“Keirda nan Kaweid en Kaudial” Liahona, Senweri 2021
Padahk en Sounpwong kan enLiahona, Senweri 2021
Keirda nan Kaweid en Kaudiahl
I kangoange kumwail en wia dahme konehng pwehn kalap rong mwahu Kauno pwe kumwail en kak ale kamarain me E ketin kupwurki ketkihong kumwail.
Kilel kan me sang Getty Images
Ni Septempe 30, 2017, mwurin tiepenehn kapokon lap en mwurin sawas en rahno, I uhdi ni imwen winio pwehn tehk kempoakepahi emen tohn pwihno Elder Robert D. Hales. Ohlo kapidolongehr nan imwen wini mwurin ah alehdi soumwahu en mohngiong doar ehu rahn kei mwowe.
Aht tuhpenehu mwahu pwe e mwomwen wie kekehlailda. Ohlo pil kak wie esiesingengki pein ih, met wia ehu sain mwahu.
Ahpw ni soutiko, Ngehno sairki ahi mohngiong oh ahi madmadau me I anahne pwurala ni imwen wini Rahn Sarawi. Ansou me tiepenehn kapokon lap en ni menseng en Rahn Sarawi wiewiawi, anahno pwurehng sair ie kehlail. I kehn me I sohte konehng mwengehn souwas pwehn mwadang lella rehn Elder Hales ansou me tiepenehu nek oh ihme I wia.
Ansou me I lella, I kak kilang me en Elder Hales ah soumwahuo doaralahr. Paisuwed, pwe ohlo mweselda minit 10 mwurin ahi lella reh, ahpw I kalahnganki ei kak iang en ohlo pwoud, Mary, oh neira pwutak riemen kamwurala ohlo ni ah mwesel sang mour wet.
I kaping kalahnganki loiloitikitik kan en Ngehn Sarawi ah kamwakidie ien wia mehkot me I kakete sohte wia. Oh I kaping kalahnganki duwen me mehlel kan en kaudiahl me nanleng kan pwurehng ritidahr.
Nan pahr wet atail kasukuhl ong emenemen oh wasahn kasukuhl kan pahn doke Doctrine and Covenants. “Kaudiahl sarawi kan oh padahk kamarain” pwukat kak kapaiada koaros me kasukuhlki oh idawehn arail kaweid kan. Ire pwukat luke “aramas koaros nan wasa koaros en rong kepitien Kauno Sises Krais,”1 pwe ni mehlel “kepitien Kauno kin kipe aramas koaros” (Doctrine and Covenants 1:2).
Keper, Rotorot, Widing
Kahpwal kan en paliwar oh palingehn wia kisehn mour en pohn sampah, ihme soumwahu doar COVID-19 katamanehng kitailehr. Ong ni ansou kan mwohnte Sapwellime Ketdo Keriauo, Sounkomouro kohpadahr ansoun kahpwal laud. E mahsani, “Lehk laud pahn mie, oh kahpwal kan, oh rerrer en sahpw, nan wasa kei” (Joseph Smith—Matthew 1:29).
Me kalaudehla kahpwal pwukat iei laudlahn rotorot oh widing me kapel kitail pene. Sises mahsanihong Sapwellime wahnpoaron kan, “kahpwal pahn laudla” mwohn Sapwellime sapahldohu (Joseph Smith—Matthew 1:30).
Tepelo kihpenehr nah sounpei kan oh eri kaukawe doadoahk en Kauno oh kitail kan me wiewia doadoahko. Pwehki lalaudlahn keper me kitail wie sohsohpai, atail anahne kaweid sarawi wie lalaudla, oh atail anahne rong kepitien Sises Krais—atail Sounkaweid, Sounkomour, oh Soundoar—inenen kalaimwun sang mahs.
Ihme I ndahier mwurinte ahi maliplipda ong Presiden en Mwomwohdisoht, Kauno ketin onopadahr en kasalehiong kitail Kupwure. Met wia ehu Sapwellime kapai keieu laud ong kitail.2
Nan atail mwehi, E ketin inoukidahr, “Ma kumwail peki, kumwail pahn ale kaudiahl pohn kaudiahl, marain pohn marain” (Doctrine and Covenants 42:61).
I ese me E pahn ketin sapeng atail pekipek kan.
Mwomwen Atail kin Rong Ih
Rahn wet e inenen kesempwal kitail en ese mwomwen en Ngehno mahsen. Pwehn ale pein amwail kaudiahl, pwehn diar pasepeng kan, oh pwehn ale perehre oh kaweid, kitail tamataman mwohmw me Soukohp Joseph Smith kasalehiongehr kitail.
Keieu, kitail wadek iren pwuhk sarawi kan ansou koaros. Met kin langahda atail madmadau kan oh mohngiong kan ohng padahk oh me mehlel kan en Sounkomouro. Mahsen kan en Krais kin “mahsanihong [kitail] mehkoaros me [kitail] anahne wia” (2 Nephi 32:3), ahpw mehlel nan rahn pwukat me direkihla sawehwe oh kahpwal.
