“Magtubo sa Prinsipyo sang Rebelasyon,” Liahona, Enero 2021
Bulanan nga Mensahe sa Liahona, Enero 2021
Magtubo sa Prinsipyo sang Rebelasyon
Ginapaisog ko kamo sa paghimo sang importante nga mga tikang sa pagpamati sing mas maayo kag sing mas masunson sa Ginuo agud nga makabaton kamo sang pagpasanag nga luyag Niya ihatag sa inyo.
Laragway gikan sa Getty Images
Sang Septyembre 30, 2017, pagkatapos sang hapon nga sesyon sang komperensya, naghapit ako sa ospital agud usisaon ang akon pinalangga nga miyembro sang korum nga si Elder Robert D. Hales. Naospital sia sugod sang gin-atake sa korason pila ka adlaw ang nagligad.
Nangin manami ang amon pagbisita, kag dawsa nagaayo na sia. Nagaginhawa na gani sia nga sia lang, nga maayo nga senyales.
Sina nga gab-i, ugaling, ang Espiritu nagpabatyag sa akon tagipusuon kag pamensaron nga dapat ako magbalik sa ospital sa Domingo. Sa tion sang aga nga sesyon sang pangkabilogan nga komperensya, inang mabaskog nga pagpabatyag nagbalik. Nabatyagan ko nga dapat indi na ako manyaga kag nagdalidali pakadto kay Elder Hales pagkatapos gid sang aga nga sesyon, nga amo ang ginhimo ko.
Pag-abot ko, nakita ko nga si Elder Hales dawsa gulpi lang nga naglala. Sa masubo, napatay sia 10 ka minutos pagkatapos ko nga mag-abot, apang mapinasalamaton ako nga ato ako sa iya tupad upod ang iya mapinalanggaon nga asawa nga si Mary kag ang ila duha ka bata nga lalaki sang magtaliwan sia sa sining kabuhi.
Daw ano ang akon pagpasalamat nga ang paghutik sang Balaan nga Espiritu nagpabatyag sa akon nga himuon ang isa ka bagay nga wala ko kuntani mahimo kon wala ini. Kag daw ano ang akon pagpasalamat sa realidad sang rebelasyon nga ang kalangitan sa liwat ginbuksan.
Sini nga tuig ang aton ginatutokan sa personal kag pagtuon sa klase amo ang Doktrina kag mga Kasugtanan. Ining “diosnon nga mga rebelasyon kag inspirado nga mga pahayag” magapakamaayo sang tanan nga nagatuon sang mga ini kag nagaakto sa ila diosnon nga mga pagtuytoy. Ginaagda sang mga ini “ang tanan nga katawhan sa bisan diin nga pamatian ang tingug sang Ginuong Jesucristo,”1 kay sa pagkamatuod “ang tingug sang Ginuo nagalab-ot sa tanan nga katawhan” (Doktrina kag mga Kasugtanan 1:2).
Katalagman, Kadulom, Panglimbong
Ang pisikal kag espiritwal nga mga bagyo kabahin sang kabuhi sa kalibutan, subong sang ginpahanumdom sa aton sang pandemya nga COVID-19. Sa tion antes sang Iya Ika-duha nga Pagkari, ang Manluluwas nagtagna sang panahon sang dako nga kapipit-an. Sia nagsiling, “May mga tiggulutom, kag mga peste, kag mga linog sa nagkalainlain nga mga lugar” (Joseph Smith—Mateo 1:29).
Nagadugang sa sinang mga kapipit-an amo ang nagapadayon nga kadulom kag pagpanglimbong sa palibot naton. Sa ginsiling ni Jesus sa iya mga sumulunod, “Ang kalainan magadagsa” antes sang Iya pagbalik (Joseph Smith—Mateo 1:30).
Ginatipon ni Satanas ang iya kasoldadohan kag aktibo nga nagaatake sa buluhaton sang Ginuo kag sa aton nga nagapasakop sini. Tungod sang nagadako nga mga katalagman nga aton ginaatubang, ang aton panginahanglan sang diosnon nga paggiya nangin mas labi pa gid, kag ang aton mga paghimud-os nga mabatian ang tingug ni Jesucristo—ang aton Manugpatunga, Manluluwas, kag Manunubos—nangin mas labi pa gid kakinahanglanon.
Subong sang akon ginhambal pagkatapos nga gintawag ako bilang Pangulo sang Simbahan, ang Ginuo handa sa pagpahayag sang Iya hunahuna sa aton. Isa ina sa Iya pinakadako nga mga bugay sa aton.2
Sa aton panahon, Sia nagpromisa, “Kon magpangayo ka, makabaton ka sang rebelasyon dugang sa rebelasyon, ihibalo dugang sa ihibalo” (Doktrina kag mga Kasugtanan 42:61).
Nakahibalo ako nga pagasabton Niya ang aton mga pagpakitluoy.
Paano Naton Sia Ginapamatian
Ang mahibal-an kon paano ang Espiritu nagahambal importante sa karon nga panahon. Para makabaton sang personal nga rebelasyon, makakita sang mga sabat, kag makabaton sang proteksyon kag direksyon, panumdumon naton ang sulundan nga ginhatag sa aton ni Propetang Joseph Smith.
Una, isubsob naton ang aton mga kaugalingon sa balaan nga mga kasulatan. Ang paghimo sini nagabukas sang aton mga pamensaron kag mga tagipusuon sa mga pinanudlo sang Manluluwas kag sa mga kamatuoran. Ang mga pulong ni Cristo “nagahambal sa [aton] sang tanan nga mga butang nga dapat [naton] himuon” (2 Nefi 32:3), ilabi na sa sining panahon sang kawala kapat-uran kag kagamo.
