“Gro i kam insaed long Prinsipol blong Revelesen,” Liahona, Jenuware 2021
Evri Manis Liahona Mesej, Jenuware 2021
Gro i kam insaed long Prinsipol blong Revelesen
Mi leftemap tingting blong yu blong mekem ol impoten step blong harem Lod moa gud mo oltaem blong mekem se yu save kasem ol samting we Hem i wantem blong givim long yu.
Foto i kam long Getty Images
Long 30 Septemba 2017, folem aftenun sesen blong jeneral konfrens, mi stop long hospital blong jekem wan memba blong kworom we mi lavem tumas Elda Robert D. Hales. Hem i bin go stap long hospital taem hem i stap safa long wan hat atak sam dei bifo.
Mitufala i bin gat wan naesfala visit, mo i luk olsem se hem i stap kam oraet sloslo. Hem i stap pulum win hemwan nao, mo hemia i wan gud saen.
Long aftenun ia, Spirit i toktok long long hat mo maen blong mi se mi mas gobak long hospital long Sandei. Long Sandei moning sesen blong jeneral konfrens, strong filing mo tingting ia i kambak. Mi filim se mi no mas go lanj mo hariap go long saed bed blong Elda Hales stret afta long en blong moning sesen, mo mi bin mekem.
Taem mi kasem, mi save luk se Elda Hales i bin kam moa nogud. Sori nomo, hem i ded 10 minit afta mi kasem hospital, be mi glad se mi bin stap long saed blong hem wetem swit waef blong hem, Meri, mo tufala boe blong tufala taem hem i lego laef ia.
Hamas mi glad tumas se voes blong Tabu Spirit i mekem mi mekem wan samting we maet bae miwan mi no save mekem. Mo mi glad tumas long fasin blong kasem revelesen we i ril mo ol heven oli open wan taem bakegen.
Long yia ia, bae yumi lukluk moa long stadi blong wanwan man mo klasrum stadi bae i Doktrin mo Ol Kavenan. Ol “tabu revelesen mo dikleresen we i givim insperesen” oli save blesem evriwan we oli stadi long olgeta mo praktisim ol tabu kaonsel. Oli invaetem “evri man long evri ples blong harem voes blong Lod Jisas Kraes,”1 from i tru “voes blong Lod i go long evri man” (Doktrin mo Ol Kavenan 1:2).
Denja, Tudak, Fasin blong Giaman
Hariken long saed blong bodi mo spirit oli pat blong laef long wol ia, olsem KOVID-19 sik i rimaenem yumi. Kolosap long taem blong Kambak blong Hem, Sevya i bin tokbaot ol dei blong ol bigfala trabol. Hem i talem, “Mo bambae i gat hadtaem blong kasem kaekae, mo ol defren kaen sik, mo ol graon we oli seksek, long ol defren ples” (Josef Smit—Matiu 1:29).
Ademap ol kaen trabol ia i wan tudak we i kam moa antap mo fasin blong giaman we i raonem yumi. Olsem Jisas i talem long ol disaepol blong hem, “rabis fasin bae i kam moa bigwan” bifo hem i kambak (Josef Smit—Matiu 1:30).
Setan bae i karem i kam tugeta ol paoa blong hem mo gohed agensem ol wok blong Lod mo yumi we yumi pat long hem. From ol denja ia we i stap kam moa antap we yumi fesem, nid blong yumi long saed blong tabu help i kam moa bigwan, mo traehad blong yumi blong harem voes blong Jisas Kraes—Medieta blong yumi, Sevya blong yumi, mo Ridima blong yumi—i neva kam moa impoten.
Olsem mi talem smol afta we oli singaotem mi olsem Presiden blong Jos, Lod i rere blong talemaot maen blong Hem long yumi. Hemia i wan long ol bigfala blesing blong Hem long yumi.2
Long dei blong yumi, Hem i promes se, “Sapos yufala i askem, bambae yufala i kasem wan revelesen, folem nara revelesen, wan save folem nara save” (Doktrin mo Ol Kavenan 42:61).
Mi save se bambae Hem i ansa long ol prea blong yumi.
Olsem Wanem Yumi Harem Hem
Save olsem wanem Spirit i toktok i impoten tedei. Blong kasem revelesen blong yuwan, blong faenem ol ansa, mo blong kasem proteksen mo daereksen, yumi tingbaot ol step we Profet Josef Smit i soem long yumi.
Faswan, yumi draonem yumiwan long ol skripja. Taem yumi Mekem olsem, bae i openem maen mo hat blong yumi long ol tijing blong Sevya mo trutok. Ol toktok blong Kraes i we “talem [yumi] evri samting we [yumi] mas mekem” (2 Nifae 32:3), speseli long ol dei we yumi gat tu tingting mo ol samting we oli stap jenis hariap.
