“Mukeroul el ngara Osisechakl er a Ocholt,” Liahona, Kot el buil 2021
Bek el Buil Liahona Klumech, Kot el buil 2021
Mukeroul el ngara Osisechakl er a Ocholt
A ku meksemeriar er kemiu me bo momes a ungil rorel e bo mungil rongesii a Rubak el di blechoel mel bol sebechem el ngmai a llomes el Ngii a soal lomeskau.
Siasing el mlengai er a Getty Images
Sera September 30, 2017, ruriul er sel klou el ongdibel er a iieta sils, e ak mlo ra osbitar el mo omes er a betik ra rengud el chedal a quorum el Elder Robert D. Hales. Ng mlo niuing er sera bol secher el mle heart attack er a sesei el sils ruchei.
Ng mle ungil odngelam, e ngii a kora milrael mo ungil. E bai di mle ngii el sebechel louteliil, tia a mle ungil lolangch.
Engdi, sel kesus, ea Chedaol Reng a milngedecheduch er a renguk el kmo ng kirek el lmuut el mora osbitar er a Sandei. Seikid el klou el ongdibel er a tutau er a Sandei, eng liluut el merngak a mesisiich lomelchesiu. El kirek el oitii a suelbek e mereched el mo mes ra Elder Hales sel bol merek tial ongdibel ra tutau, meng mlo uaisei.
Sera kbong, e ak milsa Elder Hales el merael mo mechitechut. Mekngit a rengud, leng mlad ruriul er a teruich el bung er a kbong, engdi ngungil a renguk le ak mlara bita er a bechil, ra Mary me a reteru er a rengelekir sechal er a bochal dibus er tial klengar.
Ak mereng a saul er a omengelulau er a Chedaol Reng el uldbechak el mo rulii a kmong ngerang el diak el sebechel el di ngak el mesang. E mereng a saul el kirel a meral ngarngii el ocholt me a babeluades a mla lmuut el obok.
Chelechal rak ea omesubel a derta el chad me a klass a mo chemau a omesubel a Doctrine and Covenants. A ikal “chedaol locholt me a mlukrael el tekoi” a sebechel lomekngeltengat er a rokui el tir a mesuub er ngii e meruul a ikel chedaol tekoi ra chelsel. A ikang a oleker er a “rokui el chad er a ngii di el ker el mo orrenges er a ngerel a Rubak el Jesus Kristo,”1 ng kle merang el ngerel a Rubak a mora rokui el chad(Doctrine and Covenants 1:2).
Kengaol, Ilkolk, Mengebirukl
A ringelel a bedenged me a reng a tebedechel tial klengar re beluulechad, el diua COVOD-19 el secher el ngii a mla mekletkid. Ruchei er a Ongerul Lemei, e a Osobel e mle omlaoch a sils er a betok el ongarm. Ng dilu el kmo “Ng mo er ngii a bosech, meringel rakt, desiu, ra bek bedengel a basio” (Joseph Smith—Mateus 1:29).
Oldekial a ikal ringel a merael mo klou el ilkolk me a chelbirukl el iliuekl er kid. A Rubak a dilu er a roltirakl er ngii, “A klengit a mo imis” ruchei er sel Lemei (Joseph Smith—Mateus 1:30).
A Diablong a mla toketek a klisichel e oldechelakl lomtok er a Rubak me a kid el loureor er a chelsel. E le a uchul a merael mo betok el kengaol tekoi a bo de chebangel, e a ulsbechelled er a chedaol lomekrael a dirkak a tang mel sal el klou a belkul, e ma blakelreng er kid el mo orrenges er a ngerel a Jesus Kristo—el Mesebechakl, Osobel, e Osebeled—e dirkak a tang mel sal klou a belkul ra uai chelechang.
Uai kel kulekoi ruriul er a kmokedong el President er a Ikelesia, a Rubak a kldmokl el mo olecholt er a Uldeseuel el mer er kid. Tiang a tara ikel ngarbab el klengeltengat er Ngii el me er kid.2
Tia el sils el de ngarngii, e Ngii a yaksok el kmo alsekum koker, e kau e mo ngmai a ocholt, el chachisois, ma klemedengei el chachisois (Doctrine and Covenants 42:61).
Ak medengei el kmo Ngii a mo onger a ongtid.
Ke de mekerang a Dorrenges er Ngii
A meduch lorrenges er a Chedaol Reng a longedecheduch a kmal ulsbechall er chelechal sils. Sel bo dolai ocholt le mera derta er kid, e melai a nger, e nguu a omesebechakl me a ulekrael, e ke de dobedebekii sel ngii a teletelel el Profet Joseph Smith a kildmeklii el merkid.
A kot, e kede mo dmolech omesubed er a chedaol llechukl. Sel doruul er tiang eng mok a uldesued me a rengud el mora klemerang er a osisecheklel a Osobel. A tekingel a Kristo a “molecholt er [kid] a rokui el tekoi el [kid] a kired el meruul” (2 Nephi 32:3), tokuni, aikal sils el mui er a raureng me a uldikel.
