“Karihngihnyuck ke Mukwikwi luhn Alu,” Liahona, Julahe 2020

Petsac kacn mukul fuhsr se ahkolah lohm in camp sel Bud Corkin; petsac ke muhtwacn se ahkolah tepuh sel Sherie Price McFarland; background tuhkuh sin Getty Images

Ip Yohk in Karihngihn, Julahe 2020

Karihngihnyuck ke mukwikwi luhn Alu

Sokwack mwe kahsruh: Article se inge oreklac meet liki elyah sikyak ke COVID-19. Kuhtuh sin ma sramsramkihnyuck twen inge e tiac kuh in orekmakihnyuck ke pacl in toeni luhn kais sie sie tuhsruhk ac tuhfah oasr pacl kuh in orekmakihnyuck ke pacl in Miting ke Alu ac kuhtuh mukwikwi sifil ahkfahsryeyuck. Fin enenuh, nuhnak muhnahs oruh in kuh in orekmaihnyuck ma sramsramkihnyuck inge ke Alu mihsenge ac mwe kol luhn government.

Sie atac ma kuht kuh in orekmakihn in karihngihn mempucr wiyacsr ke ward lasr uh, mwet tuhlan, ac kawuck pa mukwikwi luhn Alu. Lah kom plwacnwelah mukwikwi raunweack ma enenweyuck kuh ma luhngse luhn mwet se kom karihngihn kuh kom solwacltahl in wi mukwikwi kuh kuhlwacnsap in karihngihn mwet sahyac, mukwikwi ke ward, stek, kuh finne fahsrweni in kaihngihn ac ahkkweye mempucr.

Mukwikwi luhn Alu oacyacpac kuh in ikucslah sruhnguhl nuh sin kais sie sie in karihngihn. Srihkasrak se, Mukwikwi ke Alu uh kuh in ahkolah srihpac in wi kuhlwacnsap ke project ma e ahkinsewowoye mwet sahyac ac Muhsaheack Kuhpahsr lasr in yohk Kalmeyac ke muhtuhnfwacl se. Mukwikwi luhn Alu oacyacpac kuh in eis srihpac se in som sokwack mempucr wiyacsr ma muhnahslah ke Alu uh ac sokwack kawuck lasr ke luhlahlfongi sahyac kuh kawuck ma wacngihn luhlahlfongi la.

Weacng pacna mwet pucspucs ke mukwikwi luhn Alu uh oraclah srihpac nuh sin Leum in ahkkinsewowoye ac ahkkweye ward ac pracns lasr uh, mwet tuhlan lasr, ac muhtuhnfwacl lasr uh.

Muhsaheack Kuhpahsr in Yohk Kalmeyac

Winter uh e tuhkuh, ac David Dickerson el nihkihn lah el ac oruh fuhkah sucu lal uh in muhta fucsrfucsr.

David, muhtwacn kiacl, ac tuhlihk muhtwacn luo nahtuhlos tuhfahna som nuh ke siti fin acn Fredonia, Arizona, USA, yen mwesis ma rauniyucklac ke yot fuhlwact sruhsrah, sagebrush, ac sahk.

Ke Lohm sel Dickson ah oasr acn tae se suc orekmakihnyuck pac mwe ahk fucsrfucsr se. David ahksayacl in etuh in oracni etong in fihsrwacsr nuhsel mweyen pacl in winter ke acn Fredonia uh upac snow ac aes uh.

“Wacngihn etong kuh tahtah sein se kuh finne pac in etuh orekmakihnyac!” David el fahk. “Nga tiacna etuhlah meac nga e oruh ah.”

Kuhtuh sin mempucr ke ward uh siyuck sel David lah oasr suhnuhn etong luhn sucu lal ah in orekmakihnyuck ke puhluhn winter se. “Tiac na paht elos in akihlwacnwack lah wacngin,” David el fahk. “Tok kuhtuh u luhn elder fahklah elos kuh in kahsrweyuc twelwack etong ah. Upac engan ac srui luhk, nga lwelah nguhsr lalos.”

David el soklah ke pacl tok ah lah ti etong sac tiacna eklac nuhke placn wo, oreklac wo, ac oasr wo ke mukwikwi luhn ward. Sie litutacng in Sacte ah, David, u luhn elder, ac mempucr ke ward sahyac elos oraclah luhman u in mwet fucfahsryucsr kahsruhsr ke stosah luhlahp ac trailer nuh finohl ah.

“Ke sie ekuh ah, kuloh ke kuhfwen mwe orekma ac etuh lalos ah, mempucr ke ward lasr ah ahkolah kahp in etong nuhsin sucu luhk uh oruh wo ohiyac kuh in sun winter luo,” David el fahk. “Ma yohk srihpac se, nga lotwelah ma nuhkwewa nga enenuh in etuh in sifacna oracni etong luhk. Ke puhluhn pacl se nga som liki acn Fredonia, Nga etwaclah orekmakihnyen tahtah sein ac nga kahsruh ward pac sahyac ke mukwikwi lalos in oracni etong pohs likina nga kuh in owacklah.”

