“Ekori ekesim ndaha Ukpep Eriyarare,” Liahona, January 2021
Etop Liahona eke ofuri Ofiong, January 2021
Ekori ekesim ndaha Ukpep Eriyarare
Ami ndoho mbufo nte enam nkpo eke odotde man enehede ekop uyo Abasi enyung ekop ndien-ndien man mbufo ekeme ndibo ntat-enyin emi Enye oyomde ndino mbufo.
Ndise otode Getty Images
Ke September 30, 2017, ke ikpehe uwemeyo eke akwa mbono okurede, ami mma nka ufokibok man nkese edima owo eboho mi Elder Robert D. Hales. Enye okodu ke ufokibok tongo okodongode ubiak esit ke esisit usen emi ekebede.
Nnyin ima ikop inemesit ke ndikut kiet eken, ndien ekebiet nte idem esie otongo ndisong. Enye ekewek ibifik ke idemesie, emi ekedide eti idiongo.
Ke mbubreyo oro, nte ededi, Spirit ama eteme esit ye ekikere ete yak ami mfiak nka ufokibok ke Sunday. Kini ikpehe usenubok Sunday eke akwa mbono, osongo ntuuk oro afiak eti mi. Ami ndikere ke akpana ami mfep udia-uwemeyo ndien nwara nka nkese Elder Hales ke ikpehe usenubok oro okurede, emi ami nkanamde.
Ke ini ami nkesimde, mma nkut ke idem ama akabade odiok Elder Hales ata eti-eti. K mfuho, enye ama ebe efep ke minit duop ebede tongo nte ami nkedisim do, edi ami mmekom Abasi koro ami mma ndu ye enye ye ediye nnwan esie, Mary, ye ndito iren iba esie kini enye okpongde uwem emi.
Ami mmekop inemesit ke ntuuk Edisana Spirit ama eteme mi ete nnam nkpo eke ami mme mkpeke-nam-ke ke usung efen. Ndien ami mmekop inemesit ke eriyarare akpaniko ndien ke efiak eberede mme heaven ke inikiet efen.
Ke isua emi ukpebnkpo idem nnyin ye eke classroom edi-di Doctrine ye Covenants. Mme “ndisana eriyarare ye nti etop” emi ekeme ndidiong kpukpru owo emi ekotde mmo enuyng eda ndisana item mmo enam nkpo. Mmo eteme “akapaimo owo ke ofuri ebiet ete ekop uyo Obong Jesus Christ,”1 koro ke akpaniko “uyo Abasi oworo ono kpukpru owo” (Doctrine ye Covenants 1:2).
Afanikong, Ekim, Abianga
Mme oyobio eke ikpokidem ye eke ukpong edi ubak-nkpo eke uwem isong, nte eke udongo COVID-19 editide nnyin. Ke esisit ini mbemiso Edid Esie Oyoho Ikaba, Andinyanga ama eting abanga akwa usen ndutuho. Enye eting ete ke, “Akang, ye idiok udongo, ye unyek-isong eyedu, ke nsio-nsio ebiet” (Joseph Smith—Matthew 1:29).
Ndidiana ye oruk ndutuho oro edi okposong ekim ye abianga emi akanare nnyin okuk. Nte Jesus eketingde ono mbet Esie ete ke, “Ukwang-ido eyetot” mbemiso Enye afiak edi (Joseph Smith—Matthew 1:30).
Satan ama otum nkpo-ekong esie onim ndien ke anwana ye utom Abasi ye nnyin emi inamde utom oro. Ke ntak okposong afanikong emi nnyin ikutde, udong nnyin ke ediyom edisana ndausung enehede okpon, ndien ukeme nnyin man ikop uyo Jesus Christ—Etie-ubiong, Andinyanga, ye Andifak nnyin—enehede okpon akan nte ekesidide.
Nte ami nketingde ke esisit ini ke ema ekekot mi nte President Ufok Abasi nte ke, Abasi ebenge-idem ndiyara ekikere Esie nno nnyin. Oro edi kiet kotu ikpo edidiong Esie ono nnyin.2
Ke eyo nnyin, Enye ama onwongo ete, “Edieke mbufo edibupde, mbufo eyebo eriyarare ke eriyarare, ifiok ke ifiok” (Doctrine ye Covenants 42:61).
Ami mmediongo ke Enye eyeboro mkpe-ubok nnyin.
Nte Nnyin ikpekopde Uyo Esie
Ndidiongo danga nte Spirit etingde iko mfin emi edi akpan-nkpo. Man ibo eriyarare eke idem nnyin, ibo iboro, inyung ibo ukpeme ye ndausung, ana nnyin iti usung emi Prophet Joseph Smith ekenimde ono nnyin.
Akpa, nnyin iyesin idem nnyin ke nwed Abasi. Ndinam ntre eyeberede ekikere ye esit nnyin ono ukpebnkpo ye akpaniko eke Andinyanga. Iko Christ ”eyesian [nnyin] kpukpru nkpo se [nnyin] inyenede ndinam” (2 Nephi 32:3), akpan-akpan ke mme usen unana-idorenyin ye mbumere.
