“Ministering paagi sa Programa sang Kabataan kag Lamharon,” Liahona, Oktubre 2020

Mga litrato iya ni Tom Garner, Isaac Darko-Acheampong, Alexander K. Boateng, kag Jonas Rebicki

Mga Prinsipyo sang Ministering, Oktubre 2020

Ministering paagi sa Programa sang Kabataan kag Lamharon

Ang pag-imbitar sa iban nga magtubo kag pagbulig sa ila sa sini nga proseso amo ang kahulugan sang ministering.

Madamo sang mga oportunidad sa pagminister paagi sa programa sang Kabataan kag Lamharon. Ayhan may mga kabataan kamo ukon mga lamharon sa inyo kaugalingon nga puluy-an. Ayhan isa kamo ka lider sa programa ukon nagaminister kamo sa mga pamilya nga may mga kabataan kag lamharon. Ukon basi natabuan nga may kilala kamo nga mga kabataan kag lamharon (dapat kita tanan sakop sina). Bisan ano ang inyo sitwasyon, may madamo nga pamaagi para gamiton ang programa ukon ang mga prinsipyo sini agud bugayan ang mga kabuhi sang iban.

Pagpauswag sang Aton mga Kaugalingon sing Ululupod

Sa sentro sang Kabataan kag Lamharon (nga programa) amo ang pagtutok sa pagtinguha kada adlaw nga mangin mas pareho sa Manluluwas, nga nagminister sing perpekto. Madamo sa mga nagpartisipar sa programa ang nakatuon nga kon mas nagatubo ka sa lainlain nga mga bahin sang imo kabuhi, mas labi ka nga mangin makasarang sa pagbulig ukon pagminister sa iban.

Pero sa programa sang Kabataan kag Lamharon, ang pagbugay sa iban wala na ginahulat hasta nga makatuon ka sang isa ka butang. Ang akto sang pagtuon mismo nagahatag sang mga oportunidad sa pagminister.

Para sa lamharon nga lalaki nga ginhingadlan Prophet nga nagaistar sa Ghana, ang paghimo sang lalab-uton sa Kabataan kag Lamharon (nga programa) nga magtuon sa pagtukar sang piano panugod lamang. “Tuyo ko man nga makabulig sa iban nga tawo nga makahibalo kon ano ang akon ginatun-an,” siling ni Prophet.

Bisan pa nga indi pa sia instruktor, ang iya handum nagdako pa sangsa iya ginhunahuna. May ara na karon sang 50 ka mga estudyante nga nagakuha sang mga klase sa piano sa simbahan kadungan ni Prophet. Kag sin-o naman ang nagatudlo kay Prophet kag sadtong 50 ka mga estudyante? Sanday Alexander M. kag Kelvin M., pareho nga nagaedad 13. “Gusto namon nga magpakita sang mga buhat sang kaayo sa iban nga tawo,” siling ni Kelvin.

Tatlo ka adlaw kada semana ang duha ka lamharon nagatudlo sang simple nga mga leksyon sa piano nga libre sa tanan nga nagakadto para magtuon. May dugang pa nga benepisyo ang mga leksyon sa piano. Ang pila sa mga estudyante nga ginpakilala sa Simbahan paagi sa mga klase sa piano sang ulihi nagtuon sang ebanghelyo kag nagdesisyon nga magpabunyag.

Samtang nagatinguha kita nga pauswagon ang aton mga kaugalingon, makaminister kita sa iban paagi sa paghagad sa ila nga mag-upod sa aton.

Sigurado nga Recipe para sa Ministering

Bilang pangulo sang Primary sa stake, nakita ni Sabrina Simões Deus Augusto sang Curitiba, Brazil, kon paano ginabugayan sang mga aspeto sang personal nga pag-uswag sang programa ang mga kabataan kag mga lamharon sa iya stake. Pero nakita man niya ang madamo nga pamaagi agud gamiton ang iya natun-an parte sa personal nga pag-uswag sa iya buluhaton bilang isa ka ministering sister.

“Kon magtuon ako sang talento,” siling ni Sister Augusto, “pwede ko gamiton inang talento para bugayan ang tawo nga akon ginaministeran.”

