“Buambi kupitshila ku Bibilu bia Ekelezia,” Liahona, Ngondo wa Muandamuteketa 2020

Image

buambi

Foto ya bansonga baluma bibaka ntenta ngua Bud Corkin; foto wa nsongakaji uteka mesa ngua Sherie Price McFarland; mpala ngua ku bimfuanyi bia Getty

Nshindamenu ya Buambi, Ngondo wa Muandamuteketa 2020

Buambi kupitshila ku Bibilu bia Ekelezia

Dimanyisha dia mufundi: Dibeji edi divua difundibua kumpala kua tshipupu tshia COVID-19. Imua ya ku ngenyi mifila kuinshi eku kayena mua kutekibua mu tshienzedi mu bikondo bia dishilangana ntanta mu nsombelu to kadi nebitekibua mu tshienzedi musangu wikala bisangilu ne bibilu bia Ekelezia bipingajibua. Pikalabio bikumbana, suayi nuakaja ngenyi eyi mu dipetangana ne maludiki a mpindiewu a Ekelezia ne a Mbulamatadi.

Mushindu umua utudi mua kuenza buambi kudi bidimba bietu bia mu tshikongu, bena mutumba ne balunda, udi kupitshila ku bibilu bia Ekelezia. Nansha nuenu nulongolola tshibilu tshipetangana ne majinga anyi malomba a muntu unudi nusamba anyi nubabikila bua balue mu bibilu anyi mu mishindu ya disadila kudi bakuabu, bibilu bia mu tshikongu, mu dikunji anyi bia makunji masangila bidi mua kufila njila miumvuika ne ya didilekelela bua kuibaka bobumua ne kukankamika bidimba.

Bibilu bia Ekelezia bidi kabidi mua kunzulula tshîbi ku mishindu yabungi ya kuenza buambi. Bu tshilejilu, bibilu bia Ekelezia bidi mua kufila mishindu ya kudibuinka mu midimu idi ibenesha bakuabu ne ibaka malanda majalama mu nsangilu ya bantu. Bibilu bia Ekelezia bidi kabidi mua kuikala diakalengela bua kutantshila bidimba bia Ekelezia bidi biteketa mu ditabuja ne balunda ba mu masambila makuabu anyi balunda badi kabayi ne ntendelelu.

Patudi tubueja bantu mu bibilu bia Ekelezia bidi bifila mushindu wa Mukalenga kubenesha ne kukankamika bikongu bietu ne matamba etu, bena mutumba betu ne nsangilu yetu.

Kuibaka Malanda Majalama

Pavua tshikondu tshia mashika tshilua, David Dickson kavua mumanya bua kulama dîku dienda mu muaba wa luya to.

David, mukajenda, ne bana benda bakaji babidi bavua bumbuka mu tshimenga tshishadile tshia Fredonia, mu Arizona, Etats Unis. muaba wa tshipela munyunguluka kudi mabaya makunza, metu ne bisonsa.

Nzubu uvua dîku dia Dickson diangata uvua anu ne luesu luvua lunangulula ku nkunyi bu mushindu wa kupeta luya. David wakamanya palukasa se dikunguija dia nkunyi ya kutemesha nayi mudilu divua ne mushinga bualu bikondu bia mashika mu Fredonia bidi bilokesha neje ne mabua a mashika.

“Tshivua ne nkunyi ya mudilu nansha tshiamua tshia kukosa natshi ne kabidi tshivua ne dimanya dia kuenza natshi mudimu!” Ke mudi David wamba. “Tshivua mumanya tshimvua ne bua kuenza to.”

Bidimba bikuabu biakakonka David pikale dîku diende ne didi ne nkunyi yabungi ya kupita nayi tshikondo tshia mashika. David wakamba ne, “kabiakabangata mutantshi mula bua kujandula se tshivua nayi.” “Kasumbu ka bakulu kakaleja dijinga dia kungambuluisha bua kukunguija nkunyi. Bu mumvua muikala ne disanka, ngakitaba dipa diabu.”

David wakapeta se luendu lua dikunguija dia nkunyi tshivua tshikala tshimue tshia ku bibilu bia tshikongu, bilongolola bimpa, ne bikala ne bantu babungi. Dimua Disambombo mudinda, David, kasumbu ka bakulu ne bidimba bikuabu bia mu tshikongu bakaya ku mikuna mu milongu ya kaminyo ne mashinyi manena.

David udi wamba se, “mu dilolu dimua, tuasakadila kudi biamua biabu ne mamanya abu, bidimba bia tshikongu biakapa dîku dianyi bisumbu bia nkunyi biakanenga bikondu bibidi bia mashika.” “Ne tshia mushinga wabungi, ngakalongeshibua bintu bionso bimvua nabi dijinga bua kukunguija nkunyi nkayanyi. Diba dingakumbuka mu Fredonia, mvua mumanya kukuata tshiamua tshia kukosa natshi, ne ngakambuluisha mu bibilu bia tshikongu mu makunguiji a nkunyi bungi kabuyi kubala.”

