“Kev Txhawb Pab Dhau ntawm lub Txheej Xwm rau cov Me Nyuam thiab cov Tub Hluas Ntxhais Hluas,” Liahona, Kaum Hli Ntuj 2020

Daim Duab

Tej Ntsiab Cai txog Kev Txhawb Pab

Tej duab los ntawm Tom Garner, Isaac Darko-Acheampong, Alexander K. Boateng, thiab Jonas Rebicki

Tej Ntsiab Cai txog Kev Txhawb Pab, Kaum Hli Ntuj 2020

Kev Txhawb Pab Dhau ntawm lub Txheej Xwm rau cov Me Nyuam thiab cov Tub Hluas Ntxhais Hluas

Lub ntsiab ntawm kev txhawb pab yeej los duav qhov uas caw lwm tus neeg los loj hlob tuaj thiab pab lawv taug txoj kev yog.

Yeej muaj cib fim txhawb pab lwm tus neeg dhau ntawm lub txheej xwm rau cov Me Nyuam thiab cov Tub Hluas Ntxhais Hluas. Tej zaum koj muaj me nyuam yaus los sis tub hluas ntxhais hluas hauv koj tsev neeg. Tej zaum koj yog ib tug thawj coj hauv lub txheej xwm los sis koj txhawb pab tej tsev neeg uas muaj me nyuam yaus los sis tub hluas ntxhais hluas. Los yog tej zaum koj paub ib co me nyuam yaus los sis tub hluas ntxhais hluas (li ntawd yog yuav luag peb txhua tus). Txawm tias koj lub neej zoo li cas los, muaj ntau yam koj ua tau kom siv lub txheej xwm no los yog nws tej ntsiab cai kom foom koob hmoov rau lwm tus neeg.

Loj Hlob Tuaj Ua Ke

Lub ntsiab ntawm lub txheej xwm rau cov Me Nyuam thiab cov Tub Hluas Ntxhais Hluas yog kom tsom ntsoov qhov uas txhua txhua hnub peb yuav sim los ua neeg zoo li tus Cawm Seej, uas tau txhawb pab lwm tus neeg zoo tag nrho. Neeg coob heev uas tau koom ua lub txheej xwm no tau kawm hais tias yus yim loj hlob tuaj rau ntawm ob peb yam hauv koj lub neej, yus yim muaj peev xwm txhawb pab lwm tus neeg.

Tiam sis hais txog lub txheej xwm rau cov Me Nyuam thiab cov Tub Hluas Ntxhais Hluas, txoj kev foom koob hmoov rau lwm tus neeg tsis yog ib yam uas yus yuav tsum kawm dab tsi tso mam ua. Txoj kev kawm yeej muab cib fim rau koj txhawb pab lwm tus neeg.

Muaj ib tug tub hluas hu ua Prophet uas nyob hauv Ghana, es qhov uas nws cuab lub hom phiaj hauv phau Me Nyuam thiab Tub Hluas Ntxhais Hluas kom kawm ntaus nkauj yog qhov pib xwb. Prophet hais tias, “Yog kuv lub hom phiaj kom pab lwm tus neeg paub saib kuv kawm dab tsi.”

Txawm hais tias nws tseem tsis yog ib tug neeg qhia kev ntaus nkauj los, nws lub hom phiaj twb loj hlob tuaj ua ib yam loj dua nws tau xav. Nim no muaj 50 tus tub hluas ntxhais hluas uas nrog Prophet kawm ntaus nkauj rau ntawm lub tsev sib ntsib. Thiab leej twg yog tus uas qhia Prophet thiab 50 tus tub hluas ntxhais hluas i? Alexander M. thiab Kelvin M., nkawd muaj hnub nyoog 13 xyoos. Kelvin hais tias, “Peb xav ua siab zoo rau lwm tus neeg.”

Ob tug tub hluas no qhia tag nrho cov uas tuaj kawm ntaus nkauj pub dawb ib lis piam peb zaug. Yeej muaj qhov zoo tshaj qhov uas kawm ntaus nkauj thiab. Ob peb tug tub kawm ntaus nkauj uas kawm txog lub Koom Txoos dhau ntawm kev kawm ntaus nkauj no tau kawm txog txoj moo zoo thiab txiav txim siab tias lawv xav ua kev cai raus dej.

Thaum peb rau rau siab ua zoo dua tuaj, peb txhawb pab tau lwm tus neeg thaum peb caw lawv nrog peb koom ua tej yam zoo.

Txoj Kev Txhawb Pab Lwm tus Neeg uas Muaj Yeej

Ua ceg txheem ntseeg ib tug Thawj Tswj Hwm rau cov Me Nyuam Yaus, Sabrina Simões Deus Augusto ntawm Curitiba, Brazil, tau pom saib lub txheej xwm txoj kev loj hlob ntawm lawv tus kheej tau pab cov me nyuam thiab cov tub hluas ntxhais hluas hauv nws ceg txheem ntseeg. Tsis tas li ntawd nws kuj tau pom tias nws yuav siv tau tej yam nws tau kawm txog txoj kev loj hlob tuaj ntawm yus tus kheej hauv nws txoj hauj lwm ua ib tug txhawb pab nws cov viv ncaus.

