Ginhambalan Kita sang Dios nga Magpabunyag

Nagpahamtang si Jesucristo sang ehemplo sang pagpabunyag sa tawo nga may awtoridad sang Dios.

Bisan wala naton mahibal-i ang madamo sa mga detalye parte sa personal nga kabuhi ni Jesucristo, nahibal-an naton nga ginbunyagan Sia sang mga 30 anyos ang Iya edad (tan-awa sa Lucas 3:23). Ari ang pila sa mga butang nga aton nahibal-an parte sa bunyag halin sa Iya ehemplo.

Para sa Tagsa ka Tawo

Kon hustuhan na ang aton edad kag hamtong na para mahibal-an ang kinalain sang husto kag sayop, gusto sang Amay nga Langitnon nga mabunyagan kita (tan-awa sa Doktrina kag mga Kasugtanan 18:42). Perpekto si Jesus, pero ginpili Niya gihapon nga magpabunyag para sundon ang mga kasuguan sang Dios (tan-awa sa Mateo 3:13–17; 2 Nefi 31:7). Bisan atong mga nagkalamatay na pwede magbaton sang bunyag. Ginatanyag naton ini sa ila paagi sa pagpabunyag para sa ila sa mga templo. (Tan-awa sa Doktrina kag mga Kasugtanan 128:15–18.)

Ginahimo nga may Awtoridad

Wala si Jesus ginbunyagan sang bisan sin-o lang. Nagkadto Sia mismo sa Iya pakaisa nga si Juan, nga may awtoridad sang priesthood halin sa Dios. Sang mapatay si Jesus kag ginpamatay ang Iya mga disipulo, ang ina nga awtoridad sang priesthood nadula halin sa duta. Dayon, sang 1829, nagpakita si Juan Bautista kay Joseph Smith kag ginhatagan sia sang awtoridad nga magbunyag sa ngalan sang Dios. Bangud sinang pagpanumbalik, sarang na kita mabunyagan sa karon nga panahon sa pareho nga awtoridad sadto.

Balosay nga Promisa

Ang bunyag nagalakip sang balosay nga promisa, ukon kasugtanan, sa tunga naton kag sang Dios. Nagapromisa kita:

Nga dalhon naton sa aton kaugalingon ang ngalan ni Cristo.
Nga dalayon Sia nga dumdumon.
Nga tumanon ang Iya mga kasuguan.

Bilang balos, nagapromisa ang Dios nga ang Iya Espiritu mangin ara sa aton pirme. Ang mga tinaga sa pang-sakramento nga mga pangamuyo nagapadumdom sa aton sining kasugtanan kada semana. (Tan-awa sa Doktrina kag mga Kasugtanan 20:77, 79.)

Ang Pagbaton sang Balaan nga Espiritu Isa ka Importante nga Bahin sang Bunyag

Pagkatapos ni Jesus nga mabunyagan, nagpakita ang Balaan nga Espiritu sa dagway sang salapati (tan-awa sa 2 Nefi 31:8). Sa karon, pagkatapos mabunyagan ang mga tawo, ginakumpirmar sila. Buot silingon sini ginabaton nila ang espesyal nga bugay kon diin ginaagda sila nga batunon ang espirituhanon nga regalo sang pagtinlo sang Balaan nga Espiritu (tan-awa sa 2 Nefi 31:17). Ang Balaan nga Espiritu sarang magpaandam sa aton sang katalagman, magpasulhay sa aton, maggiya sa aton sa paghimo sang maayo nga mga desisyon, kag magbulig sa aton nga mabatyagan ang pagpalangga sang Dios (tan-awa sa Doktrina kag mga Kasugtanan 39:6).

Makahinulsol Kita Pirme

Nahibal-an sang Dios nga magahimo kita sang mga sayop. Wala sapayan sang aton pwerte nga mga pagpaninguha, makasala kita kag kabuson sa pagtuman sang aton mga pangako sa bunyag. Gani ginhatagan Niya ang kada isa sa aton sang tsansa nga maghinulsol. (Tan-awa sa Doktrina kag mga Kasugtanan 18:13.) Kada adlaw sarang naton himuon ang aton masarangan para magpangayo sang pasensya kag tadlungon ang mga kasaypanan. Makapangamuyo kita kag makapangayo sang kapatawaran sang Dios. Dayon, kon mag-ambit kita sang sakramento nga may mapainubuson nga tagipusuon, maangkon naton ang Balaan nga Espiritu upod sa aton (tan-awa sa 3 Nefi 18:11).

babayi nga nagapangamuyo sa tupad sang hiligdaan

Ano ang Ginasiling sang Balaan nga mga Kasulatan parte sa Bunyag?

Dapat buligan sang mga ginikanan ang ila mga kabataan nga maghanda para sa bunyag (tan-awa sa Doktrina kag mga Kasugtanan 68:25).

Atong mas bata pa sa walo ka tuig ang edad indi kinahanglan nga bunyagan (tan-awa sa Moroni 8).

Kon ginabunyagan kita, nagapromisa kita nga “magpangasubo upod sadtong mga nagapangasubo; … magpaumpaw sadtong mga nagakinahanglan sang kaumpawan, kag magtindog bilang mga saksi sang Dios sa tanan nga mga tinion kag sa tanan nga mga butang, kag sa tanan nga mga duog” (Mosias 18:9).

© 2021 iya Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, February 2021. Hiligaynon. 17464 861