Efen nnyin ibong-akam. Akam oyom udong, ntre nnyin iyesuhore-idem nnyin kiso Abasi, iyom ndobo ebiet kiet emi nnyin idikade ndien-ndien, inyung inwanga esit nnyin ino Enye.
Obong odoho ete, “Sanga kpere mi ndien Ami nyesanga mkpere fi, tim yom mi ndien mbufo eyekut mi; bup, ndien mbufo eyebo; kong, ndien eyeberede usung eno mbufo” (Doctrine ye Covenants 88:63).
Ndisanga mkpere Obong ono ndongesit ye osongo-uo, idorenyin ye edikok. Ntre, nnyinibong-akam ke enying Esie kabanga mfina ye mmem-idem nnyin, udong ye mbon ima nnyin, ikoot ye mme mbume nnyin.
Ekem nnyin ikpang-utong.
Edieke nnyin iditongoke edong nnyin ke esisit ini kini nnyin ikurede akam nnyin, mme ekikere, ntuuk, ye ndausung eyeduk esit nnyin. Ndiwet mme ntuuk oro nim eyenwam nnyin nditi ewe edinam ke Abasi oyom nnyin inam.
Nte nnyin ifiakde inam nkpo emi, nnyin, ke iko Prophet Joseph Smith, iyekori ikesim ndaha ukpeb eriyayare.”3
Ndidot man Ibo Eriyayare
Ndisongo ukeme nnyin man ifiok ntuuk Edisana Spirit nnyung nam ukeme nnyin ke ndibo eriyarare okori oyom idu uwem emi odotde. Uwem-emi-odotde iyomke mfon-mma, edi oyom ete nnyin inwana ndikori ke edisana-ido.
Abasi oyom ukeme, edinam-ofon, edikabare-esit ke ofuri usen. Uwem-emi-odotde ada edisana-ido edi, ndien edisana-ido anam nnyin idot ndibo Edisana Spirit. Nte nnyin idade “Edisana Spirit nte ndausung [nnyin]” (Doctrine ye Covenants 45:57), nnyin iyedot ndibo eriyayare eke idem nnyin.
Edieke nkpo etrede nnyin ke ndiberede usung nyom ndausung eke heaven, akpana nnyin ikabare-esit. Edikabare-esit anwam nnyin ndiberede usung man nnyin ikop uyo Abasi awak ndien-ndien ye anwanga-anwanga.
Elder David A. Bednar eke Eboho mme Apostles Duopeba ekekpeb ete ke “Uwutnkpo emi edi inwang-inwang.” “Edieke nkpo emi nnyin ikerede, isede, ikopde, mme eke inamde adiangare nnyin okpong Edisana Spirit, ntem akpana nnyin itre ndikere, ndikut, ndi-se, ndikop, mme ndinam nkpo oro. Nte uwutnkpo, edieke nkpo emi okponode inemesit, edidiangare nnyin okpong Edisana Spirit, ntem ke akpaniko oruk inemesit oro idige eke nnyin. Koro Edisana Spirit ikemeke ndidung ye nkpo emi edehede, odiokde, mme midotke, ntem oruk nkpo oro idige eke nnyin.”4
Ini emi nnyin idiande nkori edisana-ido ye nkopitem ke utre-udia, itim iyom, ikoot nwed Abasi ye iko eke mme odu-uwem prophet, inam utomtemple ye eke family history, heaven eyeberede. Abasi, ndien, eyenam enwongo Esie eke: “Ami nyeyak Spirit Mi nno mbufo, emi edinwangade esit mbufo” (Doctrine ye Covenants 11:13).
Akpana nnyin inyene ime, edi Abasi eyeting ono nnyin ke usung Esie ye ke ini Esie.
Spirit Edidiongo
Job ofiori ete ke, “Spirit odu owo ke idem: spirit Abasi Ibom onyung asian mmo nkpo” (Job 32:8). Ke obufa isua emi, ami ndoho mbufo nte enam nkpo eke odotde man enehede ekop uyo Abasi enyung ekop ndien-ndien man mbufo ekeme ndibo ntat-enyin emi Enye oyomde ndino mbufo.
Mbemiso Elder Hales ekebe-efeb ke usen October oro ke 2017, enye ama ewet ekrpi eteting-iko onim ono akwa mbon emi enye mikikemeke ndino. Ke eteting-iko oro, enye ekewet ete ke, “Mbuotidem nnyin ebenge nnyin idem man idu kiso Abasi.”5
Ini emi nnyin ibode eriyarare, nnyin ibiat ini kiso Abasi ke nte Enye ayarare ekikere, uduak, ye uyo Esie ono nnyin (se Doctrine ye Covenants 68:4). Yak nnyin isin mbuotidem nnyin ke utom, ikoot Enye, idu uwem emi odotde ke ndibo ifiok enwongo Esie, inyung inam nkpo ke ndausung emi nnyin ibode.
© 2020 otode Intellectual Reserve, Inc. All rights reserved. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Etop eke Liahona ke ofuri Ofiong, January 2021. Efik 17463 553