Muam Augusto hais tias, “Thaum kuv xyaum ua ib yam dab tsi, kuv siv tau qhov uas kuv xyaum ua ntawd kom pab foom koob hmoov rau ib tug neeg uas kuv txhawb pab.”

Muam Augusto tau qhia nws ib tug viv ncaus uas nws txhawb pab saib nws yuav ua li cas ua tau tej khoom qab zib chocolate truffles. Nim no tus viv ncaus ntawd ua cov khoom qab zib ntawd thiab muab muag kom pab khwv nyiaj rau nws tsev neeg. Muam Augusto hais tias, “Ob peb hlis tom qab ntawd, kuv tau koob hmoov thaum lwm tus viv ncaus qhia kuv ua khob cij qab zib uas kuv muab muag tau. Thaum peb kawm txawj ua ob peb yam, ua li ntawd yuav pab peb txhua tus ib leeg rau ib leeg thiab ua rau peb ua viv ncaus uas sib txhawb pab zoo dua.”

© 2020 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, October 2020. Hmong. 16725 295

Lub Txheej Xwm rau cov Me Nyuam Yaus thiab cov Tub Hluas Ntxhais Hluas Yuav Ua Li Cas Pab Koj Txhawb Pab Lwm tus Neeg?

Caw lwm tus neeg koom ua lub txheej xwm rau cov Me Nyuam thiab Tub Hluas Ntxhais Hluas.

Koj caw tau tej tsev neeg uas koj txhawb pab kom koom ua lub txheej xwm rau cov Me Nyuam thiab Tub Hluas Ntxhais Hluas. Tej zaum lawv yuav xav koom tej yam ntxim saib ntxim ua, tej kev loj hlob ntawm lawv tus kheej, los sis tej kev kawm vaj lug kub. (Kom tau ntaub ntawv xov xwm ntxiv txog kev txhawb pab dhau ntawm Los, Nrog Kuv Mus, saib “Kev Txhawb Pab Dhau Los ntawm Los, Nrog Kuv Mus,” hauv lub Cuaj Hlis Ntuj 2020 phau Liahona.)
Txhawb nqa lawv tej hom phiaj.

Ua ib tug txhawb pab lwm tus neeg hauv tej tsev neeg uas muaj me nyuam yaus los sis tub hluas ntxhais hluas, koj yeej txhawb nqa tau tej hom phiaj lawv cuab hauv phau Me Nyuam thiab Tub Hluas Ntxhais Hluas. Txawm hais tias lawv tej hom phiaj yeej nyob ntawm lawv cuab los, yog tias koj paub hais tias lawv nyiam ua dab tsi, koj tseem pab tau lawv ua ntau yam. Tej zaum koj nrhiav tau tej cuab yeej teeb duab rau lawv, ua ib tug saj cov khoom qab zib uas lawv ua, los yog ua ib tug pab tswv yim ua ib yam uas koj txawj. Koj puas paub hloov roj hauv tsheb? Ntxiv tej ris tsho uas ntuag? Koj puas txawj xam phaj thaum nrhiav hauj lwm? Koj qhia tau tswv yim rau lawv hais txog tej yam koj txawj ua yog tias lawv txaus siab kawm.
Caw lwm tus neeg los nrog koj koom koj txoj kev loj hlob tuaj.

Txoj kev loj hlob tuaj ntawm yus tus kheej tsis yog rau me nyuam yaus los sis tub hluas ntxhais hluas xwb. Koj koom ua lub txheej xwm no koj tus kheej txawm tias koj muaj hnub nyoog li cas. Thaum koj siv sij hawm ua zoo dua ntawm sab ntsuj plig, kev nrog lwm tus sib raug zoo, lub cev nqaij daim tawv, los sis kev txawj ntse, koj yuav npaj txhawb pab lwm tus neeg, txawm tias koj ntsib leej twg los xij. Thiab ib yam li Prophet hauv Ghana, koj foom koob hmoov tau rau lwm tus thaum koj caw lawv nrog koj koom ua, txawm tias koj coj tib neeg los kawm ntaus nkauj ua ke, coj lawv mus kom tes taw ua ke, los yog kawm lwm yam lus ua ke.
Cuab hom phiaj kom txhawb pab lwm tus neeg.

Teem sij hawm txhua hnub kom txhawb pab lwm tus neeg. Ua li no tej zaum koj xa xov mus rau lwm tus neeg los sis mus ntsib lawv saib lawv nyob li cas los yog teem sij hawm sib ntsib. Tej zaum yuav yog siv sij hawm sau tej hnub nyoog ntawm cov neeg koj txhawb pab tseg rau hauv daim qhia hnub los yog soj lawv qab hauv koos pis tawj saib lawv txaus siab ua dab tsi los yog saib lawv ua dab tsi tsis ntev tas los no. Siv tsib feeb xwb kom xav saib lwm tus neeg xav tau dab tsi yuav tshoov koj lub siab kom ua dab tsi uas yuav pab lwm tus neeg.