“Sèvis pastoral atravè Pwogram Timoun ak Jèn nan,” Lyawona, Oktòb 2020

Foto pa Tom Garner, Isaac Darko-Acheampong, Alexander k. Boateng, ak Jonas Rebicki

Prensip Sèvis Pastoral, Oktòb 2020

Sèvis Pastoral atravè Pwogram Timoun ak Jèn nan

Envite lòt moun pou yo pwogrese ak ede yo sou chemen an se esans sèvis pastoral la.

Opòtinite yo miltipliye nan sèvis pastoral la atravè pwogram Timoun yo ak Jèn yo. Petèt ou gen timoun oubyen jèn pa w nan fwaye ou. Petèt ou se yon dirijan ki nan pwogram nan oubyen w ap fè sèvis pastoral avèk kèk fanmi ki gen timoun avèk jèn. Oubyen petèt ou konn kèk timoun ak jèn (sa ta kapab enkli nou tout). Kèlkeswa sitiyasyon w ta ye a, gen anpil fason pou itilize pwogram nan oubyen prensip li yo pou beni lavi lòt moun.

Devlope Tèt nou Ansanm

Nan kè pwogram Timoun ak Jèn nan, gen yon aksan yo mete sou eseye chak jou pou nou vin pi sanble avèk Sovè a, Limenm ki te fè sèvis pastoral la pafètman an. Anpil nan moun ki te patisipe nan pwogram nan te aprann ke, plis nou pwogrese nan plizyè domèn nan lavi nou, se plis n ap vin gen kapasite pou nou ede oubyen sèvi lòt moun.

Men avèk pwogram Timoun ak Jèn nan, beni lòt moun pa bezwen rete tann jiskaske w aprann yon bagay. Aksyon pou aprann nan limenm ofri opòtinite pou nou fè sèvis pastoral la.

Pou yon jènjan ki rele Prophet k ap viv nan Ghana, fikse bi nan pwogram Timoun ak Jèn nan pou aprann jwe pyano a sete jis kòmansman an. Prophet di: “Se bi pa m tou pou m ede lòt moun konnen sa m ap aprann nan.”

Menmsi li poko yon enstriktè, bi l fikse a gentan grandi vin tounen yon bagay ki pi gran pase sa l te janm imajine. Kounyeya, gen 50 elèv k ap pran kou pyano nan chapèl la ansanm ak Prophet. Epi devine kiyès k ap ansenye Prophet avèk lòt 50 elèv sa yo? Alexander M. ansanm avèk Kelvin M., yo toulède gen 13 zan. Kevin di: “Nou vle montre jantiyès anvè lòt moun.”

Twa jou pa semèn, de jènjan sa yo ansenye leson pyano debaz gratis pou tout moun ki vin aprann. Te genyen yon benefis anplis ke yo te jwenn nan kou pyano yo. Plizyè nan elèv yo ki te vin konnen Legliz la atravè kou pyano a te vin etidye levanjil la nan apre epi yo te deside vin batize.

Pandan n ap fè efò pou amelyore tèt pa nou, nou kapab fè sèvis pastoral pou lòt moun nan envite yo pou yo vin jwenn nou.

Yon Resèt Viktorye pou Sèvis Pastoral

Antanke yon Prezidant Primè Pieu, Sabrina Simões Deus Augusto ki soti Curitiba, nan Brezil wè kijan aspè devlòpman pèsonèl yo ki nan pwogram nan beni timoun yo ak jèn yo nan pieu l la. Men tou, li wè plizyè fason pou l itilize sa l aprann konsènan devlòpman pèsonèl yo nan apèl li kòm sè k ap fè sèvis pastoral.

Lè mwen devlope yon talan, ”Sè Augusto di, “Mwen kapab itilize talan sa a pou beni yon moun ke m ap rann sèvis pastoral.”

Sè Augusto te ansenye youn nan sè ki soukont li yo kijan pou l fè bonbon chokola. Kounyeya, sè sa a fè bonbon epi li vann yo pou ede fanmi l gen yon revni siplemantè. Sè Augusto di: “Kèk mwa apre, mwen te beni lè yon lòt sè te ansenye m kijan pou m fè pen myèl (pain au miel) ke m te kapab vann.” “Devlope ak pataje talan nou kapab beni lavi chak lòt moun epi sa kapab ranfòse relasyon nou antanke sè nan sèvis pastoral la.”

© 2020 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/19. Apwobasyon tradiksyon: 6/19. Tradiksyon Ministering Principles, October 2020. Haitian Creole. 16725 036

Kòman Pwogram Timoun ak Jèn nan kapab ede w fè sèvis pastoral?

Envite lòt moun pou yo patisipe nan pwogram Timoun ak Jèn nan.

Ou kapab envite fanmi jèn ak timoun w ap rann sèvis pastoral yo pou yo patisipe nan Pwogram Timoun ak Jèn nan. Yo kapab petèt enterese pou yo patisipe nan aspè aktivite, devlòpman pèsonèl, oubyen menm aspè etid levanjil la ki nan pwogram nan. (Pou plis enfòmasyon konsènan sèvis pastoral atravè Vini, Suiv Mwen an, gade “Sèvis Pastoral atravè Vini, Suiv Mwen,” nan Lyawona Septanm 2020 an.)
Sipòte bi pa yo.

Antanke yon frè oubyen yon sè k ap fè sèvis pastoral avèk fanmi ki gen jèn moun ladan yo, ou nan yon pozisyon tou natirèl pou w sipòte bi yo ta kapab ap travay sou yo nan pwogram Timoun ak Jèn nan. Byenke bi sa yo pèsonèl, si w konn kisa ki enterese yo, ou ta kapab ofri pou w ede nan plizyè fason. Sa ta kapab akonpli nan jwenn materyèl atistik y ap chèche yo, oubyen sèvi kòm jij pou bonbon y ap prepare, oubyen vin yon konseye pou yo nan yon domèn ke w konnen byen. Èske w konn kijan pou w chanje luil nan yon machin? Koud ak ranje rad? Èske w se yon ekspè nan fè antrevi pou travay? Ou kapab ofri pou w pataje konesans oubyen talan w genyen avèk yo, si yo enterese.
Envite lòt moun pou yo kontribye nan devlòpman pèsonèl pa w tou.

Devlòpman pèsonèl la pa rezève pou timoun yo ak jèn yo sèlman. Ou kapab patisipe nan pwogram nan tou, kèlkeswa laj ou genyen an. Pandan w ap pase tan ap amelyore domèn espirityèl, sosyal, fizik, ak entèlektyèl yo nan lavi w, w ap pi byen prepare pou w fè sèvis pastoral pou moun, kèlkeswa moun ou rankontre a. Epi, menm jan ak Prophet nan Ghana, ou kapab beni lòt moun nan envite yo pou yo patisipe avèk ou, keseswa pou òganize yon kou pyano, ale nan yon klas pou spò, oubyen aprann yon nouvo lang ansanm.
Fè sèvis patoral la yon bi.

Konsidere pou w pase tan chak jou pou fè sèvis pastoral. Sa ta kapab tankou voye yon mesaj tèks oubyen pase wè kòman bagay yo ye oubyen òganize yon ti rankont. Sa ta ka enkli pran tan pou mete dat anivèsè moun sa yo w ap vizite a nan kalandriye w oubyen suiv yo nan rezo sosyal pou w ka dekouvri kisa k enterese yo oubyen kisa yo t ap fè nan jou k sot pase yo. Jis pou pran senk minit pou w panse a sa yon lòt moun bezwen kapab mennen nan ide enspire ki ta kapab fè yon diferans.