“Ministering paagi sa Dali, Magsunod sa Akon,” Liahona, Septyembre 2020
Mga Prinsipyo sa Ministering, Septyembre 2020
Ministering paagi sa Dali, Magsunod sa Akon
Paano ang Dali, Magsunod sa Akon makabulig sa inyo nga maghimo sang kinalain sa mga kabuhi sang iban?
Kon kaupod ninyo ang inyo pamilya, sa klasehan sang Sunday School bilang manunudlo ukon estudyante, ukon sa eskwelahan, trabaho, ukon sa diin man, ang pagtuon sang balaan nga kasulatan paagi sa Dali, Magsunod sa Akon nagatanyag sang madamo nga oportunidad sa pag-alagad sa iban. Ang pagtudlo, kon hunahunaon, “labaw pa sangsa pagpanguna sa paghinambalanay kon Domingo; nagalakip ini sang pag-alagad nga may pagpalangga kag pagbugay sang iban sang ebanghelyo.”1
Pagkonektar sa mga Estudyante
Sang gintawag si Ofelia Trejo de Cárdenas nga magtudlo sang lamharon nga mga hamtong sa iya ward sa Siyudad sang Mexico, nabatyagan niya nga ang kasuod sa tagsa niya ka mga estudyante sa Sunday School magapadugang sang iya ikasarang sa pagtudlo kag pagpabakod sa ila.
“Kon indi ako malapit sa akon mga estudyante kag kon indi nila mabatyagan ang akon pagpalangga, basi indi sila magpati sa akon kon nagatudlo ako sa klase ukon nagapaambit sang akon testimonya,” siling niya. “Basi nga sa pamatyagan nila isa lamang ako ka titser sa Sunday School.”
Pero paano ni Sister Cárdenas mapatubo ang ina nga klase sang relasyon kon kaisa lang sia magtudlo kada duha ka semana? Nakita niya ang sabat paagi sa teknolohiya. Gamit ang application sa celphone nga WhatsApp, sia kag ang iya mga estudyante nagsugod nga magpakig-angot adlaw-adlaw paagi sa mga mensahe sa text kag tingug. Sa karon, kada adlaw antes sang madason nga leksyon sa Sunday School, may boluntaryo sa klase nga nagapadala sa iban nga mga miyembro sang klase sang isa ka bersikulo sang balaan nga kasulatan halin sa sinang madason nga leksyon nga may naangot nga personal nga panghunahuna. Pagkatapos basahon ang bersikulo kag panghunahuna, nagasabat ang mga miyembro sang klase sang ila kaugalingon nga mga panghunahuna.
“Kon ginbasa nila ang balaan nga kasulatan, nagapadala sila sang nagayuhum nga guya (nga smiley) para mahibal-an ko nga ila nabasa ukon gintun-an ang balaan nga kasulatan kag nga ila ini ginpamensar,” siling ni Sister Cárdenas. Pag-abot sang oras sang leksyon sa dason nga Domingo, handa na ang mga estudyante nga magpartisipar.
Ining adlaw-adlaw nga pagpakig-angot sang sini lang nagbugay sang isa ka lamharon nga hamtong nga ang mga ginikanan indi aktibo sa Simbahan.
“Nanamian gid ko nga makita sia nga nagasimba tungod nahibal-an ko nga para makakadto, kinahanglan niya nga malampuwasan ang pila ka mga kabudlayan,” siling ni Sister Cárdenas. “Sigurado ako nga ang balaan nga mga kasulatan kag ang mga panghunahuna nga ginpadala sang iya mga kaklase kag ang balaan nga mga kasulatan kag mga panghunahuna nga iya ginpadala sang iya na toka nagpabakod gid sa iya.”
Siling ni Sister Cárdenas nga ang ministering paagi sa balaan nga mga kasulatan wala nagauntat sa iya leksyon kon Domingo kag sa adlaw-adlaw nga pagpakig-angot sang iya klase sang balaan nga kasulatan.
“Ang akon preparasyon nagalakip sang pagpangamuyo para sa akon nga estudyante,” hambal niya. “Ginapanumdom ko sila indi lamang kon Domingo kundi kada adlaw man sang semana. Ang kada isa sa ila may partikular kag lainlain nga mga panginahanglan. Ang kada isa anak sang Dios. Ginapanumdom ko sila samtang nagapreparar ako sang akon mga leksyon.”
Kag kon nagatudlo sia, nagapamati sia—pareho sa iya mga estudyante kag sa Balaan nga Espiritu.
“Ang Espiritu amo ang manunudlo,” nga masami niya mabatian sa mga tingug sang iya mga estudyante. “Kinahanglan ko nga magtutok tungod ang ila ginahambal amo ang rebelasyon nga ginahatag sang Espiritu sa ila.”