Bibilu bia tshikongu bu ebi kabiakibaka anu malanda majalama munkatshi mua bidimba bia Ekelezia to, kadi biakibaka kabidi malanda majalama ne bantu bonso mu nsangilu.

David udi wamba se, “ndi mvuluka mamu umua, uvua kayi muikala tshidimba tshia Ekelezia, ne muikala mupiamupia mu muaba.” “Uvua mujikija nkunyi yenda yonso mu mudilu bua kulama nzubu wenda mu luya. Musangu utuakamanya bua dikenga diende, tuakenza bua se dîku diende dikala ne nkunyi yabungi ya kupita nayi tshikondo tshia mashika. Uvua ne disanka dia bungi ne mua kabangaye kuakula.”

Kudienzeja kua midimu ya buambi mu Fredonia kuvua kujadika bua se muntu yonso ikala mu bukubi ne mu luya munkatshi mua tshikondo tshia mashika.

Kutantshila Bakuabu

Pavuaye usadila mu mission wa ku Romania, Meg Yost ne muena dingomba wende bavua bakumbula kumisangu dîku divua kadiyi diya mu ekelezia to bua mutantshi mula. Meg udi wamba se, “dîku dia Stanica bavua bidimba biakumpala bia Ekelezia mu Romania,” “ne tuvua babananga.”

Pakafika diba dia kulongolola ne kuenza tshibilu tshia ditamba, balombodi bakapangadika bua se ditamba dienza “Butuku bua Bampanda-njila.” Etshi tshidi tshikala dilolu dia kusekelela bampanda-njila ba dikima bavua basabuka Etats Unis bua kuya mu Tshibanda tshia Salt Lake Tshivua kabidi tshikala mushindu wa kupesha bunema kudi bampanda-njila ba Ekelezia mu Romania.

Meg udi wamba se, “tuakela meji bua se tshivua mua kuikala mushindu wa bamua ba ku bidimba kutuala bujadiki bua dikudimuna diabu dia mitshima ne mushindu uvuabu bamona Ekelezia mutanta mu Romania.” “Tuakela meji musangu umua bua se dîku dia Stanica divua ne bua kuikala momu. Tuakababikila bua balua, ne bobu bakadi ne disanka!”

Mu butuku bua tshibilu, bena mu dîku dia Stanica kabavuanu balua too ne pakafika diba dia kubangisha.

Meg udi wamba ne “tuvua ne didiabakena bualu kabavu banji kulua.” “Kadi anu popu apu, bakabuela ku tshîbi. Bena mu dîku dia Stanica bakatuala bujadiki buimpe bua lumu luimpe ne bua Ekelezia. Bobu bakamanyangana kabidi ne bidimba bikuabu bivuabu kabayi bamona bua mutantshi mula.”

Bidimba bia ditamba biakunzulula maboku ne biakakidila dîku dia Stanica. Dialumingu divua dilonda, Meg uvua ne disanka dia dikema bua kumona Mamu Stanica mu ekelezia.

“Pangakakumbula ditamba ngondu mikesa mipita, uvuanu mushala ulua!” Ke mudi Meg wamba. “Ndi ngela meji se mushindu wa kufila bujadiki buenda ne kudiumvua mudibuika ne mujingibua mu ditamba biakamuambuluisha bushuwa.”

Ngenyi 4 bua Kuenza Buambi kupitshila ku Bibilu bia Ekelezia

Longololayi bibilu bidi biandamuna ku majinga: Bibilu bidi bikala mushindu munena wa kuandamuna ku majinga abungi mashilashilangana. Bidi ne bua kuikala bilongolodibua bua kuandamuna ku majinga a pabuawu a muntu anyi tshisumbu. Bidi kabidi ne bua kuandamuna ku majinga a badi babienza, nansha dijinga diodi dikala dia kufika ku dimanyangana bimpa, kulonga biabungi pa lumu luimpe, anyi kumvua Nyuma.
Bikilayi bantu bonsu: Panudi nulongolola bibilu, dienzejayi bikola bua kubikila aba badi ne bua kupeta kupitshila ku dilua diabu. Lamayi mu lungenyi bidimba bipiabipia, bidimba biteketa mu ditabuja, bansonga, bakulumpe badikadila, bantu badi ne bulema, ne bantu ba ntendelelu mikuabu. Filayi mabikila ne majinga abu aa mu lungenyi, ne balejayi dinanga dinumvua pikalebu balua.
Kankamikayi diakula: Aba baudi ubikila nebapeta biabungi mu bibilu pikalabu bapeta mushindu wa kuakula. Mushindu umua wa kukankamika diakula udi ngua kuambila muntu ne muntu bua aleja mapa, ngenyi ne mamanya munkatshi mua tshibilu.
Akidilayi muntu yonsu: Padi balunda benu balua mu tshibilu, enzayi muenu monsu bua badiumvua bakidibua. Bia momumua, panudi numona bantu banudi kanuyi bamanya, nuikala nabu bulunda ne nubakidila bimpa!

© 2020 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Ministering Principles, July 2020. Tshiluba. 16989 760