“Ministering paagi sa Mga Aktibidades sa Simbahan,” Liahona, Hulyo 2020

Litrato

ministering

Litrato sang lamharon nga mga lalaki nga nagaplastar sang tolda iya ni Bud Corkin; litrato sang babayi nga nagahanda sang lamisa iya ni Sherie Price McFarland; background iya sang Getty Images

Mga Prinsipyo sa Ministering, Hulyo 2020

Ministering paagi sa Mga Aktibidades sa Simbahan

Pahanumdom sang editor: Ining artikulo ginsulat antes pa sang pandemya sang COVID-19. Ang pila sa mga panugyan sa idalom indi pwede sa tinion sang social distancing pero mangin pwede na himuon sa tion nga magbalik na ang mga miting kag aktibidades sa Simbahan. Kon kinahanglan, palihog bagaya ining mga panugyan suno sa pinakaulihi nga mga pagsulundan sang Simbahan kag gobyerno.

Isa ka paagi nga mag-minister kita sa aton isigka-miyembro sa ward, mga kasilingan, kag kaabyanan amo ang paagi sa mga aktibidades sa Simbahan. Kon nagaplano kamo sang aktibidades base sa mga panginahanglan ukon mga interes sang tawo nga inyo ginaministeran ukon ginaimbitar ninyo sila sa pag-entra sa mga aktibidades ukon sa oportunidad sa pagserbisyo, ang mga aktibidades sa lebel sang ward, stake, ukon bisan pa sa gintingob nga mga stake makahatag sang makahulugan kag masadya nga mga paagi agud patubuon ang paghiliusa kag pabakuron ang mga miyembro.

Ang mga aktibidades sa Simbahan makabukas man sang pwertahan sa madamo nga mga oportunidad sa pag-minister. Halimbawa, ang mga aktibidades sa Simbahan sarang maghatag sang mga oportunidad sa pagpartisipar sa mga proyekto sa pagserbisyo nga makabugay sa iban kag makapatubo sang positibo nga mga relasyon sa komunidad. Ang mga aktibidades sa Simbahan sarang man nga mangin kahigayunan nga malab-ot ang mga indi-gawa-aktibo nga miyembro sang Simbahan kag mga abyan sa iban nga pagtuluohan ukon mga abyan nga wala sang ginaentrahan nga relihiyon.

Ang paglakip sang madamo nga mga tawo sa mga aktibidades sa Simbahan nagatuga sang oportunidad para sa Ginuo nga bugayan kag pabakuron ang aton mga ward kag branch, ang aton mga kasilingan, kag ang aton mga komunidad.

Pagpasad sang Positibo nga mga Relasyon

Manug-abot na ang tigtulugnaw, kag wala sing ideya si David Dickson kon paano proteksyunan ang iya pamilya sa tugnaw.

Si David, ang iya asawa, kag duha ka kabataan nga babayi bag-o lang nagsaylo sa nauma nga siyudad sang Fredonia, Arizona, USA, isa ka mataas nga disyerto nga ginapalibutan sang matahum nga pula nga mga banglid, sagebrush, kag berde nga mga kakahuyan.

Ang balay nga ginaarkilahan sang mga Dickson nagasalig sa kalan nga ginagatungan sang kahoy bilang mayor nga pangpainit sa balay. Natun-an gilayon ni David nga ang pagpanipon sang inuggatong isa ka kinahanglanon nga abilidad bangud kay ang mga tigtulugnaw sa Fredonia puno sang nieve kag yelo.

“Wala gid ako sang bisan isa ka inuggatong ukon sang chainsaw ukon bisan gani sang ihibalo kon paano maggamit sina!” siling ni David. “Indi ko mahibal-an kon ano ang himuon ko.”

Pila sa mga miyembro sa ward ang namangkot kay David kon ang iya pamilya -may igo nga kahoy nga inuggatong para sa bilog nga tigtulugnaw. “Wala nagdugay sang marealisar nila nga wala gid ako sina,” siling ni David. “Wala madugayi nagtanyag ang korum sang mga elders nga buligan ako nga magpanipon sang kahoy. Nga puno sang kapasalamatan, ginbaton ko ang ila tanyag.”

Dugay-dugay nahibal-an ni David nga ang ini nga klase sang lakat sa pagpanipon sang kahoy kinaandan sa madamo nga planado, organisado, kag ginatambungan gid nga mga aktibidades sa ward. Isa ka Sabado sang aga, si David, ang korum sang mga elders, kag ang iban pa nga mga miyembro sa ward nagpadulong sa kabukiran sa isa ka guban sang mga pick-up kag mga trak.

“Sa isa lang ka hapon, salamat sa ila mga gamit kag ihibalo, ang mga miyembro sa ward nakatigayon nga magtigana sa akon pamilya sang inuggatong nga naglawig sa amon sang mga duha ka tigtulugnaw,” hambal ni David. “Mas labing importante, natudloan ako sang tanan nga dapat ko mahibal-an parte sa pagpanipon sang kahoy nga ako lang. Sang nagbiya ako sa Fredonia, makahibalo na ako kon paano maggamit sang chainsaw, kag nakabulig ako sa mas madamo nga aktibidades sa pagpanipon sang kahoy sangsa akon maisip.”