Oasr mukwikwi luhn ward ma tiac muhsahelah muhkwena in fototo inmahsrlosr mempucr ke Alu uh muhkwena tuh in muhsahelah pac in fototo inmahsrlon mwet nuhkewa ke muhtuhnfwacl se inge.

“Nga esam sie muhtacn, el tiac mempucr ke Alu uh, suc sasuc nuh ke acn se inge,” David el fahk. “Etong an ke mwe fihl se luhn muhtacn sac suhpuhslac in karuhnguhnuhlwacng in fucsrfucsr. Ke na pacl se kuht etuh ke ma el oasr kac ah, kuht oracni in pohs etong in kuh in oan ahlukwelah winter. El arulacna kulokihn oruh el tekuh in arlac sramsram wo.”

Karihngihn orekma kom insacnweacng kac ke acn Fredonia ahkpwacyei lah mwet nuhkwewa muhta sef ac wo ke winter sac.

Suk Mwet Sahyac

Ke pacl se kuhlwacnsap ke misin fin acn Romania, Meg Yost ac companion lal muhtwacta yurin sucu se inkaiyacn pacl uh suc tiac som nuh ke alu ah ke pacl na loeloes. “Sucu Stanicas pa wi mempucr emeet ke Alu fin acn Ramania,” Meg el fahk,“ac kuht luhngse eltahl.”

Ke pacl in placn uh tuhkuh ac ahkolah mukwikwi ke pracns, mwet kol uh sulwaclah lah pracns uh e tuhfah oruh “Fong in Payonir.” Fong se inge pa fong in ahkfuhlwactye ahkkweye mwet fuhfahsryucsr loeloes suc crossiyac United States in som nuh Salt Lake Valley. E pacl na wowo se in ahkfuhlwactye mwet fuhfahsryucsr loeloes ke Alu Romania.

“Kuht nuhnkuh muh e srihpac na wowo se nuh sin mempucr in fahkwack luhlahlfongi la ma eklac ac lah fuhkah ke elos liye Alu Romania kapwack,” Meg el fahk. “Kuht sifacpacna nuhnkweack lah sucu Stancia enenuh in wi. Kuht solwaclos in wi, ac elos arulacna engan!”

Ke fong se ma mukwikwi sac, sucu Stanicas sac soenna yorack ke pacl se ma e muhtwacwacack ah.

“Kuht elyah lah elos e tiac tuhkuh,” Meg el sifil esamwack. “Tuh ke pacl sac, elos utyak ke sruhnguhl ah. Sucu Stanica sac fahkwack luhlahlfongi na wowo lalos ke wosasuc ac ke Alu uh. Elos oacyacpac oruh elos in akacsruhi nuhsin mempucr sahyac suc elos tiac liye ke pacl na loeloes.”

Mempucr ke pracns uh ikucslah paolos ac paing sucu Stanica sac. Ke Sacnri se tohkoh, Meg el lut napwacye ke el liyaclwack tahmtahel Stanica ke alu ah.

“Ke nga muhtwacta ke pracns ah ke mahlwem ekahsr tohkoh ah, el srackna tuhkuh wi!” Meg el fahk. “Nga nuhnkuh tuh pacl na wo se elan fahkwack luhlahlofngi lal ac in puhla oasr ip lal in orekmakihnyuck ac enwenweyuck ke pracns arulacna kahsrwel.”

Mwe Nuhnak ahkosr[4] in Karihngihnyuck ke Mukwikwi ke Alu

Plwacn in mukwikwi ma enwenweyuck: Mukwikwi uh pa sie srihpac na wo in orekmkihnyuck ke kain in enenuh. Sahp ma plwacniyuck in sun enenuh luhn kais sie kuh u. Elos enenuh in oacyacpac oruh in sun enenuh luhn mwet ma wi, lah enenuh sacn pa in oruh in etwaclah sie sin sie, lotwelah yohk ke wosasuc, kuh puhla nguhn.
Suli mwet nuhkwewa: ke kom placni mukwikwi an, oruh in srihpac na wo se in suli elos suc e oruh wo ke e wi uh. Sang nuh ke nuhnak lom an mempucr sasuc an, mempucr muhnahslah, tuhlihk fuhsr, mwet lolwacp, mwet oasr suhkahpahs la, ac mwet ke luhlahlfongi sahyac. Oraclah invitation an in fal nuh ke luhngse lalos, ac sang lah kom e oruh fuhkah ke kom e luhngse elos in tuhkuh uh.
Ahkkweye mwet ma wi: Elos suc kom suli e tuhfah eis ma na yohk ke mukwikwi an fin oasr srihpac lalos in wi. Sie srihpac in ahkkweye mwet ma wi an pa in kais sie selos orekmakihn mwe sang, skill, ac talan ke mukwikwi sacn.
Paing kowos nuhkwewa: Fin kawuck lom an wi mukwikwi se, oruh ma kom kuh in oruh elos in kuh in puhla paing. Oacyacpac, fin kom liye mwet kom tiac etuh, oruh kom in kuhlwacng, ac pwacnguhlos pac!

© 2020 ke Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng ke Ip Yohk ke Karihngihn, Julahe 2020. Kosraean. 16989 868