“Mgelnog ko Kenginn e Yi’iy,” Liahona, January 2021
Milwol Ngan Thapeg ko Pul ko Liahona January 2021
Mgelnog ko Kenginn e Yi’iy
Gube ning chilyen ngom ningam rrin’ e pi’nen ni t’uf ningam rung’ag Somoel ni gubin yal’ ninge yoeg ningam thapeg e thogthog Irba’adag ninge pii’ ngom.
Sasing ni yib ko rok Getty Images
U September 30, 2017, tomuren fare mo’olung ko general conference u blayal’, Kug taw nga hospital ningu guy reb e chongin nib t’uf ko ulung rog Elder Robert D. Hales. Ke yaen nga hospital nap’an keb e heart attack ngak boech e rran u faram.
Kug sabathingow nib fel’, ma ke fel’ rogon. Ke thoy nib fel’ rogon, nib fel’ e pow.
Fa binem e neap’, machane, fare Ya’el ke non nga gum’racha’ag ma tafnay rog ni thingar Ningu sul nga hospital nem nap’an e Madnom. Nap’an fare mo’olung ko Sabado’ u kadbul’ ko general mo’olung, ke sulweg fare thamtham nem. Kug thamiy thingar ningu ta’leg abich rog mug waen nga to’oben Elder Hales nap’an ke mu’ fare mo’olung ko kadbul nem, mug rrin’.
Nap’an Kug taw, Kug guy ni Elder Hales ke m’ar nib almarin. Nib kirebaen’, ke yim’ 10 minute tomuren Kug taw, machane gube pinning e magaer Kug paered u to’oben ko le’engin, Mary, nge la’agrow e fak nib mo’on roraed nap’an ke chuweg ko yafas ney.
Kug faflaen’ ko fapi kathakath ko Kan ni Thothup ke pii’ e ngongoliy ngog ni dad gu rrin’ed ni yigo’ Gag. Gub falfalen’ ngay ko fare tawa’ath nifen e kalngan’ nge fare gelngin fare Bayul rok fare Tathapeg.
Biney e duw e kad puluwgaed ko fil ni fandaed ma class rodad ko fare Doctrine nge Convenants. Fapi “yi’iy nu tharmiy ma milwol ko tharmiy” rayog e taw’ath ngak urngin e gidii’ ra biy’eg ma fol e fanow nu tharmiy riy’. Yaed ba pinning “urngin e gidii’ u gubin nam ningar runga’ged laem rok en Somoel Yesus Kristus,”1 bachan nib riyul’ “laem rok Somoel ba yaen ngak urngin e gidii’” (Doctrine and Covenants 1:2).
Rifya’, Lumor, Baen
Yoko’ ko dowef nge ya’el ba un e yafas u fayleng, woed rogon COVID-19 mar ke fil ngodad. Nap’an e ningyal’ ou’moon bin La’aruw e Wub Rok, en Tathapeg ke yoeg ni bay yib boech e rran ko kirebaen’. Ke yoeg, “Bay e deru’, marm dira’, u gubin e nam” (Joseph Smith—Matthew 1:29).
Nibe un e tin kireb nem i’ir e lumor nge baen ufithikdaed. Woed Jesus ke yoeg ngak e gachalpen Rok, “Denen ran gaa’nag” ou’moon e sulweg Rok (Joseph Smith—Matthew 1:30).
Satan be yarmiy e salthaw rok ni yaedba chamgaed ngak muruwel Somoel ma gadad gubin nibe muruwel rok. Aram fan pi magothgoth nibe yib ngodaed, nib t’uf ningad thapeged ayuw ko tharmiy ko reb e ningyal’, ma rayog rodade ningad motoyilgaed ngak e lam Yesus Kristus—e Taayuw, Tathapeg, Tabayul rodad—nib gaa’ fan.
Woed kug gog tomuren kan pinningeg Ningu mang President ko Galasia, En Somoel ba’adag ninge dag e tafnay Eok ngodad. I’ir e bin thabi gaa’ taw’ath Rok ninge pii’ ngodad.2
U tiney erran rodad, Ke micheg, “Fa’an mu fith ngay, rayoeg e yi’iy ko yi’iy, lowaen’ ko lowaen’ ngom”(Doctrine and Covenants 42:61).
Gu manang ni ra motoyil ko wenig ko gidii’ Rok.
Ni’ir uragon be rungaged Ir!
Nang fan urrogon e Ya’el ba non nib t’uf daba’. Ningad thapeged e yi’iy rodad, ningad piry’eg e fulweg, ngad thapeged e matangiy nge fanow, ngad pugurrangaed e yalen ni ke tay fare Profet Joseph Smith ni fan dad.
Bin somm’on, ngad bi’eged pi scripture. Ninge yoeg ningad bing e tafnay ma gum’racha’daed ko welthin nge tin riyul’ rok Tathapeg. Pi thin ko Kristus “ba fil [ngodad] urngin e ban’en thingar [ningad] rrin’ed (2 Nephi 32:3), arragon nap’an tiney erran ko kirebaen’ nge tin kireb.