Gintudloan ni Sister Augusto ang isa sa mga sister nga gintoka sa iya kon paano maghimo sang tsokolate nga truffles. Ang ina nga sister nagahimo kag nagabaligya na sa karon sang truffles para madugangan ang kita sang iya pamilya. “Pila ka bulan ang nagligad, ginbugayan ako sang may isa ka sister nga nagtudlo sa akon kon paano maghimo sang tinapay nga may pulot nga pwede ko ibaligya,” siling ni Sister Augusto. “Ang pagpatubo kag pagpaambit sang aton mga talento makabugay sang kabuhi sang tagsa-tagsa kag makapadalom sang aton mga relasyon bilang mga ministering sister.”

© 2020 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, October 2020. Hiligaynon. 16725 861

Paano Makabulig sa Inyo ang Programa sang Kabataan kag Lamharon nga Magminister?

Hagara ang iban nga magpartisipar sa programa sang Kabataan kag Lamharon.

Pwede ninyo hagaron ang mga pamilya sang lamharon kag mga kabataan nga inyo ginaministeran nga magpartisipar sa programa sang Kabataan kag Lamharon. Basi mangin interesado sila sa pag-entra sa mga aktibidades, personal nga pag-uswag, ukon bisan gani sa mga aspeto sang pagtuon sang ebanghelyo sang programa. (Para sa dugang nga impormasyon parte sa ministering paagi sa Dali, Magsunod sa Akon, tan-awa sa “Ministering paagi sa Dali, Magsunod sa Akon,” sa Septyembre 2020 Liahona.)
Suportahi ang ila mga tuyo.

Bilang ministering brother ukon sister sa mga pamilya nga may mga lamharon, ara kamo sa husto nga posisyon para suportahan ang mga tuyo nga ila ginalab-ot sa Kabataan kag Lamharon (nga programa). Bisan nga ang ila mga lalab-uton personal, kon nahibal-an ninyo kon ano ang ila mga interes, pwede kamo magtanyag sang bulig sa lainlain nga mga paagi. Mahimo nga paagi ini sa pagpangita sang mga gamit sa art nga ila ginapangita, pagserbe nga hurado sa ila ginluto, ukon mangin bulig sa bahin nga may ara kamo sang ihibalo. Makahibalo ka bala mag-ilis sang grasa sang awto? Magtahi sang nagisi nga bayo? Eksperto ka bala sa pag-interbyu para sa trabaho? Pwede kamo magtanyag nga magpaambit sang inyo ihibalo ukon ikasarang kon interesado sila.
Agdaha ang iban nga mangin kabahin sang inyo personal nga pag-uswag.

Ang personal nga pag-uswag wala lang ginreserba para sa mga kabataan kag lamharon. Pwede kamo magpartisipar sa programa mismo bisan ano pa ang inyo edad. Samtang nagahatag kamo sang tiyempo sa pagpauswag sang espirtuhanon, sosyal, pisikal, kag pang-kinaalam nga mga bahin sang inyo kabuhi, mangin mas handa kamo sa pagminister sa mga indibidwal, bisan sin-o pa ang inyo masugata. Kag pareho kay Prophet sang Ghana, mabugayan ninyo ang iban paagi sa paghagad sa ila sa pagpartisipar upod sa inyo, kon ina amo ang pag-organisar sang mga leksyon sa piano, pagkadto sa klase sa pag-ehersisyo, ukon pagtuon sang lenggwahe sing ululupod.
Himoa ang ministering nga isa ka tuyo.

Pamensara ang paghatag sang tiyempo kada adlaw sa ministering. Pwede diri ang pagpadala sang mensahe sa text ukon pagbisita para magpangamusta ukon paghanda sang isa ka tipon-tipon. Mahimo nga magalakip ini sang pagtanda sa kalendaryo sang mga kaadlawan sang inyo mga ginaministeran ukon i-follow sila sa social media para hibaluon kon ano ang ila ginakawilihan ukon ginahimo sining karon lang. Ang paghatag sang lima lamang ka minutos para panumdumon kon ano ang kinahanglanon sang isa ka tawo mahimo nga makahatag sang inspirado nga mga ideya nga magahimo sang kinalain.