Ongerung e kede meluluuch. A nglunguuch a kirel blak a rengud er ngii, meng kired el ngmai a rengud el meriou er a uchei er a Dios, e mora chellelakl el basio el sebeched el blechoel el mo er ngii, e otobed a rokui el ngara rengud el mo er Ngii.
A Rubak a dilu el kmo bem keed er ngak me bo keed er kau; bol blak a rengum losiik er ngak me bo betik er ngak; molengit, me bo mngai; molengod me lobok a chesimer el kirem (Doctrine and Covenants 88:63).
A mo kmeed er a Rubak a meskid a ongelaod me a duchelreng, urunguled me a omekungil. Maleuaisei, e kede meluluuch el ngara Ngklel el kirel a desimbai me a chelitechetud, aikel ngara rengud me a re betik ra rengud, ngercheled ra ikelesia me a kerid.
E okor e orrenges.
Alsekum me kede outubaruach el telkib sel bode merek el meluluuch, e a uldasu, domelchesiu, me a ulekrael a mei er a uldesued. A meluches a ikal merkid el tekoi a mo ngosukid el dobedebek a omeruul el Rubak a soal a bo doruul.
Sel domelekl er tial omeruul, e sel nguu er a tekingel a Profet, e kid a mo, “a mukeroul el ngara osisecheklel a ocholt.”3
Klikiid el mo Melai a Ocholt
Melisiich er a duch er kid el dongchii Chedaol Reng a longedecheduch e mengisois er a techelled el mo ngmai a ocholt a kired el mo klikiid. A klikiid a diak el kired el kmal cherrungel, ng bai kired el melasem el merael el mo mechellings a rengud.
A Rubak a mengerchir er kid el di oureor el kirel er a bek el sils, e bek el sils el dorael mo ungil, bek el sils el douchel a rengud. A Klikiid a meskid a mechellings el reng, a mechellings el reng a ngoikid el mo nguu a Chedaol Reng. Me sel de nguu a Chedaol Reng el mo omekrael er [kid] (Doctrine and Covenants 45:57), e kid a mo sebeched el melai a ocholt el mera derta er kid.
Alsekum eng ngarngii a merrob er kid lomok ra chesmerel a omekrael el ngara babeluades, eng locha kired el mo ouchel a rengud. A ouchelreng a meskid a techall el mo mekengii a chesimer me bol sebeched el rongesii a ngerel a Rubak el di blechoel e bleketakl.
“A kerbai a bleketakl,” ng ulsisechakl a Elder David A. Bednar er a Chelechad er a Teruich me a terung el Apostol. “Alsekum me a domdasu, domes, dorrenges, ma lechub a doruul a choridid er a Chedaol Reng, eng kired el mo torob a ikal domdasu, domes, dorrenges, malechub a doruul el tekoi. Alsekum eng kirel mengelaod, tia di okesiu, e choridid er a Chedaol Reng, e tial teletelel ra ongelaod a diak el kired el meruul er ngii. E le a uchul a Chedaol Reng a diak el sebechel kiei lobengkel a delebois, mekikiongel, malechub a terrekakl ra bedenged.”4
Sel dodak a melisiich el mo mechellings e olengesenges lobengkel a olsengerenger, blakerreng losiik, omesubel chedaol llechukl me a tekingir a rengar el reprofet, me a urerel a templo ma reksi er a telungalek, e a babeluades a mo obok. E a Rubak , a de nguu er ngii, a mo otaut a yaksok er ngii el kmo: Ak mo meskemiu a Reng er ngak, el ngii a mo omekllomes a uldesuiu. (Doctrine and Covenants 11:13)
Ke de locha kired el mo klou a rengud, eng di a Dios a mo mengedecheduch er kid lokiu sel soal rael me a temel.
Reng er a Klemedengei
A Job a millekoi, “A chad a ngarngii a reng el lobang: me a ulekrael el ngara Olab a Klisiich a mesterir a klemedengei” (Job 32:8) Chelechal beches el rak, e ak olengit er kemiu el mo omes a teletael el mo orrenges er a Rubak el di blechoel me bol sebechem el ngmai a omekllomes el Ngii a soal lomeskau.
Uchei er a omerolel a Elder Hales el sel sils er a October 2017, e ngii a kildmeklii a kedeb el tekingel el mor sel klou el ongdibel el ngii a dimlak el sebechel el mo dulii. Chelsel tial cheldechedechal, eng milluches, “A klaumera er kid a kudmeklid el mo obengelii a Rubak.”5
Se dolai a ocholt, e a taem a dechoit el chelbangel er a Dios el Ngii a olecholt el merkid a uldesuel, soal, me a ngerel el merkid. (mesa Doctrine and Covenants 68:4). Mei e denguu a klaumera er kid el mo ouedikel, el omekedong er Ngii, a kiei el klikiid el kirel a yaksok er Ngii er a ulekrael, e meruul a ikaikid el ulekrael e de ngai.
© 2020 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Bek el Buil Liahona Message, Kot el buil 2021. Palauan. 17463 881