“Marita non ewe Nongonongen Pwarata,” Liahona, January 2021
Porous ren Liahona Iteiten maram, January 2021
Marita non ewe Nongonongen Pwarata
Ua pesei kemi pwe oupwe fori met mi auchea pwe oupwe rongochu ewe Samon me epwe fan chommong pwe oupwe tongeni angei ewe mirit I a mochen epwe ngeni kemi.
Sasing seni Getty Images
Non September 30, 2017, mwirin ewe mwichen nekkunionun mwichenapen mwichefen, ua kouno ren ewe pioing ai upwe cheki atongeiei Elter Robert D. Hales chon ai we mwich. A fen nuwing nupwen a tori semwenin ngasangas ekkoch ran me mwan.
A amwarar am chufengen, me usun a ekis pwak. A fen pwan pwisin ngasangas won winikapan, minne ew esisin mi och.
Nge, ena nekkunionun, ewe Ngun a kapas ngeni netipei me ai ekiek pwe upwe niwin ngeni ewe pioing non Raninfel. Fansoun ewe mwichen nesossorun Raninfel ren ewe mwichenapen mwichefen, ena pochokunen memef a niwinsefan. Ua mefi pwe upwe onuw mwongon neonowas me mwitir ngeni nepekin an Elter Hales we pet mwirin chok ewe mwichen nesosor a sareno, minne ua fori.
Nupwen ua tikeri, ua tongeni kuna pwe Elter Hales a wesen ngaweno. A enetipengaw, a sopweno 10 minich mwirin ai tikeri, nge ua kinisou pwe ua nom unukun fiti punuwan mi echipwer, Mary, me nour kewe ruemon att nupwen a no seni ei manau.
Ua men kinisou pwe ewe mongungun ewe Ngun mi Fel a peseiei ai upwe fori och mettoch usap tongeni fori me nukun. Me ua men kinisou ren ennetin pwarata me pwan ekkewe nang ra suk sefan.
Ei ier ewe Doctrine and Covenant epwe ina met emon me emon me klasroom repwe kaeo. Ekkei “pwarata mi pin me esinesin seni nang” ra tongeni efeiochu meinisin ir ekkewe ra kaeo ir me fori ar emwen. Ra etiwa aramas meinisin ekis meinisin ar repwe ausening ngeni mongungun ewe Samon Jises Kraist,1 pun ennetin mongungun ewe Samon mi no ngeni aramas meinisin” (Doctrine and Covenants 1:2).
Feiengaw, Rochopwak, Otuputup
Monumonun pekin aion me ngun ir pekin manau won ewe fonufan, usun ewe watten semwenin COVID-19 a achema kich. Ren ewe fansoun me mwen An Oruwen Wareto, ewe Chon Amanau a osini ekkoch ranin riaffou napanap. A apasa, Epwe wor nengita, me samau, me chechin fonu, non sokopaten neni (Joseph Smith—Matthew 1:29).
Achufengenin ei sokkun riaffou ina ewe napenon rochopwak me otuputup mi rokowanikicheno. Usun Jises a ureni noun chon kuno, Fofforungaw epwe napeno me mwen An niwinsefan (Joseph Smith—Matthew 1:30).
Setan a achufengeni an pochokun me a fiu ngeni ewe angangen ewe Samon me kich ekkewe sia angang non. Pokiten ewe napenon efeiengaw sia weri, auchean emwen seni nang ngeni kich a fokkun nap, me ach attures ne ausening mongungun Jises Kraist—ach Chon Affor, Chon Amanau, Chon Angasano—esamo kon nap weiweitan.
Usun ua apasa mwirin chok ai kokko ngeni ai Presetenin ewe Mwichefen, ewe Samon a mwoneta an epwe pwari An ekiek ngeni kich. Ina ew me nein An kewe watten feioch ngeni kich.2
Non ach ei fansoun, A fen pwonei, Ika kopwe tingor, kopwe angei pwarata me pwarata, mirit me mirit (Doctrine and Covenants 42:61).
Ngang mi sinei I epwe ponuweni ach sio.
Ifa usun Sia Rong I
Ach sinei ifa usun ewe Ngun a kapas mi auchea ikenai. Ach sipwe pwisin angei ach pwarata, ach sipwe kuna ponuwan, me angei eppet me emwen, sia chechemeni ewe tetten ewe Soufos Joseph Smith a forata fan itach.
Aewin, sipwe nikitu ne kaeo ekkewe pukefel. Ach fori epwe suki ach ekiek me netipach ngeni an ewe Chon Amanau asukun me ennet. Ekkewe kapasen Kraist “ereni [kich] mettoch meinisin met [sipwe] fori” (2 Nifai 32:3), akkaewin non ekkei ranin fatangaw me osukosuk.