Mwuri kitail kapakap. Kitail anahne inengieng wie kapakap, eri karakarahkdi mwohn Koht, rapahkihda ehu wasa me kitail kak ansou koaros kohla ie oh kasalehiong Koht audepen atail mohngiong kan.
Kauno mahsani, “Kumwail kohdo rehi oh I ahpw pahn keieng mpomwail; ngoangki rapahkinie oh kumwail ahpw pahn diarie; peki oh kumwail ahpw pahn ale; letelet, oh e pahn ritidahng kumwail” (Doctrine and Covenants 88:63).
Karaniala Koht kin wahdo kansenamwahu, kakehlail, koapwoaroapwoar oh komour. Kitail eri kapakap ni Mwarehki atail iren kapwunod kan oh atail luwet kan, atail anahn kan oh kempoakpatail kan, atail malipilip kan oh atail peidek kan.
Kitail eri rong.
Ma kitail kin wie kelkelehpwiki ansou kis mwurin atail kapakap, lamalam kan, pepehm kan, oh kaweid pahn pwarada nan atail madmadau. Ntingiedi mepwukat pahn sewesei kitail tamataman dahme Kauno ketin kupwurki kitail en wia.
Ni atail kin kapwkapwurehiong mwekid wet, kitail pahn keirda, nin duwen mahsen kan en Soukohp Joseph Smith, “keirda nan kaweid en kaudiahl.”3
Warehng Ale Kaudiahl
Kitail anahne warehng pwehn kadaiala atail kak en kasawiada loiloi tikitik kan en Ngehn Sarawi oh kalaudehla atail kak en ale kaudiahl. Warehng sohte anahne kitail en mwakelekel unsek, ahpw e anahne kitail en poaden nannantihong kitail en mwakelekel.
Kauno ketin kasik kitail en doadoahk, keirda oh koluhla rahn koaros. Warehng kin wahdo mwakelekel, oh mwakelekel kin kasapwil kitailda rehn Ngehn Sarawi. Ni atail ale “Ngehn Sarawi pwehn kahluwai [kitail]” (Doctrine and Covenants 45:57), kitail warehng ale pein atail kaudiahl.
Ma mie mehkot me kin kolkitaildi sang kaweid en nanleng, kitail anahne koluhla. Koluhla kin elehiong kitail en ritingada wenihmwo pwe kitail en kak rong mwahu kepitien Kauno ansou koaros.
Elder David A. Bednar en Pwihn en Wahnparon Ehk Riemenko padahkihong kitailehr me “Wiepehu me sansal.” “Ma mie mehkot kitail kin medewe, kilang, rong, de wia me kin kadohwan kitail sang Ngehn Sarawi, a kitail anahne uhdi sang medmedewe, kilekilang, rongorong de wiewia mehkot o. Karasepe, ma dipwisoun kemweit ehu kin kadohwan kitail sang Ngehn Sarawi, eri mehlel kitail anahne kesehla dipwisoun kemweito. Pwehki Ngehno sohte kin kak patehng mehkot me suwed, samin de mwomwsuwed, eri mehlel mepwuko sohte mwahu ong kitail.”4
Ni atail kin kapatapene mwakelekel oh peik ong kaisihsol, pwerisekieng rapahki, onopiki iren pwuhk sarawi kan oh mahsen kan en soukohp kan, oh doadoahk en tehnpas sarawi oh poadoapoad en peneinei, nanleng kan pahn ritida. Kauno pahn uhd kapwaiada Sapwellime inouo: “I pahn ketkihong kumwail Ngenio, me pahn kamaraini kumwail” (Doctrine and Covenants 11:13).
Kitail pahn anahne kanengamah, pwe Koht pahn ketin mahsendohng kitail nin duwen Kupwure oh Sapwellime ansou.
Ngehn Kupwurokong ehu
Job kosoia, “Ahpw iet pwe ngenen Koht Wasa Lapalahpie me kin ketikidohng aramas kupwurokong” (Job 32:8). Nan pahr kapw wet, I kangoangei kumwail en wia dahme konehng pwehn rong mwahu Kauno oh ansou koaros pwe kumwail en kak ale kupwurokong me E ketin kupwuriki ketikihong kumwail.
Mwohn en Elder Hales ah mweselda nan sounpwong en Oaktohpe 2017, ohlo kaunopadahr ehu padahk ong kapokon lap me e sohla kak kihda. Nan kapahreko, ohlo ntingiedi, “Atail pwoson kin kaunop kitailda pwehn pato nan sihlangin Kauno.”5
Ni atail kin ale kaudiahl, kitail kin pato nan sihlangin Koht ni E kin ketin kasalehda Tapwi, Kupwure oh kepitie ong kitail (tehk Doctrine and Covenants 68:4). Kitail doadoahngki atail pwoson, likweriong Ih, momourki mour me warehng ale Sapwellime inou en kamarain, oh mwekmwekidki kaweid me kitail kin ale.
© 2020 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Inglis: 6/19. Kamanaman ong kawehwe: 6/19. Kawehwe pen Padahk en Sounpwong kan en Liahona, Senweri 2021, Lokaia. 17463 885