“Ho Hola Motheong oa Tśenolo,” Liahona, Pherekhong 2021
Molaetsa oa khoeli Liahona Pherekhong 2021
Ho Hola Motheong oa Tśenolo
Ke le khothalletsa ho nka mehato e hlokahalang ho utloa Morena ka mokhoa o ntlafetseng le hangata e le hore u tle u fumane leseli leo a batlang ho u neha lona.
Pontśo ea litśoantśo ka Getty.
Ka la 30, Loetse 2017, kamora nako ea Seboka se Akaretsang, ke ile ka fapohela sepetlele ho hloela e mong oa litho tsa lekhotla Moholo oa kereke Robert D. Hales. O ne a kene sepetlele ka mora ho hlaseloa ke lefu la pelo matsatsing a fetileng.
Re bile le nako e monate haholo ebile o ne a bonahala a hlaphohetsoe. O ne a bile a hema ka bo eena, eleng sesupo se setle.
Phirimaneng eo, Moea o ile oa bua pelong eaka le maikutlong hore ke khutlele sepetlele ka Sontaha. Ka Sontaha ka nako ea Seboka se Akaretsang, maikutlo ane a ile a khutla ka matla. Ka utloa hore ke tlameha ho tlohela lijo tsa motśeare ke potlakele ho Moholo oa kereke Hales hang ha nako ea Seboka Se Akaretsang sa hoseng e fela, ʹme ka fela ka etsa joalo.
Ha ke fihla, ke ile ka lemoha hore boemo ba Moholo oa kereke Hales bo mpefetse. Ka bomalimabe, o ile a hlokahala metsotso e leshome kamorao hore ke fihle, empa ke leboha hore ke ne ke le pela hae le mofumahali oa hae Mary, le bara ba bona ba babeli ha a falla bophelong bona.
Ke motlotlo ka linyenyeletso tsa Moea o Halalelang tse ileng tsa ntśusumetsa ho etsa seo nka beng ke sa se etsa ka mokhoa o mong. Ke motlotlo ka linnete tsa tśenolo le hore maholimo a bulehile hape.
Selemong sena re tlo tsepamisa maikutlo boithutong ba Melao ea Thuto le Lilekane ka bo-mong le ka sehlopheng. “Litśenolelo tsena tse matlafetseng le liphatlalatso tse khothatsang” li ka hlohonolofatsa bohle ba ithutang tsona ebile ba etsa ka moo ba laeloang. Ba mema “batho bohle hohle moo ba leng teng ho utloa lentsoe la Morena Jesu Kreste,”1 hoba kannete “lentsoe la Morena ke la batho bohle” (Melao ea Thutlo le Lilekane 1:2).
Kotsi, Lefifi, Thetso
Lifefo tsa nama le tsa moea ke karolo ea bophelo lefatśeng, joalokaha COVID-19 e re hopolitse. Pele ho ho khutla hoa Hae Hoa Bobeli, Mopholosi o ile a bolela ka matsatsi a matśoenyeho a maholo. O ile a re, “Ho tla ba teng tlala, mafu a seoa, ho reketla ha lefatśe, libakeng tse fapaneng” (Joseph Smith—Matheu 1:29).
Ho kopanya matśoenyeho a joalo ke ho eketsa lefifi le thetso tse re potileng. Joalokaha Jesu a ile a bolella barutuoa ba hae,“Bobe botla tota” pele ho ho khutla ha hae hoa bobeli (Joseph Smith—Matheu 1:30).
Satane o bokelletse mabotho a hae ´me bohale ba hae bo khahlanong le mosebetsi oa Morena le rona ba keneng ka hara ona. Ka lebaka la likotsi tse eketsehang tseo re tobanang le tsona, ho hloka tataiso e halaleng ho eketsehile haholo, le boiteko ba rona ba ho utloa lentsoe la Jesu Kreste— Mokena-lipakeng oa rona, Mopholosi le Molopolli— ha li so hlokahale ka matla ka tsela ena.
Joalokaha ke boletse kamorao hore ke bitsoe ke le Moetapele oa Kereke, Morena o itukiselitse ho hlahisa mehopolo ea hae ho rona. Ke a mang a mahlohonolo a fetisisang a hae ho rona.2
Nakong ena, O tśepisitse, “Ha le kopa, letla fuoa tśenolo holima tśenolo, tsebo holima tsebo” (Melao ea Thuto le Lilekane 42:61).
Kea tseba o tla araba likopo tsa rona.
Ka Moo Re Mo Utloang
Ho tseba ka moo Moea o buang ke taba ea bohlokoa kajeno. Ho fumana tśenolo ka bo-mong, ho fumana likarabo, le ho amohela tśireletso le tataiso, re hopola mohlala oo Moprofeta Joseph Smith a re sietseng ona.
Taba ea pele,re bala mangolo a halalelang ka botebo. Ho etsa joalo ho bula likelello le lipelo tsa rona ho lithuto le linnete tsa Morena. Mantsoe a Kreste “a re bolella lintho tsohle tseo re lokelang ke ho li etsa” (2 Nefi 32:3), haholo ka nako ena ea ho hloka botsitso le meferefere.