Bin magid ngad meybilgaed. Meybil ba t’uf ningad tabab, aram fan ngad sobutaen’gaed ngak Got, ngad piry’eged e tafen nib gapas ngad dared ngak, ngad upnguy e gum’racha’daed Ngak.
Ba aray e pi thin rok: “I yog ni susun ni ngad chuchgur gad Ngak me Ir era chuchgur ngodad; susun ni ngan gay e fithik e athamgil ma gadad ra pirieg Ngak, susn ni ngad fithed maran fulweg tabon ngodad, ma susun ni ngad tugtuguyed maran bing ngodad.” (Doctrine and Covenants 88:63).
Ngad chuchugur gaed ngak Somoel nibe yoeg e gapas nga ayuw, athap nge gol. Ere, ngad meybilgaed ufithik Fithingan ko tam’ra tin mo’owaer rodad, e marnog nge gidii’ nib t’uf ngodaed, e calling nge duwer rodad.
Ma arama gadaed bi’eg ni:
Fa’an ngad paer nga but tomuren e meybil rodad, laem, thamtham, nge fanow ra yib nga tafnay rodad. Mu yoloey e thamtham ra ayuwegdaed ningad pugurran e ngongol en Somoel ba’adag ningad rrin’ed.
Napan ni garam rrin’ e biney u lan reb e rran nge yan ngalan reb e rran, reb e pul nge reb e pul, reb e duw nge reb e duw, ma garam ‘ilal u fithik yalen e yi’iy.’”3
Mat’aw Ningan Thapeg e Yi’iy
Ngad gaa’nag e rayog rodad ningad nang fan e kathkath ko fare Kan Thothup nge gaa’nag e rayog rodad ningad thapeged e yi’iy nibe t’uf e mat’aw. Mat’aw dani t’uf e machaelboeg, machane irba t’uf e rayog rodad ningad gay rogon e machaelboeg.
En Somoel ba’dag ningad gay rogon urngin e rran, udakaen ngongol, ma kalngaen’ urngin e rran. Mat’aw ra yoeg e machaelboeg, ma machalboeg ra pii’ mat’awondaed ko fare Kan Thothup. Nap’an ngad pinninged “fare Kan Thothup ninge powiy’[nogdaed]” (Doctrine and Covenants 45:57), ningad mat’awgaed ko yi’iy.
Fa’an e ban’en ba ta’legdaed ningad binged e maab ko tharmiy, thingar ningad kalgaedngaen’daed. Kalngaen’ ra bing e maab ngodad ningad motoyilgaed ko laem Somoel nib fel’ rogon.
“Fare Motochiyel nib machaelboeg,” ke fil Elder David A. Bednar ko fare Ulung ko fare Ragag nge L’agruwi Apostle. “Fa’an e ban’en ningad tafnaynog, guy, rung’ag, fa pii’dad nib palog ko fare Kan Thothup, ningeyoeg ningad ta’leged e tafnay, guy, motoyil, fa rrin’ fare’nem. Fa’an e ban’en ra entertainnogdaed, ko sasun, ra chuwegdaed ko fare Kan Thothup, aram fan ni dariy’ e entertainment rodad. Bachan e Ya’el dabiyoeg ninge paer ko tin tagan’, alit, fa kireb, aram fan fa pinn’ey ni dariy’ fan ngodad.”4
Nap’an ngad uned e machaelboeg nge mafol ko balaynag abich, gay, biy’eg e babyor nib thothup ma thin ko profet nib fas, nge temple nge tabinaew chepin muruwel, pi tharmiy ra bing. En Somoel u ningyal’ rok, ra fulweg e micheg rok ni: “Gu pi’ ngom ko fare Kan Thothup rog, ni ra tamilang nag tafney rom, ni ba sug e ya’el rom ko falfalaen’” (Doctrine and Covenants 11:13).
Ma bay boech ban’en ni ran soen nag u fithik e gumaen’, u fithik e mich, nang ni en Somoel e ba muruwel u ngiyal’ Rok nge rogon Rok.
E Ya’el ko Nang Fan
Job ke yoeg, “Machane kan nthothup: rok Got ni Gubin ma Rayag Rok e ma yib ngodad nge pi’ e gonop ngodad.” (Job 32:8). Nap’an e duw nib be’ech ney, Gube pinning med ningam gay rogon ningam motoyilgaed ngak Somoel ni fel rogon ninge yoeg e yi’iy ngomed ni Irba’adag ninge pii’ ngom.
Ou’moon Elder Hales ke yim nap’an fare rran u October 2017 nem, ke yoloey e welthin ko general mo’olung ni dabiyoeg ninge pii’. Nap’an re welthin nem, ke yoloey, “Michaen’daed ma taermedliydaed ningad dared u to’oben Somoel.”5
Nap’an ngad thapeged e yi’iy, gadadba paer u to’oben Got ninge dag e tafnay, laniyaen’, nge laem Rok ngodaed (mu guy Doctrine and Covenants 68:4). Ninge yoeg ningad ngongoliy e mich rodad, ngad pinningaed Ngak, ngad paered nib mat’aw ko yi’iy Rok kan micheg, ngad folgaed e fanow nap’an ngad thapeged.
© 2020 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Piliyeg ko Monthly Liahona Message, January 2021. Language. 17463 000