“Kapwack lun Mwe Lutlut ke Fwackyuhk,” Liahona, Jacnwacri 2021
Mahlwem nuhkwewa Liahona Message, January 2021
Kapwack lun Mwe lutlut ke Fwackyuhk
Nga pahtok kom in eis step ma fal kom in eis in lohngohl Leum wo liki met ah ac pacl puhkantwen kom in muh kuh in eis kahlwem ma El ke usot nuh sum.
Petsac an sin Getty Images
Ke September 30, 2017, tukun miting ke toeni luhlahp ke tacfuhlwacn tok tari, Nga tui ke lohm ono ah in liye mempuhr ke quorum sacohk se Elder Robert D. Hales. El muhta ke lohm ono ke lwen ekahsr tari ah ma ke misen art lal.
Muhtwacta ses lasr ah arulacna wo, ac el muhtwacwacack in kwelac. El sifacna momong, suc pa akucl wowo se pa inge.
Ke ekuh sac, tuhsruhktuh, Nguhn sramsram nuh insiyuhk ac nuhnak luhk uh fahk lah nga enenuh in fohlohklac nuhke lohm ono ah ke Sacnri. Ke pacl se ma miting ke toeni luhlahp ke Sacnri ah orek ah, nuhnak sac fohlohk fokoko. Nga puhla lah nga enenuh in tiac mongo infulwacn lwen ac silahklahk na som nuh yohrohl Elder Hales ke pacl se na sahflah miting sac, suc pa nga oruh ah.
Ke nga sun acn we ah, Nga kuh in liye lah upaclah mas lal Elder Hales uh. Suhpwacriyac uh, minit 10 tukun nga sun acn we el misac, tuh nga kuloh lah nga kuh in muhta siskacl wi muhtwacn kiacl, Mary, ac tuhlihk mukul luo nahtuhlos, ke el som liki moul se inge ah.
Fuhkah luhpan kuloh luhk ke mahmah luhn Nguhn Muhtahl kol yuc in oruh sie ma ma nga e kuh in tiacna orwaclh Ac fuhkah luhpan kuloh luhk ke pwacyeiacn fwackyuhk ac inkuhsrao sifilpac ikacklah.
Yac se inge ma kuht e lohacng yohk ke lutlut lasr sifacna ac lun kuhlahs pa Doctrine and Covenants. “Fwackyuhk muhtahl inge ac mwe fahkwack wowo” kuh in ahkinsewowoye nohfohn mwet maa lutlut kac ac orekma nuhke kolyuhk muhtahl lalos. Elos suli “nohfohn mwet ke yen nuhkwewa in lohng puhsrwacl Leum Jisus Kraist,”1 ke srihpen “puhsrwacl Leum el ma nuh sin mwet nuhkwewa” (Doctrine and Covenants 1:2).
Sensen, Lohsr, Kikiacp
Mwe sruhf nuhke mahno ac nguhn ipin moul fin facluh, oacna ke COVID-19 pandemic el ahkacsmakihnye kuht kac. Ke pacl met liki Tuhkuh Ahkluo lal, Mwet in Molwelah el palyei ke ma upac luhlahp. El fahk, “E fah asr srwacl, ma orahkrahk koluk, ac kusrusrsruhsr, ke kain in acn” (Joseph Smith—Matthew 1:29).
Ma ahkyohkyelihk ma upac inge pa lohsr ac kikiacp ma rauni kuhtlac. Oacna ke Jisus el fahk nuh sin mwet tuhma lutlut Lal, “Ma koluk e upaclah” met liki fohlohk Lal (Joseph Smith—Matthew 1:30).
Setuhn el ahkolah kuh lal ac ahngyahng lal in lain orekma luhn Leum ac mwet ma wi orekma lal. Ke srihpen ma sensen ma kuht puhlakihn inge, enenuh lasr nuhke kolyuhk muhtahl arulacna yohk, ac orekma lasr in lohng puhsrwacsr Jisus Kraist—Mwet Tuhtahf lasr, Mwet Molwelah lasr, ac Mwet in Iwaclah lasr—arulacna elyah tiacna oacna met ah.
Oacna ke nga fahk tuhfahna tari ah tukun pahng nga in ekihn Prestuhn luhn Alu uh, Leum el ahkolah in ahkkahlwemye nuhnak Lal nuh sesr. Pa inge sie mwe insewowo na yohk Lal nuh sesr.2
Ke pacl lasr uh, El olwelah muh, “Fin kom siyuhk, kom e fah eis fwackyuhk nuhke fwackyuhk, lahlmwetmwet nuhke lahkmwetmwet”(Doctrine and Covenants 42:61).
Nga etuh lah Elac fah topuk siyuhk lasr.
Kuht Lohngohl Fuhkah
In etuh lah Nguhn el sramsram fuhkah yohk srihpac misenge. In eis fwackyuhk lasr sifacna, in sokwack top, ac in eis karihngihnyuhk ac kolyuhk, kuht esam pactuhn se Joseph Smith el oakiyac nuh sesr ah.
Ma se met, kuht sang kwewa lohacng lasr uh nuhke ma suhmuhslah. Fin kuht oruh na nuhnak lasr ac insiyacsr e ikacklah nuhke mwe lutlut lal Mwet in Molwelah ac ma pwacye. Kahs luhn Kraist “fahk [nuh sesr] nohfohn ma [kuht] enenuh in oruh” (2 Nephi 32:3), finne nuhke lwen in tahfuh luo ac fohs.