Ntho e latelang ke ho rapela. Thapelo e hloka boikitlaetso, kahona, re ikokobetsa kapele ho Molimo, re fumane sebaka se khutsitseng moo re ka eang hangata, re bule lipelo tsa rona ho Eena.
Morena o re,“Atamelang ho ʹna le ʹna ke tla atamela ho lona; mpatleng ka mafolofolo ʹme le tla mphumana; kopang le tla fuoa, kokotang le tla buleloa” (Melao ea Thuto le Lilekane 88:63).
Ho atamela ho Morena ho tlisa boiketlo le khothatso, tśepo le pholiso. Re rapela ka lebitso la Hae ka matśoenyeho a rona le mefokolo ea rona, litakatso tsa rona le tsa baratuoa ba rona, lipitso le lipotso tsa rona.
Ebe rea mamela.
Ha re ka lula mangoleng a rona metsotsoana kamora ho rapela, mehopolo, maikutlo, le tataiso li tla tla menahanong ea rona. Ho ngola maikutlo ao ho tla re thusa ho hopola tseo Morena a batlang re li etse.
Ha re pheta ketsahalo ena, hoea ka mantsoe a Moprofeta Joseph Smith, re tla “hola motheong oa Tśenolo.”3
Tśoanelo ea ho Amohela Tśenolo
Ho ntlafatsa bokhoni ba rona ba ho lemoha tśusumetso ea Moea o Halalelang le ho eketsa bokhoni ba rona ba ho amohela tśenolo ho hloka boitukiso. Boitukiso ha bo hloke phethahalo, empa bo hloka hore re leke ho eketsa bohloeki.
Morena o hloka boiteko ba letsatsi le letsatsi, ntlafalo ea letsatsi le letsatsi le ho baka ha letsati le letsatsi. Boitukiso bo tlisa bohloeki, mme bohloeki bo etsa hore re lokeloe ke Moea o Halalelang. Ha re nka “Moea o Halalelang joaloka motataisi oa rona” (Melao ea Thuto le Lilekane 45:57), re lokeloa ke tśenolo ea botho ka bo-mong.
Haeba hona le ho hong ho re sitisang ho bula monyako hoea leholimong, re tla tlameha ho baka. Ho baka ho re lumella ho bula lemati hore re ka utloa lentsoe la Morena hangata le ka mokhoa o hlakileng.
“Tekanyetso e hlakile,” ho rutile Moholo oa kereke David A. Bednar oa Lekhotla la Ba-Apostola Ba Leshome le Metso e ʹmeli. “Haeba se seng seo re se nahanang , re se bonang, re se utloang, kapa seo re se etsang se re isa hole le Moea o Halalelang, re tlameha ho emisa ho nahana, ho bona, ho utloa kapa ho etsa seo. Haeba seo se reretsoeng ho thabisa, mohlala, se re khannela hole le Moea o Halalelang, ho hlakile hore mofuta oo oa boithabiso hase oa rona. Hobane Moea o ke ke oa lula ka hara litśila, moo ho senang hlompho, ho hlakile hore lintho tse joalo hase tsa rona.”4
Ha re kopanya ho hloeka ho eketsehileng le kutlo le ho itima lijo, le ho batla ka mafolofolo, ho ithuta mangolo a halalelang le mantsoe a baprofeta ba phelang, le mosebetsi oa tempele le oa malapa, maholimo a tla buleha. Morena ka morao ho moo, o tla phethisa tśepiso ea hae: “Ke tla tśollela Moea oaka ho lona, ona o tla khantśa likelello tsa lona” (Melao ea Thuto le Lilekane 11:13).
Re ka ʹna ra lokela ho ba le mamello, empa Molimo o tla bua le rona ka tsela ea hae le ka nako ea hae.
Moea oa Kutloisiso
Jobo o phatlalalitse a re, “Hona le Moea ka hare ho motho: le pululelo ea ea Matla Ohle e ba neang kutloisiso” (Jobo 32:8). Selemong sena se secha, ke le khothalletsa ho nka mehato e hlokahalang ho utloa Morena ka mokhoa o ntlafetseng le hangata e le hore le tle le fumane leseli leo a batlang ho le neha lona.
Pele Moholo oa kereke Hales a hlokahala ka Mphalane eo ea 2017, o ile a hlophisa puo e khutśoanyane ea Seboka Se Akaretsang eo a sakang a atleha ho e fana. Puong eo ea hae, o ne a ngotse,“Tumelo ea rona e re lokisetsa hoba ka hare ho boteng ba Molimo.”5
Ha re amohela tśenolo, re qeta nako ka hare ho boteng ba Molimo ha antse a hlahisa se mohopolong oa hae, thato ea hae le lentsoe la hae ho rona (sheba Melao ea Thuto le Lilekane 68:4). Ha re ke re beheng tumelo ea rona tśebetsong, re ntse re mo rapela, re phela ka tsela eo re tla lokeloa ke pululelo eo a re tśepisitseng eona le ho latela tataiso eo re e fumanang.
© 2020 by Intellectual Reserve, Inc. All rights reserved. Printed in USA. Tumello ea Sekhooa: 6/19. Tumello ea phetolelo: 6/19. Phetolelo ea Monthly Liahona Message, January 2021. Sotho. 17463 739