Ang amo nga mga aktibidades sa ward wala lamang nagapasad sang positibo nga mga relasyon sa mga miyembro sang Simbahan kundi nagapasad man sang positibo nga mga relasyon sa tanan sa komunidad.

“Nadumduman ko ang isa ka babayi, nga indi miyembro sang Simbahan, nga bag-uhanon sa lugar,” siling ni David. “Napilitan sia nga igatong ang kahoy nga dingding sa iya balay para lang mainitan ang iya balay. Sang mahibal-an namon ang iya kahimtangan, ginsiguro namon nga may hustohan sia nga inuggatong para sa bilog nga tigtulugnaw. Grabe ang iya pagpasalamat nga haluson sia makahambal.”

Ang mga pagpaninguha sa ministering sa Fredonia nagsiguro nga ang tanan nagapabilin nga hilway sa katalagman kag mainit sa bilog nga tigtulugnaw.

Paglab-ot sa Iban

Samtang nagaserbe sa misyon sa Romania, si Meg Yost kag ang iya kaupod regular nga nagabisita sang isa ka pamilya nga malawig na nga wala nagasimba. “Ang pamilya Stanica isa sa pinakauna nga mga miyembro sang Simbahan sa Romania,” siling ni Meg, “kag palangga namon sila.”

Sang tion na nga magplano kag mag-organisar sang aktibidades sa branch, nagdesisyon ang mga lider nga maghiwat ang branch sang “Gab-i sang mga Pionero.” Mangin gab-i ini sa pagselebrar sang maisog nga mga pionero nga nagtabok sa Estados Unidos para makalab-ot sa Salt Lake Valley. Mangin isa man ini ka oportunidad agud pasidunggan ang mga pionero sang Simbahan sa Romania.

“Napinsar namon nga mangin manami ini nga paagi para sa mga miyembro nga magpaambit sang ila testimonya parte sa ila pagkahaylo kag kon paano nila nakita ang pagdako sang Simbahan sa Romania,” siling ni Meg. “Napinsaran namon gilayon nga dapat mag-intra ang pamilya Stanica. Ginhagad namon sila nga magpartisipar, kag nalangkag gid sila!”

Sang gab-i sang kahiwatan, ang pamilya Stanica wala pa gihapon nag-abot sang manugsugod na.

“Nabalaka kami nga indi sila magkadto,” ginsaysay ni Meg. “Pero sang masugod na, nagsulod sila sa pwertahan. Nagpaambit sang matahum nga testimonya ang pamilya Stanica parte sa ebanghelyo kag sa Simbahan. Nagkililit-anay man sila sang iban nga mga miyembro nga madugay na nila nga wala makita.”

Ginbuksan sang mga miyembro sang branch ang ila mga kamot kag gin-abiabi ang mga Stanica. Sang madason nga Domingo, malipayon nga nasorpresa si Meg nga makita si Sister Stanica sa simbahan.

“Sang nagbisita ako sa branch pila ka bulan ang nagligad, nagasimba sia gihapon!” siling ni Meg. “Sa banta ko ang tsansa nga magpaambit sang iya testimonya kag makabatyag nga may labot kag kinahanglanon sa branch nakabulig gid sa iya.”

4 ka Mga Ideya para Mag-minister paagi sa Mga Aktibidades sa Simbahan

Magplano sang mga aktibidades nga nagasabat sang mga panginahanglan: Ang mga aktibidades maayo nga paagi agud masabat ang madamo nga lainlain nga mga panginahanglan. Mahimo nga planuhon ang mga ini para masabat ang partikular nga mga panginahanglan sang isa ka indibidwal ukon grupo. Dapat man ang mga ini magsabat sang mga panginahanglan sang mga nagapartisipar, kon ang inang panginahanglan amo ang mas makilala ang kada isa, magtuon pa gid parte sa ebanghelyo, ukon mabatyagan ang Espiritu.
Agdaha ang tanan: Samtang nagaplano kamo sang mga aktibidades, maghimo sang espesyal nga pagtinguha nga hagaron ang mga makabenepisyo sa pag-entra. Panumduma ang bag-o nga mga miyembro, ang indi-gawa-aktibo nga mga miyembro, mga lamharon, mga single adults, mga tawo nga may mga kasablagan, kag mga tawo sa iban nga pagtuluohan. Ipalab-ot ang imbitasyon nga ginapanumdom ang pinakamaayo nila nga interes, kag ipahayag nga gusto gid ninyo nga magkadto sila.
Pabaskuga ang partisipasyon: Ang inyo mga ginaimbitar mas makatuon sa mga aktibidades kon may oportunidad sila nga magpartisipar. Isa sa paagi nga magpabaskog sang partisipasyon amo ang pagpagamit sa mga indibidwal sang ila mga abilidad, mga ikasarang, kag talento sa tion sang aktibidades.
Abiabiha ang tanan: Kon ang inyo mga abyan magkadto sa isa ka aktibidades, himoa ang tanan ninyo nga masarangan agud mabatyagan nila nga ginaabiabi sila. Sa amo man, kon may makita kamo nga mga tawo nga indi ninyo kilala, magmangin mainabyanon kag abiabiha man sila!

© 2020 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, July 2020. Hiligaynon. 16989 861