“To Taub lub Ntsiab Cai txog Kev Tshwm Sim,” Liahona, Ib Hlis Ntuj 2021
Zaj Lus hauv Liahona Txhua Hli, Ib Hlis Ntuj 2021
Kawm lub Ntsiab Cai txog Kev Tshwm Sim
Kuv xav kom nej ua tej yam nej yuav tsum ua kom mloog tus Tswv zoo dua thiab ntau dua ntxiv nej thiaj li txais tau lub tswv yim uas Nws xav muab rau nej.
Daim duab los ntawm Getty Images
Thaum lub Cuaj Hlis Ntuj hnub tim 30, xyoo 2017, tom qab tuas tav su ntawm lub tuam rooj sab laj, kuv tau mus rau lub tsev kho mob seb kuv tus phooj ywg hauv kuv pawg thwj tim, Txwj Laug Robert D. Hales, nyob li cas. Nws pw hauv lub tsev kho mob tom qab nws lub plawv nres ob peb lub hnub ua ntej.
Wb txoj kev sib tham yeej zoo heev, thiab zoo li nws tab tom zoo me ntsis. Nws ua pa nws tus kheej, uas yog ib lub cim zoo.
Tiam sis hmo ntawd, tus Ntsuj Plig tau hais rau kuv lub siab lub ntsws qhia kuv tias kuv yuav tsum rov qab mus rau lub tsev kho mob thaum hnub Sunday. Nyob hauv tuas Hnub Sunday yav sawv ntxov ntawm lub tuam rooj sab laj, kev tshoov siab ntawd rov qab los. Kuv xav tias kuv yuav tsum tsis txhob noj su thiab mus rau Txwj Laug Hales lub txaj thaum tuas yav sawv ntxov tiav lawm, es kuv twb ua li ntawd.
Thaum kuv tuaj txog, kuv pom tias Txwj Laug Hales yeej tsis xis nyob lawm. Tu siab, nws tau tas sim neej 10 feeb tom qab kuv tuaj txog, tiam sis kuv ua Vajtswv tsaug vim kuv nyob nrog nws tus poj niam, Mary, thiab nkawd ob tug tub thaum nws tso lub ntiaj teb no tseg.
Kuv zoo siab uas tus Vaj Ntsuj Plig Dawb Huv tej lus ntxhi tau tshoov kuv lub siab pab kuv ua ib yam uas kuv ib txwm yuav tsis ua hlo li. Thiab kuv ua Vajtswv tsaug vim muaj kev tshwm sim thiab lub ntuj twb qhib plho lawm.
Xyoo no peb yuav tsom ntsoov rau phau Lus Qhuab Qhia thiab Kev Khi Lus thaum peb kawm ntawm peb tus kheej thiab kawm hauv hoob kawm. “Vajtswv tej kev tshwm sim thiab kev tshaj tawm” no yuav ua rau txhua tus uas kawm thiab ua raws li Nws txib lawv tau koob hmoov. Tej kev tshwm sim no caw “neeg sawv daws nyob txhua qhov chaw kom mloog tus Tswv Yexus Khetos lub suab,”1 vim “us Tswv lub suab yeej yog hais tseeb rau tag nrho txhua tus neeg” (Lus Qhuab Qhia thiab Kev Khi Lus 1:2).
Qhov Txaus Ntshai, Kev Tsaus Ntuj, Kev Dag Ntxias
Tej teeb meem ntawm sab cev nqaij daim tawv thiab sab ntsuj plig nyob hauv lub ntiaj teb no yeej yog ib feem ntawm peb lub neej, xws li peb pom los ntawm phaum mob COVID-19. Hais txog lub sij hawm ua ntej Nws txoj Kev Los Zaum Ob, tus Cawm Seej tau hais tias yuav muaj tej kev ntxhov siab txhawj xeeb loj heev. Nws tau hais tias, “Yuav muaj kev tshaib kev nqhis thiab av yuav qeeg txhua qhov” (Joseph Smith—Mathais 1:29).
Nrog rau tej kev tsim txom li no yog kev tsaus ntuj thiab kev dag ntxias uas loj zuj zus nyob ib puag ncig. Ib yam li Yexus tau qhia Nws cov thwj tim, “kev ua phem yuav muaj ntau ntau” ua ntej Nws cov qab los (Joseph Smith—Mathais 1:30).
