“Imbaga ti Dios Kadatayo nga Agpabuniag,” Liahona, Pebrero 2021
Binulan a Mensahe iti Liahona , Pebrero 2021
Imbaga ti Dios Kadatayo nga Agpabuniag
Impakita ni Jesucristo ti maysa a pagwadan ti panangbuniag babaen ti maysa a tao nga addaan iti turay ti Dios.
Idinto nga awan unay ammotayo a detalye maipapan iti personal a biag ni Jesucristo, ammotayo a nabuniagan Isuna idi agarup 30 ti tawenna (kitaen iti Lucas 3:23). Adtoy ti sumagmamano a banag a masursurotayo maipapan iti panagbuniag manipud Iti pagwadanna.
Para iti Tunggal Tao
No umdasen ti tawen ken manakmantayon tapno mangibaga iti pagdumaan ti umno ken biddut, kayat ti Nailangitan nga Ama nga agbuniagtayo (kitaen iti Doktrina ken Katulagan 18:42). Awan ti pagkurangan ni Jesus, ngem pinilina pay laeng ti agpabuniag tapno sumurot kadagiti bilin ti Dios (kitaen iti Mateo 3:13–17; 2 Nephi 31:7). Uray pay kadagiti pimmusayen mabalinda nga awaten ti panagbuniag. Idiayatayo daytoy kadakuada babaen ti panagpabuniag para kadakuada kadagiti templo. (Kitaen iti Doktrina ken Katulagan 27:15–18.)
Maaramid babaen ti Turay
Saan a basta binuniagan ti asino man ni Jesus. Napan iti kasinsinna a ni Juan, nga addaan iti turay ti priesthood manipud iti Dios. Kalpasan a pimmusay ni Jesus ken napapatay dagiti disipulona, napukaw manipud iti daga ti turay ti priesthood. Kalpasanna, idi 1829, nagparang ni Juan Bautista ken ni Joseph Smith ket intedna kenkuana ti turay a mangbuniag iti nagan ti Dios. Gapu iti dayta a pannakaisubli, mabalintayo ti mabuniagan iti kasta met la a turay iti agdama.
Maysa a Panagkinnari ti Dua
Iraman ti panagbuniag ti panagkinnari, wenno katulagan, iti nagbaetantayo ken iti Dios. Ikaritayo:
-
Nga awaten iti bagitayo ti nagan ni Jesucristo.
-
A manglaglagip a kanayon Kenkuana.
-
Nga agtungtungpal kadagiti bilinna.
Kas supapak, ikari ti Dios a kadkaduaennatayto a kanayon ti Espirituna. Dagiti balikas ti kararag ti sakramento ti mangipalagip kadatayo iti daytoy a katulagan iti tunggal lawas. (Kitaen iti Doktrina ken Katulagan 20:77, 79.)
Napateg a Paset ti Panagbuniag ti Panangawat iti Espiritu Santo
Kalpasan a nabuniagan ni Jesus, nagparang ti Espiritu Santo iti langa ti maysa a kalapati (kitaen iti 2 Nephi 31:8). Ita, kalpasan a mabuniagan dagiti tao, makumpirmaanda. Kaipapanan daytoy nga awatenda ti naisangsangayan a bendision a nakaawisanda nga umawat iti naespirituan a pangdalus a sagut ti Espiritu Santo (kitaen iti 2 Nephi 31:17). Maballaagannatayo ti Espiritu Santo maipapan iti peggad, maliwliwanatayo, maiwanwannatayo nga agaramid iti nasayaat a pangngeddeng, ken matulongannatayo a mangrikna iti ayat ti Dios (kitaen iti Doktrina ken Katulagan 39:6).
Kanayon a Makapagbabawitayo
Ammo ti Dios nga agaramidtayo kadagiti biddut. Iti baet dagiti kasayaatan a panagkagumaantayo, agbasol ken mapaaytayo a mangipatungpal kadagiti karitayo iti panagbuniag. Isu nga ikkanna ti tunggal maysa kadatayo iti gundaway nga agbabawi. (Kitaen iti Doktrina ken Katulagan 18:13.) Inaldaw a mabalintayo nga aramiden iti amin a kabaelantayo tapno dumawat iti pammakawan ken mangatur kadagiti ania man a biddut. Mabalintayo ti agkararag ken agkiddaw iti pammakawan ti Dios. Kalpasanna, no makiranudtayo iti sakramento nga addaan iti napakumbaba a puso, maaddaantayo iti Espiritu Santo a mangkadkadua kadatayo (kitaen iti 3 Nephi 18:11).
Ania ti Kuna ti Nasantuan a Kasuratan maipapan iti Panagbuniag?
Nasken a tulongan dagiti nagannak dagiti annakda nga agsagana para iti panagbuniag (kitaen iti Doktrina ken Katulagan 68:25).
Saan a nasken a mabuniagan dagiti in-inaudi ngem walo ti tawenna (kitaen iti Moroni 8).
No mabuniagantayo, ikaritayo a “makipagladingit kadagiti agladladingit; … manglinglingay kadagiti makasapul iti pannakalinglingay, ken agtakder a saksi ti Dios iti amin a kanito, iti amin a banag, ken iti amin a lugar” (Mosiah 18:9).
© 2021 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, February 2021. Ilokano. 17464 864