Mwirin sipwe iotek. Mi auchea epwe wor kokkoten fori ren iotek, iwe sia etekisona kich me mwen Kot, kutta ew neni mi mosonoson sia tongeni feinno ngeni, me uwau netipach ngeni I.
Ewe Samon a apasa pwe sipwe arap ngeni I me epwe arap ngeni kich. Sipwe kutta I non nukuchar me sipwe kuna I. Sipwe tingor, me sipwe angei. Sipwe fichifich, me epwe suk ngeni kich (Doctrine and Covenants 88:63).
Arap ngeni ewe Samon a wato kinamwe me pesepes, apinukunuk me echikar. Iwe, sia iotek non Itan usun ach aurek me ach apwangapwang, ach anean me atongeach kewe, wisach me ach kapaseis.
Mwirin sipwe ausening.
Ika sipwe nom won pukuwach ekis tameno mwirin ach awesi ach iotek, ekiek, memef, me emwen repwe tonong non ach ekiek. Rekotini ekkena memef epwe anisi kich ne chechemeni met foffor ewe Samon epwe mochen sipwe fori.
Nupwen sipwe enniwini sefani ei mwokutukut, sipwe, non ekkoch kapasen ewe Soufos Joseph Smith, “marita non ewe nongonongen pwarata.”3
Nimenimoch ne Angei Pwarata
Nimenimoch mi auchea an epwe murinono ach tufichin esinna mongungun ewe Ngun mi Fel me anapano ach unusen tongeni angei pwarata. Nimenimoch esap auchea epwe unusoch, nge a auchea ach sipwe achocho ngeni epwe napeno nimoch.
Ewe Samon a esuku achocho iteiten ran, ochuno iteiten ran, aier iteiten ran. Nimenimoch a wato nimoch, me nimoch a atufichi kich ngeni ewe Ngun mi Fel. Nupwen sia angei ewe Ngun mi Fel pwe [ach] emwen (Doctrine and Covenants 45:57), sia tufich ngeni pwarata won winikapach.
Ika och mettoch a akounoi kich seni ach suki asamen aanen nang, epwe auchea sipwe aier. Aier a mut ngeni kich sipwe suki ewe asam pwe sipwe tongeni rongorong mongungun ewe Samon fan chommong me epwe fatafatoch.
“Ewe nongonong mi fatoch,” Elter David A. Bednar seni ewe Mwichen ekkewe Engon me Ruemon a aitikich. “Ika och mettoch sia ekieki, kuna, rongorong, ika fori a atowawa kich seni ewe Ngun mi Fel, iwe sipwe kouno ne ekieki, nengeni, rong, ika fori ena mettoch. Ika och mettoch mi fis pwe epwe apwapwa kich, ren awewe, a asukicheno seni ewe Ngun mi Fel, iwe ennetin ena sokkun pekin apwapwa ese och ngeni kich. Pokiten ewe Ngun ese tongeni etiwa met mi nimengaw, ennieput ika sarawaraw, iwe mi fatoch pwe ekkena sokkun mettoch rese och ngeni kich.”4
Nupwen sia achufengeni napenon nimoch me anneasochis me echikipin, nikitu ne kutta, kaeo ekkewe pukefel me kapasen ekkewe soufos mi manau, me angangen tempel me uruon famini, ekkewe nang repwe suk. Ewe Samon, ren niwinin, epwe apwonueta an pwon: Upwe ngeni kemi Nguni, minne epwe asarama ami ekiek (Doctrine and Covenants 11:13).
Epwe auchea sipwe tipepos, nge Kot epwe kapas ngeni kich non An pwisin napanap me non An pwisin fansoun.
Ew Ngunun Weweiti
Job a affata, “Mi wor ew ngun non aramas: me ewe pesepesin ewe mi Napanap a ngenir mirit” (Job 32:8). Non ei minafon ier, ua pesei kemi pwe oupwe fori met mi auchea pwe oupwe rongochu ewe Samon me epwe fan chommong pwe oupwe tongeni angei ewe mirit I a mochen epwe ngeni kemi.
Me mwen an Elter Hales sopweno non ena ranin October non 2017, a amwonata ew mwochomwochen afanafan fan iten mwichenapen mwichefen minne i ese tongen i epwe atoura. Non ena afanafan, a makkei, “Ach nuku a amonnakicheta ach sipwe nom ne mesen ewe Samon.”5
Nupwen sia angei pwarata, sia nom ne mesen Kot nupwen I a pwari An ekiek, mochen, me mongungun ngeni kich (nengeni Doctrine and Covenants 68:4). Amwo sipwe wanong ach nuku non foffor, kokkori I, manau nimenimoch fan iten An pwon, me foffor won ewe emwen sia angei.
© 2020 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Translation of Monthly Liahona Message, January 2021. Chuukese. 17463 901