“Ministering babaen ti Programa dagiti Ubbing ken Agtutubo,” Liahona, Oktubre 2020
Dagiti Ladawan da Tom Garner, Isaac Darko-Acheampong, Alexander K. Boateng, ken Jonas Rebicki
Dagiti Pagbatayan iti Ministering, Oktubre 2020
Ministering babaen ti Programa dagiti Ubbing ken Agtutubo
Ti panangawis kadagiti dadduma a dumur-as ken panangtulong kadakuada iti dalanda ti kaipapanan ti ministering.
Umad-adu dagiti gundaway para iti ministering babaen ti programa dagiti Ubbing ken Agtutubo. Nalabit nga addaanka kadagiti bukodmo nga ubbing wenno agtutubo iti pagtaengan. Nalabit maysaka a lider iti programa wenno agministerka iti pamilia nga addaan kadagiti ubbing ken agtutubo. Wenno nalabit nga am-ammom ti sumagmamano nga ubbing ken agtutubo (a nasken a sakupen laeng ti agarup datayo amin). Ania man ti mabalin a kasasaadmo, adu dagiti wagas a pangusaran iti programa wenno dagiti pagbatayanna a mangbendision iti biag dagiti dadduma.
Panangpadur-as iti Bagbagitayo a Sangapada
Iti puso dagiti Ubbing ken Agtutubo ket maysa a pokus iti panangpadas iti tunggal aldaw nga agbalin nga ad-adda pay a kas iti Mangisalakan, a nag-minister a naan-anay. Adu kadagiti nakiraman iti programa ti nakasursuro a ti ad-adda a panagdur-asmo iti nadumaduma a tay-ak ti biagmo, nasaysayaat met a makatulongka wenno makapag-ministerka kadagiti dadduma.
Ngem babaen iti programa dagiti Ubbing ken Agtutubo, ti panangbendision kadagiti dadduma saan a nasken nga yuray agingga a nasursuromon ti maysa a banag. Ti aramid a panagsursuro mismo ket mangipaay kadagiti gundaway nga ag-minister.
Para iti maysa nga agtutubo a lalaki nga agnagan iti Prophet nga agnanaed iti Ghana, ti panangituding iti panggep a tun-oyen iti Ubbing ken Agtutubo a makasursuro no kasano ti agtokar iti piano ket pangrugian laeng. Panggepko pay a tun-oyen ti mangtulong iti dadduma a tao a mangammo no ania ti masursurok,” kuna ni Prophet.
Nupay saan pay a mannursuro, dimmakkelen ti panggepna a tun-oyen iti maysa a banag nga ad-adda pay ngem iti inarapaapna. Adda itan 50 nga estudiante nga agad-adal iti piano iti balay a pagmimitingan a kadua ni Prophet. Ket asino ti mangisursuro ken ni Prophet ken dagiti dadduma pay a 50 nga estudiante? Da Alexander M. ken Kelvin M., agpadpada nga agtawen iti 13. “Kayatmi nga ipakita dagiti aramid ti kinaimbag kadagiti sabali a tao,” kuna ni Kelvin.
Tallo nga aldaw ti makalawas isuro ti dua nga agtutubo dagiti pangrugian nga adalen iti piano nga awan ti bayadna iti amin nga umay nga agsursuro. Addan nainayon a pagimbagan kadagiti adalen iti piano. Sumagmamano kadagiti estudiante a nayam-ammo iti simbaan babaen kadagiti adalen iti piano ti nagadal iti ebanghelio idi agangay ken inkeddengna ti agpabuniag.
No ikarkarigatantayo ti mangpasayaat iti bagbagitayo, makapagministertayo kadagiti dadduma babaen ti panangawis kadakuada a makikadua kadatayo.
Maysa a Pangabak a Recipe para iti Ministering
Kas maysa a presidente iti Primary iti stake, naimatangan ni Sabrina Simões Deus Augusto ti Curitiba, Brazil, no kasano a paraburan dagiti aspeto ti programa ti bukod a panagdur-as dagiti ubbing ken agtutubo iti stake-na. Ngem nakitana pay ti adu a wagas a pangusaran no ania ti nasursurona maipapan iti bukod a panagdur-as iti pagrebbenganna kas maysa a babai a kabsat iti ministering.
“No mapadur-asko iti maysa a talento,” kuna ni Sister Augusto, “mabalinko nga usaren dayta a talento a mangparabur iti maysa a tao a pagministerak.
Insuro ni Sister Augusto ti maysa kadagiti kabsat a babai a naidutok kenkuana no kasano ti agaramid iti chocolate truffles. Agar-aramid ken aglaklako itan dayta a kabsat a babai iti truffles tapno makatulong a mangnayon iti matgedan ti pamiliana. “Kalpasan ti sumagmamano a bulan, naparaburannak idi sinuruannak ti maysa pay a kabsat a babai no kasano ti agaramid iti honey bread a mabalinko nga ilako,” kinuna ni Sister Augusto. “Ti panangpadur-as ken panangibinglay kadagiti talentotayo ket makaparabur iti biag ti tunggal maysa ken mangpauneg iti pannakilangentayo kas agkakabsat a babbai iti ministering.”
© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, October 2020. Ilokano. 16725 864