“Ministering babaen ti Panagpannuray iti Bukod a Kabaelan,” Liahona, Agosto 2020
Dagiti Pagbatayan iti Ministering, Agosto 2020
Ministering babaen ti Panagpannuray iti Bukod a Kabaelan
Ti panangtulong iti dadduma nga agbalin a mapagpannuray iti bukodda a kabaelan [self-reliant] ket panangipaay ken panag-minister iti wagas ti Apo.
Adu kadagiti miembro ti pamiliatayo, gagayyem, ken kaarruba ti interesado iti panagbalin nga ad-adda a mapagpannuray iti bukod a kabaelan [self-reliant]. Iti panangusar iti inisiatibo ti Simbaan iti panagpannuray iti bukod a kabaelan, agsapsapul dagiti miembro ti klase kadagiti gundaway nga agserbi, agaywan, ken agminister bayat ti panangparaburda iti dadduma kadagiti pagbatayan a mangisangbay iti “dakdakkel a namnama, talna, ken panagdur-as.”1
“Addaak iti Pagtaengan”
Ni Chrissy Kepler, Arizona, USA
Agkarkarigatanak iti pakaseknan iti kuarta kalpasan ti maysa a diborsio, a mangpadpadas ti agsubli nga agtrabaho kalpasan ti panagbalinko nga stay-at-home mom iti uneg ti walo a tawen. Agkarkarigatanak pay iti kinaespirituan, nga agsapsapul iti kinapudno ken pammati, nupay diak pay simrek iti maysa a chapel manipud pay iti kinaagtutubok.
Maysa a Domingo aglablabaak iti pagtaengan ti inauna a kabsatko a babai, ni Priscilla, maysa nga aktibo a miembro ti Simbaan. Kabayatan ti kaaddak idiay, inawisnak ni Priscilla a makimisa a kakuyog ti pamiliana—ti umuna a pannakaawisko iti nasurok a 15 a tawen.
Nagkedkedak idi damo, ngem iti rabii kasakbayanna, impakaasik iti Dios nga ipakitana kaniak no kasano nga umas-asidegak Kenkuana. Kalpasan ti pannakariknak a maguyod ti kaunggak, inkeddengko, “Apay ketdin a di mapan a dumngeg ken kumita para iti bagim kas maysa a nataengan iti bukodmo a puso ken mata?”
Kabayatan ti kaaddami iti miting ti sakramento, nadlawko ti maysa a flyer iti buletin ti Domingo a mangipakpakaammo iti kurso iti self-reliance maipapan iti personal finances. Diak nakasagana nga agsubli iti simbaan, ngem naawis ti riknak iti 12-a-lawas a kurso. Addaan iti pammaregta ti kabsatko a babai ken ti kayongko, nagpailistaak, a mangnamnama a masursuruanak laeng no kasano ti agbadyet ken agbayad iti utang. Dagiti klase, nupay kasta, ti nangbalbaliw kaniak a naespirituan.
Nasdaawak kadagiti naespirituan a mensahe kadagiti umuna a lawas ti klase, ngem bayat ti maikatlo a klase, napalaus ti riknak iti pammatalged nga addaak iti pagtaengan ket dumdumngegak iti baro ngem pamiliar a kinapudno. Pimmanawak iti klase ket nagmanehoak a napan kumita ken ni Priscilla. Agluluaak a nagsaludsod kenkuana, “Kasano nga ad-adda pay a mariknak daytoy iti biagko?” Nakipagurnos kadagiti missionary tapno rugian ti panangisuroda kaniak.
Dimteng dagiti miembro ti klasek iti self-reliance para kadagiti missionary lessonko ket sinuportarandak. Nakaaramidda iti napaut nga epekto maipapan iti espiritualidadko ket tinulongandak a mangpatanor iti pammaneknek maipapan iti ebanghelio ken kadagiti propeta iti agdama nga aldaw.
Iti panawen a binubosko a mangileppas iti kurso, nakaaramidak iti sumagmamano a temporal ken naespirituan a panagbalbaliw. Nangrugiak iti baro a pagtrabahuan iti nasayaat a kompania, ken nabayadak ti sumagmamano nga utangko.
Ngem dagiti naun-uneg, nasamsam-it a bendision a simmangbay manipud iti kurso ket maibilang ti panangparnuay iti napipintas a panaggagayyem, panangpadur-as iti nasayaat a pannakilangen iti manangparegta a bishop, panangsarak iti pammaneknek iti apagkapullo, ken panangawat iti temple recommend, pannakapa-endow, ken pannakakita iti pannakabuniag dagiti dua nga inauna nga annakko.
Ti danak iti panagpannuray iti bukod a kabaelan ket silulukat pay laeng, ngem para iti nabati pay a panagdaliasatko, ipategkonto dagiti adalen a nasursurok ken dagiti naaramidko a pannakigayyem.
“Pinanawak ti Tunggal Klasek a Marikriknak a Naipategak”
Idi binisitana ti Temple Square iti Salt Lake City, Utah, a kaduana ti agtawen iti 10 nga anakna a lalaki, ni Vincent, idi Disiembre 2016, imbilang ni Katie Funk ti bagina a “nagin-awa nga agnostiko.” Pinanawanna ti Simbaan idi agtawen iti 16, nagbalin a balasang nga ina idi agtawen iti 17, nagpatato, ken naginum iti kape. Ngem kabayattan dayta nga isasarungkar iti Temple Square, narikna ni Vincent ti Espiritu Santo ket indawatna ken ni nanangna no mabalinna ti dumngeg kadagiti missionary lesson.
Iti baet ti dua a trabaho, 80-nga-oras a lawas a panagtrabaho, inadal ni Katie ti ebanghelio a kaduana ni Vincent, a nagsapsapul kadagiti sungbat dagiti saludsodna iti nagbaetan dagiti isasarungkar dagiti missionary. Iti kalgaw ti 2017, rinugianna ti dimmar-ay kadagiti miting iti Simbaan, a nakaammuanna maipapan kadagiti kurso ti self-reliance iti Simbaan.
“Naamirisko a maysada a banag a makatulong kaniak,” kinunana. “Nalabit a saan a nasken nga agtrabaho iti dua a pagtrabahuan wenno agpannuray kadagiti dadakkelko iti nabati pay a biagko.”
Inawagan ni Katie ti kursona a “di nakappapati a temporal ken naespirituan a pangpapigsa,” saan laeng a gapu iti nasursurona no di ketdi pay gapu iti panangawat ken panagminister kenkuana ti grupona iti self-reliance.
© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, August 2020. Ilokano. 16723 864