“Dumur-as iti Pagbatayan ti Paltiing,” Liahona, Enero 2021
Mensahe ti Binulan a Liahona , Enero 2021
Dumur-as iti Pagbatayan ti Paltiing
Allukoyenkayo a mangaramid kadagiti kasapulan nga addang a dumngeg iti Apo a nasaysayaat ken masansansan tapno maawatyo ti pannakalawlawag a kayatna nga ited kadakayo.
Dagiti Panangiladawan manipud iti Getty Images
Idi Septiembre 30, 2017, kalpasan ti sesion iti malem ti sapasap a komperensia, napanak iti ospital tapno kitaek ti ay-ayatek a miembro ti korumko a ni Elder Robert D. Hales. Nayospital isuna nanipud pay idi nagsagsagaba iti pannakaatake ti puso iti immun-una a sumagmamano nga aldaw.
Maysa a naragsak ti isasarungkarmi, ken kasla simmayaat ti kasasaadna. Umang-anges payen a bukbukodna, a daytoy ti nasayaat a pagilasinan.
Nupay kasta, iti dayta a rabii, tinignay ti Espiritu ti pusok ken panunotko a nasken nga agsubliak iti ospital iti Domingo. Kabayatan ti sesion iti bigat ti Domingo ti sapasap a komperensia, nagsubli dayta napigsa a parikna. Nariknak a nasken a laktawak ti pangngaldaw ket alistuak ti mapan iti sibay ni Elder Hales apaman a malpas ti sesion iti bigat, nga isu ti inaramidko.
Idi simmangpetak, makitak ni Elder Hales a serioso nga agturongen iti dakdakes a kasasaadna. Nakaladladingit, pimmusay isuna 10 a minuto kalpasan a nakasangpetak, ngem ti pagyamyamanak ta addaak iti sibayna a kaduak ti naayat nga asawana a ni Mary ken dagiti dua a lallaki nga anakda idi pumanaw iti daytoy a biag.
Agyamanak ta tinignaynak ti arasaas ti Espiritu Santo nga agaramid iti maysa a banag a mabalin a saanko koma a naaramid. Ketn agyamanak iti kinapudno ti paltiing ken nakalukat manen dagiti langit.
Iti daytoy a tawen ti pokustayo para iti panagadal iti bukod ken iti siled ti klase ket ti Doktrina ken Katulagan. Dagitoy “nadiosan a paltiing ken dagiti pammaregta a palawag” ket mabalin a mangbendision iti amin nga agadal kadagitoy ken agtignay a mayannurot kadagiti nadiosan a panangiturongda. Awisenda ti “amin a tao iti amin a lugar tapno dumngeg iti timek ti Apo a ni Jesucristo,”1 ta pudno nga “agpaay iti amin a tao ti timek ti Apo” (Doktrina ken Katulagan 1:2).
Peggad, Sipnget, Panangallilaw
Dagiti pisikal ken naespirituan a didigra ket paset ti biag iti lubong, a kas impalagip kadatayo ti COVID-19 pandemic. Ti panawen sakbay ti Maikadua a Yaayna, impadles ti Mangisalakan ti aldaw ti nakaro a panagrigat. Kinunana, “Addanto bisin, ken angol, ken ginggined, iti nadumaduma a lugar” (Joseph Smith—Mateo 1:29).
Ti namagbalin a narigrigat iti kasta a panagtutuok ket dumakdakkel a sipnget ken panangallilaw a nanglawlaw kadatayo. Kas iti imbaga ni Jesus kadagiti disipulona, “Aglablabesto ti kinamanagbasol” sakbay ti panagsublina (Joseph Smith—Mateo 1:30).
Inummong ni Satanas dagiti buyotna ket nakarungrungsotda a mangsuppiat iti aramid ti Apo ken dagiti makiraman iti daytoy. Gapu iti dumakdakkel a pagpeggadan a pakaipasanguantayo, saan iti kaano man a dakdakkel ti pagkasapulantayo iti nadiosan a pannarabay , ken ti panagkagumaantayo a dumngeg iti timek ni Jesucristo—ti Mangibabaet, ti Mangisalakan, ken ti Mannubbottayo—ket di kaano man ad-dda a kasapulan.
Kas nasaok idi nabiitak pay a naawagan a kas Presidente ti Simbaan, nakasagana nga ipalgak ti Apo ti panunotna kadatayo. Dayta ti maysa kadagiti kaindaklanan a bendisionna kadatayo.2
Iti panawentayo, inkarina a, “No agdawatkayo, umawatkayo iti paltiing kada paltiing, pagsiriban kada pagsiriban” (Doktrina ken Katulagan 42: 61).
Ammok a sungbatanna dagiti ar-ararawtayo.
No Kasano a Dumngegtayo Kenkuana
Napateg ita ti panangammo no kasano nga agsarita ti Espiritu. Tapno umawat iti bukod a paltiing, tapno mangsarak kadagiti sungbat, ken tapno umawat iti pannakasalaknib ken pangiturong, lagipentayo ti pagtuladan nga intuding kadatayo ni Propeta Joseph Smith.
Umuna, iraremtayo ti bagbagitayo kadagiti nasantuan a kasuratan. Iti panangaramid iti kasta ket manglukat iti pampanunot ken puspusotayo kadagiiti pannursuro ti Mangisalakan ken kinapudno. Dagiti balikas ni Cristo “ibagana [kadatayo] dagiti amin a banag a rumbeng nga aramiden[tayo]” (2 Nephi 32:3), nangnangruna kadagitoy nga aldaw ti panagduadua ken panagbalbaliw.