Afta yumi prea Prea i nidim aksen, so yumi putum yumiwan daon bifo long God, faenem wan kwaet ples we yumi save go long hem oltaem, mo kapsaetem tingting blong hat blong yumi long Hem.
Lod i talem, “Kam kolosap long mi mo bambae mi kam kolosap long yufala; lukaotem mi wetem strong tingting mo bambae yufala i faenem mi; askem mo bambae yufala i kasem; noknok, mo bae i open long yufala” (Doktrin mo Ol Kavenan 88:62–63).
Blong stap kam kolosap long Lod, i karem i kam kamfot, i leftemap tingting, hop mo i givim hiling. So, yumi prea long nem blong Hem long saed blong ol wari blong yumi mo ol samting we yumi, mi no strong long hem, ol hadtaem mo olgeta we yumi lavem, ol koling blong yumi mo ol kwestin blong yumi.
Afta yumi lisin:
Sapos yumi stap long ol ni blong yumi afta yumi finisim prea blong yumi, ol tingting, ol filing, mo daereksen bae i kam long maen blong yumi. Rekodem ol tingting bae i helpem yumi tingbaot wanem aksen Lod bae i wantem yumi tekem.
Taem yumi ripitim wei ia, bae yumi, long ol toktok blong Profet Josef Smit, “gro i kam insaed long prinsipol blong revelesen.”3
Klin Inaf blong Kasem Revelesen
Mekem i kam niu janis ia we yumi save luksave voes blong Tabu Spirit mo mekem i kam antap paoa blong yumi blong save kasem revelesen we i nidim fasin blong stap klin inaf. Klin Inaf i no nidim yumi blong kam stret evriwan, be i nidim se yumi traehad blong mekem i kam antap stret mo gud fasin.
Lod i wantem luk trae hat blong evri dei, kam moa gud evri dei, sakem sin evri dei. Fasin blong stap klin inaf i karem i kam stret mo gud fasin, mo stret mo gud fasin i kwalifaem yumi blong kasem Tabu Spirit. Taem yumi tekem “Tabu Spirit olsem gaed blong [yumi]” (Doktrin mo Ol Kavenan 45:57), yumi kwalifae from revelesen blong yumiwan.
Sapos i gat wan samting we i stap stopem yumi blong openem doa long daereksen we i kam long heven, bae yumi nidim blong sakem sin. Sakem sin i letem yumi openem ol doa mekem se yumi save harem voes blong Spirit plante taem moa, mo moa klia.
“Stamba Tingting i klia,” Elda Deved A. Bedna blong Kworom blong Olgeta Twelef Aposol i bin tijim. “Sapos wan samting we yumi tingting long hem, yumi luk, yumi harem, o mekem we i mekem se yumi go longwe long Tabu Spirit, bae yumi sut stop blong tingting, lukluk, harem o mekem samting ia. Sapos wan samting we i gat tingting blong mekem yumi hapi, eksampol, mekem yumi go longwe long Tabu Spirit, i tru se ol kaen aktiviti ia i no blong yumi. From se Tabu Spirit i no save stap wetem wanem we i no tes gud , i no tan, o i no naes, i klia se ol kaen samting olsem oli no blong yumi.”4
Taem yumi putum tugeta stret mo gud fasin we i stap kam antap mo fasin blong obei wetem fasin blong livim kaekae, wok strong blong lukaotem, stadi long ol skripja mo toktok blong ol profet we oli laef mo famli histri wok, heven bae i open. Lod, long narasaed, bae i mekem promes blong Hem i kamtru : “Spirit blong mi, we bambae i givim laet long maen blong yu” (Doktrin mo Ol Kavenan 11:13).
Bae yumi nidim blong gat longfala tingting, be God bae i toktok long yumi long wei blong Hem mo long taem blong Hem.
Wan Spirit we I Andastanem Samting
Job i talem, “I gat spirit insaed ol man: mo insperesen blong God we i strong tumas i givim long olgeta andastaning” (Job 32:8) Long niu yia ia, mi leftemap tingting blong yufala blong tekem ol impoten step blong harem moa gud Lod blong mekem se yu save kasem laet we Hem i wantem blong givim long yu.
Bifo ded blong Elda Hales long Oktoba dei ia long 2017, hem i priperem wan sot toktok blong jeneral konfrens we hem i no bin save givim. Insaed long toktok ia, hem i raetem, “Fet blong yumi i mekem yumi rere blong stap long ples blong Lod.”5
Taem yumi kasem revelesen, yumi spendem taem long ples we God i stap olsem Hem i talemaot maen blong Hem, tingting, mo voes blong Hem long yumi (luk long Doktrin mo Ol Kavenan 68:4). Bae yumi putum fet blong yumi long aksen, singaotem Hem, stap klin inaf long laef ia from ol insperesen we oli promesem, mo folem wanem we yumi kasem we spirit i gaedem yumi long hem.
© 2020 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem translesen: 6 /19. Translesen blong Monthly Liahona Message, January 2021. Bislama. 17463 852