“ການປະຕິບັດສາດສະໜາກິດຜ່ານທາງໂຄງການເດັກ ແລະ ຊາວໜຸ່ມ,” Liahona, ເດືອນຕຸລາ 2020
ຮູບພາບໂດຍ ທອມ ກາເນີ, ໄອເຊັກ ດາໂກ-ອາແຊມປົງ, ອາເລັກຊານເດີ ເຄ ໂບອາເທັງ, ແລະ ໂຈນັສ ເຣບິກກີ
ຫຼັກທຳຂອງການປະຕິບັດສາດສະໜາກິດ, ເດືອນຕຸລາ 2020
ການປະຕິບັດສາດສະໜາກິດຜ່ານທາງໂຄງການເດັກ ແລະ ຊາວໜຸ່ມ
ການເຊື້ອເຊີນຄົນອື່ນໃຫ້ເຕີບໂຕ ແລະ ການຊ່ວຍເຫຼືອພວກເຂົາລະຫວ່າງທາງ ເປັນສິ່ງສໍາຄັນຕໍ່ການປະຕິບັດສາດສະໜາກິດ.
ມີຫຼາກຫຼາຍໂອກາດສໍາລັບການປະຕິບັດສາດສະໜາກິດ ຜ່ານທາງໂຄງການເດັກ ແລະ ຊາວໜຸ່ມ. ບາງທີທ່ານອາດມີເດັກນ້ອຍ ຫຼື ຊາວໜຸ່ມຢູ່ໃນບ້ານຂອງທ່ານເອງ. ບາງທີທ່ານອາດເປັນຜູ້ນໍາຢູ່ໃນໂຄງການ ຫຼື ທ່ານອາດປະຕິບັດສາດສະໜາກິດຕໍ່ຄອບຄົວທີ່ມີເດັກນ້ອຍ ແລະ ຊາວໜຸ່ມ. ຫຼື ບາງທີທ່ານອາດຮູ້ຈັກເດັກນ້ອຍ ແລະ ຊາວໜຸ່ມບາງຄົນ (ນັ້ນອາດລວມທັງພວກເຮົາທຸກຄົນ). ບໍ່ວ່າທ່ານຈະຢູ່ໃນສະຖານະການໃດກໍຕາມ, ມີຫຼາຍວີທີທີ່ຈະໃຊ້ໂຄງການ ຫຼື ຫຼັກທໍາຂອງມັນເພື່ອເປັນພອນໃຫ້ແກ່ຊີວິດຂອງຄົນອື່ນ.
ການພັດທະນາຕົວພວກເຮົາເອງໄປນໍາກັນ
ໃນຈຸດໃຈກາງຂອງໂຄງການເດັກ ແລະ ຊາວໜຸ່ມ ຄືການເອົາໃຈໃສ່ຕໍ່ຄວາມພະຍາຍາມໃນແຕ່ລະມື້ ເພື່ອໃຫ້ກາຍເປັນເໝືອນດັ່ງພຣະຜູ້ຊ່ວຍໃຫ້ລອດ, ຜູ້ປະຕິບັດສາດສະໜາກິດຢ່າງດີພ້ອມ. ຫຼາຍຄົນທີ່ໄດ້ເຂົ້າຮ່ວມໂຄງການໄດ້ຮຽນຮູ້ວ່າ ຍິ່ງເຮົາກ້າວໜ້າໃນຫຼາຍໆດ້ານໃນຊີວິດຂອງເຮົາຫຼາຍເທົ່າໃດ, ເຮົາກໍຍິ່ງພ້ອມທີ່ຈະຊ່ວຍເຫຼືອ ຫຼື ປະຕິບັດສາດສະໜາກິດຕໍ່ຄົນອື່ນຫຼາຍຂຶ້ນເທົ່ານັ້ນ.
ແຕ່ດ້ວຍໂຄງການເດັກ ແລະ ຊາວໜຸ່ມ, ການເປັນພອນໃຫ້ແກ່ຄົນອື່ນບໍ່ຈໍາເປັນຕ້ອງຖ້າຈົນກວ່າເຮົາຮຽນຮູ້ບາງຢ່າງກ່ອນ. ການກະທຳຈາກການຮຽນຮູ້ນັ້ນເອງ ຈະເປີດໂອກາດໃຫ້ປະຕິບັດສາດສະໜາກິດ.
ສໍາລັບຊາຍໜຸ່ມທີ່ຊື່ ພຼໍເຟັດ ທີ່ອາໄສຢູ່ປະເທດການາ, ການຕັ້ງເປົ້າໝາຍໃນໂຄງການເດັກ ແລະ ຊາວໜຸ່ມ ເພື່ອຮຽນວິທີຫຼິ້ນປີອາໂນ ເປັນພຽງແຕ່ຈຸດເລີ່ມຕົ້ນເທົ່ານັ້ນ. “ເປົ້າໝາຍຢ່າງໜຶ່ງຂອງຂ້ານ້ອຍແມ່ນການຊ່ວຍໃຫ້ຄົນອື່ນຮູ້ເຖິງສິ່ງທີ່ຂ້ານ້ອຍກຳລັງຮຽນຢູ່,” ທ້າວພຼໍເຟັດກ່າວ.