Dab Ntxwg Nyoog tau muab nws pawg tub rog koom ua ke thiab nws tawm tsam tus Tswv txoj hauj lwm thiab peb cov uas ua txoj hauj lwm ntawd. Vim peb muaj tej xwm txheej ntau zuj zus, peb haj yam xav tau Vajtswv txoj kev coj, thiab peb yeej yuav tsum siv zog xav mloog Yexus Khetos lub suab—peb tus Neeg Nruab Nrab, tus Cawm Seej, thiab tus Txhiv Dim.
Ib yam li kuv tau hais tsis ntev tom qab kuv raug hu los ua tus Thawj Tswj Hwm ntawm lub Koom Txoos, tus Tswv yeej xav qhia Nws lub tswv yim rau peb. Qhov ntawd yog ib txoj koob hmoov zoo kawg nkaus uas Nws foom pub rau peb.2
Nyob hauv peb lub caij nyoog, Nws tau cog lus tias, “Yog hais tias nej thov, nej yuav tau txais kev tshwm sim ntxiv rau kev tshwm sim, kev txawj ntse ntxiv rau kev txawj ntse” (Lus Qhuab Qhia thiab Kev Khi Lus 42:61).
Kuv paub tias Nws yuav teb peb tej lus thov.
Peb Mloog Nws Hais Li Cas
Peb yuav tsum paub tus Ntsuj Plig qhia peb li cas. Yog peb xav txais kev tshwm sim, xav paub qhov tseeb, thiab txais kev pov hwm thiab kev qhia, peb yuav tsum nco txog tus yam ntxwv uas tus Yaj Saub Joseph Smith tau qhia rau peb.
Qhov thib ib, peb yuav tsum nyeem cov vaj lug kub ntau. Thaum peb ua li ntawd ces peb muab peb lub siab qhib rau tus Cawm Seej tej lus qhia thiab tej lus tseeb. Khetos tej lus “qhia [peb] txhua yam uas [peb] yuav tsum ua” (2 Nifais 32:3), qhov tseem ceeb yog nyob hauv lub caij nyoog ntxhov siab no.
Tom qab ntawd peb thov Vajtswv. Peb yuav tsum muab siab xav thov, yog li ntawd peb txo hwj chim rau Vajtswv, nrhiav ib qho chaw ntsiag to rau peb nyob tau, thiab thov Nws kawg siab kawg ntsws.
Tus Tswv hais tias, “Txav los nyob ze kuv ces kuv yuav txav los nyob ze nej; rau siab ntso nrhiav kuv ces nej yuav ntsib kuv; thov, ces nej yuav tau txais; khob, ces yuav qhib rau nej” (Lus Qhuab Qhia thiab Kev Khi Lus 88:63).
Thaum peb txav los nyob ze tus Tswv ces ua rau peb txais kev nplij siab thiab kev txhawb nqa, kev cia siab thiab kev kho mob. Yog li ntawd, peb thov Vajtswv los ntawm Nws lub npe txog peb tej kev txhawj xeeb thiab peb tej kev qaug zog, peb tej kev xav thiab cov uas peb hlub, peb txoj kev hu thiab peb tej lus nug.
Ces peb mloog zoo.
Yog peb yuav txhos caug ntev zog tom qab peb thov Vajtswv tas, ceg tej kev xav thiab tej kev tshoov siab yuav nkag hauv peb lub siab. Yog peb teev ntawv txog tej kev tshoov siab ntawd ces yuav pab peb nco qab txog tej yam uas tus Tswv xav kom peb ua.
Thaum peb rov qab ua tus txheej txheem no ces peb yuav ua raws li tus Yaj Saub Joseph Smith, “yuav to taub lub ntsiab cai txog kev tshwm sim.”3
Tsim Nyog Txais Kev Tshwm Sim
Thaum peb haj yam txawj mloog tus Vaj Ntsuj Plig Dawb Huv tej kev ntxhi lus thiab txawj txais kev tshwm sim ces peb yuav tsum ua neeg tsim nyog. Kev tsim nyog tsis yog kev ua zoo tag nrho, tiam sis peb yuav tsum siv zog xav ua neeg dawb huv ntxiv.