Ang Amon Klase “Daw Pareho sang Home Evening”
Pamatyag ni Carla Gutiérrez Ortega Córdoba ginbugayan sia nga mangin miyembro sang klase ni Sister Cárdenas sa Sunday School tungod sang maatipanon kag nagaalagad nga pamatyagan diri. Gintudlo ni Carla ang rason sinang pamatyagan sa pila ka mga butang, lakip na ang:
-
Preparasyon: Ang pagpaambitanay sang balaan nga mga kasulatan kag mga panghunahuna nagabulig sa mga estudyante nga maghanda para sa madason nga klase. “Ang adlaw-adlaw nga balaan nga mga kasulatan nagabusog sa amon kag nagapasangkad sang amon ihibalo,” paathag niya.
-
Partisipasyon: “Nagahambal kami tanan. Nagatugot ini sa akon nga mas makilala pa gid ang akon mga kaklase, bilang mga abyan kag bilang mga kauturan.”
-
Pagpalangga: “Ginagiyahan ka ni Sister Cárdenas. Ang amon klase daw pareho sang home evening, nga may madamo nga mga kauturan. Ka-espeyal gid katama.”
-
Ang Balaan nga Espiritu: “May manami, nagahangpanay nga pamatyagan sa amon klase tungod palareho kami nga nagaimbitar sang Espiritu.”
-
Testimonya: “Ang Dali, Magsunod sa Akon nakabulig sa akon nga mangin handa sa pagpaambit sang akon testimonya. May mas madalom ako nga ihibalo sang Libro ni Mormon kag sang Biblia. Ginatugotan ako sina nga magpaambit sang akon natun-an sa akon mga kaklase sa eskwelahan kag sa mga tawo sa trabaho.”
Pag-minister sa Espirituhanon nga mga Panginahanglan
Sang si Greg kag Nicky Christensen, sang Kentucky, USA, nagbasa parte sa kasugtanan ni Abraham sa balaan nga mga kasulatan sa ila tatlo ka kabataan nga lalaki, nabudlayan sila nga ipaathag ini sa ila. Nagdesisyon sila bilang pamilya nga ang kada isa sa ila magatuon sang kasugtanan ni Abraham nga sila lang kag dayon istoryahan ang ila matun-an.
“May ara kami sang pila ka makawiwili nga mga komento,” siling ni Greg. “Natun-an sang amon walo-ka-tuig [nga bata] nga Abram ang ngalan ni Abraham sadto. Gin-islan ang iya ngalan sang Abraham tungod naghimo sia sang promisa sa Ginuo nga magliso halin sa sala kag magpangabuhi sang matarong nga kabuhi. Nasorpresa gid ako nga natukiban niya ina.”
Tanan sila nakatuon sang bag-o nga butang kag may manami nga diskusyon parte sa kon ano ang kasugtanan ni Abraham kag kon ano ang kahulugan sang mangin Santos sa Ulihing mga Adlaw sa karon.
“Sang-una nagalibot lang kami sa kuwarto kag nagabulos-bulos basa sang mga bersikulo sang balaan nga mga kasulatan para sa amon pang-pamilya nga pagtuon sang balaan nga mga kasulatan,” siling ni Nicky. “Ang Dali, Magsunod sa Akon mas nagatutok sa pagtudlo paagi sa Espiritu. Karon nga nagatuon kami nga ululupod, makabatyag ako sang mga pagtandog sang Espiritu nga iliko ang amon mga paghinambalanay sa lain nga direksyon base sa mga panginahanglan sang amon pamilya.”
Ang paggamit sang Dali, Magsunod sa Akon wala lang nakabulig sa ila pamilya nga mangin mas imbolbado kag interesado sa pang-pamilya nga pagtuon sang ebanghelyo, kundi nakabulig man kanday Greg kag Nicky nga mag-minister sa espirituhanon nga mga panginahanglan sang ila kabataan.
“Ang Dali, Magsunod sa Akon nagabulig sa akon nga tudloan ang akon kabataan,” siling ni Nicky. “Ginabuligan man ako sini nga atubangon ang lainlain nga mga hangkat nga akon ginaatubang kon kaisa sa akon mga kabataan. Nakabatyag ako nga mas naangot sa Espiritu, mas nagapamati ako, kag nakabaton ako sang mga pagpabatyag kon paano ko buligan ang tagsa ka bata.”
Nasadyahan si Greg sang mas malawig nga paghinambalanay parte sa ebanghelyo nga ginabulig patigayon sang Dali, Magsunod sa Akon sa sulod sang pamilya. “Ang amon mga kabataan may lainlain nga lebel sa ila ihibalo sa ebanghelyo,” siling niya. “Ang Dali, Magsunod sa Akon naghatag sang paagi nga mabuligan namon ang kada isa sa ila nga magtuon base sa ila mga panginahanglan. Ang makita sila nga nagatubo sa ila pagpalangga sa ebanghelyo kag ang makita sila nga nagapamensar kon paano nila mapangabuhi ang ihibalo sang ebanghelyo sa ila mga kabuhi isa ka manami nga bugay.”
© 2020 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, September 2020. Hiligaynon. 16724 861