2020
Omerk er a Llomes er a Kristo sel Kurismas
Ongeteruich ma ongerung el buil 2020

“Omerk er a Llolmes er a Kristo sel Kurismas,” Liahona, December 2020

odingel

Siasing a lullai a Niltza Beatriz Santillan Castillo; siasing el mlengai er a Getty Images

Osischeklel Omesiou, December 2020

Omerk er a Llolmes er a Kristo sel Kurismas

Momdasu el kirir tirkel moldingel er tir. Ng mekera mngesuterir el mo kmeed er a Kristo er a Kurismas?

Kede melbedebek er a Kristo er a bek el rak, eng di a Kurismas a taem el doldeu er a kot el ngarbab el sengk el bla denguu: “Beltikereng er a Dios el kirel a beluulechad a uchul, e nguldureklii a di chimol Ngelekel” (Johanes 3:16). Sel doldingel er a temel a Kurismas, e kid a dirrek el sebeched lodars a sengk el ngosuterir a rechad el mo kmeed er a Osobel. Ngungil a domdasou er kid el okesiul a sengk er a Chedam er a Babeluades.

Ak Dirk Obang a Sengk

Susan Hardy, California, USA

Sera leteruich me a ta rekik, e a sensei er ngak er a Sandei Skuul, el Brother Deets, a dilu er kemam el uase alsekum aki mo medengei a Tebechelel a Klaumerang e smaod a belkul el morngii, e ngii a mo mechar a chedaol llechukl er kemam.

A Brother me a Sister Deets a dirk ulemuchel, el ngeasek lobekel. Ng dimlak kumerang el uase a Brother Deets a mle sebechel mechar chedaol llehcukl el mora rebek el chad. Ngdi a kulemdasou el ause alsekum e ngii omdasou el meklou a belkul a Articles of Faith, e ak mo mesuub.

Uriul er a bok merek el mesuub el rokui, eng mlo diak kulchesuar a taem e obes er a yaksok er ngii.

Eng di, sel sils er a Kurismas, e ak ngiluu a uldurokl el mlarngii a ngklek er ngii. Ak milkengii e mes a chedaol llechukl el kloklek, lobengkel a card el mengelechel er ngak el mo blechoel menguiu. Tia sera 1972, e me lmuut er chelechal sils ak dirk olab aikal chedaol llechukl. Ng kmal mekreos er ngak.

Ng diak el cheral aikal sengk ng bai sel blekokeuii el ngii a ulechotii er ngak me a blakereng er ngii el rullak me ak mlo semeriar el mesuub a tekingel a Dios. Ak melasm loltirakl okesiul a Brother Deets er a omesiou loldars a ngarngii a ultutelel sengk el mo ra ngara bitar ngak, loureng el mo omekngeltengat er a rebebil el uai ngii el mla omekngeltengat er ngak.

Siotai el mo Nguu a Ngerachel

Richard M. Romney, Utah, USA

Tirkel loungerachel omilil er a Kurismas er a ward er kemam er a lolengit er ngak el mo oldingel er a tal diak el blechoel ngara ikelesia el chad el mo siotai er ngii el mei er tial omilil, eng mle suebek a renguk. Ng dirk tal kisa Darren, er a lemei e ra kuk mle tara omilil er a ward. Ng mle llechotel a bdelul er a ikel llechet lousbech a rechad el ngara otobai. A mekemanget el cheiul a mle llechotel er a ponytail, e mekemanget e becheleleu a chesemel, e a chimal a di delengod.

Ak dilak, ngak me a tara chad er a ward, el mora blil a Darren, el melchedech el kmo ngmo dmu el mongerang. Ng dilu er kemam el me tmuu er a blai, aki uluchais er ngii el uase ngera uchul aki mlei. Ng dilu el kmo, “Oi, ng kmal soak lekong!”

Ng kmal mle meduch el rirelii tial omilil, el kmal mo ungil el mora rebetok el chad. Telkib el taem ruriul, e a kldemek er a odingel me ngak a mlongit el mo blechoel mo oldingel er a Darren. Ng mle blechoel lungil a rengul lomes er kemam, e mle ungil a cheldechedemam. Ak mereng a saul le ongit el mlorngii el kirel omilil er a ward a mlo uchul a ungil deleuill er a kemam.

Oldingel er a Rebebil er a Kurismas

Aikakid a bebil er a tekoi el sebechem el meruul luchul e tirkel moldingel er tir a mo medengei el uase ke melatk el kirir, oumesingd chelechal taem,

  1. Bebil er a taem e di mou dengua a lechub em text a sebechel lolureor. Muchelii a cheldecheduch lolab a beot el tekoi el uaia “Alii, ke uangerang?” a sebechel ngarngii a relii.

  2. Bom dak er a kmo ngera lomilil a lesebechel. A Kurismas a kmal ungil taem el dosuub el kirel a doumerang el tekoi. Sel mouchais a moumerang el tekoi e kuk morrenges er a rebebil, e ke mekengii a chesimer el kirel a ungil klemedengei.

  3. Moluluuch el kirir el melekoi a ngklir. Molengit er a Chedam er a Babeluades me lengesukau el mo omdasou a teletael el mo ngoiteterir el mo kmeed er a Ngelekel.

  4. A beot el sengk a blechoel diak dobes. Ng diak a belkul a meklou el sengk. Sengk er a temem, sengk lorrenges, olecholt a siasing a lechub aikel modengei—aikaikid a sebechel sengk el ngara reng.

  5. Mochotii a sengk er a klaumerang. Molengit er tir me louchais er beltikereng er tir el mora Osobel, e dirrek kau mouchais er a beltikereng er kau el mo er Ngii.

  6. Msiotai er a rebebil el mo ngara ongdibel er a Kurismas. A rebebil er a rechad a sorir el ngara ongdibel e ng di diak lodengei el kmo te mo er ker. Msiotai er tir el mei er a ongdibel lobengkem.

  7. Mokekii a blirir er a budech. Mouchais er tir el kmo a remisionari a ngarngii a klumech er a Kurismas el sebechir lochotii el mo er tir, el ngii a mo mesterir a budech me a beltikereng er a rengrir.

Dmak Loldingel el Chedal a Ikelesia

A ulsbechellir a rebetok el chad a klou a belkul. A rebebil a sebechir el mengedmokl el kirel omilil. A rebebil a kuk sebechir a mekekerei e beot a kedmeklel omilil. Tirkel tir a oungerachel omilil a kirir el mo ngara nglunguuch el kirir a rousbech a ngesou.

  • A rechedal a ikelesia er a kldei el stakes er a Paris, France, a ulengeseu er sel Light the World el mlarngii a talent show me a fashion show. Te kildmokl a klalou e uldars el mo er a remechebuul me tirkel diak a delengcheklir.

  • A Charlotte North Carolina Central Stake a rirelii a “Kurismas er a Beluulechad” er a basio er tir, el luledkeu er a Osobel lolab a kall, me a uldelid el teletael er a Kurismas, chelitakl, ureor el beluu, me a kurismas er a rengalek.

  • A rechad er a ikeelsia er a Vero Branch Florida Stake a mlo teloi er a rechad er a beluu el kirel a uchul eng ngarngii a Kurismas. A omotzia mlodars el mo er a ikel chelechad lolngeseu er a remechebuul. A rengalek er a Primary a milngitakl, e betok el ikelesia a mlarngii a booth er ngii.

  • A Jacksonville Florida Stake a ulelecholt er a video el Osebelel a Beluuelchad er a beluu.

© 2020 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Osisechakl er a Odingel, Ongeteruich ma ongerung el buil 2020. Palauan. 16727 881