Dason mangamuyo kita. Ang pangamuyo nagapangayo sang paggiho, gani magapaubos kita sang aton kaugalingon sa atubang sang Dios, mangita sang malinong nga lugar nga pwede naton makadtoan pirme, kag ibubo ang aton mga tagipusuon sa Iya.
Ang Ginuo nagsiling, “Magpalapit sa akon kag magapalapit ako sa inyo; pangitaa ako sing matutum kag makita ninyo ako; magpangayo, kag magabaton kamo; magpanuktok, kag pagabuksan ini sa inyo” (Doktrina kag mga Kasugtanan 88:63).
Ang pagpalapit sa Ginuo nagahatag sang pagpasulhay kag pagpaisog, paglaum kag pag-ayo. Gani, nagapangamuyo kita sa Iya ngalan parte sa aton mga kabalaka kag aton mga kahuyang, aton mga handum kag aton mga pinalangga, aton mga tawag kag aton mga pamangkot.
Dayon mamati kita.
Kon magapabilin kita nga nakaluhod sing makadali pagkatapos sang aton pangamuyo, ang mga panghunahuna, mga balatyagon, kag paggiya magaabot sa aton pamensaron. Ang pagsulat sang sinang mga pagpabatyag magabulig sa aton nga dumdumon ang mga aksyon nga luyag sang Ginuo nga aton himuon.
Kon aton suliton ining proseso, sa mga pulong ni Propetang Joseph Smith, kita “magatubo sa prinsipyo sang rebelasyon.”3
Takus nga Magbaton sang Rebelasyon
Ang paghanas sang aton ikasarang nga makilal-an ang mga paghutik sang Balaan nga Espiritu kag pagpadako sang aton kapasidad nga magbaton sang rebelasyon nagapangayo sang katakos. Ang katakos wala nagapangayo sang kahimpit, apang nagapangayo ini nga magpadayon kita sa dugang nga kaputli.
Ang Ginuo nagapaabot sang adlaw-adlaw nga pagpaninguha, adlaw-adlaw nga pagtin-ad, adlaw-adlaw nga paghinulsol. Ang katakos nagadala sang kaputli, kag ang kaputli nagapabagay sa aton nga makaupod ang Balaan nga Espiritu. Samtang aton ginahimo ang “Balaan nga Espiritu nga [aton] giya” (Doktrina kag mga Kasugtanan 45:57), mangin nagakaangay kita para sa personal nga rebelasyon.
Kon may nagaupang sa aton sa pagbukas sang pwertahan sa langitnon nga paggiya, dapat kita nga maghinulsol. Ang paghinulsol nagatugot sa aton nga buksan ang pwertahan agud aton mabatian ang tingug sang Ginuo sing mas masami kag maathag.
“Ang sulundan klaro,” gintudlo ni Elder David A. Bednar sang Korum sang Dose ka Apostoles. “Kon ang aton ginapensar, ginatan-aw, ginapamatian, ukon ginahimo nagapalayo sa aton sa Balaan nga Espiritu, dapat naton untatan ang pagpamensar, pagtan-aw, pagpamati, ukon paghimo sinang butang. Kon inang bagay nga nagatuyo sa pagpasadya, halimbawa, nagapalayo sa aton sa Balaan nga Espiritu, piho gid nga inang tipo sang kasadyahan indi para sa aton. Bangud ang Espiritu indi makapuyo sa sinang binastos, malaw-ay, ukon di-maugdang, gani maathag nga inang nga butang indi para sa aton.”4
Kon updan naton ang dugang nga kaputli kag pagkamatinumanon sang pagpuasa, maukod nga pagpangita, pagtuon sa balaan nga mga kasulatan kag mga pulong sang buhi nga mga propeta, kag sang buluhaton sa templo kag family history, ang kalangitan magabukas. Ang Ginuo, sa baylo, magatuman sang Iya promisa: “Hatagan ko ikaw sang akon Espiritu nga magapasanag sang imo panghunahuna” (Doktrina kag mga Kasugtanan 11:13).
Mahimo nga kinahanglan naton nga mangin pasensyoso, pero ang Ginuo magapakighambal sa aton sa Iya paagi kag sa Iya ginbuot nga tiyempo.
Isa ka Espiritu sang Paghangop
Si Job nagpahayag, “Apang may espiritu sa tawo: ang ginhawa sang Makaako, nagahatag sa ila sing paghangop” (Job 32:8). Sa sining bag-ong tuig, ginapaisog ko kamo nga maghimo sang kinahanglanon nga mga tikang para mabatian ang Ginuo sing mas maayo kag mas masami agud inyo mabaton ang pagpasanag nga luyag Niya nga ihatag sa inyo.
Antes sang pagtaliwan ni Elder Hales sinang adlaw sang Oktubre 2017, naghanda sia sang malip-ot nga pamulongpulong para sa pangkabilogan nga komperensya nga wala na niya mahatag. Sa sinang pamulongpulong, sia nagsulat, “Ang aton pagtuo nagahanda sa aton nga mangin yara sa presensya sang Ginuo.”5
Kon nagabaton kita sang rebelasyon, nagahinguyang kita sang panahon sa presensya sang Dios samtang Sia nagapahayag sa aton sang Iya panghunahuna, pagbuot, kag tingug sa aton (tan-awa sa Doktrina kag mga Kasugtanan 68:4). Kabay nga ibutang naton ang aton pagtuo sa aksyon, nga nagapanawag sa Iya, nagapangabuhi nga nagakabagay sa Iya ginpromisa nga inspirasyon, kag nagaakto sa giya nga aton ginabaton.
© 2020 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, January 2021. Hiligaynon. 17463 861