Nyame Kãa Kyerɛɛ Hɛn dɛ Wonnuma Hɛn

Obi a ɔwɔ Nyankopɔn no tumdzi na Jesus Christ maa onumaa No dze yɛɛ fasusu.

Yennyim Jesus Christ nankasa N’abrabɔ mu ho nsɛm piinara dze, naaso yenyim dɛ wonumaa no ber a nna Oedzi bɛyɛ mfe 30 (hwɛ Luke 3:23). Ndzɛmba binom a yesũa fa enuma ho wɔ Ne fasusu mu nye yinom.

Ma Ɔdasanyi Biara

Sɛ yeenyin yie na yeenya nyansa yie a yebotum ehu papa fi bɔn ho a, Ɔsor Egya pɛ dɛ wonuma hɛn (hwɛ Nkyerɛkyerɛ na Ahyɛmudzi 18:42). Jesus nna Odzi mu, naaso Ɔsaan mu yii dɛ wobonuma No dze edzi Nyankopɔn ne mbrasɛm do (hwɛ Matthew 3:13–17; 2 Nephi 31:7). Hɔn a woewuwu no mpo wobotum agye enuma. Yɛyɛ dze ma hɔn ber a wonuma hɛn wɔ temple mu. (Hwɛ Nkyerɛkyerɛ na Ahyɛmudzi 128:15–18.)

Wɔdze Tumdzi yɛ

Nnyɛ obiara gyan na Jesus ma onumaa No. Ɔkɔr No nuabanyin John, a ɔwɔ tumdzi fi Nyankopɔn hɔ no tɔɔtsen. Jesus wui ekyir no na wokumkuum N’esuafo no, dɛm asɔfodzi tumdzi no yewee fii asaase do. Afe 1829 mu no, John Onumanyi no puee Joseph Smith do na ɔmaa no tumdzi a wɔdze numa wɔ Nyankopɔn ne dzin mu. Osian dɛm nsan-ananmu no, wobotum dze dɛm tumdzi noara enuma hɛn ndɛ.

Beenu Anohoba bi

Beenu anohoba, anaa ahyɛmudzi, a hɛn na Nyankopɔn dzi no kã enuma ho. Yɛbɔ anohoba dɛ:

Yɛbɛfa Christ Ne dzin ato hɛn do.
Yɛakaa No aber nyina.
Yɛbedzi Ne mbrasɛm do.

Nyankopɔn bɔ anohoba dɛ No Sunsum nye hɛn bɛtsena daa. Sacrament mpaabɔ mu nsɛm no kaa hɛn ahyɛmudzi yi dapɛn biara. (Hwɛ Nkyerɛkyerɛ na Ahyɛmudzi 20:77, 79.)

Eregye Sunsum Krɔnkrɔn no yɛ Enuma Afã Tsitsir

Wonumaa Jesus ekyir no, Sunsum Krɔnkrɔn no puee dɛ ebubur no su mu (hwɛ 2 Nephi 31:8). Ndɛ, wonuma nkorɔfo wie a, wosi hɔn pi. Iyi asekyerɛ nye dɛ wɔgye nhyira soronko a no mu no, wɔto nsa frɛ hɔn dɛ, wɔngye Sunsum Krɔnkrɔn akyɛdze a ɔyɛ sunsum mu ntsewho no (hwɛ 2 Nephi 31:17). Sunsum Krɔnkrɔn no botum abɔ hɛn kɔkɔ afa esian ho, ɔakyekye hɛn werɛ, ɔama hɛn adwenpɔwbɔ papa ho kwankyerɛ, na ɔaboa hɛn ma yɛatse Nyame no dɔ ho nkã (hwɛ Nkyerɛkyerɛ na Ahyɛmudzi 39:6).

Yebotum Enu Hɛnho Aber Nyina

Nna Nyankopɔn nyim dɛ yɛbɔfom pii. Hɛn mbɔdzembɔ ara yie nyina ekyir no, yɛbɛyɛ bɔn na yɛatɔ sin wɔ hɛn enuma ahyɛmudzi horow no ho. Ntsi Ɔma hɛn mu kor biara kwan ma ɔdze enu no ho. (Hwɛ Nkyerɛkyerɛ na Ahyɛmudzi 18:13.) Dabiara yebotum abɔ mbɔdzen ara yie apa kyɛw na yesiesie mfomdo horow biara. Yebotum abɔ mpaa na yebisa Nyankopɔn no bɔnfakyɛ. Nkyii, ber a yɛdze ahobrɛadze akoma afa sacrament no, yebotum enya Sunsum Krɔnkrɔn no wɔ hɛn nkyɛn (hwɛ 3 Nephi 18:11).

Ebɛnadze na Kyerɛwsɛm no kã fa Enuma ho?

Awofo wɔdɛ wɔboa hɔn mba ma wɔyɛ enuma ho ahosiesie (hwɛ Nkyerɛkyerɛ na Ahyɛmudzi 68:25).

Hɔn a wonndzii mfe awɔtwe no nnhia dɛ wonuma hɔn (hwɛ Moroni 8).

Sɛ wonuma hɛn a, yɛbɔ anohoba dɛ “[yɛ]nye hɔn a hɔn werɛ ahow [be]dzi hɔn yaw; … [bɛ]kyekye hɔn a wohia awerɛkyekyer no hɔn werɛ, na [ye]gyina dɛ Nyankopɔn n’adasefo aber nyina wɔ adze nyina mu, wɔ gyinabew biara mu” (Mosiah 18:9).

© 2021 by Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛasee ngye ntomu: 6/19. Monthly Liahona Message, February 2021 ne nkyerɛasee. Fante. 17464 502