Tohkoh kuht pruhe. Pruhe el enenuh lwemlwem, pwacnwacng kuht ahkpuhsisaclye kuht sifacna ye muhtahl God, sokwack sie acn mihs ma kuht kuh in som nuhke ke pacl nuhkwewa, ac fahklah kwewa insiyacsr nuh Sel.
El fahk lah kuht enenuh in fototoi nuh Sel ac El ac fototoi nuh sesr; kuht enenuh in oaru in Sokol ac kuht ac Konwaclwack; kuht enenuh siyuck ac kuht ac eis; kuht enenuh tongtong ac El ac ikucslah nuh sesr (liye Doctrine and Covenants 88:63).
Fototoyang nuh sin Leum use ahkkweye ac pahtokyuhk, finsrak ac onweyuhk. Pwacnwacng, kuht pruhe ke Inel ke elyah lasr ac muhnahs lasr, kena lasr ac sucu lasr, ma kunacsr ac kihsensiyuhk lasr.
Na kuht lohng.
Fin kuht sikuhkmuhtuhntei paht tukun kuht tari ke pruhe lasr, nuhnak, puhla, ac kolyuhk e fah tuhkuh nuhke nuhnak lasr uh. Suhmuhslah nuhnak inge e fah kahsrwe kuht in esam lah mukwikwi fuhkah Leum el ke kuht in oruh.
Ke kuht kalweni ohiyac se inge uh, kuht e fah, ke kahs luhn Mwet Pahluh Joseph Smith, “kapwack lun mwe lutlut ke fwackyuhk.”3
Nwacsnwacs in Eis Fwackyuhk
Ahkwoyelah kuh lasr in akihlen mahmah luhn Nguhn Muhtahl ac ahkyohkye luhpan kuh lasr in eis fwackyuhk enenuh nwacsnwacs. Nwacsnwacs tiacna enenuh in wo na pwacye, tuhsruhk el enenuh kuht in kampare in yohkwelihk nwacsnwacs lasr.
Leum el ke orekma upac ke lwen nuhkwewa, wolac ke lwen nuhkwewa, auliyak ke lwen nuhkwewa. Nwacsnwacs use ma wo, ac ma wo el oruh kom in fal nuhke Nguhn Muhtahl. Ke kuht eis “Nguhn Muhtahl in mwe kol [lasr]” (Doctrine and Covenants 45:57), kuht fal in eis fwackyuhk lasr sifacna.
Fin asr ma se tulokihn kuht in ikuhslah sruhnguhl nuhke acn inkuhsrao asr we, kuht enenuh in auliyak. Auliyak el lwelah kuht in ikuhslah sruhnguhl ah kuht in muh kuh in lohng puhsrwen Leum in fusus ac kahlwem.
“Akwuck se inge kahlwem,” Elder David A. Bednar ke Luo luhn Mwet Sap Singucul Luo ah luti. “Fin ma se kuht nuhnkuh, liye, lohng, kuh oruh ahkloesyaclihk inmahsrlosr sin Nguhn Muhtahl, na kuht enenuh in tui ke nuhnkuh, liye, lohng, kuh oruh ma se ingacn. Fin ma se ingacn ma orek in ahkpwacrye, fin pa, oruh kuht loesuhlihk liki Nguhn Muhtahl, na atacn mwe ahkpwacr se ingacn tiac ma nuh sesr. Ke srihpen Nguhn se inge tiac kuh in muhta wi ma suc koluk, suhlallacl, kuh tiac nwacsnwacs, na arulacna kahlwem lah ma inge tiacna ma nuh sesr.”4
Ke kuht ahkyohkyelihk nwacsnwacs ac ahkostwen wi lalo, oaru in suk, lutlut ke ma suhmuhslah ac kahs luhn mwet pahluh moul, ac orekma ke tempuhl ac tahk sucu lasr, inkuhsrao efah ikacklah. In fohlohkihn, Leum, elac fah ahkfahsryelah olwelah lal: “Nga e fah usot nuh sum Nguhn luhk, suc e fah ahkkahlwemye nuhnak lom” (Doctrine and Covenants 11:13).
Kuht enenuh in muhtweng, tuhsruhk God elac sramsram nuh sesr ke atac Lal sifacna ac ke pacl Lal sifacna.
Sie Nguhn in Kahlwem
Job el fahk, “Asr nguhn se ke mwet uh: ac mokleyuhk luhn God Kuhlacna sang nuh selos kahlwem” (Job 32:8). Ke yac sasuc se inge, nga pahtok kom in eis step ma fal in lohngohl Leum wo liki met ah ac pohs liki met ah kom in muh kuh in eis kahlwem se ma El ke usot nuh sum uh.
Met liki misac lal Elder Hales ke lwen se ingacn ke Ohktopa 2017 ah, el ahkolah sramsram fototo se nuhke toeni luhlahp se ma el tiac kuh in orwaclah. Ke sramsram sac, el suhmuhslah, “Luhlahlfongi lasr ahkwe kuht in tu ye muhtahl Leum.”5
Ke kuht eis fwackyuhk uh, kuht eis pacl lasr in muhta ye muhtuhn God ke el ahkkahlwemye nuhnak Lal, luhngse lal, ac puhsrwacl nuh sesr uh (liye Doctrine and Covenants 68:4). Lwelah kuht in fihliyac luhlahlfongi lasr nuhke orekma, pahng nuh sel, moul in nwacsnwacs nuhke mokleyuhk el olwelah, ac mukwikwi nuhke kolyuhk kuh eis uh.
© 2020 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng nuhke Mahlwem nuhkwewa Liahona Sramsram, January 2021. Language. 17463 000