Tus Tswv xav kom peb siv zog txhua hnub, ua zoo dua txhua hnub, hloov siab lees txim txhua hnub. Kev tsim nyog ua rau peb ua neeg dawb huv, thiab kev ua neeg dawb huv ua rau peb tsim nyog muaj tus Vaj Ntsuj Plig Dawb Huv. Thaum peb “cia tus Vaj Ntsuj Plig Dawb Huv ua [peb] tus coj kev” (Lus Qhuab Qhia thiab Kev Khi Lus 45:57), peb tsim nyog txais kev tshwm sim.
Yog muaj ib yam dab tsi tab kaum peb txoj kev qhib lub qhov rooj mus saum ntuj ceeg tsheej, tej zaum peb yuav tsum hloov siab lees txim. Kev hloov siab lees txim ua rau peb muaj peev xwm qhib lub qhov rooj rau oeb peb mloog tus Tswv lub suab ntau ntxiv thiab meej ntxiv.
“Txoj kev cai yeej meej heev,” Txwj Laug David A. Bednar los ntawm Pawg Kaum Ob tug Thwj Tim tau qhia. “Yog ib qho uas peb xav, pom, ua, los sis mloog ua rau peb tsis nyob ze tus Vaj Ntsuj Plig Dawb Huv, ces yuav tsum tsis txhob xav, pom, ua los sis mloog qhov ntawd. Ua piv txwv hais tias, yog tias muaj kev lom zem uas ua rau peb raug cais tawm ntawm tus Vaj Ntsuj Plig Dawb Huv, ces kev lom zem ntawd yeej tsis zoo rau peb. Vim tus Ntsuj Plig nyob tsis taus thaum muaj tej yam uas qias neeg, phem, los sis tsis tsim txiaj, ces tej yam zoo li ntawd yeej tsis zoo rau peb.”4
Thaum twg peb muab kev dawb huv thiab kev mloog lus koom ua ke nrog kev yoo mov, kev rau siab nrhiav, kev kawm vaj lug kub thiab cov yaj saub tej lus qhia, thiab ua hauj lwm hauv lub tuam tsev thiab nrhiav tsev neeg zaj keeb kwm, ces lub ntuj yuav qhib plho. Ces tus Tswv yuav ua raws li Nws tau cog lus tseg hais tias: “Kuv yuav cia kuv tus Ntsuj Plig los rau koj, tus uas yuav ua kom koj lub siab to taub, tus uas yuav ua kom koj tus ntsuj plig muaj txoj kev xyiv fab puv npo” (Lus Qhuab Qhia thiab Kev Khi Lus 11:13).
Tej zaum peb yuav tsum ua siab ntev, tiam sis Vajtswv yuav hais lus rau peb raws li Nws txoj kev thiab Nws lub sij hawm.
Tus Ntsuj Plig uas Pab Peb To Taub
Yauj hais tias, “Yog Vajtswv tus uas muaj hwj chim loj kawg nkaus tus ntsuj plig los kav neeg lub siab thiab pub tswv yim rau neeg xwb” (Yauj 32:8). Xyoo tshiab no, kuv xav kom nej ua tej yam nej yuav tsum ua kom mloog tus Tswv zoo dua thiab ntau dua ntxiv nej thiaj li txais tau lub tswv yim uas Nws xav muab rau nej.
Ua ntej Txwj Laug Hales tas sim neej no thaum lub Kaum Hli Ntuj xyoo 2017, nws tau npaj ib zaj lus uas nws tsis muaj cib fim hais nyob hauv lub tuam rooj sab laj. Nyob hauv zaj lus ntawd, nws tau sau hais tias, “Peb txoj kev ntseeg ua rau peb npaj nyob nrog tus Tswv.”5
Thaum peb txais kev tshwm sim, peb siv sij hawm nrog Vajtswv nyob thaum Nws qhia Nws lub siab nyiam, thiab Nws lub suab rau peb (saib Lus Qhuab Qhia thiab Kev Khi Lus 68:4). Thov kom peb yuav muab siab rau ntseeg, thov Nws, ua neej tsim nyog txais tej kev tshoov siab uas Nws cog lus rau peb, thiab ua raws li txoj kev coj uas peb txais tau.
© 2020 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Monthly Liahona Message, January 2021. Hmong 17463 295