ເຖິງແມ່ນວ່າ ລາວຍັງບໍ່ທັນເປັນນາຍຄູເທື່ອ, ແຕ່ເປົ້າໝາຍຂອງລາວໄດ້ເຕີບໂຕໄປສູ່ສິ່ງທີ່ຍິ່ງໃຫຍ່ກວ່າສິ່ງທີ່ລາວໄດ້ຈິນຕະນາການໄວ້ກ່ອນແລ້ວ. ຕອນນີ້ມີນັກຮຽນ 50 ຄົນທີ່ກຳລັງຮຽນຫຼິ້ນປີອາໂນຄຽງຂ້າງກັບທ້າວພຼໍເຟັດຢູ່ທີ່ຕຶກໂບດ. ແລະ ໃຜລະທີ່ກຳລັງສອນທ້າວພຼໍເຟັດ ແລະ ນັກຮຽນທັງ 50 ຄົນເຫຼົ່ານັ້ນ? ອາເລັກຊານເດີ ເອັມ ແລະ ແຄວວິນ ເອັມ, ທັງສອງອາຍຸ 13 ປີ. “ພວກເຮົາຢາກສະແດງການກະທໍາແຫ່ງຄວາມດີຕໍ່ຄົນອື່ນ,”ແຄວວິນກ່າວ.
ສາມມື້ຕໍ່ອາທິດ ຊາວໜຸ່ມສອງຄົນນີ້ສອນບົດຮຽນປີອາໂນຂັ້ນເລີ່ມຕົ້ນໃຫ້ທຸກຄົນທີ່ເຂົ້າມາຮຽນຟຣີ. ມັນໄດ້ມີຜົນປະໂຫຍດເພີ່ມເຕີມສໍາລັບການຮຽນປີອາໂນ. ນັກຮຽນບາງຄົນໄດ້ຮັບການແນະນໍາໃຫ້ຮູ້ຈັກກັບສາດສະໜາຈັກຜ່ານທາງການຮຽນປີອາໂນ ຕໍ່ມາໄດ້ສຶກສາພຣະກິດຕິຄຸນ ແລະ ຕັດສິນໃຈຮັບບັບຕິສະມາ.
ເມື່ອພວກເຮົາພະຍາຍາມທີ່ຈະພັດທະນາຕົວເອງ, ພວກເຮົາສາມາດປະຕິບັດສາດສະໜາກິດຕໍ່ຄົນອື່ນ ໂດຍການເຊື້ອເຊີນພວກເຂົາໃຫ້ເຂົ້າຮ່ວມກັບພວກເຮົາ.
ສູດທີ່ດີທີ່ສຸດສໍາລັບການປະຕິບັດສາດສະໜາກິດ
ໃນຖານະປະທານອົງການປະຖົມໄວຂອງສະເຕກ, ຊາບຣີນາ ຊີໂມເອສ ດີອຸສ ອໍກຸສໂຕ ຈາກເມືອງກູຣິຕິບາ, ປະເທດບຣາຊິນ, ໄດ້ເຫັນວ່າ ການພັດທະນາຕົວເອງໃນດ້ານຕ່າງໆຂອງໂຄງການ ໄດ້ເປັນພອນໃຫ້ແກ່ບັນດາເດັກນ້ອຍ ແລະ ຊາວໜຸ່ມໃນສະເຕກຂອງລາວແນວໃດ. ແຕ່ລາວກໍຍັງໄດ້ເຫັນຫຼາຍໆວິທີທີ່ຈະໃຊ້ສິ່ງທີ່ລາວໄດ້ຮຽນຮູ້ກ່ຽວກັບການພັດທະນາຕົວເອງໃນການມອບໝາຍຂອງລາວ ໃນຖານະເອື້ອຍນ້ອງຜູ້ປະຕິບັດສາດສະໜາກິດ.
“ເມື່ອຂ້າພະເຈົ້າພັດທະນາພອນສະຫວັນ,” ຊິດສະເຕີ ອໍກຸສໂຕ ກ່າວ, “ຂ້າພະເຈົ້າສາມາດໃຊ້ພອນສະຫວັນນັ້ນເພື່ອເປັນພອນໃຫ້ແກ່ຄົນທີ່ຂ້າພະເຈົ້າປະຕິບັດສາດສະໜາກິດຕໍ່.”
ຊິດສະເຕີ ອໍກຸສໂຕ ໄດ້ສອນຄົນໜຶ່ງໃນບັນດາເອື້ອຍນ້ອງທີ່ລາວໄດ້ຮັບມອບໝາຍ ໃຫ້ເຮັດເຂົ້າໜົມຊ໊ອກໂກແລັດທຣັບໂຟ. ດຽວນີ້ ເອື້ອຍນ້ອງຜູ້ນັ້ນກໍເຮັດເຂົ້າໜົມທຣັບໂຟຂາຍ ເພື່ອເປັນການເສີມລາຍໄດ້ໃຫ້ຄອບຄົວຂອງລາວ. “ຫຼາຍເດືອນຕໍ່ມາ, ຂ້າພະເຈົ້າໄດ້ຮັບພອນ ເມື່ອເອື້ອຍນ້ອງຄົນໜຶ່ງໄດ້ສອນຂ້າພະເຈົ້າວິທີເຮັດເຂົ້າຈີ່ນໍ້າເຜິ້ງທີ່ຂ້າພະເຈົ້າສາມາດຂາຍໄດ້,” ຊິດສະເຕີ ອໍກຸສໂຕໄດ້ກ່າວ. “ການພັດທະນາ ແລະ ການແບ່ງປັນພອນສະຫວັນຂອງພວກເຮົາ ສາມາດເປັນພອນໃຫ້ແກ່ຊີວິດຂອງກັນແລະກັນ ແລະ ເຮັດໃຫ້ຄວາມສໍາພັນຂອງພວກເຮົາໃນຖານະເອື້ອຍນ້ອງຜູ້ປະຕິບັດສາດສະໜາກິດເລິກເຊິ່ງຂຶ້ນໄດ້.”
© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Ministering Principles, October 2020. Laotian. 16725 331