ufang ndibuana. Usung kiet ke ndisongo ebuana edi ndinyene mme owo emi edade eno, ifiok-utom, ye oniong mmo esin ke edinam oro.
Edara kpukpru mbon emi edide: Edieke mme ufan mbufo edide edinam kiet, enam ofuri se ekemede man mmo ekop inem edi-di. Ke ukem usung oro, edieke mbufo ekutde mme owo emi mbufo mifiokke, enam ufan enyung edara mmo ndi-di nko!

© 2020 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare eke Ukpebnkpɔ Unwam, Ɔfiɔŋ July ke isua 2020. Efik. 16989 553