Sumaruno agkararagtayo. Agkasapulan ti kararag iti bukod a panagtullugod, isu nga ipakumbabatayo ti bagbagitayo iti sango ti Dios, mangsarak iti naulimek a lugar a mabalintayo a kanayon a papanan, ken ibukboktayo dagiti puspusotayo Kenkuana.
Kuna ti Apo, “Umasidegkayo kaniak ket umasidegakto kadakayo; sapulendak a sireregta ket masapulandakto; agdawatkayo, ket umawatkayonto; agtuktokkayo, ket malukatankayto” (Doktrina ken Katulagan 88:63).
Ti yaasideg iti Apo ket mangisangbay iti pannakaliwliwa ken pannakaparegta, namnama ken pannakaagas. Ngarud, agkararagtayo iti naganna maipapan kadagiti pagdanagantayo ken pagkapsutantayo, panaggagartayo ken ipatpategtayo, takemtayo ken saludsodtayo.
Kalpasanna dumngegtayo.
No agtalinaedtayto a nakaparintumeng iti apagbiit kalpasan a malpastayo ti kararagtayo, umayto iti isiptayo dagiti pampanunot, marikrikna, ken direksion. Ti panangisurat kadagita nga impresion ket tulongannatayonto a manglaglagip no ania dagiti tignay a kayat ti Apo nga aramidentayo.
Bayat ti panangulittayo iti daytoy a proseso, datayonto ket, “dumur-as iti pagbatayan ti paltiing” kas insao ni Propeta Joseph Smith.3
Maikari nga Umawat iti Paltiing
Ti panangpasayaat iti kabaelantayo a mangilasin kadagiti arasaas ti Espiritu Santo ken mangpadakkel iti kapasidad nga umawat iti paltiing ket agkasapulan iti pannakaikari. Ti pannakaikari ket saan nga agkasapulan iti kinaperpekto, ngem agkasapulan iti panagkagumaan para iti ad-adu a kinatarnaw.
Namnamaen ti Apo iti inaldaw a panagkagumaan, inaldaw a panagdur-as, inaldaw a panagbabawi. Mangisangbay ti pannakaikari iti kinatarnaw, ken ti kinatarnaw ti mangpaikari kadatayo para iti Espiritu Santo. No awatentayo “ti Nasantuan nga Espiritu a bagnos[tayo]” (Doktrina ken Katulagan 45:57), maikaritayo para iti bukod a paltiing.
No pagsardengennatayo ti maysa a banag iti pananglukat iti ridaw iti nailangitan a panangiturong, mabalin a kasapulantayo ti agbabawi. Ti panagbabawi ti mangpalugod kadatayo a manglukat iti ridaw tapno mangngegtayo ti timek ti Apo a masansansan ken nalawlawag.
“Nalawag ti pagrukodan,” insuro ni Elder David A. Bednar ti Korum dagiti Sangapulo-ket-dua nga Apostol. “No ti maysa a banag nga intay pampanunoten, dengdenggen, wenno ar-aramiden ket iyadayonatayo manipud iti Espiritu Santo, kalpasanna nasken nga isardengtayon a panunoten, kitaen, denggen, wenno aramiden dayta a banag. No dayta a naisangrat a pagaliwaksayan, kas pagarigan, ket mangyadayo kadatayo iti Nasantuan nga Espiritu, ngarud awan duadua a dayta a kita ti pagaliwaksayan ket saan a para kadatayo. Gapu ta ti Espiritu ket saan a makapagtalinaed iti bulgar, narusanger, wenno saan a disente, ngarud nalawag a dagita a banag ket saan a para kadatayo.”4
No laokantayo ti dakdakkel a kinatarnaw ken panagtulnog iti panagayuno, napasnek a panagsukisok, panagadal kadagiti nasantuan a kasuratan ken dagiti balikas dagiti sibibiag a propeta, ken aramid iti templo ken family history, aglukatto dagiti langit. Ti Apo, kas supapak, tungpalennanto dagiti karina: “Itdekto kenka ti Espirituk, a mangpalawag iti panunotmo” (Doktrina ken Katulagan 11:13).
Mabalin a kasapulam ti agan-anus, ngem kasaonatayonto ti Dios iti bukodna a wagas ken iti bukodna a panawen.
Ti Espiritu ti Pannakaawat
Impakdaar ni Job, “Adda maysa nga espiritu iti tao: ket ti pammaregta ti Mannakabalin ikkanna ida ti pannakaawat” (Job 32:8). Iti daytoy baro a tawen, allukoyenkayo a mangaramid kadagiti kasapulan nga addang tapno nasaysayaat ken masansansan a dumngeg iti Apo ken tapno maawatyo ti pannakalawlawag a kayatna nga ited kadakayo.
Sakbay ti ipupusay ni Elder Hales iti dayta nga aldaw ti Oktubre 2017, nangisagana iti ababa a mensahe iti sapasap a komperensia a saanna a naited. Iti dayta a mensahe, insuratna, “Ti pammatitayo ti mangisagana kadatayo nga adda iti imatang ti Apo.”5
No umawattayo iti paltiing, mangbubostayo iti oras iti imatang ti Dios kabayatan ti panagipalgakna ti panunotna, ti pagayatanna, ken timekna kadatayo (kitaen iti Doktrina ken Katulagan 68:4). Usarentayo koma ti pammatitayo iti aramid, umararaw Kenkuana, agbiagtayo a maikari iti naikaria pammaregtana, ken agtignay iti pannarabay a maawattayo.
© 2020 ti Intellectual Reserve, Inc. All rights received. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, January 2021. Ilokano. 17463 864